Read S'gaw Karen 1 ကရံၣ်သူး 11 Bible Online

1 ကရံၣ်သူး 11 - S'gaw Karen bible

1 ကရံၣ်သူး 11

¹လၢတၢ်န့ၣ်အဃိ, ကွၢ်လိယၤ, ဒ်ယကွၢ်လိခရံာ်အသိးန့ၣ်တက့ၢ်.

²ယစံးထီၣ်ပတြၢၤသုလီၤ. အဂ့ၢ်ဒ်အံၤ, ထီဘိန့ၣ်သုသ့ၣ်နီၣ် ထီၣ်ယၤဒီးပိာ်ထွဲတၢ်သိၣ်လီၤသီလီၤလၢယဟ့ၣ်လီၤတ့ၢ်ယဲဆူ သုအိၣ်တဖၣ်လီၤ.

³ဘၣ်ဆၣ်ဒီးယအဲၣ်ဒိးသုကနၢ်ပၢၢ်လၢခရံာ်မ့ၢ်ပှၤပိာ်ခွါကိး ဂၤဒဲးအခိၣ်, ဝၤမ့ၢ်မါအခိၣ်, ဒီးကစၢ်ယွၤမ့ၢ်ခရံာ်အခိၣ်န့ၣ်လီၤ.

⁴လၢတၢ်န့ၣ်အဃိ, ပှၤပိာ်ခွါတဂၤလၢအဃ့ဘါထုကဖၣ်တၢ်, မ့တမ့ၢ်ကတိၤတၢ်လၢဝံအကျိာ်ဖဲပှၤဂီၢ်မုၢ်အတၢ်ဘူၣ်ထီၣ်ဘါ ထီၣ်အဆၢကတီၢ်, မ့ၢ်ဖၢၣ်ဘၢဃာ်အခိၣ်ဒီးမ့ၢ်အမၤဟးဂီၤ အခိၣ်, ခရံာ်အလၤကပီၤန့ၣ်လီၤ.

⁵ဒီးပှၤပိာ်မုၣ်တဂၤဂၤလၢအဃ့ဘါထုကဖၣ်, မ့တမ့ၢ်, ကတိၤတၢ်လၢဝံအကျိာ်ဖဲပှၤဂီၢ်မုၢ်အတၢ်ဘူၣ်ထီၣ်ဘါထီၣ်အဆၢ ကတီၢ်န့ၣ်မ့ၢ်တဖၢၣ်ဘၢဃာ်အခိၣ်လၢတၢ်နီတစဲးဒီးမ့ၢ်အမၤဟးဂီၤ အဝၤအလၤကပီၤလီၤ. အဝဲဒၣ်တလီၤဆီဒီးပိာ်မုၣ်လၢအခိၣ်သူဘၣ်တၢ်လူၤကွံာ်အီၤ တဂၤဘၣ်.

⁶ပိာ်မုၣ်တဂၤန့ၣ်မ့ၢ်တမၤဘၢဃာ်အခိၣ်ဒီး, ဂ့ၤတက့ၢ်လၢအကတံာ်ကွံာ်အခိၣ်သူလီၤ. ဒီးမ့ၢ်လၢပိာ်မုၣ်တဂၤကလူၤအခိၣ်, မ့တမ့ၢ်ကတံာ်ကွံာ်အခိၣ်သူအဂီၢ်မ့ၢ်တၢ်လီၤမဲာ်ဆှး တမံၤအဃိ, အဝဲဒၣ်ကြၢးဖၢၣ်ဘၢဃာ်အခိၣ်လီၤ.

⁷ပှၤပိာ်ခွါတဂၤန့ၣ်အလီၢ်တအိၣ်လၢအကဖၢၣ်ဘၢဃာ်အခိၣ် ဘၣ်. အဂ့ၢ်ဒ်အံၤ, အဝဲဒၣ်မၤဖျါထီၣ်ကဒါက့ၤအကစၢ်ယွၤ အက့ၢ်အဂီၤဒီးအလၤကပီၤန့ၣ်လီၤ. မ့မ့ၢ်, ပိာ်မုၣ်န့ၣ်မၤဖျါက့ၤပိာ်ခွါအလၤကပီၤလီၤ.

⁸အဂ့ၢ်ဒ်အံၤ, ပှၤပိာ်ခွါန့ၣ်တဘၣ်တၢ်တ့လီၤအီၤလၢပိာ်မုၣ် အအိၣ်ဘၣ်. မ့မ့ၢ်, ပိာ်မုၣ်န့ၣ်ဘၣ်တၢ်တ့လီၤအီၤလၢပိာ်ခွါ အအိၣ်လီၤ.

⁹ဒ်န့ၣ်အသိး, ပိာ်ခွါတဘၣ်တၢ်တ့လီၤအီၤလၢပိာ်မုၣ်အဂီၢ် ဘၣ်. မ့မ့ၢ်ပိာ်မုၣ်ဘၣ်တၢ်တ့လီၤအီၤလၢပိာ်ခွါအဂီၢ်လီၤ.

¹⁰လၢမူခိၣ်ကလူးတဖၣ်အဃိ, ပိာ်မုၣ်တဂၤကြၢးအိၣ်ဒီးခိၣ်ဖၢၣ် လၢအခိၣ်လိၤ, ဒ်သိးအကဒုးနဲၣ်ဖျါလၢအဝဲဒၣ်အိၣ်လၢအဝၤ အတၢ်စိတၢ်ကမီၤအဖီလာ်အဂီၢ်န့ၣ်လီၤ.

¹¹မ့ၢ်နာ်သက့ဒ်န့ၣ်ဒီး, လၢပတၢ်အိၣ်မူလၢကစၢ်အပူၤန့ၣ်, ပိာ်မုၣ်တအိၣ်သဘျ့ဒီးပိာ်ခွါ, ဒီးပိာ်ခွါတအိၣ်သဘျ့စ့ၢ်ကီးဒီးပိာ်မုၣ်ဘၣ်.

¹²အဂ့ၢ်ဒ်အံၤ, ဒ်ပိာ်မုၣ်ဘၣ်တၢ်ဒုးအိၣ်ထီၣ်အီၤလၢပိာ်ခွါအသိးန့ၣ် ပိာ်ခွါဘၣ်အိၣ်ဖျဲၣ်ထီၣ်လၢပိာ်မုၣ်ဒီးပှၤလၢအဒုးအိၣ်ထီၣ် တၢ်ခဲလၢာ်ခဲဆ့န့ၣ်မ့ၢ်ကစၢ်ယွၤလီၤ.

¹³ကွၢ်ဆိကမိၣ်ဒၣ်သုဝဲတက့ၢ်. ပှၤပိာ်မုၣ်တဂၤကဃ့ဘါထု ကဖၣ်တၢ်ဆူကစၢ်ယွၤအအိၣ်တအိၣ်ဒီးတၢ်ဖၢၣ်ဘၢဃာ် အခိၣ်န့ၣ်, မ့ၢ်တၢ်လၢအကြၢးဝဲဘၣ်ဝဲကစီဒီဧါ.

¹⁴အဂ့ၢ်ဒ်လဲၣ်, န့ဆၢၣ်ဒၣ်လဲာ်သိၣ်လိသုလၢပှၤပိာ်ခွါတဂၤအိၣ် ဒီးအခိၣ်သူအထီန့ၣ်, မ့ၢ်တၢ်မၤဟးဂီၤအလၤကပီၤတမ့ၢ်ဘၣ်ဧါ.

¹⁵မ့မ့ၢ်လၢပိာ်မုၣ်အလိၤန့ၣ်, မ့ၢ်လၢတၢ်ဃံတၢ်လၤတမံၤလီၤ. အဝဲဒၣ်အခိၣ်သူအထီန့ၣ်, ဘၣ်တၢ်ဟ့ၣ်တ့ၢ်အီၤဒ်သိးအကမၤဘၢဃာ်အခိၣ်အဂီၢ်န့ၣ်လီၤ.

¹⁶ဘၣ်ဆၣ်ဒီးပှၤတဂၤဂၤမ့ၢ်အဲၣ်ဒိးဂ့ၢ်လိာ်ဘှီလိာ်လၢအဂ့ၢ်န့ၣ်, ယစံးယဲသ့ဒၣ်လၢပဝဲဒၣ်မ့ၢ်ဂ့ၤ, ယွၤအတၢ်အိၣ်ဖှိၣ်တဖၣ် မ့ၢ်ဂ့ၤတအိၣ်ဒီးလုၢ်လၢ်အဂၤလၢတၢ်ဘူၣ်တၢ်ဘါအပူၤနီ တမံၤဘၣ်လီၤ.

¹⁷မ့မ့ၢ်, ဖဲလၢအဘၣ်ဃးဒီးတၢ်သိၣ်လိနဲၣ်ကျဲလၢလာ်တဖၣ်န့ၣ်, ယတစံးထီၣ်ပတြၢၤသုဘၣ်. အဂ့ၢ်ဒ်အံၤ, သုတၢ်အိၣ်ဖှိၣ်ဘူၣ် သကိးဘါသကိးတၢ်န့ၣ်, မၤအၢတၢ်နီၢ်နီၢ်အါန့ၢ်အမၤဂ့ၤတၢ်နီၢ်နီၢ် တက့ၢ်လီၤ.

¹⁸အဆိကတၢၢ်န့ၣ်, ယဘၣ်တၢ်စံးဘၣ်တဲဘၣ်ယၤလၢသုတၢ်ပာ်ဖှိၣ်ထီၣ် သကိးသုသးအပူၤန့ၣ်တၢ်ထီဒုၣ်ထီဒါလိာ်သုသးအိၣ်ဝဲဒၣ်, ဒီးယနာ်လၢတၢ်ဂ့ၢ်အဝဲအံၤမ့ၢ်ဝဲတီဝဲတနီၤလီၤ.

¹⁹သပှၢ်ကတၢၢ်တၢ်လီၤမုၢ်လီၤဖးကအိၣ်ဝဲဒၣ်လၢသုသိးသုကျါ, ဒ်သိးပှၤလၢအဂ့ၤအဝါတဖၣ်ကဘၣ်တၢ်ထံၣ်သ့ၣ်ညါအီၤဖျါဖျါ အဂီၢ်န့ၣ်လီၤ.

²⁰ဖဲသုအီၣ်သကိးတၢ်တပူၤဃီဒ်ပှၤတဖုအသိးန့ၣ်, တမ့ၢ်သုအီၣ်ကစၢ်အတၢ်အီၣ်လၢဟါအီၣ်ဘၣ်.

²¹အဂ့ၢ်ဒ်အံၤ, ဖဲသုအီၣ်တၢ်န့ၣ်, သုဝဲတဂၤဒီးတဂၤသုအီၣ်ဆိ သုတၢ်အီၣ်ဒၣ်သုဝဲ, ဒီးတဂၤတၢ်သၣ်ဝံၤအသးဖဲအဂၤတဂၤ အီၣ်လုၣ်ကိအီလုၣ်ကပာ်တၢ်န့ၣ်လီၤ.

²²မ့ၢ်သုတအိၣ်ဒီးသုဟံၣ်သုဃီဒၣ်သုဝဲလၢသုကအီၣ်တၢ် အီတၢ်လၢအပူၤဘၣ်ဧါ. မ့တမ့ၢ်ဘၣ်ဒီး, မ့ၢ်သုကကွၢ်တလီၤယွၤအတၢ်အိၣ်ဖှိၣ်, ဒီးဒုးမဲာ်ဆှးပှၤလိၣ်ဘၣ်တၢ်မၤစၢၤတဖၣ်န့ၣ်ဧါ. ဘၣ်ဃးဒီးတၢ်တမံၤအံၤအဂ့ၢ်န့ၣ်မ့ၢ်သုမုၢ်လၢ်လၢယကစံး ယဲဒ်လဲၣ်. မ့ၢ်ယကစံးထီၣ်ပတြၢၤသုဧါ. သပှၢ်ကတၢၢ်ယတမၤဘၣ်.

²³အဂ့ၢ်ဒ်အံၤ, ယဒိးန့ၢ်ဘၣ်တ့ၢ်ယဲလၢကစၢ်အအိၣ်, တၢ်သိၣ်လီၤသီလီၤလၢယဟ့ၣ်လီၤကဒီးဆူသုအိၣ်တဆီ, လၢအမ့ၢ်ဝဲ, ကစၢ်ယ့ၣ်ၡူးဖဲမုၢ်တနၤလၢအဝဲဘၣ်တၢ်ဆါလီၤ အီၣ်ကွံာ်အီၤန့ၣ်, ဟံးန့ၢ်ကိၣ်တလိၣ်,

²⁴ဟ့ၣ်တၢ်စံးထီၣ်ပတြၢၤဆူကစၢ်ယွၤ, စိၢ်ဘျဲးဝဲဒီးစံး, “အဝဲအံၤမ့ၢ်ယနီၢ်ခိလၢအမ့ၢ်ဝဲလၢသုဂီၢ်လီၤ. မၤတၢ်အဝဲအံၤလၢတၢ်သ့ၣ်နီၣ်ထီၣ်က့ၤယၤအဂီၢ်တက့ၢ်.”

²⁵လၢကျဲတဘိဃီန့ၣ်, အီၣ်တၢ်အီၣ်ဝံၤအလီၢ်ခံအဝဲဒၣ်ဟံးန့ၢ်လီ ခီဒီးစံးဝဲ, “လီခီအံၤ, မ့ၢ်ယွၤအတၢ်အၢၣ်လီၤအီလီၤအသီ, လၢအဘၣ်တၢ်စဲပနီၣ်ဃာ်အီၤလၢယသွံၣ်လီၤ. တဘျီလၢ်လၢ်ဖဲသုအီအီၤန့ၣ်မၤအီၤလၢတၢ်သ့ၣ်နီၣ်ထီၣ်က့ၤယၤ အဂီၢ်န့ၣ်တက့ၢ်.”

²⁶အဝဲအံၤန့ၣ်အခီပညီမ့ၢ်ဝဲ, တဘျီလၢ်လၢ်ဖဲသုအီၣ်ကိၣ် အဝဲအံၤ, ဒီးအီတၢ်လၢလီခီအဝဲအံၤအပူၤန့ၣ်, မ့ၢ်သုဘိးဘၣ်သ့ၣ်ညါ ကစၢ်အတၢ်သံအဂ့ၢ်, တုၤလီၤလၢအဝဲဒၣ်ဟဲတစုလီၤ.

²⁷လၢတၢ်န့ၣ်အဃိပှၤတဂၤလၢအအီၣ်ကစၢ်အကိၣ်, ဒီးအီတၢ်လၢအလီခီပူၤလၢကျဲလၢအမၤဟးဂီၤအဝဲဒၣ် အလၤကပီၤန့ၣ်, အဝဲဒၣ်မၤကမၣ်ဘၣ်ကစၢ်အနီၢ်ခိဒီးအသွံၣ်လီၤ.

²⁸မ်ဒ်န့ၣ်ဒီး, ပှၤကိးဂၤဒဲးကြၢးသမံသမိးဆိလီၤအသးဝံၤအလီၢ်ခံ, အီၣ်အဝဲန့ၣ်ဒီးအီတၢ်လၢလီခီအဝဲန့ၣ်အပူၤလီၤ.

²⁹အဂ့ၢ်ဒ်အံၤ, အဝဲဒၣ်မ့ၢ်တသ့ၣ်ညါတၢ်အခီပညီဘၣ်ဃးဒီး ကစၢ်အနီၢ်ခိဖဲအအီၣ်ကိၣ်ဒီးအီတၢ်လၢလီခီအပူၤန့ၣ်, အဝဲဒၣ်ဒုးတုၤလီၤတၢ်စံၣ်ညီၣ်လၢအနီၢ်ကစၢ်ဒၣ်ဝဲအလိၤဖဲ အအီၣ်တၢ်ဒီးအီတၢ်အဆၢကတီၢ်န့ၣ်လီၤ.

³⁰လၢတၢ်ဂ့ၢ်အဝဲန့ၣ်အဃိ, သုဝဲအါဒံအါဂၤသုဂံၢ်စၢ်ဘါစၢ်, ဒီးဆူးဝဲဆါဝဲ, ဒီးတနီၤသံကွံာ်ဝဲဒၣ်န့ၣ်လီၤ.

³¹ပမ့ၢ်သမံသမိးဆိလီၤက့ၤပသးဒီး, တမ့ၢ်လၢပကဘၣ်ယွၤ အတၢ်စံၣ်ညီၣ်ဘၣ်.

³²ဘၣ်ဆၣ်ဒီးပဘၣ်တၢ်စံၣ်ညီၣ်ဒီးသိၣ်ဃီၣ်ပှၤလၢကစၢ်, ဒ်သိးပသုတဘၣ်တၢ်စံၣ်ညီၣ်ဃုာ်ပှၤတပူၤဃီဒီးဟီၣ်ခိၣ် တဂ့ၤအဂီၢ်န့ၣ်လီၤ.

³³လၢတၢ်န့ၣ်အဃိ, ယဒီပုၢ်ဝဲၢ်သ့ၣ်ဧၢ, ဖဲသုပာ်ဖှိၣ်သုသးတပူၤဃီလၢသုကအီၣ်ကစၢ်အတၢ်အီၣ် လၢဟါအီၣ်အဂီၢ်န့ၣ်, အိၣ်ခိးလိာ်သုသးတဂၤဒီးတဂၤန့ၣ် တက့ၢ်.

³⁴ဒီးပှၤတဂၤဂၤတၢ်မ့ၢ်သၣ်ဝံၤအသးန့ၣ်, ကြၢးအီၣ်တၢ်လၢဟံၣ်, ဒ်သိးသုတဘၣ်ကစၢ်ယွၤအတၢ်စံၣ်ညီၣ်ဖဲသုအိၣ်ဖှိၣ်သကိး အဆၢကတီၢ်တဂ့ၤအဂီၢ်လီၤ. မ့မ့ၢ်တၢ်ဂ့ၢ်တၢ်ကျိၤအဂၤတဖၣ်န့ၣ်, ယကကွၢ်သုးကျဲၤကတိၤပျီက့ၤယဲလၢအဂ့ၢ်ဖဲယဟဲအဆၢ ကတီၢ်လီၤ.