Read S'gaw Karen 1 ကရံၣ်သူး 15 Bible Online

1 ကရံၣ်သူး 15 - S'gaw Karen bible

1 ကရံၣ်သူး 15

¹ဒီးခဲကနံၣ်အံၤ, ယဒီပုၢ်ဝဲၢ်သ့ၣ်ဧၢ, ယသးအိၣ်ဒုးသ့ၣ်နီၣ်ထီၣ်သုဘၣ်ဃးတၢ်သးခုကစီၣ် လၢယစံၣ်တဲၤတဲလီၤဆူသုအိၣ်, လၢသုဒိးန့ၢ်သုဝဲဒီးလၢသုတၢ်စူၢ်တၢ်နာ်အိၣ်ဆၢထၢၣ်လၢ အလိၤဂၢၢ်ဂၢၢ်ကျၢၤကျၢၤန့ၣ်လီၤ.

²အဝဲန့ၣ်မ့ၢ်တၢ်သးခုကစီၣ်, တၢ်ကစီၣ်လၢယစံၣ်တဲၤတဲလီၤ ယဲဆူသုအိၣ်န့ၣ်လီၤ. မ့တမ့ၢ်လၢသုစူၢ်သုနာ်ကလီကလီ တၢ်ဘၣ်ဒီးသုမ့ၢ်ဟံးဃာ်တၢ်သးခုကစီၣ်အံၤကျၢၤကျၢၤန့ၣ်, သုဒိးန့ၢ်ဘၣ်တၢ်အုၣ်က့ၤခီၣ်က့ၤလၢအီၤလီၤ.

³တၢ်လၢယဒိးန့ၢ်ဘၣ်တ့ၢ်ယဲန့ၣ်, ယဟ့ၣ်လီၤကဒီးယဲဆူသုအိၣ် တဆီလၢအမ့ၢ်တၢ်အကါဒိၣ်ကတၢၢ်တမံၤ, လၢခရံာ်သံလၢ ပတၢ်ဒဲးဘးအဃိဒ်အအိၣ်ကွဲးအသးလၢတၢ်ကွဲးအသးစီဆှံ အပူၤအသိး,

⁴လၢအဝဲဒၣ်ဘၣ်တၢ်ခူၣ်လီၤအီၤဒီးဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဖဲသၢသီဝံၤအလီၢ်ခံ, ဒ်အအိၣ်ကွဲးအသးလၢတၢ်ကွဲးအသးစီဆှံအပူၤအသိးန့ၣ်,

⁵လၢအဝဲဒၣ်လီၣ်ဖျါထီၣ်အသးလၢစီၤပ့းတရူးဝံၤအလီၢ်ခံလၢပှၤ တၢ်မၢဖိတဆံခံဂၤလၢာ်န့ၣ်လီၤ.

⁶အန့ၣ်ဝံၤအလီၢ်ခံအဝဲဒၣ်လီၣ်ဖျါထီၣ်အသးလၢအပျဲၢ်အဘီၣ် အါန့ၢ်အဂၤယဲၢ်ကယၤ, လၢတဘျီဃီအတီၢ်ပူၤဒီးပှၤသ့ၣ်တဖၣ် အံၤစှၤဂၤန့ၣ်, သံတ့ၢ်လံဝဲသနာ်က့အဝဲသ့ၣ်အါဒၣ်တၢ်တက့ၢ် အိၣ်မူအိၣ်ဂဲၤဒံးဝဲလီၤ.

⁷အန့ၣ်ဝံၤအလီၢ်ခံအဝဲဒၣ်လီၣ်ဖျါထီၣ်အသးလၢစီၤယၤကိာ်, ဒီးလၢခံန့ၣ်လၢပှၤတၢ်မၢဖိခဲလၢာ်လီၤ.

⁸လၢခံကတၢၢ်န့ၣ်, အဝဲလီၣ်ဖျါထီၣ်စ့ၢ်ကီးအသးလၢယၤ, လၢယမ့ၢ်လီၤဂာ်သနာ်က့ဒီးပှၤတဂၤလၢအတအိၣ်ဖျဲၣ် ထီၣ်ဘၣ်ဆၢဘၣ်ကတီၢ်ဘၣ်န့ၣ်လီၤ.

⁹အဂ့ၢ်ဒ်အံၤ, ယမ့ၢ်ပှၤအဆံးကတၢၢ်လၢပှၤတၢ်မၢဖိခဲလၢာ်အကျါ လီၤ. ယတကြၢးဘၣ်တၢ်ကိးဒၣ်လဲာ်ယၤလၢပှၤတၢ်မၢဖိတဂၤဘၣ်. အဂ့ၢ်မ့ၢ်လၢယမၤအၢမၤနးကစၢ်ယွၤအတၢ်အိၣ်ဖှိၣ်အဃိလီၤ.

¹⁰ဘၣ်ဆၣ်ဒီးခီဖျိကစၢ်ယွၤအဘျုးန့ၣ်, ယမ့ၢ်တၢ်လၢယမ့ၢ်ဒီးတၢ်ဘျုးတၢ်ဖှိၣ်လၢအဝဲဒၣ်ဟ့ၣ်တ့ၢ်ယၤန့ၣ် တကဲတၢ်ကလီကလီဘၣ်. မ့မ့ၢ်ယဖံးမၤတ့ၢ်တၢ်ဆူၣ်န့ၢ်ပှၤတၢ်မၢဖိအဂၤတဖၣ်ခဲလၢာ်လီၤ. ဘၣ်ဆၣ်ဒီးတမ့ၢ်ယတၢ်မၤဒၣ်ယဲနီၢ်နီၢ်ဘၣ်, မ့မ့ၢ်တခီမ့ၢ်ဝဲယွၤအဘျုးအဖှိၣ်ဖံးမၤတၢ်ဒီးယၤလီၤ.

¹¹လၢတၢ်န့ၣ်အဃိ, မ့ၢ်တၢ်ဟဲလၢယအိၣ်မ့ၢ်ဂ့ၤ, လၢအဝဲသ့ၣ် အအိၣ်မ့ၢ်ဂ့ၤ, အဝဲအံၤမ့ၢ်တၢ်လၢပဝဲကိးဂၤဒဲးပစံၣ်တဲၤတဲလီၤဒီး အဝဲအံၤမ့ၢ်တၢ်လၢသုစူၢ်သုနာ်န့ၣ်လီၤ.

¹²ခဲကနံၣ်အံၤ, မ့ၢ်လၢပတၢ်ကစီၣ်မ့ၢ်ဝဲခရံာ်ဘၣ်တၢ်ဒုးဂဲၤဆၢထၢၣ်သမူ ထီၣ်က့ၤအီၤလၢတၢ်သံအဃိဒီး, သုဝဲတနီၤသုစံးလၢပှၤသံတဖၣ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤန့ၣ်သ့ဝဲလၢကျဲဒ်လဲၣ်.

¹³အဝဲန့ၣ် မ့မ့ၢ်မ့တီဒီး, အခီပညီခရံာ်တဘၣ်တၢ်ဒုးဂဲၤ ဆၢထၢၣ်သမူထီၣ်အီၤဘၣ်န့ၣ်လီၤ.

¹⁴ဒီးခရံာ်မ့ၢ်တဘၣ်တၢ်ဒုးဂဲၤဆၢထၢၣ်က့ၤအီၤလၢတၢ်သံဘၣ် န့ၣ်, ပတအိၣ်ဒီးတၢ်လၢပကစံၣ်တဲၤတဲလီၤအဂီၢ်နီတမံၤ, ဒီးသုတအိၣ်ဒီးတၢ်လၢသုကစူၢ်ကနာ်အဂီၢ်နီတမံၤဘၣ်လီၤ.

¹⁵အါန့ၢ်အန့ၣ်, ပဘၣ်တၢ်ပာ်ဖျါထီၣ်ပှၤလၢပကတိၤတၢ်ကတိၤ တမ့ၢ်တတီဘၣ်ဃးဒီးယွၤအဂ့ၢ်န့ၣ်လီၤ. အဂ့ၢ်ဒ်အံၤ ပစံးလၢအဝဲဒၣ်ဒုးဂဲၤဆၢထၢၣ်က့ၤခရံာ်လၢတၢ်သံန့ၣ်လီၤ. ဘၣ်ဆၣ်ဒီး, ပှၤသံတဘၣ်တၢ်ဒုးဂဲၤဆၢထၢၣ်သမူထီၣ်အီၤအဂ့ၢ်န့ၣ် မ့မ့ၢ်မ့တီဒီး, အဝဲဒၣ်တဒုးဂဲၤဆၢထၢၣ်သမူထီၣ်က့ၤခရံာ်ဘၣ်လီၤ.

¹⁶အဂ့ၢ်ဒ်အံၤ, ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ်သမူထီၣ် က့ၤအီၤဘၣ်ဒီး, ခရံာ်တဘၣ်တၢ်ဒုးဂဲၤဆၢထၢၣ်က့ၤအီၤစ့ၢ်ကီးဘၣ်.

¹⁷ဒီးခရံာ်မ့ၢ်တဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, သုတၢ်စူၢ်တၢ်နာ်မ့ၢ်ဒၣ်တၢ်နာ်ကမူၤကမၣ်, ဒီးသုလီၤမၢ်ဒံးဒၣ်တၢ်လၢသုတၢ်ဒဲးဘးတဖၣ်အပူၤန့ၣ်လီၤ.

¹⁸အခီပညီကမ့ၢ်စ့ၢ်ကီးလၢပှၤစူၢ်က့ၤနာ်က့ၤခရံာ်လၢအသံ တ့ၢ်လံတဖၣ်န့ၣ်လီၤမၢ်ကွံာ်ဝဲဒၣ်လီၤ.

¹⁹ပတၢ်မုၢ်လၢ်လၢခရံာ်အပူၤန့ၣ်, မ့ၢ်ဂ့ၤထဲလၢတၢ်အိၣ်မူတစိၤအံၤအဂီၢ်ဒီးတအါန့ၢ်အန့ၣ်ဘၣ်ဒီး, ပကြၢးဘၣ်တၢ်သးကညီၤပှၤဒိၣ်န့ၢ်ပှၤကိးဂၤဒဲးလၢဟီၣ်ခိၣ် ဒီဘ့ၣ်ညါန့ၣ်လီၤ.

²⁰ဘၣ်ဆၣ်ဒီး, တၢ်မ့ၢ်တၢ်တီန့ၣ်မ့ၢ်ဝဲခရံာ်ဘၣ်တၢ်ဒုးဂဲၤဆၢထၢၣ် သမူထီၣ်တ့ၢ်လံအီၤဒ်အမ့ၢ်တၢ်အုၣ်ခီၣ်အသးလၢပှၤမံလၢတၢ်သံ အပူၤတဖၣ်ကဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤစ့ၢ်ကီး န့ၣ်လီၤ.

²¹အဂ့ၢ်ဒ်အံၤ, ဒ်တၢ်သံဟဲအိၣ်ထီၣ်ခီဖျိပှၤကညီတဂၤအသိး န့ၣ်, လၢကျဲတဘိဃီအဝဲန့ၣ်တၢ်ဂဲၤဆၢထၢၣ်က့ၤလၢတၢ်သံအိၣ်ထီၣ် ဝဲဒၣ်ခီဖျိပှၤကညီတဂၤန့ၣ်လီၤ.

²²အဂ့ၢ်ဒ်အံၤ, ဒ်ပှၤကိးဂၤဒဲးသံဝဲဒၣ်ခီဖျိအဝဲသ့ၣ်အတၢ် ပာ်ဖှိၣ်ဃုာ်အသးဒီးစီၤအၤဒၣ်အသိးန့ၣ်, လၢကျဲတဘိဃီ အဝဲန့ၣ်ပှၤကိးဂၤဒဲးကဘၣ်တၢ်မၤမူထီၣ်က့ၤအီၤခီဖျိ အဝဲသ့ၣ်အတၢ်ပာ်ဖှိၣ်ဃုာ်အသးဒီးခရံာ်န့ၣ်လီၤ.

²³ဘၣ်ဆၣ်ဒီးပှၤတဂၤဘၣ်တဂၤကဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤလၢအဂ့ၢ်အဝီဘၣ်ဘျီးဘၣ်ဒါန့ၣ်လီၤ. အဆိကတၢၢ်န့ၣ်, ခရံာ်, အန့ၣ်ဝံၤအလီၢ်ခံ, ဖဲအဝဲဒၣ်ဟဲ အဆၢကတီၢ်န့ၣ်, ပှၤတဖၣ်လၢအဘၣ်ထွဲဒီးအီၤန့ၣ်လီၤ.

²⁴အန့ၣ်ဝံၤဒီး, တၢ်အကတၢၢ်ကတုၤဃီၤဝဲဒၣ်လီၤ. ခရံာ်ကမၤနၢၤကွံာ်ပှၤပၢတၢ်ပြးတၢ်လၢနီၢ်သးတကပၤခဲလၢာ်, တၢ်ခိၣ်တၢ်နၢ်, ဒီးတၢ်စိတၢ်ကမီၤခဲလၢာ်ခဲဆ့ဒီးကဟ့ၣ်လီၤ က့ၤဘီမုၢ်ဆူပၢ်ကစၢ်ယွၤအစုပူၤန့ၣ်လီၤ.

²⁵အဂ့ၢ်ဒ်အံၤ, ခရံာ်ကဘၣ်ပၢတၢ်တုၤလီၤလၢကစၢ်ယွၤမၤနၢၤ ကွံာ်ဒုၣ်ဒါခဲလၢာ်ဒီးပာ်အဝဲသ့ၣ်လၢအဝဲဒၣ်အခီၣ်ဖီလာ်တစုန့ၣ်လီၤ.

²⁶ဒုၣ်ဒါလၢခံကတၢၢ်တဂၤလၢအကဘၣ်တၢ်မၤနၢၤကွံာ်အီၤန့ၣ် မ့ၢ်ဝဲဒၣ်တၢ်သံလီၤ.

²⁷အဂ့ၢ်ဒ်အံၤ, တၢ်ကွဲးအသးစံးဝဲ, “ယွၤပာ်တၢ်ခဲလၢာ်ခဲဆ့ လၢအခီၣ်ဖီလာ်လီၤ” သပှၢ်ကတၢၢ်, အိၣ်ဖျါဝဲဒၣ်ဆှံဆှံလၢတၢ်ကတိၤ, “တၢ်ခဲလၢာ်ခဲဆ့” န့ၣ်, တပၣ်ဃုာ်ဒီးကစၢ်ယွၤအနီၢ်ကစၢ်ဒၣ်ဝဲ, လၢအပာ်တၢ်ခဲလၢာ်ခဲဆ့လၢခရံာ်အဖီလာ်န့ၣ်ဘၣ်လီၤ.

²⁸ဘၣ်ဆၣ်ဒီး, ဖဲတၢ်ခဲလၢာ်ခဲဆ့ဘၣ်တၢ်ပာ်လံအီၤလၢခရံာ် အတၢ်ပၢအဖီလာ်န့ၣ်, တုၤနုၤတစု အဝဲအနီၢ်ကစၢ်ဒၣ်ဝဲ, ဖိခွါ, န့ၣ်ကပာ်လီၤအသးလၢကစၢ်ယွၤအဖီလာ်, ကစၢ်ယွၤလၢအပာ်တ့ၢ်လံတၢ်ခဲလၢာ်လၢအဝဲဒၣ်အဖီလာ်, ဒီးကစၢ်ယွၤကပၢတၢ်လၢာ်လၢာ်ဆ့ဆ့လၢတၢ်ခဲလၢာ် အဖီခိၣ်လီၤ.

²⁹ခဲကနံၣ်အံၤ, မ့မ့ၢ်ပှၤတဖၣ်လၢအဘၣ်တၢ်ဒိးဘျၢတ့ၢ်အီၤ လၢပှၤသံတဖၣ်အဂီၢ်တခီလဲၣ်. အဝဲသ့ၣ်မုၢ်လၢ်လၢအကဟ့ၣ်ထီၣ်တၢ်ဘျုးတၢ်ဖှိၣ်မနုၤတမံၤလဲၣ်. ဒ်ပှၤတနီၤစံးဝဲအသိး ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဘၣ်ဒီးဘၣ်မနုၤအဃိပှၤတဖၣ်န့ၣ်ဘၣ်တၢ်ဒိးဘျၢ အီၤလၢပှၤသံတဖၣ်အဂီၢ်လဲၣ်.

³⁰ဒီးမ့မ့ၢ်ပဝဲသ့ၣ်တဖၣ်, ဘၣ်မနုၤအဃိပဘၣ်အိၣ်လၢတၢ်လီၤပျံၤ လီၤဘၣ်ယိၣ်အပူၤကိးနၣ်ရံၣ်ကိးဆၢကတီၢ်ဒဲးန့ၣ်လဲၣ်.

³¹ယဒီပုၢ်ဝဲၢ်သ့ၣ်ဧၢ, ယဘၣ်ကွၢ်ဆၢၣ်မဲာ်ဒီးတၢ်သံကိးနံၤဒဲးလီၤ. ယတၢ်ပာ်ကဖၢလၢယသးလၢသုပူၤ, လၢပတၢ်အိၣ်မူပာ်ဖှိၣ်ဃုာ် ပသးဒီးယ့ၣ်ၡူးခရံာ်န့ၣ်, ထိၣ်ဂဲၤယၤဒ်သိးယကပာ်ဖျါထီၣ် တၢ်တမံၤအံၤန့ၣ်လီၤ.

³²ဒ်တၢ်မၤအသးအသိး, ယမ့ၢ်ဒုးတ့ၢ်တၢ်ဒီး “ဆၣ်ဖိကီၢ်ဖိ အဒူအဃိၤ” ဖဲအံၤလၢဝ့ၢ်အ့းဖ့းစူးအိၣ်ဒၣ်ဒီးပှၤကညီ အတၢ်ပာ်သူၣ်ပာ်သးတဖၣ်န့ၣ်, မ့ၢ်ယကမၤန့ၢ်တ့ၢ်ယဲတၢ်ဘျုး တၢ်ဖှိၣ်မနုၤလဲၣ်. မ့မ့ၢ်ပှၤသံတဖၣ်မ့ၢ်တဘၣ်တၢ်ဒုးဂဲၤဆၢထၢၣ် သမူထီၣ်အီၤဘၣ်ဒီး, ဒ်တၢ်ကတိၤအိၣ်ဝဲအသိး, “မ်ပကအီၣ်သကိးအီသကိးတက့ၢ်. အဂ့ၢ်ဒ်အံၤ, ခဲမုၢ်ဆ့ၣ်န့ၣ်ပကသံလီၤ.”

³³သုတဘၣ်တၢ်လီန့ၢ်သုတဂ့ၤ. “တံၤသကိးအအၢအသီတဖၣ်န့ၣ်မၤဟးဂီၤလုၢ်လၢ်သကဲာ်ပဝး အဂ့ၤအဝါလီၤ.”

³⁴ဃၣ်ကဒါက့ၤသုသးဆူသုတၢ်သ့ၣ်ညါအကြၢး အဘၣ်, ဒီးဆိကတီၢ်ကွံာ်သုကျဲအၢကျဲသီတဖၣ်န့ၣ်တက့ၢ်. လၢသုကမဲာ်ဆှးအဂီၢ်ယပာ်ဖျါယဲဒၣ်လၢ, သုဝဲတနီၤသုတသ့ၣ်ညါကစၢ်ယွၤဘၣ်န့ၣ်လီၤ.

³⁵ပှၤတဂၤကသံကွၢ်ဝဲ, “ပှၤသံကဘၣ်တၢ်ဒုးဂဲၤဆၢထၢၣ်သမူထီၣ် က့ၤအီၤလၢကျဲဒ်လဲၣ်. အဝဲသ့ၣ်ကအိၣ်ဒီးအနီၢ်ခိဒ်လဲၣ်တကလုာ် လဲၣ်.”

³⁶ပှၤသူၣ်တဆးသးတဆးဧၢ, ဖဲနဖှံလီၤတၢ်ချံလၢဟီၣ်ခိၣ် အပူၤန့ၣ်, မ့တမ့ၢ်လၢအသံဒီးတမဲထီၣ်ဝဲဘၣ်.

³⁷ဒီးတၢ်လၢနဖှံလီၤန့ၣ်, မ့ၢ်ဒၣ်တၢ်ချံလီၤ. ဘၣ်တဘၣ်ကမ့ၢ်ဘုကၠူၣ်, မ့တမ့ၢ်ဘုအဂၤတမံၤမံၤလီၤ. တမ့ၢ်တၢ်မုၢ်တၢ်ဘိအလၢအပှဲၤဒ် အကဒိၣ်ထီၣ်ဝဲလၢခံအသိးန့ၣ်ဘၣ်.

³⁸ကစၢ်ယွၤဟ့ၣ်တၢ်ချံအဝဲန့ၣ်လၢအနီၢ်ခိဒ်အဆၢဟ့ၣ်ဝဲအသိး လီၤ. အဝဲဒၣ်ဟ့ၣ်တၢ်ချံတဖျၢၣ်လၢအနီၢ်ခိဒၣ်ဝဲဒ်အကြၢးဒီး အီၤအသိးလီၤ.

³⁹ဒီးတၢ်မူတၢ်ဂဲၤတဖၣ်အဖံးအညၣ်န့ၣ်, တမ့ၢ်တၢ်ဖံးတၢ်ညၣ် တကလုာ်ဃီဘၣ်. ပှၤကူပှၤကညီအိၣ်ဒီးအဖံးအညၣ်တကလုာ် ဒၣ်ဝဲ, ဆၣ်ဖိကီၢ်ဖိတဖၣ်အိၣ်ဒီးအဖံးအညၣ်တကလုာ်ဒၣ်, ထိၣ်ဖိလံာ်ဖိ, တကလုာ်ဒၣ်, ဒီးဒ့ၣ်ဧိၤညၣ်ဧိၤ, တကလုာ်ဒၣ်လီၤ.

⁴⁰ဒီးတၢ်အမိၢ်ပှၢ်တဖၣ်လၢအဘၣ်ဃးဒီးမူခိၣ်, ဒီးတၢ်အမိၢ်ပှၢ် တဖၣ်ဘၣ်ဃးဒီးဟီၣ်ခိၣ်န့ၣ်အိၣ်ဝဲလီၤ. အတၢ်မိၢ်ပှၢ်လၢအဘၣ်ဃးဒီးမူခိၣ်အတၢ်ဃံတၢ်လၤန့ၣ်, လီၤဆီဒီးတၢ်အမိၢ်ပှၢ်လၢအဘၣ်ထွဲဒီးဟီၣ်ခိၣ် အတၢ်ဃံတၢ်လၤန့ၣ်လီၤ.

⁴¹မုၢ်အိၣ်ဒီးအတၢ်ဃံတၢ်လၤဒၣ်ဝဲ, လါအိၣ်ဒီးအတၢ်ဃံတၢ်လၤ အဂၤတကလုာ်ဒီးဆၣ်ဧိၤဖီဧိၤတဖၣ်အိၣ်ဒီးအတၢ်ဃံတၢ်လၤလီၤ ဆီဆီလီၤ. ဒီးဆၣ်တဖျၢၣ်ဒီးတဖျၢၣ်ဒၣ်လဲာ်အတၢ်ဃံတၢ်လၤ တဒ်သိးသိးဘၣ်.

⁴²ဖဲပှၤသံတဖၣ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤအကတီၢ် န့ၣ်, တၢ်ကမၤအသးဒ်အံၤလီၤ. အနီၢ်ခိလၢအဘၣ်တၢ်ခူၣ်လီၤဘါလီၤ အီၤန့ၣ်, မ့ၢ်တၢ်သံသ့လီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, မ့ၢ်တၢ်သံတသ့ဘၣ်န့ၣ်လီၤ.

⁴³ဖဲအဘၣ်တၢ်ခူၣ်လီၤဘါလီၤအီၤအဆၢကတီၢ်န့ၣ်, မ့ၢ်တၢ်လၢအလာ်အၢဒီးအဂံၢ်စၢ်ဘါစၢ်ဝဲလီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, ကဃံကလၤဒီးဂံၢ်ဆူၣ်ဘါဆူၣ်လီၤ.

⁴⁴တၢ်လၢအဘၣ်တၢ်ခူၣ်လီၤဘါလီၤအီၤန့ၣ်, မ့ၢ်နီၢ်ခိလီၤ. မ့မ့ၢ်ဖဲအဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤန့ၣ်, မ့ၢ်နီၢ်သးန့ၣ်လီၤ. ဒ်နီၢ်ခိအိၣ်စဲဃဲၤဝဲအသိးန့ၣ်နီၢ်သးကဘၣ်အိၣ်ဝဲစ့ၢ်ကီးလီၤ.

⁴⁵အဂ့ၢ်ဒ်အံၤ, တၢ်ကွဲးအသးစံးဝဲ, “ပှၤကညီအဆိကတၢၢ် တဂၤ, စီၤအၤဒၣ်ဘၣ်တၢ်တ့လီၤပာ်လီၤအီၤဒ်သးလၢအမူဝဲ,” မ့မ့ၢ်စီၤအၤဒၣ်လၢခံကတၢၢ်တဂၤမ့ၢ်ဝဲသးလၢအဟ့ၣ်တၢ်မူန့ၣ်လီၤ.

⁴⁶တၢ်လၢအဟဲဆိလၢညါကတၢၢ်န့ၣ်တမ့ၢ်နီၢ်သးဘၣ်. မ့ၢ်ဝဲနီၢ်ခိဝံၤမးနီၢ်သးန့ၣ်လီၤ.

⁴⁷စီၤအၤဒၣ်အဆိကတၢၢ်တဂၤလၢအဘၣ်တၢ်တ့အီၤလၢဟီၣ်ခိၣ်န့ၣ်, ဟဲလၢဟီၣ်ခိၣ်, မ့မ့ၢ်စီၤအၤဒၣ်ခံဂၤတဂၤန့ၣ်ဟဲလၢမူခိၣ်လီၤ.

⁴⁸ပှၤလၢအဘၣ်ထွဲဒီးဟီၣ်ခိၣ်တဖၣ်န့ၣ်, လီၤဂာ်ဒီးပှၤတဂၤလၢအဘၣ်တၢ်တ့အီၤလၢဟီၣ်ခိၣ်, မ့မ့ၢ်ပှၤလၢအဘၣ်ထွဲဒီးမူခိၣ်တဖၣ်န့ၣ်, လီၤဂာ်ဒီးပှၤတဂၤလၢအဟဲလၢမူခိၣ်လီၤ.

⁴⁹ဒီးဒ်ပဒိးဘၣ်ပှၤလၢအဘၣ်တၢ်တ့အီၤလၢဟီၣ်ခိၣ်တဂၤအက့ၢ် အဂီၤအသိးန့ၣ်, ပကဒိးဘၣ်စ့ၢ်ကီးပှၤတဂၤလၢအဟဲလၢမူခိၣ် အက့ၢ်အဂီၤစ့ၢ်ကီးန့ၣ်လီၤ.

⁵⁰တၢ်လၢယအဲၣ်ဒိးစံးယဲန့ၣ်ယဒီပုၢ်ဝဲၢ်သ့ၣ်ဧၢ, တၢ်လၢအဘၣ်တၢ်တ့အီၤလၢတၢ်ညၣ်ဒီးတၢ်သွံၣ်တၢ်ထံန့ၣ်, ဒိးန့ၢ်ဃုာ်ယွၤအဘီအမုၢ်တသ့ဘၣ်. ဒီးတၢ်လၢအသံသ့န့ၣ်, န့ၢ်ဘၣ်တၢ်သံတသ့န့ၣ် တသ့ဘၣ်.

⁵¹ဒိကနၣ်တၢ်ဂ့ၢ်ဘၣ်ဃးတၢ်မ့ၢ်တၢ်တီလၢအမ့ၢ်တၢ်ခူသူၣ် တမံၤအံၤန့ၣ်တက့ၢ်. ပတသံပဝဲကိးဂၤဒဲးဘၣ်. မ့မ့ၢ်ဖဲကွဲၤသီၣ်ထီၣ်လၢခံကတၢၢ်န့ၣ်, ပကဘၣ်တၢ်လဲလိာ်ကွံာ်ပှၤလၢတစိၢ်ဖိအတီၢ်ပူၤ, ချ့သဒံးဒ်ပှၤဖျးပှၤမဲာ်ချံအသိးန့ၣ်လီၤ. အဂ့ၢ်ဒ်အံၤ, ဖဲကွဲၤသီၣ်ထီၣ်န့ၣ် ပှၤသံတဖၣ်ကဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤ, ဒ်သိးအသုတသံလၢၤနီတဘျီတဂ့ၤ. ဒီးပဝဲကိးဒံကိးဂၤဒဲးပကဘၣ်တၢ်လဲလိာ်ကွံာ်ပှၤလီၤ.

⁵²

⁵³အဂ့ၢ်ဒ်အံၤ, တၢ်လၢအသံသ့ကဘၣ်သိးထီၣ်တၢ်လၢအသံ တသ့, ဒီးတၢ်လၢအဟးဂီၤသ့ကဘၣ်သိးထီၣ်တၢ်လၢ အဟးဂီၤတသ့ဘၣ်န့ၣ်လီၤ.

⁵⁴မၤသးဒ်န့ၣ်ဒီး ဖဲတၢ်သံသ့ဘၣ်တၢ်ဒုးသိးထီၣ်တ့ၢ်အီၤလၢတၢ် သံတသ့, ဒီးတၢ်လၢအဟးဂီၤသ့ဘၣ်တၢ်ဒုးသိးထီၣ်တ့ၢ် အီၤလၢတၢ်ဟးဂီၤတသ့န့ၣ်, တုၤနုၤတစုတၢ်ကွဲးအသးကဟဲလၢထီၣ်ပှဲၤထီၣ်ဝဲဒၣ်လီၤ.

⁵⁵“တၢ်သံဘၣ်တၢ်မၤဟးဂီၤကွံာ်အီၤလံ. တၢ်မၤနၢၤလၢဝဲပှဲၤ ဝဲလံ. တၢ်သံဧၢ, နတၢ်မၤနၢၤအိၣ်ဖဲလဲၣ်. တၢ်သံဧၢ, နတၢ်စိတၢ်ကမီၤလၢနကမၤဆူးမၤဆါတၢ်န့ၣ်အိၣ်ဖဲ လဲၣ်.”

⁵⁶တၢ်သံဒိးန့ၢ်ဘၣ်တၢ်စိကမီၤလၢအကမၤဆူးမၤဆါတၢ်လၢတၢ်ဒဲး ဘးအအိၣ်, ဒီးတၢ်ဒဲးဘးဒိးန့ၢ်တၢ်စိတၢ်ကမီၤလၢတၢ်သိၣ်တၢ်သီ အအိၣ်လီၤ.

⁵⁷ဘၣ်ဆၣ်ဒီး ကစၢ်ယွၤလၢအဟ့ၣ်ပှၤတၢ်မၤနၢၤခီဖျိပကစၢ် ယ့ၣ်ၡူးခရံာ်တဂၤန့ၣ်, မ်အဘၣ်တၢ်စံးဘျုးစံးဖှိၣ်အီၤတက့ၢ်.

⁵⁸လၢတၢ်န့ၣ်အဃိ, ယဒီပုၢ်ဝဲၢ်သးဘိသ့ၣ်ဧၢ, အိၣ်ဆၢထၢၣ်ဂၢၢ်ဂၢၢ်ကျၢၤကျၢၤတက့ၢ်. လၢသုတၢ်မၤတၢ်လၢကစၢ်အဂီၢ်အပူၤန့ၣ်, မၤသုဝဲဆူၣ်ဆူၣ်ထီဘိတဘိယူၢ်ဃီတက့ၢ်. အဂ့ၢ်ဒ်အံၤ, သုသ့ၣ်ညါသုဝဲလၢကစၢ်အတၢ်ဖံးတၢ်မၤအပူၤ, သုတၢ်ဖံးတၢ်မၤလၢအဘျုးအဖှိၣ်တအိၣ်န့ၣ်, တအိၣ်ဝဲနီတမံၤဘၣ်န့ၣ်လီၤ.