Read S'gaw Karen ရိမ့ၤ 1 Bible Online

ရိမ့ၤ 1 - S'gaw Karen bible

ရိမ့ၤ 1

¹လၢစီၤပီလူး, ယ့ၣ်ၡူးခရံာ်အခ့အပှၤဒီးတၢ်မၢဖိတဂၤ လၢအဘၣ်တၢ်ဃုထၢဒီးကိးထီၣ်အီၤလၢကစၢ်ယွၤဒ်သိး ကစံၣ်တဲၤတဲလီၤတၢ်သးခုကစီၣ်အဂီၢ်အအိၣ်န့ၣ်လီၤ.

²တၢ်သးခုအကစီၣ်အံၤဘၣ်တၢ်စံးပာ်တ့ၢ်အီၤလၢကစၢ်ယွၤခီ ဖျိအဝံတဖၣ်ယံာ်မးလံ, ဒ်အဘၣ်တၢ်ကွဲးဃာ်အီၤလၢလံာ်စီဆှံ အပူၤအသိးန့ၣ်လီၤ.

³တၢ်ကွဲးအံၤဘၣ်ဃးဒီးအဖိခွါပကစၢ်ယ့ၣ်ၡူးခရံာ်, လၢသွံၣ်ထံဖံးညၣ်န့ၣ်အိၣ်ဖျဲၣ်ထီၣ်ဝဲဒ်စီၤဒၤဝံးအစၢၤ အသွဲၣ်တဂၤအသိးန့ၣ်လီၤ.

⁴မ့မ့ၢ်ယွၤအတၢ်စီတၢ်ဆှံလၢအအိၣ်လၢအပူၤန့ၣ်, ပာ်ဖျါထီၣ်အီၤဒ်အမ့ၢ်ကစၢ်ယွၤအဖိခွါအိၣ်ဒီးတၢ်စိတၢ် ကမီၤဖးဒိၣ်, ခီဖျိတၢ်ဒုးဂဲၤဆၢထၢၣ်က့ၤအီၤလၢတၢ်သံ အပူၤန့ၣ်လီၤ.

⁵ခီဖျိအီၤန့ၣ်, ကစၢ်ယွၤဟ့ၣ်ယၤတၢ်ဘျုးတၢ်ဖှိၣ်ဒီးတၢ် ခွဲးတၢ်ယာ်လၢယကကဲထီၣ်ဘၣ်တၢ်မၢဖိတဂၤလၢခရံာ် အဂီၢ်, ဒ်သိးယကဆှၢက့ၤပှၤကလုာ်တဖၣ်ခဲလၢာ်ဆူ တၢ်စူၢ်က့ၤနာ်က့ၤအီၤအဂီၢ်န့ၣ်လီၤ.

⁶တၢ်အံၤပၣ်ဃုာ်ဒီးသုဝဲလၢအအိၣ်လၢဝ့ၢ်ရိမ့ၤအပူၤ တဖၣ်, လၢကစၢ်ယွၤကိးထီၣ်တ့ၢ်အီၤဒ်သိးအကဘၣ် ဃးက့ၤဒီးယ့ၣ်ၡူးခရံာ်အဂီၢ်န့ၣ်လီၤ.

⁷လၢတၢ်န့ၣ်အဃိယကွဲးတၢ်ဆူသုဝဲခဲလၢာ်လၢအအိၣ် လၢဝ့ၢ်ရိမ့ၤအပူၤ, ပှၤလၢကစၢ်ယွၤအဲၣ်ဘၣ်အီၤဒီးကိးထီၣ်အီၤလၢ အကမ့ၢ်အပှၤဂီၢ်မုၢ်ဒၣ်ဝဲတဖၣ်အဂီၢ်အအိၣ်န့ၣ်လီၤ. ပပၢ်ကစၢ်ယွၤပပၢ်ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုး တၢ်ဖှိၣ်ဒီးတၢ်ဃူတၢ်ဖိးတက့ၢ်.

⁸အဆိကတၢၢ်န့ၣ်, ယစံးဘျုးယကစၢ်ယွၤခီဖျိယ့ၣ်ၡူးခရံာ်လၢ သုဝဲခဲလၢာ်အဃိ, မ့ၢ်လၢသုတၢ်စူၢ်တၢ်နာ်အဂ့ၢ်ဟူထီၣ်သါလီၤလၢဟီၣ်ခိၣ်ဒီဘ့ၣ် အဃိန့ၣ်လီၤ.

⁹အဂ့ၢ်ဒ်အံၤ, ကစၢ်ယွၤလၢယမၤအတၢ်လၢယသးဒီဖျၢၣ်ညါ ခီဖျိတၢ်စံၣ်တဲၤတဲလီၤတၢ်သးခုကစီၣ်ဘၣ်ဃးဒီးအဖိခွါန့ၣ်, မ့ၢ်ပှၤအုၣ်အသးလၢတၢ်လၢယစံးတဖၣ်မ့ၢ်ဝဲတီဝဲန့ၣ်လီၤ. ကစၢ်ယွၤသ့ၣ်ညါလၢယသ့ၣ်နီၣ်ထီၣ်သုထီဘိလၢယတၢ် ထုကဖၣ်အပူၤန့ၣ်လီၤ.

¹⁰ယဃ့ကစၢ်ယွၤလၢမ့ၢ်ဘၣ်အသးဒီးယကလဲၤအိၣ်သကိးဘၣ် သုခဲအံၤအဂီၢ်န့ၣ်လီၤ.

¹¹အဂ့ၢ်မ့ၢ်လၢ, ယသးအိၣ်ထံၣ်ဘၣ်သုဒိၣ်မးဒ်သိးယကနီၤ ဟ့ၣ်သုလၢသးအတၢ်ဆိၣ်ဂ့ၤလၢတၢ်မၤဆူၣ်ထီၣ်သုဂံၢ် သုဘါအဂီၢ်န့ၣ်လီၤ.

¹²ဒ်ပစံးတၢ်အသိး, ပတၢ်ထံၣ်လိာ်ပသးကကဲထီၣ်တၢ်မၤစၢၤတဘျီဃီလၢသုဂီၢ်ဒီး ယဂီၢ်န့ၣ်လီၤ. ယတၢ်စူၢ်တၢ်နာ်ကမၤစၢၤသု, ဒီးသုတၢ်စူၢ်တၢ်နာ်ကမၤစၢၤယၤန့ၣ်လီၤ.

¹³ယဒီပုၢ်ဝဲၢ်သ့ၣ်ဧၢ, သုကဘၣ်သ့ၣ်နီၣ်ထီၣ်လၢအါစုအါဘျီ ယတိာ်ပာ်လၢယကလဲၤဆူသုအိၣ်, ဘၣ်ဆၣ်တၢ်မၤတံာ်တာ်ယကျဲအိၣ်ထီၣ်ဝဲထီဘိလီၤ. ယသးအိၣ်မၤန့ၢ်စ့ၢ်ကီးသးသမူတဖၣ်လၢသုကျါ, ဒ်ယမၤန့ၢ်လၢပှၤကလုာ်ဂၤတဖၣ်အကျါအသိးန့ၣ်လီၤ.

¹⁴အဂ့ၢ်ဒ်အံၤ, ယဒ့ၣ်ကမၢ်အိၣ်လၢပှၤကိးကလုာ်ဒဲး, ပှၤကြံးခ်ဖိမ့ၢ်ဂ့ၤ, ပှၤပှၢ်လၢ်ကျါမ့ၢ်ဂ့ၤ, ပှၤကူၣ်တၢ်သ့မ့ၢ်ဂ့ၤ, ပှၤကူၣ်တၢ်တသ့မ့ၢ်ဂ့ၤန့ၣ်လီၤ.

¹⁵လၢတၢ်န့ၣ်အဃိ, ယသးဆူၣ်စံၣ်တဲၤတဲလီၤတၢ်သးခုကစီၣ်လၢ သုဝဲလၢအအိၣ်လၢဝ့ၢ်ရိမ့ၤအပူၤတဖၣ်အဂီၢ်စ့ၢ်ကီးန့ၣ်လီၤ.

¹⁶အဂ့ၢ်ဒ်အံၤ, ယမဲာ်တဆှးဘၣ်လၢခရံာ်အတၢ်သးခုကစီၣ်အဃိဘၣ်. မ့ၢ်ကစၢ်ယွၤအစိကမီၤလၢကအုၣ်က့ၤခီၣ်က့ၤပှၤလၢအစူၢ်က့ၤနာ် က့ၤတၢ်ခဲလၢာ်, ပှၤယူဒၤဖိတဖၣ်လၢအဆိဒီး ပှၤကြံးခ်ဖိတဖၣ်စ့ၢ်ကီးန့ၣ်လီၤ.

¹⁷အဂ့ၢ်ဒ်အံၤ, တၢ်သးခုအကစီၣ်လီၣ်ဖျါထီၣ်ကစၢ်ယွၤအတၢ် ပာ်တီပာ်လိၤပှၤကညီဒ်လဲၣ်အဂ့ၢ်န့ၣ်လီၤ. မၤဝဲခီဖျိတၢ်စူၢ်တၢ်နာ်, စးထီၣ်လၢအခီၣ်ထံးတုၤလၢအကတၢၢ်လီၤ. ဒ်တၢ်ကွဲးအသးစီဆှံစံးဝဲ အသိး, “ပှၤလၢအဘၣ်တၢ်ပာ်တီပာ်လိၤအီၤလၢကစၢ်ယွၤခီဖျိတၢ်စူၢ် တၢ်နာ်န့ၣ်, ကမူဝဲလီၤ.”

¹⁸ကစၢ်ယွၤအတၢ်သးဒိၣ်ဘၣ်တၢ်လီၣ်ဖျါထီၣ်အီၤလၢအဟဲလၢ မူခိၣ်ထီဒါပှၤဟီၣ်ခိၣ်ဖိအတၢ်ဒဲးဘးဒီးအတၢ်အၢတၢ်သီခဲလၢာ် န့ၣ်လီၤ. ပှၤဟီၣ်ခိၣ်ဖိအကျဲအအၢအသီတဖၣ်တြီဃာ်အတၢ် သ့ၣ်ညါနၢ်ပၢၢ်တၢ်မ့ၢ်တၢ်တီန့ၣ်လီၤ.

¹⁹အဂ့ၢ်ဒ်အံၤ, မ့ၢ်လၢတၢ်လၢပှၤကညီသ့ၣ်ညါနၢ်ပၢၢ်သ့ဘၣ်ဃးဒီး ကစၢ်ယွၤန့ၣ်, အိၣ်ဖျါတြၢၢ်ကလာ်လၢအဝဲသ့ၣ်အမဲာ်ညါအဃိန့ၣ်လီၤ. အဂ့ၢ်ဒ်အံၤ, ယွၤအကစၢ်ဒၣ်ဝဲမၤဖျါအီၤတြၢၢ်ကလာ်လၢအဝဲသ့ၣ် အဂီၢ်လီၤ.

²⁰စးထီၣ်လၢကစၢ်ယွၤတ့လီၤဟီၣ်ခိၣ်လံၤလံၤန့ၣ်, အတၢ်စိကမီၤအထူအယိာ်ဒီးအတၢ်မ့ၢ်ကစၢ်ယွၤအန့ဆၢၣ်လၢ ပှၤထံၣ်အီၤတသ့ဘၣ်တဖၣ်အံၤန့ၣ်, ဘၣ်တၢ်သ့ၣ်ညါနၢ်ပၢၢ်အီၤဆှံဆှံသ့ဝဲခီဖျိတၢ်လၢကစၢ် ယွၤတ့လီၤဝဲသ့ၣ်တဖၣ်အပူၤန့ၣ်လီၤ. လၢတၢ်န့ၣ်အဃိ, အဝဲသ့ၣ်ကတိၤပူၤဖျဲးအသးတသ့ဘၣ်န့ၣ်လီၤ.

²¹အဝဲသ့ၣ် သ့ၣ်ညါကစၢ်ယွၤ, ဘၣ်ဆၣ်အဝဲသ့ၣ်တဟ့ၣ်အီၤတၢ်လၤကပီၤဒ်ကစၢ်ယွၤအသိးဘၣ်ဒီး တစံးထီၣ်ပတြၢၤအီၤစ့ၢ်ကီးဘၣ်န့ၣ်လီၤ. မ့မ့ၢ်, အတၢ်ဆိကမိၣ်တဖၣ်ကဲထီၣ်တၢ်လၢအခီပညီတအိၣ် လၢာ်လၢာ်ဆ့ဆ့ဒီးအဝဲသ့ၣ်ဆိကမိၣ်တၢ်တဘၣ်ဘၣ်ဒီး အသးန့ၣ်ခံးလီၤဝဲလီၤ.

²²အဝဲသ့ၣ်စံးလီၤအသးလၢအကူၣ်တၢ်သ့, ဘၣ်ဆၣ်အဝဲသ့ၣ်မ့ၢ်ဒၣ်ပှၤဟးဂီၤဖိတဖၣ်န့ၣ်လီၤ.

²³လၢကဘူၣ်ထီၣ်ဘါထီၣ်ကစၢ်ယွၤလၢအသံတသ့ဘၣ်အလီၢ်န့ၣ်, အဝဲသ့ၣ်ဘါထီၣ်တၢ်ဂီၤတၢ်ဖီၣ်တဖၣ်လၢအလီၤဂာ်ဒီးပှၤကညီ လၢအသံသ့, မ့တမ့ၢ်ထိၣ်ဧိၤလံာ်ဧိၤ, မ့တမ့ၢ်ဆၣ်ဖိကီၢ်ဖိ တဖၣ်, မ့တမ့ၢ်ဂုၢ်ဧိၤဒးဧိၤတဖၣ်တခီန့ၣ်လီၤ.

²⁴လၢတၢ်အံၤအဃိ, ကစၢ်ယွၤဟ့ၣ်လီၤကွံာ်အဝဲသ့ၣ်ဆူ တၢ်ဘၣ်အၢဘၣ်သီတဖၣ်လၢအဝဲသ့ၣ်သးအိၣ်မၤဝဲအအိၣ်, ဒီးတၢ်လၢအဝဲသ့ၣ်မၤလိာ်အသးတဂၤဒီးတဂၤတဖၣ်န့ၣ်, လီၤမဲာ်ဆှးမးန့ၣ်လီၤ.

²⁵အဝဲသ့ၣ်ဆီတလဲကစၢ်ယွၤအတၢ်မ့ၢ်တၢ်တီလၢတၢ်ကဘျံးကဘျၣ်, ဒီးလၢအဝဲသ့ၣ်ကဘူၣ်ထီၣ်ဘါထီၣ်တၢ်ဘၣ်တ့ကစၢ်လၢအကြၢး ဒီးတၢ်စံးထီၣ်ပတြၢၤအီၤလီၤစိၤလီၤထီတဂၤအလီၢ်န့ၣ်, အဝဲသ့ၣ်ဘူၣ်ထီၣ်ဘါထီၣ်တၢ်ဘၣ်တ့တဖၣ်ဒီးမၤအတၢ်မၤန့ၣ်လီၤ.

²⁶မ့ၢ်လၢပှၤကညီမၤတၢ်အံၤအဃိဒီး, ကစၢ်ယွၤဟ့ၣ်လီၤကွံာ်အဝဲသ့ၣ်ဆူတၢ်သူၣ်ကတၢသးကတၢလၢ အလီၤမဲာ်ဆှးတဖၣ်အပူၤန့ၣ်လီၤ. ပိာ်မုၣ်တဖၣ်ဒၣ်လဲာ်ဘိးဃၣ်ကဒါ ကွံာ်တၢ်သူပိာ်မုၣ်အက့ၢ်အဂီၤလၢကျဲအဘၣ်ဆူတၢ်သူအီၤလၢ အတမ့ၢ်ဘၣ်န့ဆၢၣ်အကျဲအကပူၤန့ၣ်လီၤ.

²⁷ဒ်န့ၣ်အသိး, ပိာ်ခွါတဖၣ်စ့ၢ်ကီးဃၣ်ကွံာ်အသးလၢတၢ်မံဃုာ် အိၣ်ဃုာ်ဒီးပိာ်မုၣ်ပိာ်မၢၤဒ်တၢ်ဘၣ်တ့အကျဲအိၣ်ဝဲအသိး, ဒီးအဝဲသ့ၣ်ကွၢ်လိာ်အသးကဒဲကဒဲအိၣ်ဒီးတၢ်သးကတၢ န့ၣ်လီၤ. တၢ်လၢပိာ်ခွါတဖၣ်မၤလိာ်အသးတဂၤဒီးတဂၤန့ၣ်, မ့ၢ်တၢ်လၢအလီၤမဲာ်ဆှးဒိၣ်မး, ဒီးလၢတၢ်အံၤအဃိ, အဝဲသ့ၣ်ဘၣ်တၢ်စံၣ်ညီၣ်အီၤဒ်အကြၢးတူၢ်ဘၣ်ဝဲလၢအမၤ ကမၣ်တၢ်အသိးန့ၣ်လီၤ.

²⁸မ့ၢ်လၢပှၤကညီတတူၢ်လိာ်ပာ်လၢအသးပူၤ, တၢ်သ့ၣ်ညါအမ့ၢ်အတီဘၣ်ဃးဒီးကစၢ်ယွၤလၢအသးပူၤအဃိ, တၢ်ဟ့ၣ်လီၤအဝဲသ့ၣ်ဆူတၢ်ဆိကမိၣ်ဟးဂီၤတဖၣ်အပူၤဒ်သိး အဝဲသ့ၣ်ကမၤတၢ်လၢအတကြၢး မၤဝဲတဖၣ်န့ၣ်လီၤ.

²⁹အဝဲသ့ၣ်လၢပှဲၤဝဲဒီးတၢ်လၢအအၢအသီအကလုာ် ကလုာ်, တၢ်အၢတၢ်သီ, တၢ်သူၣ်လီသးကွံဒီးတၢ်လုၢ်အၢလၢ်သီ တဖၣ်န့ၣ်လီၤ. အဝဲသ့ၣ်လၢပှဲၤဝဲဒီးတၢ်သူၣ်က့ၣ်သးကါ, တၢ်မၤသံပှၤကညီ, တၢ်အ့ၣ်လိာ်ဆိးက့, တၢ်လီတၢ်ဝ့ၤဒီးတၢ်ဆၢအၢဆၢသီတဖၣ်န့ၣ်လီၤ.

³⁰အဝဲသ့ၣ်သီၣ်ဝံသဲကလၤ, ကတိၤအၢကတိၤသီလိာ်သးတဂၤဒီးတဂၤ န့ၣ်လီၤ. အဝဲသ့ၣ်သူၣ်ဟ့သးဟ့ကစၢ်ယွၤ, တယူးယီၣ်ပာ်ကဲတၢ်ဘၣ်, ပာ်ကဖၢလၢအသးဒီးတဲဒိၣ်တဲသွါလီၤအသးန့ၣ်လီၤ. အဝဲသ့ၣ်ဃုဆိကမိၣ်အါထီၣ်ကျဲလၢအကမၤတၢ်အၢတၢ်သီဒီး တဒိကနၣ်အမိၢ်အပၢ်တဖၣ်အကလုၢ်န့ၣ်ဘၣ်.

³¹အဝဲသ့ၣ်အသးလၢအသ့ၣ်ညါဒၣ်တၢ်တအိၣ်ဘၣ်. အဝဲသ့ၣ်တမၤလၢပှဲၤအတၢ်အၢၣ်လီၤအီလီၤတဖၣ်ဘၣ်, ဒီးတဒုးနဲၣ်တၢ်သူၣ်ဂ့ၤသးဝါမ့ၢ်ဂ့ၤ, တၢ်သးကညီၤမ့ၢ်ဂ့ၤဆူပှၤဂၤ တဖၣ်န့ၣ်ဘၣ်.

³²အဝဲသ့ၣ် သ့ၣ်ညါဝဲလၢကစၢ်ယွၤအတၢ်သိၣ်တၢ်သီစံးဝဲလၢပှၤလၢအအိၣ် မူလၢကျဲဒ်အံၤန့ၣ်ကြၢးသံဝဲလီၤ. အန့ၣ်ဒၣ်လဲာ်, တမ့ၢ်ထဲအဝဲသ့ၣ်မၤထွဲတၢ်သ့ၣ်တဖၣ်အံၤဧိၤန့ၣ်ဘၣ်, မ့မ့ၢ်အဝဲသ့ၣ်ဘၣ်သူၣ်ဘၣ်သးလၢပှၤလၢအမၤတၢ်ဒ်အံၤ တဖၣ်န့ၣ်လီၤ.