Read S'gaw Karen 1 ကရံၣ်သူး 12 Bible Online

1 ကရံၣ်သူး 12 - S'gaw Karen bible

1 ကရံၣ်သူး 12

¹ခဲကနံၣ်အံၤ, ဘၣ်ဃးဒီးတၢ်လၢသုကွဲးတ့ၢ်သုဝဲလၢသးစီဆှံ အတၢ်ဟ့ၣ်အဂ့ၢ်န့ၣ် ယသးအိၣ်လၢသုကသ့ၣ်ညါတၢ်မ့ၢ်တၢ်တီဘၣ်ဃးဒီး အဝဲသ့ၣ်အဂ့ၢ်လီၤ. ယဒီပုၢ်ဝဲၢ်သ့ၣ်ဧၢ,

²သုသ့ၣ်ညါသုဝဲလၢဖဲသုမ့ၢ်ဒံးပှၤသူခိၣ်ဖိအဆၢကတီၢ်န့ၣ်, သုဘၣ်တၢ်ဆှၢဖျိးသုလၢကျဲအါဘိအပူၤဆူတၢ်ဘါတၢ်ဂီၤ တၢ်ဖီၣ်လၢအသးသမူတအိၣ်တဖၣ်န့ၣ်လီၤ.

³ယအဲၣ်ဒိးသုကသ့ၣ်ညါလၢပှၤလၢယွၤအသးစီဆှံဆှၢအီၤ တဂၤန့ၣ်ကစံးဝဲ, “မ်ယ့ၣ်ၡူးဘၣ်တၢ်ဆိၣ်အၢတက့ၢ်” န့ၣ် တသ့ဘၣ်. ဒီးမ့တမ့ၢ်လၢပှၤတဂၤဘၣ်တၢ်ဆှၢအီၤလၢသးစီဆှံန့ၣ်, ပှၤအဝဲန့ၣ်အၢၣ်လီၤအီလီၤလၢ “ယ့ၣ်ၡူးမ့ၢ်ကစၢ်” န့ၣ်တသ့ဘၣ်.

⁴သးစီဆှံအတၢ်ဟ့ၣ်န့ၣ်အိၣ်ဝဲဒၣ်အါကလုာ်အါမံၤ, ဘၣ်ဆၣ်ဒီးပှၤလၢအဟ့ၣ်တၢ်န့ၣ်မ့ၢ်ဝဲသးစီဆှံတဂၤဃီလီၤ.

⁵တၢ်ဖံးတၢ်မၤလၢယွၤအဂီၢ်န့ၣ်အကျဲအိၣ်ဝဲအါဘိ, ဘၣ်ဆၣ်ဒီးမ့ၢ်တၢ်ဖံးတၢ်မၤလၢကစၢ်တဂၤဃီအဂီၢ်လီၤ.

⁶တၢ်သ့တၢ်ဘၣ်လၢအဘၣ်ဃးဒီးတၢ်ဖံးတၢ်မၤတၢ်လၢယွၤ အဂီၢ်န့ၣ်, အိၣ်ဝဲဒၣ်အါကလုာ်အါမံၤ, ဘၣ်ဆၣ်ဒီးပှၤလၢ အဟ့ၣ်တၢ်သ့တၢ်ဘၣ်ဆူပှၤတဂၤဘၣ်တဂၤလၢအကမၤ တၢ်ဖံးတၢ်မၤလီၤဆီဆီတမံၤမံၤန့ၣ်, မ့ၢ်ဒၣ်ကစၢ်ယွၤတဂၤ ဃီလီၤ.

⁷သးစီဆှံအတၢ်အိၣ်ဝဲလၢပှၤသိးပှၤကျါန့ၣ်, ဘၣ်တၢ်ဒုးနဲၣ်ဖျါထီၣ်အီၤလၢကျဲတဘိဘိလၢပှၤတဂၤ စုာ်စုာ်အပူၤ, လၢပှၤကိးဂၤဒဲးအတၢ်ဂ့ၤအဂီၢ်လီၤ.

⁸သးစီဆှံဟ့ၣ်ပှၤတဂၤတၢ်ကစီၣ်လၢအလၢပှဲၤဒီးတၢ်ကူၣ်ဘၣ်ကူၣ် သ့, ဖဲပှၤတဂၤဒၣ်ဘၣ်တၢ်ဟ့ၣ်အီၤတၢ်ကစီၣ်လၢပှဲၤဒီး တၢ်သ့ၣ်ညါနၢ်ပၢၢ်, လၢသးစီဆှံတဂၤဃီလီၤ.

⁹သးစီဆှံတဂၤဃီဟ့ၣ်ပှၤတဂၤလၢတၢ်စူၢ်တၢ်နာ်, ဒီးပှၤတဂၤဒၣ်လၢတၢ်စိတၢ်ကမီၤဘၣ်ဃးဒီးတၢ်မၤဘျါက့ၤ တၢ်လီၤ.

¹⁰သးစီဆှံဟ့ၣ်ပှၤတဂၤတၢ်စိတၢ်ကမီၤလၢအကမၤတၢ်လီၤလးတဖၣ်, ပှၤအဂၤတဂၤ, တၢ်ဟ့ၣ်ဘၣ်ဃးတၢ်ကတိၤတၢ်လၢဝံအကျိာ်, ဒီးပှၤတဂၤဒၣ်တၢ်သ့တၢ်ဘၣ်လၢအကပဲာ်ဖးနီၤဖးတၢ်ဟ့ၣ်တဖၣ်လၢ အဟဲလၢသးစီဆှံအအိၣ်ဒီးတၢ်ဟ့ၣ်တဖၣ်လၢအတဟဲလၢသးစီဆှံ အအိၣ်န့ၣ်အတၢ်လီၤဆီလီၤ. ဆူပှၤတဂၤအအိၣ်န့ၣ်, အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ်တၢ်စံး ကတိၤလၢကျိာ်လၢပှၤတနၢ်ပၢၢ်အီၤတဖၣ်, ဒီးဆူပှၤတဂၤဒၣ် အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ် တၢ်စံးကတိၤလၢကျိာ်လၢပှၤတနၢ်ပၢၢ်ဘၣ်တဖၣ်အခီပညီန့ၣ်လီၤ.

¹¹ဘၣ်ဆၣ်ဒီး, ပှၤလၢအမၤတၢ်သ့ၣ်တဖၣ်အံၤခဲလၢာ်န့ၣ်, မ့ၢ်ဝဲသးစီဆှံတဂၤဃီလီၤ. အဝဲဒၣ်ဟ့ၣ်ပှၤတဂၤဘၣ်တဂၤလၢတၢ်ဟ့ၣ်လီၤဆီတမံၤဒ် အသးအိၣ်မၤဝဲအသိးလီၤ.

¹²ခရံာ်လီၤဂာ်ဒ်နီၢ်ခိထဲတဂၤဃီလၢအအိၣ်ဒီးက့ၢ်ဂီၤအါမံၤလီၤ. အဝဲဒၣ်ဘၣ်တၢ်ဒုးအိၣ်ထီၣ်အီၤအိၣ်ဒီးက့ၢ်ဂီၤအါမံၤဘၣ်ဆၣ် ဒီး, မ့ၢ်ဒၣ်နီၢ်ခိတဂၤဃီလီၤ.

¹³လၢကျဲတဘိဃီန့ၣ်, ပဝဲကိးနီၢ်ဂၤဒဲး, ပှၤယူဒၤဖိမ့ၢ်ဂ့ၤ, ပှၤကလုာ်ဂၤမ့ၢ်ဂ့ၤ, ကုၢ်မ့ၢ်ဂ့ၤ, ပှၤသဘျ့မ့ၢ်ဂ့ၤ, ပဘၣ်တၢ်ဒိးဘျၢတ့ၢ်ပှၤဆူနီၢ်ခိတဂၤဃီလၢသးစီဆှံတဂၤဃီ, ဒီးပဝဲကိးဂၤဒဲးပဘၣ်တၢ်ဟ့ၣ်တ့ၢ်ပှၤသးစီဆှံတဂၤဃီ လၢပကအီအီၤအဂီၢ်န့ၣ်လီၤ.

¹⁴အဂ့ၢ်ဒ်အံၤ, နီၢ်ခိအနီၢ်ကစၢ်ဒၣ်ဝဲတဘၣ်တၢ်ဒုးအိၣ်ထီၣ်အီၤအိၣ်ဒီးက့ၢ်ဂီၤထဲ တမံၤဧိၤဘၣ်, မ့မ့ၢ်က့ၢ်ဂီၤအါမံၤလီၤ.

¹⁵ခီၣ်တခီမ့ၢ်စံးဝဲ, “ယတမ့ၢ်စုတခီအဃိယတဘၣ်ထွဲဒီးနီၢ်ခိဘၣ်” သနာ်က့ကဘၣ်ထွဲဒံးဒၣ်တၢ်လၢနီၢ်ခိဒ်က့ၢ်ဂီၤတမံၤန့ၣ်လီၤ.

¹⁶ဒီးနၢ်တခီမ့ၢ်စံး, “ယတမ့ၢ်မဲာ်ချံတခီအဃိ, ယတဘၣ်ထွဲဒီးနီၢ် ခိဘၣ်” သနာ်က့ကဘၣ်ထွဲဒံးဒၣ်တၢ်လၢနီၢ်ခိ, ဒ်က့ၢ်ဂီၤတမံၤ န့ၣ်လီၤ.

¹⁷နီၢ်ဒီဂၤညါမ့မ့ၢ်ဒၣ်မဲာ်ချံတတိၣ်န့ၣ်ကနၢ်ဟူတၢ်လၢကျဲဒ်လဲၣ်. ဒီးမ့မ့ၢ်ဒၣ်နၢ်တခီန့ၣ်ကနၢဘၣ်တၢ်လၢကျဲဒ်လဲၣ်.

¹⁸ဘၣ်ဆၣ်ဒီးဒ်တၢ်မၤအသးအသိးန့ၣ်, ကစၢ်ယွၤပာ်က့ၢ်ဂီၤလီၤဆီတမံၤဘၣ်တမံၤလၢနီၢ်ခိအလိၤဒ် အသးအိၣ်မၤဝဲအသိးလီၤ.

¹⁹နီၢ်ခိမ့မ့ၢ်က့ၢ်ဂီၤထဲတမံၤဧိၤဒီး, နီၢ်ခိတအိၣ်လၢၤဘၣ်.

²⁰ဒ်တၢ်မၤအသးအသိးန့ၣ်, က့ၢ်ဂီၤအိၣ်ဝဲဒၣ်အါမံၤဘၣ်ဆၣ်နီၢ်ခိအိၣ်ထဲတဂၤဧိၤလီၤ.

²¹လၢတၢ်န့ၣ်အဃိ, မဲာ်ချံစံးဘၣ်စု, “ယတလိၣ်ဘၣ် နၤဘၣ်” န့ၣ်တသ့ဘၣ်. ဒ်န့ၣ်အသိးခိၣ်စံးဘၣ်ခီၣ်, “ခဲကနံၣ်အံၤ, ယတလိၣ်ဘၣ်နၤဘၣ်” န့ၣ်တသ့ဘၣ်.

²²အခိၣ်တလိာ်, နီၢ်ခိအက့ၢ်အဂီၤတဖၣ်လၢအအိၣ်ဖျါဒ် အမ့ၢ်တၢ်ဂံၢ်စၢ်ဘါစၢ်တဖၣ်န့ၣ်, မ့ၢ်တအိၣ်ဒီးပအိၣ်တသ့ဘၣ်.

²³ဒီးက့ၢ်ဂီၤလၢပဆိကမိၣ်အလုၢ်အပှ့ၤတအိၣ်ကဲၣ်ဆိးတဖၣ်န့ၣ်, မ့ၢ်က့ၢ်ဂီၤတဖၣ်လၢပကတဲာ်ကတီၤဒီးမၤဘၣ်အီၤလၢတၢ်ပလီၢ် ပဒီဒိၣ်ဒၣ်တၢ်တက့ၢ်, ဖဲအက့ၢ်အဂီၤတဖၣ်လၢအတအိၣ်ဖျါဂ့ၤကဲၣ်ဆိး တဖၣ်န့ၣ်ပကတဲာ်ကတီၤဒီးမၤဘၣ်အီၤလၢတၢ်လီၤတံၢ်လီၤ ဆဲးလီၤဆီဒၣ်တၢ်အပူၤလီၤ.

²⁴မ့မ့ၢ်က့ၢ်ဂီၤလၢအဃံလၤဒိၣ်န့ၢ်အီၤတဖၣ်, တလိၣ်ဘၣ်တၢ်ကတဲာ်ကတီၤဒီးတၢ်အံးတၢ်ကွၢ်လီၤဆီဒ်အံၤ အသိးဘၣ်. ကစၢ်ယွၤအနီၢ်ကစၢ်ဒၣ်ဝဲပာ်ဖှိၣ်နီၢ်ခိအက့ၢ် အဂီၤလၢကျဲတဘိဒ်သိးအကဟ့ၣ်တၢ်လၤကပီၤဒိၣ်ဒၣ်တၢ် တက့ၢ်ဆူက့ၢ်ဂီၤလၢအလိၣ်ဘၣ်တၢ်လၤကပီၤဒ်န့ၣ်အသိး တဖၣ်လီၤ.

²⁵ဒီးလၢတၢ်န့ၣ်အဃိ, တၢ်လီၤမုၢ်လီၤဖးတအိၣ်ဝဲလၢနီၢ်ခိအပူၤ ဘၣ်. မ့မ့ၢ်, က့ၢ်ဂီၤတဖၣ်ခဲလၢာ်အိၣ်ဒီးတၢ်ကွၢ်တၢ်လၢတမံၤဒီး တမံၤအဂီၢ်ပှဲၤသိးသိးလီၤ.

²⁶နီၢ်ခိအက့ၢ်အဂီၤတမံၤမ့ၢ်တူၢ်ဘၣ်တၢ်ဒီး, က့ၢ်ဂီၤအဂၤခဲလၢာ်တူၢ်ဘၣ်ဃုာ်တၢ်ဒီးအီၤ, က့ၢ်ဂီၤတမံၤမ့ၢ်ဘၣ်တၢ်စံးထီၣ်ပတြၢၤအီၤဒီး က့ၢ်ဂီၤအဂၤတဖၣ်ခဲလၢာ်ဒိးန့ၢ်ဘၣ်ဃုာ်အဝဲဒၣ် အတၢ်သးခုလီၤ.

²⁷သုဝဲခဲလၢာ်သုမ့ၢ်ခရံာ်အနီၢ်ခိ, ဒီးသုဝဲတဂၤဘၣ်တဂၤသုမ့ၢ်အက့ၢ်အဂီၤတမံၤစုာ်စုာ်လီၤ.

²⁸လၢတၢ်အိၣ်ဖှိၣ်အပူၤန့ၣ်, ကစၢ်ယွၤပာ်ပှၤကိးဂၤဒဲးလၢအလီၢ် အကျဲဒၣ်ဝဲလီၤ. အဆိကတၢၢ်ပှၤတၢ်မၢဖိတဖၣ်, ခံဖုတဖု, ဝံဧိၤမီၣ်ဧိၤတဖၣ်, သၢဖုတဖု, သရၣ်တဖၣ်, အန့ၣ်ဝံၤပှၤလၢအမၤတၢ်လီၤလးတဖၣ်, ဒီးပိာ်ထီၣ်အခံလၢပှၤဘၣ်တၢ်ဟ့ၣ်စိဟ့ၣ်ကမီၤအီၤ လၢကမၤဘျါက့ၤတၢ်, မ့တမ့ၢ်ကမၤစၢၤပှၤဂၤတဖၣ်, မ့တမ့ၢ်ကနဲၣ်န့ၢ်အဝဲသ့ၣ်အကျဲ, မ့တမ့ၢ်ကစံးကတိၤတၢ်လၢကျိာ်လၢပှၤနၢ်တပၢၢ်တဖၣ်န့ၣ်လီၤ.

²⁹အဝဲသ့ၣ်ကိးဂၤဒဲးတမ့ၢ်ပှၤတၢ်မၢဖိတဖၣ်, မ့တမ့ၢ်ဝံဧိၤမီၣ်ဧိၤ တဖၣ်, မ့တမ့ၢ်သရၣ်တဖၣ်ဘၣ်. အဝဲသ့ၣ်ကိးဂၤဒဲးတအိၣ်ဒီးတၢ်စိတၢ်ကမီၤလၢအကမၤတၢ်လီၤလး တဖၣ်,

³⁰မ့တမ့ၢ်အမၤဘျါတၢ်ဆူးတၢ်ဆါ, မ့တမ့ၢ်ကကတိၤတၢ်လၢကျိာ်လၢပှၤနၢ်တပၢၢ်တဖၣ်, မ့တမ့ၢ်ကတဲဖျါတၢ်လၢအဘၣ်တၢ်စံးကတိၤအီၤန့ၣ်ဘၣ်.

³¹မ့မ့ၢ်ဒ်န့ၣ်ဒီး, ပာ်သုသးသပှၢ်ပှၢ်လၢတၢ်ဆၢမိၣ်န့ၢ်ဘၣ်တၢ်ဟ့ၣ်လၢ အကါဒိၣ်န့ၢ်တၢ်ဟ့ၣ်အဂၤန့ၣ်တက့ၢ်. ဘၣ်ဆၣ်ဒီး, အဂ့ၤကတၢၢ်မ့ၢ်ဝဲကျဲလၢလာ်တဘိအံၤန့ၣ်လီၤ.