Read S'gaw Karen 1 ကရံၣ်သူး 16 Bible Online

1 ကရံၣ်သူး 16 - S'gaw Karen bible

1 ကရံၣ်သူး 16

¹ခဲကနံၣ်အံၤ, ဘၣ်ထွဲဒီးတၢ်လၢသုကွဲးတ့ၢ်သုဝဲဘၣ်ဃးတိၢ်လၢသု ကထၢဖှိၣ်အီၤလၢသုကမၤစၢၤယွၤအပှၤဂီၢ်မုၢ်ဖဲကီၢ်ယူဒၤတဖၣ် အဂီၢ်န့ၣ်, သုကဘၣ်မၤသုဝဲဒ်ယစံးဘၣ်တဲဘၣ်တ့ၢ်တၢ်အိၣ်ဖှိၣ် တဖၣ်ဖဲကီၢ်ကလၤတံလၢအကမၤဝဲန့ၣ်လီၤ.

²ကိးမုၢ်အိၣ်ဘှံးနံၤဒဲးန့ၣ်, သုဝဲတဂၤဘၣ်တဂၤ, ကဘၣ်ပာ်လီၤဆီတိၢ် တနီၤ, ဒ်အကြၢးအဘၣ်ဒီးတၢ်လၢအဒိးန့ၢ်ဘၣ်တ့ၢ်ဝဲခီဖျိ အတၢ်ဖံးတၢ်မၤအသိး, ဒီးပာ်ဖှိၣ်ပာ်စၢၤဒ်သိးဖဲယဟဲန့ၣ်, အလီၢ်သုတအိၣ်လၢယကထၢဖှိၣ်တိၢ်တဂ့ၤအဂီၢ်န့ၣ်လီၤ.

³ဖဲယဟဲဝံၤအလီၢ်ခံန့ၣ်, ယကဟ့ၣ်လီၤပှၤလၢသုဘၣ်သူၣ်ဘၣ်သးအီၤ တဖၣ်လံာ်ပရၢလၢအတဲဖျါထီၣ်အဝဲသ့ၣ်အဂ့ၢ်, ဒီးဆှၢလီၤအဝဲသ့ၣ် ဒ်သိးအကလဲၤဆှၢသုတၢ်ဟ့ၣ်ဆူဝ့ၢ်ယရူၤၡလ့ၣ်အဂီၢ်န့ၣ်လီၤ.

⁴မ့ၢ်အိၣ်ဖျါကြၢးဝဲဘၣ်ဝဲလၢယကဘၣ်လဲၤန့ၣ်, အဝဲသ့ၣ်လဲၤဃုာ် ဒီးယၤသ့ဝဲလီၤ.

⁵ယကဟဲယဲဆူသုအိၣ်ဖဲယလဲၤခီဂာ်ကီၢ်မၤက့းဒနံဝံၤအလီၢ်ခံလီၤ. အဂ့ၢ်ဒ်အံၤ, ယကဘၣ်လဲၤခီဂာ်ယဲကီၢ်မၤက့းဒနံလီၤ.

⁶ဘၣ်သ့ၣ်သ့ၣ်ယကအိၣ်ယဲဒီးသုတစိၢ်တလီၢ်, ဘၣ်တဘၣ်ကမ့ၢ်ဝဲတၢ်ဂိၢ်ခါဒီကတီၢ်, ဒီးအန့ၣ်အလီၢ်ခံ, သုမၤစၢၤယၤကသ့ဝဲလၢယကလဲၤကဒီးတၢ်ဆူညါ, ဆူတၢ်လီၢ်ဖဲယကလဲၤကဒီးယဲတပူၤလၢ်လၢ်န့ၣ်လီၤ.

⁷ယဆၢထံၣ်ဘၣ်အါထီၣ်သုတမ့ၢ်ထဲတစိၢ်ဖိလၢကျဲန့ၣ်ဘၣ်. ယဆၢအိၣ်ဘၣ်ယဲဒီးသုဖးယံာ်ဖိ, ဒ်ကစၢ်ဟ့ၣ်အခွဲးအသိးလီၤ.

⁸ယကအိၣ်ယဲဖဲအံၤလၢဝ့ၢ်အ့းဖ့းစူး, တုၤလီၤလၢဘူၣ်ယဲၢ်ဆံ အမုၢ်နံၤတစုလီၤ.

⁹ပှၤလၢအထီဒါတၢ်အိၣ်ဝဲအါဒံအါဂၤဖဲအံၤသနာ်က့, တၢ်အခွဲးအယာ်နီၢ်နီၢ်အိၣ်ဝဲလၢတၢ်ဖံးတၢ်မၤဖးဒိၣ်, ဒီးတၢ်ဖံးတၢ်မၤလၢအဘျုးအိၣ်အဂီၢ်န့ၣ်လီၤ.

¹⁰စီၤတံၤမသ့းမ့ၢ်ဟဲဘၣ်ဆူသုအိၣ်န့ၣ်, ပာ်သူၣ်ပာ်သးဒ်သိးအဝဲဒၣ်ကကလၢၢ်ဘၣ်သုတၢ် တူၢ်လိာ်မုာ်အီၤလၢသုသိးသုကျါန့ၣ်တက့ၢ်. အဂ့ၢ်ဒ်အံၤ, အဝဲဒၣ်မၤတၢ်လၢကစၢ်အဂီၢ်ဒ်ယမၤယဲအသိးလီၤ.

¹¹ပှၤတကြၢးကွၢ်တလီၤအီၤနီတဂၤဘၣ်. မ့မ့ၢ်သုကဘၣ်မၤစၢၤ အီၤဒ်သိးအဝဲဒၣ်ကလဲၤဘၣ်ကဒီးတၢ်လၢတၢ်မုာ်တၢ်ပၢၤအပူၤ, ဒ်သိးအဝဲဒၣ်ကဟဲက့ၤဆူယအိၣ်န့ၣ်လီၤ. အဂ့ၢ်ဒ်အံၤ, ယကွၢ်လၢ်အဝဲဒၣ်အကျဲ, လၢအကဟဲက့ၤဝဲဒီးဒီပုၢ်ဝဲၢ်တဖၣ်လီၤ.

¹²ခဲကနံၣ်အံၤ, ဖဲလၢအဘၣ်ဃးဒီးစီၤအပီးလိၤအဂ့ၢ်န့ၣ်, ယသဆၣ်ထီၣ်တ့ၢ်အခံဒ်သိးအကလဲၤအိၣ်သကိးသုဒီးဒီပုၢ်ဝဲၢ် အဂၤတဖၣ်, ဘၣ်ဆၣ်ဒီးအဝဲတနာ်သပှၢ်ကတၢၢ်လၢအကြၢးလဲၤဝဲခဲ ကနံၣ်အံၤဘၣ်. ဘၣ်ဆၣ်ဒီး ဖဲအဝဲဒိးန့ၢ်အခွဲးန့ၣ်, ကလဲၤဝဲဒၣ်လီၤ.

¹³အိၣ်ပလီၢ်သူၣ်ပလီၢ်သး, ဆၢထၢၣ်ကျၢၤကျၢၤလၢတၢ်စူၢ်တၢ်နာ် အပူၤ, အိၣ်ဒီးတၢ်သးဒူ, အိၣ်ဒီးတၢ်ဂံၢ်တၢ်ဘါတက့ၢ်.

¹⁴မၤသုတၢ်မၤခဲလၢာ်လၢတၢ်အဲၣ်တၢ်ကွံအပူၤတက့ၢ်.

¹⁵သုသ့ၣ်ညါဘၣ်ဃးစီၤစတ့းဖနၣ်ဒီးအဒူၣ်ဖိထၢဖိအဂ့ၢ်လီၤ. အဝဲသ့ၣ်မ့ၢ်ပှၤအဆိကတၢၢ်တဖုလၢအကဲထီၣ်ပှၤခရံာ်ဖိလၢကီၢ် အဃါယၤအပူၤ, ဒီးဟ့ၣ်လီၤတ့ၢ်အသးဆူယွၤအပှၤဂီၢ်မုၢ်တဖၣ် အတၢ်ဖံးတၢ်မၤအပူၤလီၤ. ယဃ့ကညးသု, ယဒီပုၢ်ဝဲၢ်သ့ၣ်ဧၢ,

¹⁶လၢသုကပိာ်ထွဲခိၣ်နၢ်ဒ်အံၤအသိးတဖၣ်အတၢ်ပၢတၢ်ဆှၢဒီးပှၤ တဂၤလၢ်လၢ်လၢအဖံးတၢ်မၤတၢ်ဒီးမၤယွၤအတၢ်မၤတပူၤဃီဒီး အဝဲသ့ၣ်တဖၣ်န့ၣ်အတၢ်ပၢတၢ်ဆှၢလီၤ.

¹⁷ယသူၣ်ခုသးခုယဲလၢစီၤစတ့းဖနၣ်, စီၤဖူာ်တူၤနါတူးဒီးစီၤအဃကူးတဖၣ်အတၢ်ဟဲအဃိလီၤ. အဝဲသ့ၣ်တဖၣ်မၤပှဲၤက့ၤသုလီၢ်,

¹⁸ဒီးအဝဲသ့ၣ်မၤသးဖှံထီၣ်က့ၤယသး, ဒ်အမၤဖှံထီၣ်က့ၤသုသး အသိးန့ၣ်လီၤ. ပှၤဒ်အံၤအသိးတဖၣ်ကြၢးဘၣ်တၢ်ပာ်သူၣ်ပာ်သး အီၤလီၤ.

¹⁹တၢ်အိၣ်ဖှိၣ်တဖၣ်လၢကီၢ်အၤစံအပူၤဆှၢလီၤ အတၢ်ဆၢဂ့ၤဆၢဝါဆူသုအိၣ်လီၤ. စီၤအကူလၤ, နီၢ်ပြံစကံးလၤ, ဒီးတၢ်အိၣ်ဖှိၣ်လၢအထံၣ်လိာ်အိၣ်ဖှိၣ်ဖဲအဟံၣ်ပူၤန့ၣ်, ဆှၢလီၤအတၢ်ဆၢဂ့ၤဒ်ပှၤခရံာ်ဖိတဖၣ်အသိးလၢအသးဒီဖျၢၣ်ညါလီၤ.

²⁰ဒီပုၢ်ဝဲၢ်ဖဲအံၤခဲလၢာ်ဆှၢလီၤအတၢ်ဆၢဂ့ၤဆၢဝါတဖၣ်လီၤ. ဆၢဂ့ၤဆၢဝါလိာ်သုသးတဂၤဒီးတဂၤ, လၢဒီပုၢ်ဒီဝဲၢ်အတၢ်နၢမူတက့ၢ်.

²¹လၢယစုဒၣ်ယဲန့ၣ်ယကွဲးတၢ်ကတိၤတထံၣ်အံၤ, “တၢ်ဆၢဂ့ၤဆၢဝါလၢစီၤပီလူးအအိၣ်လီၤ.”

²²ပှၤတဂၤလၢ်လၢ်လၢအတအဲၣ်ကစၢ်န့ၣ်, မ်အဘၣ်ဆိၣ်အၢတက့ၢ်. မၤရၤနၤသၤ - ပကစၢ်ဧၢ, ဟဲတက့ၢ်.

²³မ်ပကစၢ်ယ့ၣ်ၡူးအဘျုးအဖှိၣ်အိၣ်ဒီးသုတက့ၢ်.

²⁴ယတၢ်အဲၣ်တၢ်ကွံ မ်အအိၣ်ဒီးသုဝဲကိးဂၤဒဲးလၢယ့ၣ်ၡူးခရံာ် အပူၤတက့ၢ်.