Read S'gaw Karen ရိမ့ၤ 15 Bible Online

ရိမ့ၤ 15 - S'gaw Karen bible

ရိမ့ၤ 15

¹ပဝဲလၢအတၢ်နာ်အဂံၢ်ဆူၣ်အဘါဆူၣ်တဖၣ်ကြၢး ဝံစၢၤယိးစၢၤပှၤလၢအဂံၢ်စၢ်ဘါစၢ်တဖၣ်အတၢ်ဝံတၢ်ယိး တဖၣ်န့ၣ်လီၤ. ပတကြၢးလူၤပသးဒၣ်ပဝဲဘၣ်.

²အခိၣ်တလိာ်, လၢပဒီပုၢ်ဝဲၢ်တဖၣ်အတၢ်ဂ့ၤဒၣ်ဝဲအဂီၢ် န့ၣ်ပဝဲတဂၤဒီးတဂၤပကြၢးမၤမုာ်အီၤဒ်သိးအတၢ်စူၢ် တၢ်နာ်ကဘၣ်တၢ်သူၣ်ထီၣ်ဂၢၢ်ကျၢၤအီၤအဂီၢ်လီၤ.

³အဂ့ၢ်ဒ်လဲၣ်န့ၣ်, ခရံာ်တလူၤအသးဒၣ်ဝဲဘၣ်. အခိၣ်တလိာ်ဒ်တၢ်ကွဲးအသးစီဆှံစံးဝဲအသိး, ‘တၢ်ဒုၣ်ဒွဲၣ်တဖၣ်လၢပှၤဂၤတဖၣ်ဒုၣ်ဒွဲၣ်နၤန့ၣ်လီၤဘၣ်လၢ ယလိၤလံ.’

⁴တၢ်ကိးမံၤဒဲးလၢတၢ်ကွဲးအသးစီဆှံအပူၤန့ၣ်ဘၣ်တၢ် ကွဲးအီၤလၢတၢ်ကသိၣ်လိပှၤအဂီၢ်, ဒ်သိးပကအိၣ်ဒီးတၢ်မုၢ်လၢ်ခီဖျိတၢ်ကွဲးအသးစီဆှံ အတၢ်ဟ့ၣ်ပှၤတၢ်သူၣ်စူၤသးစူၤဒီးတၢ်ဟ့ၣ်ဂံၢ်ဟ့ၣ်ဘါအဃိ န့ၣ်လီၤ.

⁵ဒီးမ်ကစၢ်ယွၤ, လၢအမ့ၢ်တၢ်သူၣ်စူၤသးစူၤဒီးတၢ်ဟ့ၣ် ဂံၢ်ဟ့ၣ်ဘါအဂံၢ်ထံး, မၤစၢၤသုဒ်သိးသုကအိၣ်မူသကိးလၢတၢ်ဃူတၢ်ဖိး အပူၤခီဖျိတၢ်ကွၢ်လိမၤဒိးယ့ၣ်ၡူးခရံာ်,

⁶ဒ်သိးသုဝဲခဲလၢာ်, သုကစံးထီၣ်ပတြၢၤကစၢ်ယွၤဒီးပကစၢ် ယ့ၣ်ၡူးခရံာ်အပၢ်, လၢသုသးတဖျၢၣ်ဃီအပူၤအဂီၢ်န့ၣ်တက့ၢ်.

⁷မၤသးဒ်န့ၣ်ဒီး, တူၢ်လိာ်လိာ်သုသးတဂၤဒီးတဂၤလၢကစၢ်ယွၤ အလၤကပီၤအဂီၢ်, ဒ်ခရံာ်တူၢ်လိာ်သုအသိးန့ၣ်တက့ၢ်.

⁸အဂ့ၢ်ဒ်အံၤ ယစံးဘၣ်သုလၢခရံာ်ကဲထီၣ်ပှၤယူဒၤဖိတဖၣ် အခ့အပှၤဒ်သိးကဒုးနဲၣ်ဝဲလၢယွၤအံၤအကလုၢ်တီဝဲ, ဒ်သိးအကမၤဂၢၢ်မၤကျၢၤတၢ်လၢကစၢ်ယွၤစံးပာ်တ့ၢ်ပမိၢ်ပပၢ်ဖံ ဖုသ့ၣ်လၢပျၢၤတဖၣ်,

⁹ဒီးလၢကမၤစၢၤစ့ၢ်ကီးပှၤကလုာ်ဂၤတဖၣ်ဒ်သိးကစံးထီၣ်ပတြၢၤ ကစၢ်ယွၤလၢအတၢ်သးကညီၤအဃိန့ၣ်လီၤ. ဒ်တၢ်ကွဲးအသးစံးဝဲအသိး, လၢတၢ်အံၤအဃိယကစံးထီၣ်ပတြၢၤနၤလၢပှၤ ကလုာ်ဂၤတဖၣ်အကျါ, ယကသးဝံၣ်စံးထီၣ်ပတြၢၤနမံၤလီၤ.

¹⁰စံးကဒီးဝဲ, ပှၤကလုာ်ဂၤတဖၣ်ဧၢ, သးခုသကိးဒီးကစၢ်ယွၤအပှၤဂီၢ်မုၢ်န့ၣ်တက့ၢ်.

¹¹ဒီးစံးကဒီးဝဲ, ပှၤကလုာ်ဂၤခဲလၢာ်သ့ၣ်ဧၢ, စံးထီၣ်ပတြၢၤကစၢ်တက့ၢ်. ပှၤဂီၢ်မုၢ်ခဲလၢာ်သ့ၣ်ဧၢ, စံးထီၣ်ပတြၢၤအီၤတက့ၢ်.

¹²ဒီးမၤကဒီးတစု, ဝံယၡါယၤစံးဝဲ, စီၤယံးၡဲအစၢၤအသွဲၣ်ကဟဲတဂၤ, ယွၤကဒုးဂဲၤဆၢထၢၣ်အီၤလၢ ကပၢပှၤကလုာ်ဂၤတဖၣ်အဂီၢ်, ဒီးအဝဲသ့ၣ်ကပာ်အတၢ်မုၢ်လၢ်လၢအပူၤလီၤ.

¹³မ်ကစၢ်ယွၤ, လၢအမ့ၢ်တၢ်မုၢ်လၢ်အဂံၢ်ထံး, မၤပှဲၤသုဒီးကယဲၢ်တၢ်သးခုဒီးတၢ်ဃူတၢ်ဖိးခီဖျိသုတၢ် စူၢ်တၢ်နာ်အီၤ, ဒ်သိးသုတၢ်မုၢ်လၢ်ကဒိၣ်ထီၣ်အါထီၣ်ခီဖျိသး စီဆှံအစိကမီၤန့ၣ်တက့ၢ်.

¹⁴ယဒီပုၢ်ဝဲၢ်သ့ၣ်ဧၢ, ယကစၢ်ဒၣ်ယဲယနာ်လၢသုလၢပှဲၤဒီးတၢ်ဂ့ၤတၢ်ဝါ, ဒီးတၢ်သ့ၣ်ညါအိၣ်ပှဲၤသုပူၤ ဒီးသုသိၣ်လိလိာ်သုသးတဂၤ ဒီးတဂၤသ့ဝဲန့ၣ်လီၤ.

¹⁵ဘၣ်ဆၣ်ဒီး လၢတၢ်ကွဲးအံၤအပူၤယကွဲးတၢ်ဒူဒူဘၣ်ဃးတၢ် ဂ့ၢ်တနီၤလၢယဒုးသ့ၣ်နီၣ်ထီၣ်တ့ၢ်လံသုန့ၣ်လီၤ. ယပာ်ဒူ ယသးမ့ၢ်လၢကစၢ်ယွၤဟ့ၣ်တ့ၢ်ယၤတၢ်ခွဲးတၢ်ယာ်,

¹⁶လၢယကမ့ၢ်ကစၢ်ယ့ၣ်ၡူးခရံာ်အခ့အပှၤလၢအမၤတၢ်လၢပှၤ ကလုာ်ဂၤတဖၣ်အဂီၢ်အဃိန့ၣ်လီၤ. ယမၤတၢ်ဒ်ပှၤလုၢ်တၢ်အခိၣ် တဂၤအသိးလၢတၢ်စံၣ်တဲၤတဲလီၤတၢ်သးခုကစီၣ်လၢအဟဲလၢ ကစၢ်ယွၤအအိၣ်, ဒ်သိးပှၤကလုာ်ဂၤတဖၣ်ကမ့ၢ်တၢ်လုၢ်လၢကစၢ်ယွၤ တူၢ်လိာ်အီၤသ့, ဒီးဘၣ်တၢ်ပာ်စီဆှံအီၤလၢကစၢ်ယွၤအဂီၢ် ခီဖျိသးစီဆှံန့ၣ်လီၤ.

¹⁷လၢတၢ်န့ၣ်အဃိ, ယပာ်ကဖၢလၢယသးသ့ဝဲလၢယတၢ်မၤလၢယွၤအဂီၢ်လၢ ယ့ၣ်ၡူးခရံာ်အပူၤန့ၣ်လီၤ.

¹⁸ယကအိၣ်ဒီးတၢ်သးဒူဒီးကတိၤထဲတၢ်ဂ့ၢ်ဘၣ်ဃးတၢ်လၢခရံာ် မၤတ့ၢ်ဝဲခီဖျိယၤဒ်သိးယကဆှၢပှၤကလုာ်ဂၤတဖၣ်ဆူတၢ်စူၢ် ကစၢ်ယွၤခီဖျိယတၢ်ကတိၤဒီးယတၢ်မၤ,

¹⁹ခီဖျိတၢ်ပနီၣ်လီၤလးတဖၣ်ဒီးတၢ်လီၤလးတဖၣ်, ဒီးခီဖျိယွၤအသးစီဆှံအစိအကမီၤန့ၣ်လီၤ. ဒီးလၢတၢ်န့ၣ်အဃိ, လၢယတၢ်လဲၤကျဲဒီဘိညါစးထီၣ်လၢဝ့ၢ်ယရူၤၡလ့ၣ်ဒီးတုၤလၢ ဝ့ၢ်အံးလူၤရံကူးန့ၣ်, ယစံၣ်တဲၤတဲလီၤတၢ်သးခုကစီၣ်ဘၣ်ဃးဒီးခရံာ်လၢလၢပှဲၤပှဲၤန့ၣ်လီၤ.

²⁰ယတၢ်သးစၢၢ်ဆၢထဲတမံၤဧိၤမ့ၢ်ဒၣ်တၢ်စံၣ်တဲၤတဲလီၤတၢ်သးခုကစီၣ် ဖဲတၢ်လီၢ်တဖၣ်လၢပှၤတနၢ်ဟူဘၣ်ဒံးခရံာ်အမံၤ, ဒ်သိးယသုတသူၣ်ထီၣ်ဘှီထီၣ်ဘၣ်တၢ်လၢတၢ်အခီၣ်ထံးလၢ ပှၤဂၤပာ်လီၤတ့ၢ်လံဝဲအဖီခိၣ်တဂ့ၤအဂီၢ်န့ၣ်လီၤ.

²¹ဒ်တၢ်ကွဲးအသးစံးဝဲအသိး, ပှၤလၢတၢ်တစံးဘၣ်တ့ၢ်ဒံးအီၤလၢအဂ့ၢ်နီတဘျီတဖၣ်ကထံၣ် အီၤဒီး ပှၤလၢအတနၢ်ဟူတ့ၢ်ဒံးအဂ့ၢ်နီတဘျီတဖၣ်န့ၣ်ကနၢ်ပၢၢ်ဝဲလီၤ.

²²တၢ်ဂ့ၢ်အံၤတြီယၤအါဘျီလၢယသုတလဲၤဆူသုအိၣ်အဂီၢ်လီၤ.

²³ဘၣ်ဆၣ်ခဲအံၤယတၢ်မၤဖဲတၢ်လီၢ်ကဝီၤတဖၣ်အံၤဝံၤလံဝဲ အဃိ, ဒီးဒ်ယသးအိၣ်တ့ၢ်လၢယကလဲၤထံၣ်ဘၣ်သုအိၣ်လံ တဘျုးနံၣ်အသိးန့ၣ်,

²⁴ယမုၢ်လၢ်လၢယကလဲၤဘၣ်ယဲခဲအံၤလီၤ. ယသးအိၣ်ဆၢထံၣ်ဘၣ်သုလၢယတၢ်လဲၤလၢကျဲဆူကီၢ်စပၤနံဒီး ယသးအိၣ်လၢသုကမၤစၢၤယၤဒ်သိးယကလဲၤတုၤတၢ်လီၢ်ဝဲန့ၣ်, ဖဲယနုာ်လီၤအိၣ်သကိးသုတစိၢ်တလီၢ်ဝံၤအလီၢ်ခံန့ၣ်လီၤ.

²⁵မ့မ့ၢ်ခဲအံၤတခီ, ယကလဲၤဆူဝ့ၢ်ယရူၤၡလ့ၣ်လၢယကမၤတၢ်လၢကစၢ်ယွၤအပှၤ စီဆှံဖဲန့ၣ်တဖၣ်အဂီၢ်လီၤ.

²⁶အဂ့ၢ်ဒ်လဲၣ်န့ၣ်, တၢ်အိၣ်ဖှိၣ်လၢကီၢ်မၤက့းဒနံဒီးကီၢ်အဃါယၤတဖၣ် အသးအိၣ်ထီၣ်ဒၣ်ဝဲလၢအကဟ့ၣ်မၤဘူၣ်ဝ့ၢ်ယရူၤၡလ့ၣ်အပှၤစီဆှံ လၢအဖှီၣ်အယာ်တဖၣ်န့ၣ်လီၤ.

²⁷အဝဲသ့ၣ်အကစၢ်ဒၣ်ဝဲအသးဆူၣ်သးခုမၤတၢ်အံၤလီၤ. ဘၣ်ဆၣ်ဒီးနီၢ်နီၢ်တခီအဝဲသ့ၣ်အိၣ်ဒီးအမူအဒါလၢအကမၤစၢၤ ပှၤတဖၣ်န့ၣ်လီၤ. အဂ့ၢ်ဒ်လဲၣ်န့ၣ်, ဒ်ပှၤယူဒၤဖိတဖၣ်နီၤဟ့ၣ်ပှၤကလုာ်ဂၤတဖၣ်လၢနီၢ်သးအတၢ်ဆိၣ် ဂ့ၤအသိးန့ၣ်ပှၤကလုာ်ဂၤတဖၣ်ကြၢးမၤစၢၤပှၤယူဒၤဖိတဖၣ်လၢနီၢ်ခိ အတၢ်ဆိၣ်ဂ့ၤတကပၤန့ၣ်လီၤ.

²⁸ဖဲယမၤတၢ်မၤအံၤဝံၤ, ဒီးဟ့ၣ်လီၤစ့လၢပှၤထၢဖှိၣ်လၢအဝဲသ့ၣ်အဂီၢ်တဖၣ်အံၤခဲလၢာ် ဆူအဝဲသ့ၣ်အစုပူၤဝံၤဒီးယကလဲၤဆူကီၢ်စပၤနံဒီးနုာ်လီၤအိၣ် သကိးသုလၢကျဲန့ၣ်လီၤ.

²⁹တုၤယလဲၤဆူသုအိၣ်ဒီး, ယသ့ၣ်ညါလၢယကလဲၤလၢခရံာ် အတၢ်ဆိၣ်ဂ့ၤဆိၣ်ဝါအလၢအပှဲၤအပူၤန့ၣ်လီၤ.

³⁰ဒီပုၢ်ဝဲၢ်သ့ၣ်ဧၢ, ခီဖျိပကစၢ်ယ့ၣ်ၡူးခရံာ်ဒီးခီဖျိတၢ်အဲၣ်တၢ်ကွံလၢ ကစၢ်ယွၤအသးဟ့ၣ်လီၤဝဲန့ၣ်, ယသဆၣ်ထီၣ်သုခံလၢသုကဃ့ထုကဖၣ်ယွၤသပှၢ်ပှၢ်ဃုာ်ဒီးယၤလၢ ယဂီၢ်န့ၣ်လီၤ.

³¹ဘါထုကဖၣ်ဒ်သိးယကပူၤဖျဲးဒီးပှၤယူဒၤဖိလၢအတစူၢ် တနာ်ယ့ၣ်ၡူးခရံာ်တဖၣ်အတၢ်မၤအၢမၤသီ, ဒီးဒ်သိးယတၢ်ဖံးတၢ်မၤဖဲဝ့ၢ်ယရူၤၡလ့ၣ်အပူၤကဘၣ်တၢ်တူၢ်လိာ် အီၤလၢကစၢ်ယွၤအပှၤစီဆှံဖဲန့ၣ်တဖၣ်အဂီၢ်န့ၣ်တက့ၢ်.

³²အန့ၣ်ဝံၤ, မ့ၢ်ဘၣ်ကစၢ်ယွၤအသးဒီး, ယကလဲၤဆူသုအိၣ်ပှဲၤဒီးတၢ်သးခုဒီးန့ၢ်ဂံၢ်န့ၢ်ဘါက့ၤလၢ ယတၢ်အိၣ်သကိးသုအပူၤန့ၣ်လီၤ.

³³မ်ကစၢ်ယွၤလၢအမ့ၢ်ပတၢ်ဃူတၢ်ဖိးအဂံၢ်ထံး, အိၣ်ဒီးသုခဲလၢာ်တက့ၢ်. အၤမ့ၣ်.