Read S'gaw Karen 1 ကရံၣ်သူး 4 Bible Online

1 ကရံၣ်သူး 4 - S'gaw Karen bible

1 ကရံၣ်သူး 4

¹သုကြၢးထံၣ်ပှၤဒ်ပမ့ၢ်ခရံာ်အခ့အပှၤတဖၣ်လၢအဘၣ်တၢ်ဟ့ၣ် မူဟ့ၣ်ဒါအီၤဒ်သိးအကပၢၤဃာ်တၢ်ခူသူၣ်ဘၣ်ဃးဒီးကစၢ်ယွၤ အတၢ်မ့ၢ်တၢ်တီတဖၣ်န့ၣ်လီၤ.

²တၢ်လၢအလီၢ်အိၣ်ဝဲတမံၤဘၣ်ဃးဒီးတၢ်ခ့တၢ်ပှၤဒ်န့ၣ်အသိး တဂၤန့ၣ်, မ့ၢ်အဝဲအသးကဘၣ်တီဒီးအကစၢ်န့ၣ်လီၤ.

³ဘၣ်ဆၣ်ဒီး, ဘၣ်ဃးယဘၣ်တၢ်စံၣ်ညီၣ်ထိၣ်ကွၢ်တဲာ်ကွၢ်ယၤလၢ သုဝဲ, မ့တမ့ၢ်လၢပှၤဟီၣ်ခိၣ်ဖိအနီၢ်ထိၣ်တမံၤမံၤန့ၣ်, တမ့ၢ်တၢ်အကါဒိၣ်လၢယဂီၢ်ဘၣ်. ယနီၢ်ကစၢ်ဒၣ်လဲာ်, ယတစံၣ်ညီၣ်ထိၣ်ကွၢ်တဲာ်ကွၢ်လီၤက့ၤယသးဒၣ်ယဲဘၣ်.

⁴ယသးလၢအသ့ပဲာ်ဖးနီၤဖးတၢ်ဂ့ၤဒီးတၢ်အၢအဆၢဖျါဆှံကစီဒီလီၤ. ဘၣ်ဆၣ်ဒီးအဝဲန့ၣ်တမၤဖျါလၢယတၢ်ဒဲးဘးတအိၣ်စဲဃဲၤနီၢ်နီၢ် န့ၣ်ဘၣ်. ကစၢ်မ့ၢ်ပှၤလၢအစံၣ်ညီၣ်ထိၣ်ကွၢ်တဲာ်ကွၢ်ယၤလီၤ.

⁵လၢတၢ်န့ၣ်အဃိတချုးတၢ်ဆၢကတီၢ်အဘၣ်တုၤဃီၤဒံးဘၣ်န့ၣ်, သုတကြၢးဟ့ၣ်တၢ်စံၣ်ညီၣ်ဘၣ်ဃးဒီးပှၤနီတဂၤဘၣ်. တၢ်စံၣ်ညီၣ်လၢခံကတၢၢ်န့ၣ်, ကဘၣ်အိၣ်ခိးတုၤလၢကစၢ်ဟဲတုၤ တစုလီၤ. အဝဲကလီၣ်ဖျါထီၣ်တၢ်ခူသူၣ်အိၣ်တဒၢလၢတၢ်ခံးတၢ်နၤ အပူၤတဖၣ်ဒီးမၤဖျါထီၣ်တၢ်တိာ်ပာ်ခူသူၣ်အိၣ်လၢ ပှၤကညီအသူၣ်ကံၢ်သးလဲအပူၤန့ၣ်လီၤ. တုၤနုၤတစုပှၤကိးဂၤဒဲးကဒိးန့ၢ်တၢ်စံးထီၣ်ပတြၢၤလၢအ ကြၢးဒီးအီၤလၢကစၢ်ယွၤအအိၣ်န့ၣ်လီၤ.

⁶လၢသုတၢ်ဘျုးတၢ်ဖှိၣ်အဂီၢ်န့ၣ်, ယဒီပုၢ်ဝဲၢ်သ့ၣ်ဧၢ, ယဒုးဘၣ်ထွဲတၢ်သ့ၣ်တဖၣ်အံၤခဲလၢာ်လၢစီၤအပီးလိၤဒီးယၤလီၤ. ယသူပဝဲခံဂၤဒ်တၢ်အဒိအတဲာ်ဒ်သိးသုကဒိးန့ၢ်တၢ်မၤလိဘၣ်ဃး ဒီးတၢ်ကတိၤတထံၣ်အခီပညီန့ၣ်လီၤ. တၢ်ကတိၤတထံၣ်န့ၣ်မ့ၢ်ဝဲ, “အိၣ်မူပိာ်ထွဲတၢ်ဘျၢလၢအကြၢးအဘၣ်တက့ၢ်” န့ၣ်လီၤ. သုဝဲတဂၤမးသုတကြၢးပာ်ကဖၢလၢသုသးလၢပှၤတဂၤ အဃိဒီးကွၢ်တလီၤပှၤအဂၤတဂၤဘၣ်.

⁷မ့ၢ်မတၤတဂၤဒုးလီၤဆီနၤဒီးပှၤအဂၤတဖၣ်လဲၣ်. တၢ်ခဲလၢာ်ခဲဆ့လၢအအိၣ်ဒီးသုန့ၣ်ကစၢ်ယွၤဟ့ၣ်သုတမ့ၢ်ဘၣ်ဧါ. မ့မ့ၢ်ဒ်န့ၣ်ဒီး, သုကတိၤပာ်ကဖၢလၢသုသးဒ်တၢ်အိၣ်ဒီး သုတမ့ၢ်တၢ်ဟ့ၣ်န့ၣ်ကသ့ဝဲလၢကျဲဒ်လဲၣ်.

⁸တၢ်လၢသုလိၣ်ဘၣ်န့ၣ်သုဒိးန့ၢ်ဘၣ်တ့ၢ်လံသုဝဲခဲလၢာ်လံဧါ. မ့ၢ်သုထူးထီၣ်တီၤထီၣ်တ့ၢ်လံသုဝဲလံဧါ. ပဝဲတဖၣ်ပတမ့ၢ် စီၤပၤသနာ်က့, မ့ၢ်သုကဲထီၣ်တ့ၢ်လံစီၤပၤတဖၣ်လံဧါ. ဒီးယဆၢလၢသုကမ့ၢ်နီၢ်နီၢ်စီၤပၤတဖၣ်, ဒ်သိးပမ့ၢ်စီၤပၤတပူၤဃီဒီးသုကသ့ဝဲအဂီၢ်လီၤ.

⁹အဂ့ၢ်ဒ်အံၤ, အိၣ်ဖျါဘၣ်ယၤလၢကစၢ်ယွၤဟ့ၣ်တ့ၢ်ပဝဲပှၤတၢ်မၢဖိ တဖၣ်, တၢ်လီၢ်လၢခံကတၢၢ်ဒ်ပှၤတဖၣ်လၢအဒိးဘၣ်တၢ်စံၣ်ညီၣ် ဘၢသံအီၤလၢပှၤဂီၢ်မုၢ်ဂီၢ်ပၤအမဲာ်ညါ, ဒ်သိးအကကဲထီၣ်တၢ်ကွၢ်ကီအလီၢ်လၢဟီၣ်ခိၣ်ဒီဘ့ၣ်, မူခိၣ်ကလူးခဲလၢာ်, ဒီးပှၤဟီၣ်ခိၣ်ဖိခဲလၢာ်အမဲာ်ညါအဂီၢ်န့ၣ်လီၤ.

¹⁰လၢခရံာ်အဂီၢ်ပမ့ၢ်ပှၤသူၣ်တဆးသးတဆး, ဘၣ်ဆၣ်သုဝဲသုကူၣ်ဘၣ်ကူၣ်သ့လၢသုတၢ်ပာ်ဖှိၣ်ဃုာ်သုသး တပူၤဃီဒီးခရံာ်အပူၤလီၤ. ပဝဲပဂံၢ်စၢ်ဘါစၢ်, ဘၣ်ဆၣ်သုဂံၢ်ဆူၣ်ဘါဆူၣ်လီၤ. ပဘၣ်တၢ်ကွၢ်တလီၤပှၤဘၣ်ဆၣ်သုဒိးဘၣ်တၢ်မၤလၤကပီၤသုလီၤ.

¹¹တုၤဃီၤခဲကနံၣ်အံၤ, ပသၣ်ဝံၤလီၤဒိဒီးတၢ်သူပသးလၢထံလီၤ. ပကူပသိးတၢ်ယာ်ဘုၣ်ယာ်ဖျ့, တၢ်တီၢ်ပှၤဝ့ၤပှၤ, ပဟးဝ့ၤဝီၤဆူအံၤဆူဘး

¹²ပလီၤဘှံးလီၤတီၤလၢပဖံးတၢ်မၤတၢ်ဆူၣ်အဃိလီၤ. ဖဲပဘၣ်တၢ်ဆိၣ်အၢပှၤန့ၣ်, ပဆိၣ်ဂ့ၤတၢ်, ဖဲပဘၣ်တၢ်မၤအၢမၤနးပှၤန့ၣ်, ပအိၣ်ဒီးတၢ်ဝံသးစူၤ,

¹³ဖဲပဘၣ်တၢ်ကတိၤဒုၣ်ဒွဲၣ်ပှၤန့ၣ်, ပစံးဆၢပဝဲလၢတၢ်ကတိၤအမုာ် တဖၣ်လီၤ. ပမ့ၢ်ဒၣ်ဟီၣ်ခိၣ်တဘ့ၣ်အံၤအတၢ်ကမှံၤတဖၣ်လီၤ. တုၤလီၤလၢဆၢကတီၢ်ခဲအံၤဒၣ်လဲာ်န့ၣ်, ပမ့ၢ်ဒၣ်ဟီၣ်ခိၣ်တဘ့ၣ်အံၤအတၢ်တဂိာ်တသီၣ်တဖၣ်လီၤ.

¹⁴ယကွဲးတၢ်အဝဲအံၤဆူသုအိၣ်, တမ့ၢ်လၢယသးအိၣ်မၤမဲာ်ဆှးသု အဃိဘၣ်. မ့မ့ၢ်တခီ, မ့ၢ်ဝဲဒ်သိးယကသိၣ်လိသီလိသုဒ်ယဖိသး ဘိဒၣ်ဝဲတဖၣ်အသိးန့ၣ်လီၤ.

¹⁵အဂ့ၢ်ဒ်အံၤ, လၢသုတၢ်အိၣ်မူဒ်ခရံာ်ဖိအသိးအပူၤန့ၣ်, သုမ့ၢ်အိၣ်ဒီးပှၤသိၣ်သီပၢဆှၢသုအဂၤတကလးသနာ်က့သုပၢ် အိၣ်ဒၣ်ထဲတဂၤဧိၤလီၤ. အဂ့ၢ်ဒ်အံၤ, လၢသုတၢ်အိၣ်မူပာ်ဖှိၣ်ဃုာ်သုသးဒီးယ့ၣ်ၡူးခရံာ်အပူၤန့ၣ် ယကဲထီၣ်တ့ၢ်ယဲလၢသုပၢ်, ခီဖျိယဟဲစိာ်တၢ်သးခုကစီၣ်ဆူသုအိၣ် န့ၣ်လီၤ.

¹⁶လၢတၢ်န့ၣ်အဃိယဃ့ကညးသုလၢသုကကွၢ်လိယၤလီၤ.

¹⁷လၢတၢ်တမံၤအံၤအဂီၢ်န့ၣ်, ယဆှၢလီၤယဲစီၤတံၤမသ့းဆူသုအိၣ်, အဝဲဒၣ်မ့ၢ်ယဖိသးဘိဒၣ်ယဲလၢခရံာ်အပူၤ, လၢအသးတီဝဲတဂၤ လီၤ. အဝဲဒၣ်ကဒုးသ့ၣ်နီၣ်ထီၣ်သုတၢ်ဘျၢတဖၣ်လၢယပိာ်ထွဲယဲ လၢတၢ်အိၣ်မူအသီဘၣ်ဃးတၢ်ပာ်ဖှိၣ်ထီၣ်ဃုာ်သးတဖျၢၣ်ဃီလၢ ယ့ၣ်ၡူးခရံာ်အပူၤ, ဒီးလၢယသိၣ်လီၤသီလီၤယဲလၢအဂ့ၢ်လၢတၢ်အိၣ်ဖှိၣ်ကိးဖုဒဲး အပူၤ, သကုၤဆးဒးလီၤ.

¹⁸သုဝဲတနီၤသုကဲထီၣ်တ့ၢ်ပှၤသးထီၣ်ထီ, အဂ့ၢ်မ့ၢ်လၢသုဆိကမိၣ် တ့ၢ်သုဝဲလၢယတဟဲအိၣ်သကိးသုဘၣ်အဃိလီၤ.

¹⁹ဘၣ်ဆၣ်ဒီး ကစၢ်ယွၤမ့ၢ်ဘၣ်အသးကစီဒီန့ၣ်, ယကဟဲဆူသုအိၣ်လၢ အဆိအချ့ဒီးဖဲဆၢကတီၢ်အဝဲန့ၣ်ယသ့ၣ်ညါဘၣ်လၢယနီၢ်ကစၢ် ဒၣ်ယဲ, ဘၣ်ဃးတၢ်စိတၢ်ကမီၤလၢအအိၣ်ဒီးပှၤပာ်ကဖၢလၢအသး တဖၣ်အံၤ, ဒီးတမ့ၢ်ထဲအဝဲသ့ၣ်အတၢ်စံးတၢ်ကတိၤတဖၣ်ဧိၤဘၣ်လီၤ.

²⁰အဂ့ၢ်ဒ်အံၤ, ယွၤအဘီအမုၢ်တမ့ၢ်တၢ်လၢအဘၣ်ဃးဒီးတၢ်စံးတၢ်ကတိၤ တဖၣ်ဘၣ်. မ့မ့ၢ်, ဘၣ်ဃးဒီးတၢ်စိတၢ်ကမီၤတခီလီၤ.

²¹သုအဲၣ်ဒိးဖဲလဲၣ်တမံၤလဲၣ်. မ့ၢ်ယကဘၣ်ဟဲဆူသုအိၣ်လၢနီၣ်ဖျ့ တဘိဧါ. မ့တမ့ၢ်ဘၣ်ဒီးလၢသးအိၣ်ဒီးတၢ်အဲၣ်တၢ်ကွံဒီး တၢ်သူၣ်ဂ့ၤသးဝါတခီလဲၣ်.