Read S'gaw Karen ၂ ကရံၣ်သူး 12 Bible Online

၂ ကရံၣ်သူး 12 - S'gaw Karen bible

၂ ကရံၣ်သူး 12

¹မ့တမ့ၢ်တၢ်လၢအဘျုးအိၣ်ဖှိၣ်အိၣ်သနာ်က့, ယကဘၣ် ကတိၤတၢ်ကဖၢလၢလီၤ. ဘၣ်ဆၣ်ဒီးခဲကနံၣ်အံၤယကကတိၤတၢ်ဘၣ်ဃးတၢ်ထံၣ် တၢ်လၢညါခီဒီးတၢ်လီၣ်ဖျါတဖၣ်လၢကစၢ်ဟ့ၣ်ယၤန့ၣ်လီၤ.

²ယသ့ၣ်ညါပှၤခရံာ်ဖိတဂၤလၢအပူၤကွံာ်တဆံလွံၢ်နံၣ်န့ၣ်, ဘၣ်တၢ်စိာ်ထီၣ်အီၤဆူမူခိၣ်အထီကတၢၢ်လီၤ. (တၢ်တမံၤအံၤမၤစဲဃဲၤအသးနီၢ်နီၢ်ဧါ, မ့တမ့ၢ်, မ့ၢ်အဝဲထံၣ်တၢ်လၢညါခီလဲၣ်န့ၣ်ယတသ့ၣ်ညါဘၣ်. ထဲကစၢ်ယွၤတဂၤဧိၤသ့ၣ်ညါဝဲလီၤ.)

³ယစံးကဒီးယဲ, ယသ့ၣ်ညါလၢပှၤတဂၤအံၤဘၣ်တၢ်စိာ်ထီၣ် အီၤဆူပၤရဒံစူး (ယစံးကဒီး, အဝဲအံၤမၤအသးနီၢ်နီၢ်ဧါ, မ့တမ့ၢ်မ့ၢ်တၢ်ထံၣ်လၢညါခီလဲၣ်န့ၣ်ယတသ့ၣ်ညါဘၣ်. သ့ၣ်ညါထဲကစၢ်ယွၤတဂၤဧိၤလီၤ.)

⁴ဒီးဖဲန့ၣ်အဝဲနၢ်ဟူတၢ်သ့ၣ်တဖၣ်လၢတၢ်တဲဖျါထီၣ်က့ၤ အီၤလၢတၢ်ကတိၤတသ့ဘၣ်. တၢ်သ့ၣ်တဖၣ်လၢပှၤကညီအနိးဖံးကတိၤဖျါလၢအဂ့ၢ်တသ့ ဘၣ်န့ၣ်လီၤ.

⁵မ်ဒ်န့ၣ်ဒီး, ယကတိၤတၢ်ကဖၢလၢလၢပှၤတဂၤအံၤအဂ့ၢ်, ဘၣ်ဆၣ်ဒီးယတကတိၤတၢ်ကဖၢလၢလၢယနီၢ်ကစၢ်ဒၣ်ယဲ အဂ့ၢ်ဘၣ်. ယကကတိၤဘၣ်ဃးထဲတၢ်သ့ၣ်တဖၣ်လၢအပာ်ဖျါထီၣ် ယမ့ၢ်ပှၤဂံၢ်စၢ်ဘါစၢ်ဆံးအါလဲၣ်အဂ့ၢ်န့ၣ်လီၤ.

⁶ယမ့ၢ်သးအိၣ်ကတိၤတၢ်ကဖၢလၢသနာ်က့ယတမ့ၢ်ပှၤအပျုၢ် တဂၤဘၣ်. အဂ့ၢ်ဒ်အံၤ, ကမ့ၢ်ဒၣ်ယကတိၤတၢ်မ့ၢ်တၢ်တီလီၤ. ဘၣ်ဆၣ်ဒီးယတကတိၤတၢ်ကဖၢလၢဘၣ်. အဂ့ၢ်မ့ၢ်လၢယတအဲၣ်ဒိးပှၤတဂၤဂၤကဆိကမိၣ်ဒိၣ်ယၤ, ဒိၣ်န့ၢ်ဒံးအဆိကမိၣ်တ့ၢ်ဝဲ, ခီဖျိအဝဲထံၣ်ဘၣ်တ့ၢ်တၢ်လၢယမၤဒီးနၢ်ဟူဘၣ်တ့ၢ်တၢ်လၢ ယစံးကတိၤအီၤဘၣ်အဃိန့ၣ်လီၤ.

⁷ဘၣ်ဆၣ်ဒီး, ဒ်သိးတၢ်ကတြီဃာ်ယတၢ်ပာ်ထီၣ်ထီယသးအါ တလၢခီဖျိတၢ်လီၤတိၢ်လီၤဆီအါမံၤလၢယထံၣ်ဘၣ်ယဲန့ၣ်, ယဘၣ်တၢ်ဟ့ၣ်ယၤနီၢ်ခိအတၢ်ဆါလၢအဆါမးတမံၤ, တၢ်လၢအကဲထီၣ်မုၣ်ကီၤလံၢ်အကလူးလၢအကတီၢ် ယၤဒီးတြီဃာ်ယတၢ်ပာ်ထီၣ်ထီယသးန့ၣ်လီၤ.

⁸လၢသၢဘျီအတီၢ်ပူၤယဃ့ဘါထုကဖၣ်ကစၢ်လၢတၢ်တမံၤအံၤ အဂ့ၢ်ဒီးဃ့အီၤဒ်သိးအကထုးကွံာ်အီၤလီၤ.

⁹ဘၣ်ဆၣ်ဒီးအဝဲအတၢ်စံးဆၢမ့ၢ်ဝဲ, “ယဘျုးယဖှိၣ်လၢလံလၢ နဂီၢ်လံ. အဂ့ၢ်ဒ်အံၤ, ယတၢ်စိတၢ်ကမီၤအသဟီၣ်ဆူၣ်ဒိၣ်ကတၢၢ်ဖဲနဂံၢ်နဘါစၢ်နဲန့ၣ် လီၤ.” မ့မ့ၢ်ဒ်န့ၣ်ဒီးယသးခုအဒိၣ်ကတၢၢ်လၢယကပာ်ကဖၢလၢ ယသးလၢယတၢ်ဂံၢ်စၢ်ဘါစၢ်တဖၣ်, ဒ်သိးယကကလၢၢ်ဘၣ်ခရံာ် အတၢ်စိကမီၤအတၢ်ကဟုကယာ်ယၤအဂီၢ်န့ၣ်လီၤ.

¹⁰ယသူၣ်မံယသးမံယဲလၢတၢ်ဂံၢ်စၢ်ဘါစၢ်တဖၣ်, တၢ်ကတိၤဒုၣ်ဒွဲၣ်ကတိၤတရီတပါတဖၣ်, တၢ်နးတၢ်ဖှီၣ် တဖၣ်, တၢ်မၤအၢမၤနးတဖၣ်ဒီးတၢ်ကီတၢ်ခဲတဖၣ်အပူၤလၢ ခရံာ်အဃိန့ၣ်လီၤ. အဂ့ၢ်ဒ်အံၤ, ဖဲယဂံၢ်စၢ်ဘါစၢ်န့ၣ်, မ့ၢ်ယဂံၢ်ဆူၣ်ဘါဆူၣ်လီၤ.

¹¹ယမၤယသးဒ်တၢ်ပျုၢ်တဂၤအသိးလီၤ, ဘၣ်ဆၣ်ဒီးမ့ၢ်ဒၣ်လၢ သုဃိလီၤ. သုမ့ၢ်ပှၤတဖၣ်လၢအကြၢးပာ်ဖျါသုတၢ်ဘၣ်သူၣ်ဘၣ် သးယၤလီၤ. အဂ့ၢ်ဒ်အံၤ, ယမ့တမ့ၢ်တၢ်နီတမံၤသနာ်က့, လၢကျဲတဘိအပူၤဒၣ်လဲာ်ယတဆံးန့ၢ်သု “ပှၤတၢ်မၢဖိ” လီၤတိၢ်လီၤဆီမးတဖၣ်န့ၣ်ဘၣ်.

¹²တၢ်လီၤလးဒီးတၢ်လီၤတိၢ်လီၤဆီအါမံၤလၢအအုၣ်အသးဘၣ်ဃးဒီး ယမ့ၢ်ပှၤတၢ်မၢဖိတဂၤန့ၣ်, ဘၣ်တၢ်မၤအီၤလၢတၢ်သူၣ်စူၤသးစူၤ လၢာ်လၢာ်ဆ့ဆ့အပူၤလၢသုသိးသုကျါလီၤ.

¹³သုဘၣ်တၢ်မၤသုတရီတပါဒိၣ်န့ၢ်တၢ်အိၣ်ဖှိၣ်အဂၤတဖၣ်လၢ ကျဲဒ်လဲၣ်. အိၣ်ဒၣ်ထဲတမံၤဧိၤလၢယတမၤတံာ်တာ်ဘၣ်သုလၢ တၢ်မၤစၢၤအဂီၢ်န့ၣ်ဘၣ်လီၤ. ဝံသးစူၤပျၢ်ဘၣ်ယတၢ်ကမၣ်လၢယတတီတလိၤမးထဲန့ၣ် အဃိတက့ၢ်.

¹⁴အဝဲအံၤမ့ၢ်ဝဲသၢဘျီတဘျီလၢယအိၣ်ကတဲာ်ကတီၤယသးဒ်သိး ယကဟဲအိၣ်သကိးသု, ဒီးယတဃ့တၢ်လၢသုနီတမံၤဘၣ်. တၢ်လၢယအဲၣ်ဒိးန့ၢ်ဘၣ်န့ၣ်တမ့ၢ်သုတိၢ်သုစ့ဘၣ်, မ့ၢ်ဝဲသုနီၢ်ကစၢ်လီၤ. အဂ့ၢ်ဒ်အံၤ, ဖိလံၤတဖၣ်အလီၢ်တအိၣ်လၢအကဟ့ၣ်တၢ်လၢအမိၢ် အပၢ်ဘၣ်. မ့မ့ၢ်, မိၢ်ပၢ်ကဘၣ်ဟ့ၣ်တၢ်လၢအဖိအလံၤတခီလီၤ.

¹⁵တၢ်လၢအအိၣ်ဒီးယၤခဲလၢာ်, ဒီးယနီၢ်ကစၢ်ဒၣ်ယဲစ့ၢ်ကီးန့ၣ်ယကသးခုသူအီၤဒ်သိး အကကဲတၢ်မၤစၢၤလၢသုဂီၢ်လီၤ. ယအဲၣ်သုဒိၣ်မးအဃိ ဒီး, မ့ၢ်သုကအဲၣ်ယၤစှၤန့ၢ်တၢ်န့ၣ်ဧါ.

¹⁶လၢတၢ်န့ၣ်အဃိသုကအၢၣ်လီၤအီလီၤသုဝဲလၢယတကဲ တ့ၢ်တၢ်ဝံတၢ်ယိးလၢသုဂီၢ်ဘၣ်လီၤ. ဘၣ်ဆၣ်ဒီးပှၤတဂၤကစံးဝဲ, ယလီကဒံလီကဒါတၢ်သ့ဒီးဖီၣ်န့ၢ်သုလၢယတၢ်ကတိၤကဘျံး ကဘျၣ်တဖၣ်လီၤ.

¹⁷လၢကျဲဒ်လဲၣ်န့ၣ်မ့ၢ်ယဟံးန့ၢ်တၢ်ခွဲးတၢ်ယာ်လၢသုဖီခိၣ် ခီဖျိကလူးစိာ်တၢ်ကစီၣ်လၢယဆှၢလီၤအီၤတဂၤဂၤန့ၣ်ဧါ.

¹⁸ယဃ့ကညးစီၤတံတူးဒ်သိးအကလဲၤဝဲ, ဒီးယဆှၢလီၤဒီပုၢ်ဝဲၢ်ခရံာ်ဖိအဂၤတဂၤလၢအဝဲဒၣ် အသိးလီၤ. မ့ၢ်သုကစံးလၢစီၤတံတူးဟံးန့ၢ်တၢ်အခွဲး အယာ်လၢသုဖီခိၣ်ဧါ. အဝဲဒၣ်ဒီးယၤပမၤတၢ်အိၣ်ဒီးတၢ်ထိၣ်ဟူးထိၣ်ဂဲၤပသး တမံၤဃီ, ဒီးပာ်သူၣ်ပာ်သးပဝဲလၢကျဲတဘိဃီတမ့ၢ်ဘၣ်ဧါ.

¹⁹ဘၣ်တဘၣ်သုဆိကမိၣ်သုဝဲလၢဒီဆၢဒီကတီၢ်ညါန့ၣ်, ပဂုာ်ကျဲးစၢးကတိၤဒီဒၣ်လီၤက့ၤပသးလၢသုမဲာ်ညါလီၤ. တမ့ၢ်ဘၣ်. ပစံးကတိၤတၢ်ဒ်ခရံာ်အဲၣ်ဒိးပကတိၤပဝဲအသိး, လၢကစၢ်ယွၤ အမဲာ်ညါ, ဒီးတၢ်တမံၤလၢ်လၢ်လၢပမၤအီၤန့ၣ်, တံၤသကိးသးဘိသ့ၣ်ဧၢ, မ့ၢ်ဒ်သိးအကမၤစၢၤသုလီၤ.

²⁰ယဘၣ်ယိၣ်ယဲလၢ, ဖဲယလဲၤတုၤဖဲန့ၣ်န့ၣ်, ယကထံၣ်ဘၣ်လၢသုတမ့ၢ်တၢ်ဒ်ယဆၢလၢသုကမ့ၢ်ဘၣ်ဒီး သုကထံၣ်ဘၣ်လၢယတမ့ၢ်တၢ်ဒ်သုဆၢလၢယကမ့ၢ်ဘၣ်န့ၣ် လီၤ. ယဘၣ်ယိၣ်လၢယကထံၣ်ဘၣ်တၢ်အ့ၣ်လိာ်ဆိးက့, ဒီးတၢ်သူၣ်က့ၣ်သးကါ, တၢ်သူၣ်ဖုၣ်သးဖုၣ်ဒီးတၢ်အဲၣ်လီၤသး, တၢ်ဒုၣ်ဒွဲၣ်ပယွဲ, တၢ်သီၣ်ဝံသဲကလၤ, တၢ်ပာ်ထီၣ်ထီသးဒီးတၢ်တၢထီၣ်တၢလီၤန့ၣ်လီၤ.

²¹ယဘၣ်ယိၣ်လၢ, ခဲကိာ်တဘျီ, ဖဲယဟဲန့ၣ်ယကစၢ်ယွၤ ကဒုးမဲာ်ဆှးယၤလၢသုမဲာ်ညါ, ဒီးယကဟီၣ်ကယၢၤလၢပှၤအါဒံအါဂၤလၢအမၤတ့ၢ်တၢ်ဒဲးဘးလၢ အပူၤကွံာ်တဖၣ်အဃိ, ပှၤလၢအတပီၢ်ယၢ်လီၤဒံးအသးလၢတၢ်မၤတဂ့ၤတဝါလၢ အမၤတ့ၢ်ဝဲ, တၢ်ဒဲးဘးဘၣ်ဃးမုၣ်ခွါ, တၢ်မုာ်ဖံးမုာ်ညၣ်, တၢ်သးကွံအတၢ်ဖံးတၢ်မၤတဖၣ်အဃိန့ၣ်လီၤ.