Read S'gaw Karen ရိမ့ၤ 9 Bible Online

ရိမ့ၤ 9 - S'gaw Karen bible

ရိမ့ၤ 9

¹ယကတိၤတၢ်မ့ၢ်တၢ်တီလၢခရံာ်အပူၤဒီးယတကတိၤကဘျံး ကဘျၣ်တၢ်ဘၣ်. ယသးလၢအသ့ၣ်ညါဒၣ်တၢ်အုၣ်အသး လၢယဂီၢ်လၢသးစီဆှံအတၢ်ပၢအီၤအပူၤ, လၢယတကတိၤ ကဘျံးကဘျၣ်တၢ်ဘၣ်.

²ဖဲယစံး ယတၢ်သးအုးအံၤမ့ၢ်တၢ်လၢအဒိၣ်နီၢ်မးဒီး ယသးဘၣ်ကိၢ်ဘၣ်ဂီၤတဘိယူၢ်ဃီလၢယပှၤဂီၢ်မုၢ် ယသွံၣ်ထံဖံးညၣ်ဒၣ်ယဲအဂီၢ်န့ၣ်လီၤ.

³လၢအဝဲသ့ၣ်အဃိ, ယဆၢယဲဒၣ်လၢယကအိၣ်လၢကစၢ်ယွၤ အတၢ်ဆိၣ်အၢအဖီလာ်ဒီးအိၣ်လီၤဖးဒီးခရံာ်န့ၣ်လီၤ.

⁴အဝဲသ့ၣ်မ့ၢ်ကစၢ်ယွၤအပှၤဂီၢ်မုၢ်ဒီးအဝဲဒၣ်ဒုးကဲထီၣ် အီၤလၢအဖိတဖၣ်ဒီးလီၣ်ဖျါထီၣ်အလၤကပီၤလၢအီၤ န့ၣ်လီၤ. အဝဲဒၣ်မၤအတၢ်အၢၣ်လီၤအီလီၤဒီးအဝဲ သ့ၣ်, ဒီးဟ့ၣ်လီၤအီၤလၢတၢ်သိၣ်တၢ်သီလီၤ. အဝဲသ့ၣ်အိၣ်ဒီးတၢ်ဘူၣ်ထီၣ်ဘါထီၣ်အမ့ၢ်အတီဒီးဒိးန့ၢ် ကစၢ်ယွၤအတၢ်အၢၣ်လီၤအီလီၤတဖၣ်န့ၣ်လီၤ.

⁵အဝဲသ့ၣ်ဟဲလီၤစၢၤလၢပၢ်သ့ၣ်လၢပျၢၤဒီးခရံာ်လၢ အလိၣ်ထီၣ်အသးဒ်ပှၤကညီတဂၤအသိးန့ၣ်, မ့ၢ်ပှၤ တကလုာ်ဃီဒီးအဝဲသ့ၣ်လီၤ. မ်ကစၢ်ယွၤလၢအပၢ တၢ်ခဲလၢာ်တဂၤ, ဘၣ်တၢ်စံးထီၣ်ပတြၢၤအီၤလီၤ စိၤလီၤထီတက့ၢ်. အၤမ့ၣ်.

⁶ယတစံးလၢကစၢ်ယွၤအတၢ်အၢၣ်လီၤဟးဂီၤကွံာ်လံ န့ၣ်ဘၣ်. အဂ့ၢ်ဒ်အံၤ, ပှၤဂီၢ်မုၢ်လၢအံၣ်စရ့လးအပူၤ တမ့ၢ်ကစၢ်ယွၤအပှၤဂီၢ်မုၢ်ခဲလၢာ်ဘၣ်.

⁷ဒ်န့ၣ်အသိး, ပှၤလၢအဟဲလီၤစၢၤလၢစီၤအၤဘြၤဟၣ် တဖၣ်စ့ၢ်ကီးတမ့ၢ်ကစၢ်ယွၤအဖိခဲလၢာ်န့ၣ်ဘၣ်. ကစၢ်ယွၤ စံးဘၣ်စီၤအၤဘြၤဟၣ်, “နစၢၤနသွဲၣ်လၢယအၢၣ်လီၤနၤ တဖၣ်န့ၣ်ကမ့ၢ်ပှၤလၢအဟဲလီၤစၢၤလၢစီၤအံၤစဲးန့ၣ်လီၤ” (ကဲထီၣ်၂၁:၁၂).

⁸တၢ်အံၤအခီပညီမ့ၢ်ဝဲဖိလၢအအိၣ်ဖျဲၣ်ထီၣ်ဒ်ပှၤဟီၣ်ခိၣ် ဖိအလုအလၢ်အိၣ်ဝဲအသိးတဖၣ်န့ၣ်, တမ့ၢ်ကစၢ်ယွၤ အပှၤဂီၢ်မုၢ်ဘၣ်. မ့မ့ၢ်ဖိလၢအအိၣ်ဖျဲၣ်ထီၣ်ခီဖျိကစၢ်ယွၤ အတၢ်အၢၣ်လီၤအီလီၤတဖၣ်န့ၣ်, တၢ်ပာ်အီၤဒ်စၢၤသွဲၣ်နီၢ်နီၢ် တဖၣ်အသိးန့ၣ်လီၤ.

⁹အဂ့ၢ်ဒ်အံၤ, ကစၢ်ယွၤမၤတၢ်အၢၣ်လီၤအီလီၤခီဖျိတၢ်ကတိၤ တဖၣ်အံၤ, “ဖဲတၢ်ဆၢကတီၢ်ဘၣ်န့ၣ် ယကဟဲက့ၤကဒါ က့ၤဒီးနီၢ်စၤရါကအိၣ်ဒီးအဖိခွါတဂၤလီၤ” (ကဲထီၣ် ၁၈:၁၀, ၁၄).

¹⁰ဒီးထဲန့ၣ်ဧိၤတမ့ၢ်ဘၣ်. အဂ့ၢ်ဒ်လဲၣ်န့ၣ်, နီၢ်ရံးဘကၤ အဖိခွါခံဂၤအိၣ်ဒီးအပၢ်တဂၤဃီလၢအမ့ၢ်ပပၢ်လၢပျၢၤ စီၤအံၤစဲးန့ၣ်လီၤ.

¹¹ဘၣ်ဆၣ်ဒ်သိးဒီးတၢ်ဃုထၢဖိခွါတဂၤကမ့ၢ်ကစၢ်ယွၤ အတၢ်တိာ်ဒၣ်ဝဲအတၢ်ဃုထၢနီၢ်နီၢ်အဂီၢ်န့ၣ်, ကစၢ်ယွၤ စံးဘၣ်နီၢ်ရံးဘကၤ,

¹²“အဒိၣ်တဂၤကမၤအဆံးတဂၤအတၢ်လီၤ” (ကဲထီၣ် ၂၅:၂၃). စံးတၢ်အံၤလၢဖိသၣ်တချုးအိၣ်ဖျဲၣ်ဒံးဘၣ် ဒီးတၢ်ဂ့ၤမ့ၢ်ဂ့ၤ, တၢ်အၢမ့ၢ်ဂ့ၤ, တချုးမၤဒံးဘၣ်အသး န့ၣ်လီၤ. လၢကျဲဒ်အံၤကစၢ်ယွၤအတၢ်ဃုထၢဒိးသန့ၤထီၣ် အသးလၢအဝဲအတၢ်ကိးအဖီခိၣ်ဒီးတမ့ၢ်ဘၣ်လၢတၢ်လၢ အဝဲသ့ၣ်မၤတ့ၢ်ဝဲအဖီခိၣ်ဘၣ်.

¹³ဒ်တၢ်ကွဲးအသးစီဆှံစံးဝဲအသိး, “ယအဲၣ်စီၤယၤကိာ်, မ့မ့ၢ် စီၤဧ့ၡီၤန့ၣ်ယသးဟ့အီၤလီၤ” (မၤ ၁:၂-၃).

¹⁴မ့မ့ၢ်ဒ်န့ၣ်ဒီး, ပကစံးလၢကစၢ်ယွၤမၤတၢ်တတီဘၣ်န့ၣ်ဧါ. တမ့ၢ်ဒ်န့ၣ်လ့ၤတက့ၤဘၣ်.

¹⁵အဂ့ၢ်ဒ်လဲၣ်န့ၣ်, ယွၤစံးဘၣ်စီၤမိၤၡ့, “ယကသးကညီၤပှၤလၢယသးအိၣ်သးကညီၤ, ဒီးယကသးအိၣ်ပှၤလၢယအဲၣ်ဒိးသးအိၣ်အီၤတဖၣ် န့ၣ်လီၤ.”

¹⁶လၢတၢ်န့ၣ်အဃိ, တၢ်ခဲလၢာ်လၢအမၤအသးန့ၣ်တသန့ၤ ထီၣ်အသးလၢပှၤကညီအတၢ်ဆၢန့ၢ်ဘၣ်ဒီးအတၢ်မၤ အဖီခိၣ်န့ၣ်ဘၣ်, မ့မ့ၢ်ထဲဒၣ်လၢကစၢ်ယွၤအတၢ်သး ကညီၤအဖီခိၣ်န့ၣ်လီၤ.

¹⁷အဂ့ၢ်ဒ်လဲၣ်န့ၣ်, တၢ်ကွဲးအသးစီဆှံစံးဘၣ်ဖၤရိၤ, “ယဒုးကဲထီၣ်နၤစီၤပၤလၢယကသူနၤလၢယကဒုးနဲၣ် ယစိကမီၤအဂီၢ်, ဒီးလၢယမံၤကဘၣ်တၢ်သ့ၣ်ညါအီၤလၢ ဟီၣ်ခိၣ်ဒီဘ့ၣ်အဂီၢ်န့ၣ်လီၤ.”

¹⁸လၢတၢ်န့ၣ်အဃိ, ကစၢ်ယွၤသးကညီၤပှၤလၢအသးအိၣ်သး ကညီၤဝဲတဖၣ်, ဒီးမၤကိၤပှၤအသးဖဲအသးအိၣ်မၤဝဲန့ၣ်လီၤ.

¹⁹မ့မ့ၢ်ဒ်န့ၣ်ဒီး, သုကစံးဘၣ်ယၤ, “တၢ်မ့ၢ်မၤအသးဒ်အံၤဒီး, ကစၢ်ယွၤပာ်တၢ်ကမၣ်လၢပှၤအလိၤကသ့ဒ်လဲၣ်. မ့ၢ်မတၤတြီဆၢကစၢ်ယွၤအတၢ်ဘၣ်အသးကသ့တဂၤလဲၣ်.”

²⁰ဘၣ်ဆၣ်ဒီးပှၤကညီနၤဧၢ, နမ့ၢ်မတၤတဂၤလၢအကကတိၤ ဆၢက့ၤကစၢ်ယွၤန့ၣ်လဲၣ်. သပၢၤဟီၣ်ခိၣ်တဖျၢၣ်တသံကွၢ် က့ၤပှၤလၢအတ့အီၤတဂၤ, “ဘၣ်မနုၤအဃိနတ့ယၤဒ်အံၤလဲၣ်” န့ၣ်ဘၣ်.

²¹ပှၤတ့သပၢၤတဂၤန့ၣ်အိၣ်ဒီးအခွဲးအယာ်လၢကသူဟီၣ်ခိၣ် ကပံာ်ဒ်အသးအိၣ်ဝဲအသိးဒီးလၢဟီၣ်ခိၣ်ကပံာ်တလိၣ်ဃီန့ၣ် တ့ဝဲသပၢၤခံဖျၢၣ်, တဖျၢၣ်လၢကတီၢ်လီၤဆီအဂီၢ်ဒီးတဖျၢၣ် လၢတၢ်ကသူအီၤလၢမုၢ်ဆ့ၣ်မုၢ်ဂီၤအဂီၢ်န့ၣ်လီၤ.

²²ဒီးတၢ်လၢကစၢ်ယွၤမၤတ့ၢ်လံန့ၣ်မ့ၢ်တၢ်ဒ်န့ၣ်အသိးလီၤ. အဝဲသးအိၣ်ဒုးနဲၣ်အတၢ်သးထီၣ်ဒီးလီၣ်ဖျါထီၣ်အစိကမီၤ သနာ်က့, ပှၤလၢအမၤသးထီၣ်အီၤဒီးကြၢးဝဲဒီးတၢ်မၤဟးဂီၤ အီၤတဖၣ်န့ၣ်, အဝဲဝံသးစူၤဝဲသပှၢ်ပှၢ်န့ၣ်လီၤ.

²³အါန့ၢ်အန့ၣ်, အဝဲသးအိၣ်လီၣ်ဖျါထီၣ်စ့ၢ်ကီး အလၤကပီၤ ထူးတီၤလၢအဘၣ်တၢ်ဂၢ်လီၤအီၤလၢပဝဲလၢအသးကညီၤ ဘၣ်ဝဲ, ဒီးကတဲာ်ကတီၤပာ်စၢၤဝဲလၢအကဒိးန့ၢ်ဘၣ်အလၤ ကပီၤအဂီၢ်တဖၣ်အလိၤန့ၣ်လီၤ.

²⁴အဂ့ၢ်ဒ်လဲၣ်န့ၣ်, ပမ့ၢ်ပှၤတဖၣ်လၢအဝဲကိးထီၣ်ဝဲ, တမ့ၢ်ထဲလၢပှၤယူဒၤဖိတဖၣ်အကျါဘၣ်. မ့မ့ၢ်လၢပှၤကလုာ်ဂၤတဖၣ်အကျါစ့ၢ်ကီးန့ၣ်လီၤ.

²⁵လၢလံာ်ဟိၤၡ့အပူၤယွၤစံးတၢ်ဒ်အံၤလီၤ. “ပှၤလၢအတမ့ၢ်ယပှၤဂီၢ်မုၢ်န့ၣ်, ယကကိးအီၤလၢ ‘ယပှၤဂီၢ်မုၢ်’ လီၤ. ပှၤတကလုာ်လၢယတအဲၣ်အီၤန့ၣ်, ယကကိးအီၤလၢ ‘ယတၢ်အဲၣ်ဒိၣ်’ န့ၣ်လီၤ (ဟိၤ ၂:၂၃).

²⁶ဒီးတၢ်လီၢ်တတီၤဃီဖဲအဝဲသ့ၣ်ဘၣ်တၢ်စံးဘၣ်တဲဘၣ်အီၤလၢ, ‘သုတမ့ၢ်ယပှၤဂီၢ်မုၢ်ဘၣ်’ န့ၣ်, အဝဲသ့ၣ်ကဘၣ်တၢ်ကိးအီၤလၢကစၢ်ယွၤလၢအမူဝဲ တဂၤအဖိခွါတဖၣ်န့ၣ်လီၤ.”

²⁷ဒီးဝံယၡါယၤကိးသတြီထီၣ်တၢ်ဘၣ်ဃးအံၣ်စရ့လးဒီး စံးဝဲ, “ပှၤအံၣ်စရ့လးဖိတဖၣ်မ့ၢ်အါဝဲဒ်မဲးလၢပီၣ်လဲၣ်နံၤ နာ်သက့, ကဘၣ်တၢ်အုၣ်က့ၤခီၣ်က့ၤအီၤထဲစှၤဂၤဧိၤန့ၣ်လီၤ.

²⁸အဂ့ၢ်ဒ်လဲၣ်န့ၣ်, ကစၢ်ကမၤအတၢ်စံၣ်ညီၣ်လၢဟီၣ်ခိၣ်အံၤ ချ့ချ့ဒီးတဲာ်တဲာ်န့ၣ်လီၤ” (ၡါ ၁၀:၂၂, ၂၃).

²⁹အဝဲအံၤမ့ၢ်ဒ်ဝံယၡါယၤစံးပာ်ဝဲလၢညါအသိး, “ကစၢ်လၢအဒိၣ်စိဒိၣ်ကမီၤတဂၤမ့ၢ်တပာ်တီၢ်န့ၢ်ပှၤပစၢၤ ပသွဲၣ်တနီၤနီၤဘၣ်ဒီး, ပကကဲထီၣ်ဒ်ဝ့ၢ်စဒိၣ်, ဒီးပကလီၤဂာ်ဒ်ဝ့ၢ်ဂမိရၤအသိးန့ၣ်လီၤ” (ၡါ ၁:၉).

³⁰မ့မ့ၢ်ဒ်န့ၣ်ဒီးပကစံးဒ်လဲၣ်. ပှၤကလုာ်ဂၤတဖၣ်လၢအတကျဲးစၢးမၤလိၤမၤဘၣ်အသးဒီး ကစၢ်ယွၤန့ၣ်, ဘၣ်တၢ်ပာ်တီပာ်လိၤအီၤခီဖျိတၢ်နာ်န့ၣ်လီၤ.

³¹မ့မ့ၢ်ပှၤအံၣ်စရ့လးဖိလၢအဃုတၢ်သိၣ်တၢ်သီလၢ အကပာ်တီပာ်လိၤအီၤအဂီၢ်န့ၣ်, တထံၣ်န့ၢ်ဘၣ်ဝဲဘၣ်.

³²ဘၣ်မနုၤအဃိလဲၣ်. မ့ၢ်လၢအဝဲသ့ၣ်တသန့ၤထီၣ်အသး လၢတၢ်နာ်အဖီခိၣ်ဘၣ်, မ့မ့ၢ်, လၢတၢ်မၤတဖၣ်အဖီခိၣ် အဃိလီၤ. အဝဲသ့ၣ်အခီၣ်ဘၣ်တိၢ်လၢ “လၢၢ်တၢ်ဘၣ်တိၢ် တဖျၢၣ်”

³³လၢတၢ်ကွဲးအသးစံးလၢအဂ့ၢ်, “ကွၢ်တက့ၢ်, ယပာ်လီၤလၢၢ်တဖျၢၣ်လၢစံယိၣ်အပူၤ, လၢပှၤအခီၣ်ကဘၣ်တိၢ်ဝဲအဂီၢ်, လၢၢ်တဖျၢၣ်လၢကမၤလီၤဃံၤအဝဲသ့ၣ်လီၤ. ဒီးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ် အမဲာ်တဆှးဘၣ်ဝဲဘၣ်” (ၡါ ၈:၁၄; ၂၈:၁၆).