Read S'gaw Karen ရိမ့ၤ 3 Bible Online

ရိမ့ၤ 3 - S'gaw Karen bible

ရိမ့ၤ 3

¹မ့မ့ၢ်ဒ်န့ၣ်ဒီး, မ့ၢ်ပှၤယူဒၤဖိအိၣ်ဒီးတၢ်အဘျုးအါန့ၢ်ပှၤကလုာ်ဂၤတဖၣ်တမံၤမံၤဧါ. ဒီးတၢ်ဒိးတၢ်ကူးတရံးန့ၣ် အလုၢ်အပှ့ၤမ့ၢ်အအိၣ်တမံၤမံၤဧါ.

²အိၣ်အါဝဲနီၢ်နီၢ်လၢကျဲကိးဘိဒဲးန့ၣ်လီၤ. အခီၣ်ထံးကတၢၢ်တမံၤန့ၣ်, ကစၢ်ယွၤဟ့ၣ်လီၤအးလီၤအတၢ်ကစီၣ်လၢပှၤယူဒၤဖိတဖၣ်န့ၣ်လီၤ.

³အဝဲသ့ၣ်အကျါတနီၤအကလုၢ်မ့ၢ်တတီဘၣ်ဒီးတၢ်ကမၤအသးဒ်လဲၣ်. မ့ၢ်အတၢ်ကလုၢ်တတီအံၤကမၤဟးဂီၤကွံာ်ကစၢ်ယွၤအတၢ် ကလုၢ်တီန့ၣ်ဧါ.

⁴တမ့ၢ်ဒ်န့ၣ်ဘၣ်. ပှၤကညီကိးဂၤဒဲးမ့မ့ၢ်ပှၤလီတၢ်သနာ်က့, ကစၢ်ယွၤတီဝဲလိၤဝဲလီၤ. ဒ်တၢ်ကွဲးအသးစံးဝဲအသိး, “နကဘၣ်တၢ်ပာ်တီပာ်လိၤနၤလၢ နတၢ်ကတိၤတဖၣ်အပူၤ, ဒီးနကမၤနၢၤတၢ်ဖဲ နဘၣ်တၢ်လိာ်ကွီၢ်နၤန့ၣ်လီၤ.”

⁵ဘၣ်ဆၣ်ဒီး, ပတၢ်မၤကမၣ်တၢ်န့ၣ်မ့ၢ်မၤဖျါထီၣ်ကစၢ်ယွၤ အတၢ်မၤလၢအဘၣ်န့ၣ်ဒီးဆှံဆှံပစံးမနုၤကသ့န့ၣ်လဲၣ်. မ့ၢ်ပကစံးလၢကစၢ်ယွၤမၤကမၣ်တၢ်ဖဲအဝဲစံၣ်ညီၣ်ပှၤန့ၣ်ဧါ. (ယကတိၤတၢ်ဒ်ပှၤကညီအသိးလီၤ.)

⁶တမ့ၢ်ဒ်န့ၣ်ဘၣ်. ယွၤမ့ၢ်တတီတလိၤဘၣ်ဒီး, အဝဲစံၣ်ညီၣ်ဟီၣ်ခိၣ်ကသ့လၢကျဲဒ်လဲၣ်.

⁷ဘၣ်ဆၣ်ဒီး, ယတၢ်တတီတလိၤဘၣ်န့ၣ်မ့ၢ်မၤဖျါဂ့ၤဒိၣ်ထီၣ် ကစၢ်ယွၤအတၢ်တီတၢ်လိၤလၢကစၢ်ယွၤအလၤကပီၤအဂီၢ်ဒီး, ဘၣ်မနုၤအဃိလၢယကဘၣ်တၢ်စံၣ်ညီၣ်ဒံးယၤဒ်ပှၤတၢ်ဒဲးဘးဖိ တဂၤအသိးန့ၣ်လဲၣ်.

⁸မ့မ့ၢ်ဒ်န့ၣ်ဒီးမ့ၢ်ပကစံး, “မ်ပကမၤသကိးတၢ်အၢဒ်သိးတၢ်ဂ့ၤကမၤအသးအဂီၢ်န့ၣ်ဧါ.” ပှၤတနီၤနီၤဒုၣ်ဒွဲၣ်စံးအၢယၤဒီးပာ်တၢ်ကမၣ်လၢယလိၤလၢယစံး ကတိၤတၢ်ဒ်အံၤန့ၣ်လီၤ. အဝဲသ့ၣ်ကဘၣ်တၢ်စံၣ်ညီၣ်ဃၣ်အီၤဒ်အကြၢးဝဲဒီးအီၤအသိး န့ၣ်လီၤ.

⁹မ့မ့ၢ်ဒ်န့ၣ်ဒီး, ပဝဲပှၤယူဒၤဖိတဖၣ်မ့ၢ်ပဂ့ၤန့ၢ်ဒံးပှၤ ကလုာ်ဂၤတဖၣ်န့ၣ်ဧါ. တမ့ၢ်ဒ်န့ၣ်ဘၣ်. ယပာ်ဖျါတ့ၢ်လၢပှၤယူဒၤဖိဒီးပှၤကလုာ်ဂၤခဲလၢာ်အိၣ် ဒၣ်လၢတၢ်ဒဲးဘးအစိကမီၤအဖီလာ်ဒ်သိးသိးန့ၣ်လီၤ.

¹⁰ဒ်တၢ်ကွဲးအသးစီဆှံစံးဝဲအသိး, “ပှၤအတီအလိၤတအိၣ်နီတဂၤဘၣ်.

¹¹ပှၤသူၣ်ဖးသးဖးတအိၣ်နီတဂၤဘၣ်, ဒီးပှၤလၢအဃုကစၢ်ယွၤတအိၣ်နီတဂၤဘၣ်.

¹²ပှၤကညီခဲလၢာ်ဃၣ်ကဒါကွံာ်အသးလၢကစၢ်ယွၤအအိၣ်, အဝဲသ့ၣ်ခဲလၢာ်လဲၤကမၣ်က့ၤကမၣ်လၢာ်လံ. ပှၤမၤတၢ်အဂ့ၤအဘၣ်တအိၣ်နီတဂၤဘၣ်, ထဲတဂၤဧိၤဒၣ်လဲာ်တအိၣ်ဘၣ်.

¹³အဝဲသ့ၣ်အကိာ်ပူၤတဖၣ်လီၤဂာ်ဒ် တၢ်သွၣ်ခိၣ်အပူၤအိၣ်အိးထီၣ်အသးအသိး, တၢ်လီတၢ်ဝ့ၤအအၢအသီတဖၣ် ဟဲထီၣ်လၢအပျ့ၤအလိၤ, ဒီးတၢ်ကတိၤအအၢအသီဒ် ဂုၢ်အၢအစုၣ်အပျၢ်အသိးတဖၣ်န့ၣ် ဟးထီၣ်လၢအထးခိၣ်,

¹⁴အကိာ်ပူၤတဖၣ်ပှဲၤဝဲဒီးတၢ်ဆိၣ်အၢဆိၣ်သီ လၢအခၣ်တဖၣ်န့ၣ်လီၤ.

¹⁵အဝဲသ့ၣ်ပ့ၢ်ချ့လၢကမၤဆါဒီးမၤသံတၢ်လီၤ.

¹⁶ဖဲအဝဲသ့ၣ်လဲၤဝဲတပူၤလၢ်လၢ်န့ၣ်, အဝဲသ့ၣ်ပာ်တီၢ်တၢ်မၤဟးဂီၤတၢ်ဒီး တၢ်နးတၢ်ဖှီၣ်န့ၣ်လီၤ.

¹⁷ဒီးတၢ်ဃူတၢ်ဖိးအကျဲန့ၣ်, အဝဲသ့ၣ်တသ့ၣ်ညါဝဲဘၣ်.

¹⁸ဒီးတသ့ၣ်ညါပျံၤကစၢ်ယွၤစ့ၢ်ကီးဘၣ်.”

¹⁹ခဲအံၤပသ့ၣ်ညါလၢတၢ်မၤလိာ်ခဲလၢာ်လၢတၢ်သိၣ်တၢ်သီအပူၤန့ၣ်, ဘၣ်ထွဲဒီးပှၤလၢအအိၣ်လၢတၢ်သိၣ်တၢ်သီအဖီလာ်, ဒ်သိးပှၤဟီၣ်ခိၣ်ဖိအသုတကတိၤပူၤဖျဲးအသးနီတဂၤတဂ့ၤဒီး ဟီၣ်ခိၣ်ဒီဘ့ၣ်ကဒိးဘၣ်ကစၢ်ယွၤအတၢ်စံၣ်ညီၣ်အဂီၢ်န့ၣ်လီၤ.

²⁰မ့ၢ်အဂ့ၢ်ဒ်လဲၣ်န့ၣ်, ပှၤကညီတဘၣ်တၢ်ပာ်တီပာ်လိၤအီၤလၢ ကစၢ်ယွၤအမဲာ်ညါလၢအမၤထွဲတၢ်သိၣ်တၢ်သီအခံအဃိနီ တဂၤဘၣ်. မ့မ့ၢ်တၢ်လၢတၢ်သိၣ်တၢ်သီမၤဝဲန့ၣ်, မ့ၢ်တၢ်ဒုးသ့ၣ်ညါပှၤဟီၣ်ခိၣ်ဖိလၢအဝဲမၤတၢ်ဒဲးဘးလံန့ၣ်လီၤ.

²¹ဘၣ်ဆၣ်ဒီးခဲအံၤကစၢ်ယွၤအကျဲလၢအပာ်တီပာ်လိၤပှၤဟီၣ်ခိၣ်ဖိန့ၣ် ဘၣ်တၢ်လီၣ်ဖျါထီၣ်အီၤ, ဒီးတၢ်သိၣ်တၢ်သီဒီးဝံတဖၣ်မ့ၢ်ဟ့ၣ်တၢ်အုၣ်အသးလၢ အဂ့ၢ်သနာ်က့, တၢ်အံၤတဘၣ်ဃးဒီးတၢ်သိၣ်တၢ်သီနီတမံၤဘၣ်.

²²ကစၢ်ယွၤပာ်တီပာ်လိၤပှၤဟီၣ်ခိၣ်ဖိခီဖျိအဝဲသ့ၣ်အတၢ်စူၢ်တၢ်နာ် ယ့ၣ်ၡူးခရံာ်န့ၣ်လီၤ. ကစၢ်ယွၤမၤတၢ်အံၤလၢပှၤလၢအစူၢ်က့ၤနာ်က့ၤခရံာ်ကိးဂၤဒဲးအဂီၢ်, မ့ၢ်လၢတၢ်လီၤဆီတအိၣ်ဘၣ်လၢပှၤယူဒၤဖိဒီးပှၤကလုာ်ဂၤ တဖၣ်အဘၢၣ်စၢၤအဃိလီၤ.

²³ပှၤဟီၣ်ခိၣ်ဖိခဲလၢာ်မၤတၢ်ဒဲးဘးဒီးတချုးန့ၢ်ထီၣ်ဘးကစၢ်ယွၤ အလၤကပီၤဘၣ်.

²⁴ဘၣ်ဆၣ်ဒီးအဝဲသ့ၣ်ခဲလၢာ်ဘၣ်တၢ်ပာ်တီပာ်လိၤအီၤလၢ ယွၤအဘျုးအဖှိၣ်လၢအဟ့ၣ်ကလီဝဲ, ခီဖျိယ့ၣ်ၡူးခရံာ်လၢအမၤထူၣ်ဖျဲးကွံာ်အဝဲသ့ၣ်အဃိန့ၣ်လီၤ.

²⁵ကစၢ်ယွၤဟ့ၣ်လီၤယ့ၣ်ၡူးခရံာ်ဒ်သိးခီဖျိအတၢ်သံန့ၣ်, အဝဲကကဲထီၣ်ကျဲလၢပှၤဟီၣ်ခိၣ်ဖိတဖၣ်အတၢ်ဒဲးဘး ကဘၣ်တၢ်ပျၢ်အီၤအဂီၢ်လၢအဝဲသ့ၣ်အတၢ်နာ်အီၤအဃိန့ၣ်လီၤ. ကစၢ်ယွၤမၤတ့ၢ်တၢ်အံၤဒ်သိးအကဒုးနဲၣ်အတၢ်တီတၢ်လိၤ အဂီၢ်န့ၣ်လီၤ. လၢအပူၤကွံာ်န့ၣ်, ကစၢ်ယွၤဝံသးစူၤတၢ်ဒီးကွၢ်ကပာ်ကွံာ်ပှၤဟီၣ်ခိၣ်ဖိ တဖၣ်အတၢ်ဒဲးဘးန့ၣ်လီၤ.

²⁶ဘၣ်ဆၣ်လၢဆၢကတီၢ်ခဲအံၤ, ကစၢ်ယွၤပာ်သူၣ်ပာ်သးလၢပှၤဟီၣ်ခိၣ်ဖိတဖၣ်အတၢ်ဒဲးဘး ဒ်သိးအကဒုးနဲၣ်အတၢ်တီတၢ်လိၤအဂီၢ်န့ၣ်လီၤ. လၢကျဲဒ် အံၤန့ၣ်, ကစၢ်ယွၤဒုးနဲၣ်ဝဲလၢအကစၢ်ဒၣ်ဝဲမ့ၢ်ပှၤတီပှၤလိၤ ဒီးအဝဲပာ်တီပာ်လိၤပှၤကိးဂၤဒဲးလၢအစူၢ်က့ၤနာ်က့ၤယ့ၣ်ၡူး န့ၣ်လီၤ.

²⁷မ့မ့ၢ်ဒ်န့ၣ်ဒီး, ပကပာ်ကဖၢလၢပသးလၢ မနုၤတမံၤအဃိလဲၣ်. တၢ်တအိၣ်နီတမံၤဘၣ်. ဒီးတၢ်အံၤမ့ၢ်လၢမနုၤအဃိန့ၣ်လဲၣ်. မ့ၢ်လၢပဒိကနၣ်တၢ်သိၣ်တၢ်သီအဃိဧါ. တမ့ၢ်ဘၣ်, မ့ၢ်လၢပစူၢ်က့ၤနာ်က့ၤတၢ်အဃိလီၤ.

²⁸အဂ့ၢ်ဒ်အံၤပစံးသ့လၢပှၤကညီတဂၤဘၣ်တၢ်ပာ်တီပာ်လိၤ အီၤလၢယွၤခီဖျိဒၣ်ထဲလၢတၢ်စူၢ်တၢ်နာ်, ဒီးတမ့ၢ်ဘၣ်လၢအမၤထွဲတၢ်သိၣ်တၢ်သီအတၢ်မၤလိာ်တဖၣ် အခံအဃိန့ၣ်ဘၣ်.

²⁹ကစၢ်ယွၤအံၤမ့ၢ်ဒၣ်ထဲပှၤယူဒၤဖိတဖၣ်အကစၢ်ယွၤဧိၤန့ၣ်ဧါ. မ့ၢ်အတမ့ၢ်စ့ၢ်ကီးပှၤကလုာ်ဂၤတဖၣ်အကစၢ်ယွၤဘၣ်ဧါ. မ့ၢ်သပှၢ်ကတၢၢ်ပှၤကလုာ်ဂၤတဖၣ်အကစၢ်ယွၤစ့ၢ်ကီးလီၤ.

³⁰ကစၢ်ယွၤမ့ၢ်တဂၤဃီ, ဒီးအဝဲကမၤလိၤမၤဘၣ်ပှၤဒိးတၢ်ကူးတရံးဖိ တဖၣ်ဒီးအီၤခီဖျိအဝဲသ့ၣ်အတၢ်စူၢ်တၢ်နာ်, ဒီးပှၤတဒိးတၢ်ကူးတရံးတဖၣ်စ့ၢ်ကီးခီဖျိအဝဲသ့ၣ်အတၢ်စူၢ် တၢ်နာ်န့ၣ်လီၤ.

³¹တၢ်အဝဲအံၤအခီပညီမ့ၢ်ပတၢၤကွံာ်တၢ်သိၣ်တၢ်သီလၢတၢ် စူၢ်တၢ်နာ်အံၤန့ၣ်ဧါ. တမ့ၢ်ဒ်န့ၣ်ဘၣ်. မ့မ့ၢ်ပပာ်ဂၢၢ်ပာ်ကျၢၤတၢ်သိၣ်တၢ်သီအံၤတခီန့ၣ်လီၤ.