Read S'gaw Karen ၂ ကရံၣ်သူး 9 Bible Online

၂ ကရံၣ်သူး 9 - S'gaw Karen bible

၂ ကရံၣ်သူး 9

¹အလီၢ်တအိၣ်နီၢ်နီၢ်လၢယကကွဲးတဲသုဘၣ်ဃးတၢ်မၤ စၢၤလၢအဘၣ်တၢ်ဆှၢလီၤအီၤဆူယွၤအပှၤဂီၢ်မုၢ်ဖဲကီၢ် ယူဒၤတဖၣ်အဂ့ၢ်န့ၣ်ဘၣ်.

²ယသ့ၣ်ညါလၢသုသးဆူၣ်မၤစၢၤသုဝဲ, ဒီးယကတိၤပာ်ကဖၢလၢလံယသးလၢသုဂ့ၢ်လၢ ပှၤမၤက့းဒနံဖိတဖၣ်အမဲာ်ညါန့ၣ်လီၤ. ယစံးယဲ, “ဒီပုၢ်ဝဲၢ်လၢကီၢ်အဃါယၤတဖၣ်အသးဆူၣ် ဟ့ၣ်တ့ၢ်လံတၢ်မၤစၢၤလၢအပူၤကွံာ်တနံၣ်လံၤလံၤလီၤ” သုတၢ်သးဆူၣ်န့ၣ်ထိၣ်ဟူးထိၣ်ဂဲၤလံအဝဲသ့ၣ်အါဒံ အါဂၤအသးလံန့ၣ်လီၤ.

³မ့မ့ၢ်ခဲကနံၣ်အံၤ, ယဆှၢလီၤယဲဒီပုၢ်ဝဲၢ်သ့ၣ်တဖၣ် အံၤဒ်သိးပတၢ်ပာ်ကဖၢလၢပသးလၢသုဃိဘၣ်ဃးဒီး တၢ်ဂ့ၢ်တမံၤအံၤသုတကဲထီၣ်တၢ်ကတိၤကလီကလီတၢ် တဂ့ၤအဂီၢ်န့ၣ်လီၤ. ဘၣ်ဆၣ်ဒီး, ဒ်ယစံးတ့ၢ်ယဲအသိး, သုကအိၣ်ကတဲာ်ကတီၤသုသးလၢသုကမၤစၢၤတၢ်အဂီၢ် န့ၣ်လီၤ.

⁴ဘၣ်ဆၣ်ဒီးပှၤကီၢ်မၤက့းဒနံဖိတဖၣ်မ့ၢ်ဟဲပိာ်ယခံ ဒီးထံၣ်လၢသုတအိၣ်ကတဲာ်ကတီၤဒံးသုသးန့ၣ်, ပကမဲာ်ဆှးပဝဲဆံးဒိၣ်လဲၣ်. ပတတဲဒံးလၢသုတၢ်မဲာ်ဆှး အဂ့ၢ်ဘၣ်. အဂ့ၢ်မ့ၢ်လၢပနာ်တ့ၢ်လံလၢာ်လၢာ်ဆ့ဆ့လၢ သုကအိၣ်ကတဲာ်ကတီၤသုသးအဃိန့ၣ်လီၤ.

⁵လၢတၢ်န့ၣ်အဃိ, ယဆိကမိၣ်အလီၢ်အိၣ်လၢယကမၢန့ၢ်ဆီၣ်ခံဒီပုၢ်ဝဲၢ်သ့ၣ် တဖၣ်အံၤလၢအကလဲၤဆိလၢယမဲာ်ညါဒီးအိၣ်ကတဲာ် ကတီၤဆိပာ်စၢၤတၢ်ဟ့ၣ်လၢသုအၢၣ်လီၤတ့ၢ်လၢသု ကဟ့ၣ်သုဝဲန့ၣ်လီၤ. တုၤနုၤတစု, ဖဲယဟဲတုၤယဲအဆၢ ကတီၢ်န့ၣ်, ကအိၣ်ကတဲာ်ကတီၤလံအသး, ဒီးကမၤ ဖျါထီၣ်လၢသုဟ့ၣ်တၢ်မ့ၢ်လၢသုသးအိၣ်အဃိ, ဒီးတမ့ၢ်လၢတၢ်လီၤဘၣ်သုအဃိဘၣ်န့ၣ်လီၤ.

⁶သ့ၣ်နီၣ်ထီၣ်သုဝဲလၢပှၤလၢအဖှံတၢ်ချံစှၤဖျၢၣ်န့ၣ်ကကူး ဘၣ်တၢ်စှၤ, မ့မ့ၢ်ပှၤလၢအဖှံတၢ်ချံအါဖျၢၣ်ကကူးဘၣ် တၢ်အါအါဂီၢ်ဂီၢ်န့ၣ်တက့ၢ်.

⁷လၢတၢ်န့ၣ်အဃိ, ပှၤတဂၤဘၣ်တဂၤကြၢးဟ့ၣ်တၢ်ဒ် အပာ်လီၤတ့ၢ်လံအသးအသိး, တမ့ၢ်လၢတၢ်သးအုးအပူၤ, မ့တမ့ၢ်လၢတၢ်သ့ၣ်ညါအမူအဒါအဃိဘၣ်န့ၣ်လီၤ. အဂ့ၢ်ဒ်အံၤ, ယွၤအဲၣ်ပှၤတဂၤလၢအဟ့ၣ်တၢ်လၢတၢ်သးခု အပူၤန့ၣ်လီၤ.

⁸ဒီးကစၢ်ယွၤအိၣ်ဒီးတၢ်သ့တၢ်ဘၣ်လၢအကဟ့ၣ်သုတၢ် အါန့ၢ်တၢ်လၢသုလိၣ်ဘၣ်သုဝဲ, ဒ်သိးထီဘိန့ၣ်သုကအိၣ်ဒီးတၢ်ခဲလၢာ်လၢသုလိၣ်ဘၣ်လၢ သုနီၢ်ကစၢ်ဒၣ်သုဝဲအဂီၢ်ဒီးအါန့ၢ်တၢ်လၢအလိၣ်လၢတၢ်မၤဂ့ၤ တမံၤလၢ်လၢ်အဂီၢ်န့ၣ်လီၤ.

⁹ဒ်တၢ်ကွဲးအသးစံးဝဲအသိး, “အဝဲဒၣ်ဟ့ၣ်တၢ်အါအါဂီၢ်ဂီၢ် လၢတၢ်သးအိၣ်အပူၤဆူပှၤလၢအလိၣ်ဘၣ်တၢ်, အဝဲအတၢ်သးကညီၤအိၣ်ကၢအိၣ်ခိးဝဲ လီၤထူလီၤယိာ်လီၤ.”

¹⁰ဒီးကစၢ်ယွၤလၢအဟ့ၣ်တၢ်ချံလၢတၢ်ကဖှံလီၤအီၤအဂီၢ်, ဒီးကိၣ်လၢတၢ်ကအီၣ်အီၤအဂီၢ်န့ၣ်, ကဟ့ၣ်စ့ၢ်ကီးသုတၢ်ချံလၢသုလိၣ်ဘၣ်အီၤခဲလၢာ်ဒီးကဒုးမဲ ထီၣ်အီၤဒီးဒုးအိၣ်ထီၣ်အသူအသၣ်အါအါဂီၢ်ဂီၢ်ခီဖျိတၢ်ဟ့ၣ် တၢ်အါအါဂီၢ်ဂီၢ်လၢတၢ်သးအိၣ်အပူၤန့ၣ်လီၤ.

¹¹အဝဲဒၣ်ကဒုးထူးဒုးတီၤသုထီဘိထဲသိးဒီးအလီၢ်အိၣ်ဝဲလၢသု ကဟ့ၣ်တၢ်အါအါလၢတၢ်သးအိၣ်အပူၤတဘိယူၢ်ဃီအဂီၢ်, ဒ်သိးပှၤအါဂၤကစံးထီၣ်ပတြၢၤကစၢ်ယွၤလၢသုတၢ်ဟ့ၣ်လၢ အဒိးန့ၢ်ဝဲလၢပအိၣ်တဖၣ်အဃိအဂီၢ်န့ၣ်လီၤ.

¹²အဂ့ၢ်ဒ်အံၤ, တၢ်လၢသုမၤတမံၤအံၤန့ၣ်, တမ့ၢ်ထဲအမၤလၢထီၣ်ပှဲၤထီၣ် ကစၢ်ယွၤအပှၤဂီၢ်မုၢ်အတၢ်လိၣ်တဖၣ်ဧိၤဘၣ်. မ့မ့ၢ်, ဒုးအိၣ်ထီၣ်တၢ်စံးဘျုးစံးဖှိၣ်ကစၢ်ယွၤအတၢ်ပုာ်ထီၣ်ယွၤလီၤန့ၣ်လီၤ.

¹³ဒီးလၢတၢ်အုၣ်အသးလၢသုတၢ်မၤတမံၤအံၤဟ့ၣ်ထီၣ်ဝဲအဃိ, ပှၤအါဒံအါဂၤကဟ့ၣ်တၢ်လၤကပီၤဆူကစၢ်ယွၤလၢသုတၢ်သး တီဒီးခရံာ်အတၢ်သးခုကစီၣ်လၢသုအၢၣ်လီၤပာ်ဖျါသုဝဲဖျါဖျါ အဃိဒီးလၢသုတၢ်နီၤဟ့ၣ်တၢ်ဆူအဝဲသ့ၣ်ဒီးဆူပှၤကိးဂၤဒဲး အအိၣ်အပူၤန့ၣ်, သုဟ့ၣ်တၢ်အါအါဂီၢ်ဂီၢ်လၢတၢ်သးအိၣ် အဃိန့ၣ်လီၤ.

¹⁴ဒီးလၢတၢ်န့ၣ်အဃိ, လၢတၢ်အဲၣ်တၢ်ကွံအဒိၣ်အယိာ် အပူၤ, အဝဲသ့ၣ်ကဃ့ဘါထုကဖၣ်တၢ်လၢသုဂီၢ်, အဂ့ၢ်မ့ၢ်လၢကစၢ်ယွၤဒုးနဲၣ်တ့ၢ်သုတၢ်ဘျုးတၢ်ဖှိၣ်လီၤတိၢ် လီၤဆီအဃိန့ၣ်လီၤ.

¹⁵မ်ပကစံးဘျုးယွၤလၢအတၢ်ဟ့ၣ်လၢအဒိၣ်မးဝဲတုၤပဒွး အလုၢ်အပှ့ၤတသ့ဘၣ်အဃိန့ၣ်တက့ၢ်.