Read S'gaw Karen 1 ကရံၣ်သူး 6 Bible Online

1 ကရံၣ်သူး 6 - S'gaw Karen bible

1 ကရံၣ်သူး 6

¹ဖဲသုဝဲအကျါတဂၤသုအိၣ်ဒီးတၢ်ဂ့ၢ်လိာ်ဘှီလိာ်လၢ ပှၤခရံာ်ဖိသကိးပှၤခရံာ်ဖိဒ်သုတဂၤအသိးန့ၣ်, ဒ်သိးတၢ်ဂ့ၢ်တၢ်ကျိၤကဘၣ်တၢ်စံၣ်ညီၣ်န့ၢ်အီၤအဂီၢ် အဝဲတလဲၤဝဲဆူယွၤအပှၤကညီတဖၣ်အအိၣ်ဘၣ်. ဒီးလဲၤဝဲဆူပှၤသူခိၣ်ဖိစံၣ်ညီၣ်ကွီၢ်တဖၣ်အအိၣ်ဘူၣ်ဝဲလၢ ကျဲဒ်လဲၣ်.

²မ့ၢ်သုတသ့ၣ်ညါလၢယွၤအပှၤဂီၢ်မုၢ်ကစံၣ်ညီၣ်ဟီၣ်ခိၣ်ဘၣ်ဧါ. မ့မ့ၢ်ဒ်န့ၣ်ဒီး, သုမ့ၢ်ဘၣ်စံၣ်ညီၣ်ဟီၣ်ခိၣ်န့ၣ်, မ့ၢ်သုတအိၣ်ဒီး တၢ်သ့တၢ်ဘၣ်လၢသုကစံၣ်ညီၣ်တၢ်ဂ့ၢ်ဆံးကံာ်ဆံးကိာ်ဖိ တဖၣ်ဘၣ်ဧါ.

³မ့ၢ်သုတသ့ၣ်ညါလၢပကဘၣ်စံၣ်ညီၣ်မူခိၣ်ကလူးတဖၣ် ဘၣ်ဧါ. မ့မ့ၢ်ဒ်န့ၣ်ဒီးတၢ်ဘၣ်ဃးလၢတၢ်အိၣ်မူတစိၤအံၤန့ၣ်, ကအါန့ၢ်အန့ၣ်တက့ၢ်ဆံးဒိၣ်လဲၣ်.

⁴တၢ်ဂ့ၢ်တၢ်ကျိၤဒ်န့ၣ်အသိးတဖၣ်မ့ၢ်အိၣ်ထီၣ်န့ၣ်, မ့ၢ်သုကဆှၢထီၣ်အီၤဒ်သိးအကဘၣ်တၢ်စံၣ်ညီၣ်အီၤလၢပှၤ တအိၣ်ဒီးအလီၢ်အလၤလၢတၢ်အိၣ်ဖှိၣ်အပူၤတဖၣ်န့ၣ်ဧါ.

⁵သုကြၢးမဲာ်ဆှးမးလီၤ. သပှၢ်ကတၢၢ်, လၢသုကျါန့ၣ်ပှၤကူၣ်ဘၣ်ကူၣ်သ့ကအိၣ်အစှၤ ကတၢၢ်တဂၤလၢအကစံၣ်ညီၣ်တၢ်ဂ့ၢ်လိာ်ဘှီလိာ် လၢခရံာ်ဖိသကိးခရံာ်ဖိအဘၢၣ်စၢၤကစီဒီလီၤသၢၣ်.

⁶ဘၣ်ဆၣ်ဒီး, တမ့ၢ်ဒ်န့ၣ်ဘၣ်. မ့မ့ၢ်, ပှၤခရံာ်ဖိတဂၤလဲၤဆူကွီၢ်ဘျီၣ်ဒ်သိးအကထီဒါပှၤခရံာ်ဖိ အဂၤတဂၤဒီးပျဲပှၤတစူၢ်က့ၤနာ်က့ၤတၢ်တဖၣ်စံၣ်ညီၣ်တၢ်ဂ့ၢ် တၢ်ကျိၤလီၤ.

⁷တၢ်ဂ့ၢ်တမံၤဃီအဝဲအံၤ, လၢသုအိၣ်ဒီးတၢ်လိာ်ဘၢလိာ်ကွီၢ်လၢသုဝဲကဒဲကဒဲအကျါန့ၣ်, ပာ်ဖျါထီၣ်လၢသုလီၤတိၢ်တ့ၢ်လံသုဝဲလၢာ်လၢာ်ဆ့ဆ့လံန့ၣ်လီၤ. သုမ့ၢ်ဘၣ်တၢ်မၤကမၣ်သုဒီးကဂ့ၤဒိၣ်ဒၣ်တၢ်တက့ၢ်တမ့ၢ်ဘၣ်ဧါ. သုမ့ၢ်ဘၣ်တၢ်တမျာ်သုဒီးကဂ့ၤဒိၣ်ဒၣ်တၢ်တက့ၢ်တမ့ၢ်ဘၣ်ဧါ.

⁸ဘၣ်ဆၣ်ဒီးတမ့ၢ်ဒ်န့ၣ်ဘၣ်. မ့မ့ၢ်, သုနီၢ်ကစၢ်ဒၣ်သုဝဲသုမၤကမၣ်လိာ်သုသးတဂၤဒီးတဂၤ, ဒီးတမျာ်လိာ်သုသးတဂၤဒီးတဂၤ, သုဒီပုၢ်ဝဲၢ်ဒၣ်ဝဲတဖၣ်ဒၣ်လဲာ်န့ၣ်လီၤ.

⁹သပှၢ်ကတၢၢ်, သုသ့ၣ်ညါသုဝဲလၢပှၤအၢပှၤသီတဖၣ်တဒိး န့ၢ်ဘၣ်ယွၤအဘီအမုၢ်ဘၣ်န့ၣ်လီၤ. သုတလီလီၤက့ၤသုသး တဂ့ၤ. ပှၤလၢအမၤကမၣ်မုၣ်ကမၣ်ခွါတဖၣ်, မ့တမ့ၢ်ဘါတၢ်ဂီၤ တၢ်ဖီၣ်တဖၣ်, မ့တမ့ၢ်အဲၣ်ဘၢတၢ်, မ့တမ့ၢ်အဲၣ်ပကၢၤတၢ်,

¹⁰မ့တမ့ၢ်ဟုၣ်တၢ်, မ့တမ့ၢ်သးကွံတလၢတၢ်, မ့တမ့ၢ်အီသံးအီဂာ်, မ့တမ့ၢ်ကတိၤသီၣ်ဝံသဲကလၤတၢ်လၢပှၤဂၤ အဂ့ၢ်, မ့တမ့ၢ်တမျိးတမျာ်တဖၣ်, ပှၤသ့ၣ်တဖၣ်အံၤတဒိးန့ၢ်ယွၤအဘီအမုၢ်နီတဂၤဘၣ်.

¹¹သုဝဲတနီၤသုလီၤဂာ်ဒ်န့ၣ်လီၤ. ဘၣ်ဆၣ်ဒီးသုဘၣ်တၢ်မၤကဆှီထီၣ်က့ၤသုလၢသုတၢ်ဒဲးဘး အပူၤလံ. သုဘၣ်တၢ်ပာ်စီဆှံသုလၢကစၢ်ယွၤအဂီၢ်လံ. သုဘၣ်တၢ်မၤဘၣ်လိာ်ဖိးဒ့လံသုဒီးကစၢ်ယွၤလၢကစၢ်ယ့ၣ်ၡူး ခရံာ်ဒီးလၢယွၤအသးစီဆှံလံန့ၣ်လီၤ.

¹²ပှၤတဂၤကစံးဝဲ, “ယဘၣ်တၢ်ဟ့ၣ်ယၤအခွဲးလၢယကမၤတၢ်တမံၤလၢ်လၢ်န့ၣ်လီၤ.” မ့ၢ်လံ, ဘၣ်ဆၣ်ဒီးတၢ်ကိးမံၤဒဲးတမ့ၢ်တၢ်ဂ့ၤလၢသုဂီၢ်ဘၣ်. ယစံးယဲဒၣ်သ့ဝဲလၢယဘၣ်တၢ်ဟ့ၣ်ယၤအခွဲးလၢယကမၤတၢ် တမံၤလၢ်လၢ်လီၤ. ဘၣ်ဆၣ်ဒီးယတပျဲတၢ်တမံၤမံၤဒုးကဲယၤလၢ အကုၢ်အပှၤဘၣ်.

¹³ပှၤအဂၤတဂၤကစံးဝဲ, “တၢ်အီၣ်န့ၣ်မ့ၢ်ဝဲလၢဟၢဖၢအဂီၢ်, ဒီးဟၢဖၢန့ၣ်လၢတၢ်အီၣ်အဂီၢ်လီၤ.” မ့ၢ်လံ. ဘၣ်ဆၣ်ဒီး ယွၤကမၤဟးဂီၤကွံာ်အီၤခံမံၤလၢာ်လီၤ. နီၢ်ခိန့ၣ်တမ့ၢ်လၢတၢ်ကသူအီၤလၢတၢ်မၤကမၣ်မုၣ်ကမၣ်ခွါအဂီၢ် န့ၣ်ဘၣ်. မ့မ့ၢ်လၢတၢ်ကမၤတၢ်လၢကစၢ်ယွၤအဂီၢ်, ဒီးကစၢ်ယွၤဟ့ၣ်တၢ်လၢနီၢ်ခိလိၣ်ဘၣ်ဝဲန့ၣ်လီၤ.

¹⁴ကစၢ်ယွၤဒုးဂဲၤဆၢထၢၣ်သမူထီၣ်က့ၤကစၢ်လၢတၢ်သံ, ဒီးအဝဲဒၣ်ကဒုးဂဲၤဆၢထၢၣ်သမူထီၣ်စ့ၢ်ကီးပှၤလၢအတၢ်စိ တၢ်ကမီၤလီၤ.

¹⁵သုသ့ၣ်ညါသုဝဲလၢသုနီၢ်ခိတဖၣ်မ့ၢ်ဝဲက့ၢ်ဂီၤတဖၣ်လၢ အဘၣ်ထွဲဒီးခရံာ်အနီၢ်ခိန့ၣ်လီၤ. မ့ၢ်ယကဟံးန့ၢ်က့ၢ်ဂီၤတခီလၢအဘၣ်ထွဲဒီးခရံာ်အနီၢ်ခိ ဒီးဒုးကဲထီၣ်အီၤက့ၢ်ဂီၤတခီလၢအဘၣ်ထွဲဒီးဃဲသဲမုၣ် အနီၢ်ခိန့ၣ်ဧါ. တသ့ဘၣ်.

¹⁶မ့တမ့ၢ်, ဘၣ်တဘၣ်သုတသ့ၣ်ညါလၢပှၤပိာ်ခွါတဂၤ လၢအပာ်ဖှိၣ်ဃုာ်အနီၢ်ခိဒီးဃဲသဲမုၣ်တဂၤန့ၣ်, ကဲထီၣ်ပှၤတဂၤဃီဒီးအီၤလၢနီၢ်ခိနီၢ်ခီန့ၣ်လီၤ. တၢ်ကွဲးအသးစံးဝဲဒၣ်ဖျါဖျါကစီဒီလီၤ. “ပှၤခံဂၤန့ၣ်ကကဲထီၣ်နီၢ်ခိတဂၤဃီလီၤ.”

¹⁷မ့မ့ၢ်ပှၤတဂၤလၢအပာ်ဖှိၣ်ဃုာ်အသးဒီးကစၢ်န့ၣ်, ကဲထီၣ်ပှၤတဂၤဃီဒီးအီၤလၢသူၣ်လၢသးတကပၤလီၤ.

¹⁸ဟးဆှဲးတၢ်မၤကမၣ်မုၣ်ကမၣ်ခွါတက့ၢ်. တၢ်ဒဲးဘးအဂၤတမံၤမံၤလၢပှၤကညီတဂၤမၤဝဲန့ၣ်, တမၤဘၣ်ဒိဘၣ်ထံးအနီၢ်ခိဘၣ်. မ့မ့ၢ်ပှၤတဂၤလၢအမၤ ကမၣ်မုၣ်ကမၣ်ခွါန့ၣ်, မၤဘၣ်တၢ်ဒဲးဘးထီဒါအနီၢ်ခိဒၣ်ဝဲန့ၣ်လီၤ.

¹⁹မ့ၢ်သုတသ့ၣ်ညါလၢသုနီၢ်ခိမ့ၢ်တၢ်လုၢ်ဟံၣ်ဘၣ်ဃးဒီးသး စီဆှံ, လၢအအိၣ်ဝဲဆိးဝဲလၢသုပူၤ, ဒီးဘၣ်တၢ်ဟ့ၣ်သုလၢ ယွၤန့ၣ်ဘၣ်ဧါ. သုတဘၣ်ဃးဒီးသုနီၢ်ကစၢ်ဒၣ်သုဝဲဘၣ်, မ့မ့ၢ်သုဘၣ်ဃးဒီးယွၤလီၤ.

²⁰အဝဲဒၣ်ပှ့ၤသု, ဒီးဘၣ်ဟ့ၣ်ဝဲအပှ့ၤအကလံၤလီၤ. လၢတၢ်န့ၣ်အဃိဒိးသူသုနီၢ်ခိတဖၣ်လၢယွၤအလၤကပီၤ အဂီၢ်န့ၣ်တက့ၢ်.