Read S'gaw Karen ရိမ့ၤ 12 Bible Online

ရိမ့ၤ 12 - S'gaw Karen bible

ရိမ့ၤ 12

¹လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, မ့ၢ်လၢကစၢ်ယွၤအတၢ်သးကညီၤဒိၣ်ဝဲအါဝဲလၢပဖီခိၣ်အဃိ, ယဃ့ကညးသုလၢသုကလုၢ်ထီၣ်သုသး ဒ်တၢ်လုၢ်မူစီဆှံ ဆူကစၢ်ယွၤအအိၣ်အသိး, ပာ်စီဆှံသုသးလၢအတၢ်မၤအဂီၢ်, ဒီးမၤသးမုာ်သးခုအီၤတက့ၢ်. တၢ်အံၤမ့ၢ်တၢ်ဘူၣ်ထီၣ်ဘါထီၣ်အမ့ၢ်အတီလၢသုကြၢးမၤ အီၤန့ၣ်လီၤ.

²တဘၣ်အိၣ်မူထိၣ်သုသးလၢပှၤဟီၣ်ခိၣ်ဖိတဖၣ်အတၢ်အိၣ်မူ အတီၤတဂ့ၤ. မ့မ့ၢ်တခီ ပျဲယွၤလဲလိာ်သုလၢသုသူၣ်ကံၢ်သးလဲ ခီဖျိတၢ်လဲလိာ်ကွံာ်သုတၢ်ဆိကမိၣ်လၢာ်လၢာ်ဆ့ဆ့တက့ၢ်. အန့ၣ်ဒီး, သုကသ့ၣ်ညါကစၢ်ယွၤအတၢ်ဘၣ်အသး - တၢ်လၢ အဂ့ၤ, ဒီးတၢ်လၢအဒုးသးမုာ်သးခုအီၤ, ဒီးတၢ်လၢတၢ် ပှဲၤမ့ၢ်တၢ်ဒ်လဲၣ်ဒ်လဲၣ်န့ၣ်လီၤ.

³ဒီးမ့ၢ်ယွၤအတၢ်ဟ့ၣ်ဘျုးဟ့ၣ်ဖှိၣ်ယၤအဃိ, ယစံးဘၣ် တဲဘၣ်သုခဲလၢာ်လီၤ. တဘၣ်ဆိကမိၣ်လီၤသုသးဒိၣ်န့ၢ်ဒံး သုကြၢးဆိကမိၣ်န့ၣ်တဂ့ၤ. မ့မ့ၢ်တခီ, ဆိကမိၣ်လီၤသုသးဖဲ အဘၣ်အဘၣ်, ဒီးသုဝဲတဂၤဒီးတဂၤစံၣ်ညီၣ်လီၤသုသးဒ် တၢ်စူၢ်တၢ်နာ်လၢကစၢ်ယွၤဟ့ၣ်လီၤသုအသိးန့ၣ်တက့ၢ်.

⁴ပနီၢ်ခိတဂၤအံၤအက့ၢ်အဂီၤအိၣ်အါမံၤ, ဒီးက့ၢ်ဂီၤခဲလၢာ်အံၤအတၢ်မၤတဖၣ်လီၤဆီဝဲန့ၣ်လီၤ.

⁵ဒ်န့ၣ်အသိး, ပအိၣ်အါဂၤသနာ်က့ပမ့ၢ်နီၢ်တဂၤဃီလၢခရံာ် အပူၤဒီးပဘၣ်တၢ်ဒုးစဲဘူးပှၤတဂၤဒီးတဂၤဒ်နီၢ်ခိတဂၤဃီ အက့ၢ်အဂီၤလၢအလီၤဆီတဖၣ်အသိးန့ၣ်လီၤ.

⁶လၢတၢ်န့ၣ်အဃိ ပကဘၣ်သူပတၢ်ဟ့ၣ်လၢအလီၤဆီ တဖၣ်ဒ်သိးကလီၤပလိာ်ဒီးတၢ်ဘျုးတၢ်ဖှိၣ်လၢကစၢ် ယွၤဟ့ၣ်လီၤပှၤန့ၣ်လီၤ. ပတၢ်ဟ့ၣ်မ့မ့ၢ်တၢ်စံၣ်တဲၤတဲလီၤ ယွၤအတၢ်ကစီၣ်ဒီး, ပကမၤအီၤလီၤပလိာ်ဒီးတၢ်နာ်လၢ အအိၣ်ဒီးပှၤန့ၣ်လီၤ.

⁷မ့မ့ၢ်တၢ်မၤတၢ်ခ့တၢ်ပှၤအတၢ်မၤဒီး, ပကဘၣ်မၤတၢ်ခ့တၢ် ပှၤအတၢ်မၤလီၤ. မ့မ့ၢ်တၢ်သိၣ်လိတၢ်ဒီး, ပကဘၣ်သိၣ်လိ တၢ်လီၤ.

⁸မ့မ့ၢ်တၢ်ဟ့ၣ်ဂံၢ်ဟ့ၣ်ဘါပှၤဂၤတဖၣ်ဒီး, ပကဘၣ်ဟ့ၣ်ဂံၢ်ဟ့ၣ် ဘါတၢ်လီၤ. ပှၤတဂၤလၢ်လၢ်လၢအနီၤဟ့ၣ်တၢ်လၢအအိၣ်ဒီး အီၤလၢပှၤဂၤတဖၣ်န့ၣ်, ကဘၣ်မၤဝဲလၢတၢ်သူၣ်အိၣ်သးအိၣ် အပူၤန့ၣ်လီၤ. မ့မ့ၢ်ခိၣ်နၢ်တဂၤဂၤဒီး, ကဘၣ်မၤတၢ်ဆူၣ်ဆူၣ် လီၤ. ပှၤတဂၤလၢ်လၢ်လၢအဒုးနဲၣ်တၢ်သးကညီၤလၢပှၤဂၤ တဖၣ်န့ၣ်, ကဘၣ်မၤဝဲလၢတၢ်သူၣ်ခုသးခုအပူၤလီၤ.

⁹တၢ်အဲၣ်တၢ်ကွံကဘၣ်မ့ၢ်တၢ်လၢအပူၤဖျဲးဒီးတၢ်ပာ်မၤ အသးန့ၣ်လီၤ. သးဟ့တၢ်လၢအအၢ, ဒီးဟံးဃာ်တၢ် လၢအဂ့ၤန့ၣ်တက့ၢ်.

¹⁰အဲၣ်လိာ်သုသးတဂၤဒီးတဂၤတံၢ်တံၢ်နီၢ်နီၢ်ဒ်ဒီပုၢ်ဝဲၢ်တဖၣ် လၢခရံာ်အပူၤအသိး, ဒီးသးဆူၣ်ဒုးနဲၣ်တၢ်ယူးယီၣ်ပာ် ကဲလိာ်သးလၢတဂၤဒီးတဂၤအဂီၢ်န့ၣ်တက့ၢ်.

¹¹မၤတၢ်ဆူၣ်ဆူၣ်ဒီးတဘၣ်ကၢၣ်တဂ့ၤ. မၤကစၢ်အတၢ်မၤလၢသးလၢအပှဲၤဒီးတၢ်အဲၣ်တၢ်ကွံ ဒီးတၢ်ဟ့ၣ်လီၤသးန့ၣ်တက့ၢ်.

¹²မ်သုတၢ်မုၢ်လၢ်ဒုးသးခုသု, အိၣ်ဒီးတၢ်ဝံသးစူၤလၢသုတၢ်ကီတၢ်ခဲတဖၣ်အပူၤ, ဒီးဃ့ဘါထုကဖၣ်တၢ်ကိးဆၢကတီၢ်ဒဲးန့ၣ်တက့ၢ်.

¹³နီၤဟ့ၣ်တၢ်လၢအအိၣ်ဒီးသုတဖၣ်လၢသုဒီပုၢ်ဝဲၢ်လၢ အလိၣ်ဘၣ်တၢ်တဖၣ်, ဒီးတူၢ်လိာ်ပှၤသမှံၤတဖၣ်လၢသုဟံၣ်သုဃီတဖၣ်အပူၤတက့ၢ်.

¹⁴ဃ့တၢ်လၢကစၢ်ယွၤလၢကဆိၣ်ဂ့ၤပှၤလၢအမၤအၢမၤနး သုတဖၣ်တက့ၢ်. မ့ၢ်လီၤ. ဃ့အီၤလၢကဆိၣ်ဂ့ၤတၢ်အဂီၢ်, တမ့ၢ်လၢကဆိၣ်အၢတၢ်အဂီၢ်ဘၣ်.

¹⁵ပှၤလၢအသးခုတဖၣ်န့ၣ်သးခုဃုာ်ဒီးအီၤတက့ၢ်. ပှၤလၢအဟီၣ်တဖၣ်န့ၣ်ဟီၣ်ဃုာ်ဒီးအီၤတက့ၢ်.

¹⁶သူၣ်အိၣ်သးအိၣ်ပှၤကိးဂၤဒဲးဒ်သိးသိးတက့ၢ်. တဘၣ်ပာ်ထီၣ်ထီသုသးတဂ့ၤ, မ့မ့ၢ်ရ့တံၤရ့သကိးဒီးပှၤဖှီၣ်ဖိယာ်ဖိတဖၣ်တက့ၢ်. တဘၣ်ဆိကမိၣ်လီၤသုသးလၢသုကူၣ်ဘၣ်ကူၣ်သ့တဂ့ၤ.

¹⁷ပှၤတဂၤဂၤမ့ၢ်မၤအၢသုဒီး, တဘၣ်မၤဆၢအီၤလၢတၢ်အၢတ ဂ့ၤ. ကျဲးစၢးမၤတၢ်လၢပှၤခဲလၢာ်ဆိကမိၣ်ဝဲလၢအမ့ၢ်တၢ်ဂ့ၤ န့ၣ်တက့ၢ်.

¹⁸မ့မ့ၢ်သုဝဲတခီ, ဖဲသုသ့န့ၣ်အိၣ်ဃူလိာ်ဖိးလိာ်သုသး ဒီးပှၤခဲလၢာ်တက့ၢ်.

¹⁹ယတံၤသကိးသးဘိသ့ၣ်ဧၢ, တဘၣ်မၤကၣ်တၢ်တဂ့ၤ, မ့မ့ၢ်ပျဲကစၢ်ယွၤအတၢ်သးထီၣ်ကမၤဒၣ်ဝဲတက့ၢ်. အဂ့ၢ်ဒ် လဲၣ်န့ၣ်, တၢ်ကွဲးအသးစီဆှံစံးဝဲ, “ယကမၤကၣ်က့ၤတၢ်, ယကမၤဆၢက့ၤတၢ်, ကစၢ်စံးဝဲဒၣ်လီၤ.”

²⁰အါန့ၢ်အန့ၣ်, ဒ်တၢ်ကွဲးအသးစီဆှံစံးဝဲအသိး, “နဒုၣ်နဒါတၢ်မ့ၢ်သၣ်ဝံၤအသးဒီးလုၢ်အီၣ်လုၢ်အီအီၤ တက့ၢ်. တၢ်မ့ၢ်သူအသးလၢထံဒီးဟ့ၣ်အီအီၤထံတက့ၢ်. လၢနမၤတၢ်ဒ်အံၤအဃိအဝဲကမဲာ်ဆှးလီၤက့ၤအသးလီၤ.”

²¹တဘၣ်ပျဲတၢ်အၢတၢ်သီမၤနၢၤသုတဂ့ၤ. မ့မ့ၢ်တခီ, မၤနၢၤတၢ်အၢလၢတၢ်ဂ့ၤန့ၣ်တက့ၢ်.