Read S'gaw Karen ကလၤတံ 4 Bible Online

ကလၤတံ 4 - S'gaw Karen bible

ကလၤတံ 4

¹ခဲကနံၣ်အံၤ, တၢ်လၢယကစံးကတိၤအါထီၣ်မ့ၢ်ဒ်အံၤလီၤ. ဖိခွါတဂၤလၢအကဒိးန့ၢ်ဘၣ်အပၢ်အတၢ်စုလီၢ်ခီၣ်ခိၣ်န့ၣ်, ဖဲအသးစၢ်ဒံးအခါတၢ်ပာ်အီၤဒ်ကုၢ်တဂၤအသိးလီၤ. အနီၢ်နီၢ်တခီတၢ်စုလီၢ်ခီၣ်ခိၣ်ခဲလၢာ်မ့ၢ်အဝဲဒၣ်အတၢ်လီၤ.

²ဖဲအဝဲဒၣ်အသးစၢ်ဒံးအဆၢကတီၢ်န့ၣ်, ပှၤအိၣ်ဝဲဒၣ်လၢကကွၢ်ထွဲပၢဆှၢအီၤဒီးဟံးန့ၢ်မူဒါဘၣ်ဃး အတၢ်စုလီၢ်ခီၣ်ခိၣ်တုၤမုၢ်တနံၤလၢအပၢ်စံၣ်ညီၣ်ပာ်လီၤ တ့ၢ်ဃာ်ဝဲန့ၣ်လီၤ.

³ဒ်န့ၣ်အသိး, ပဝဲစ့ၢ်ကီးပကဲကုၢ်လၢသးတဖၣ်လၢအပၢ ဟီၣ်ခိၣ်မူခိၣ်အဖီလာ်တချုးပတုၤတၢ်ဒိၣ်တုာ်ခိၣ်ပှဲၤလၢ သူၣ်လၢသးန့ၣ်လီၤ.

⁴ဘၣ်ဆၣ်ဒီး, ဖဲတၢ်ဆၢကတီၢ်အဘၣ်တုၤဃီၤဝဲန့ၣ်, ကစၢ်ယွၤဆှၢလီၤအဖိခွါဒၣ်ဝဲလီၤ. အဝဲဒၣ်ဟဲဒ်မိၢ်လၢအမ့ၢ်ပှၤဟီၣ်ခိၣ်ဖိတဂၤအဖိအသိးဒီးအိၣ် မူလၢယူဒၤဖိအတၢ်သိၣ်တၢ်သီအဖီလာ်,

⁵လၢအကအုၣ်က့ၤခီၣ်က့ၤပှၤလၢအအိၣ်မူလၢတၢ်သိၣ်တၢ်သီ အဖီလာ်, ဒ်သိးပကကဲထီၣ်ကစၢ်ယွၤအဖိခွါတဖၣ်လီၤ.

⁶ဒ်သိးအကအိၣ်ဖျါလၢသုမ့ၢ်အဖိခွါတဖၣ်န့ၣ်, ကစၢ်ယွၤဆှၢလီၤအဖိခွါအသးဆူပသးပူၤ, ယွၤအသးလၢ အကိးထီၣ်ဝဲ, “အးဘၤ, ပၢ်ဧၢ” န့ၣ်လီၤ.

⁷မၤသးဒ်န့ၣ်ဒီး နတမ့ၢ်လၢၤကုၢ်တဂၤဘၣ်. နမ့ၢ်ဖိခွါတဂၤလီၤ. ဒီးဒ်နမ့ၢ်အဝဲဒၣ်အဖိအသိးန့ၣ်, ကစၢ်ယွၤကဟ့ၣ်နၤတၢ်လၢ အအိၣ်ဒီးအီၤခဲလၢာ်လၢအဖိခွါတဖၣ်အဂီၢ်န့ၣ်လီၤ.

⁸လၢအပူၤကွံာ်န့ၣ်သုတသ့ၣ်ညါကစၢ်ယွၤဘၣ်. အဃိ, သုကဲကုၢ်လၢတၢ်လၢအတမ့ၢ်ကစၢ်ယွၤတဖၣ်အဖီ လာ်လီၤ.

⁹မ့မ့ၢ်ခဲကနံၣ်အံၤ မ့ၢ်လၢသုသ့ၣ်ညါကစၢ်ယွၤလံ, မ့တမ့ၢ်, ယကြၢးစံး, ကစၢ်ယွၤသ့ၣ်ညါသုလံန့ၣ်, ဘၣ်မနုၤအဃိသုသးအိၣ်ဃၣ်ကဒါက့ၤသုသးဆူသး တဖၣ်လၢအဂံၢ်စၢ်ဘါစၢ်ဒီးဖှီၣ်ဝဲယာ်ဝဲအအိၣ်ဒီးသး အိၣ်ကဲက့ၤကဒီးကုၢ်လၢအဖီလာ်န့ၣ်လဲၣ်.

¹⁰သုပာ်ဒိၣ်လီၤဆီမုၢ်နံၤတနီၤ, လါတနီၤ, ကတီၢ်တနီၤဒီးနံၣ် တနီၤလီၤ.

¹¹ယသူၣ်ကိၢ်သးဂီၤလၢသုဂီၢ်လီၤ. မ့ၢ်ကယဲၢ်တၢ်လၢယမၤ တ့ၢ်အီၤလၢသုဂီၢ်ကဲထီၣ်တၢ်ကလီကလီလံဧါ.

¹²ယဒီပုၢ်ဝဲၢ်သ့ၣ်ဧၢ, ယဃ့ကညးသု, ကဲထီၣ်ဒ်ယၤအသိး တက့ၢ်. ယဒ်သိးဒၣ်သုစ့ၢ်ကီးလီၤ. သုတမၤကမၣ်ယၤနီ တမံၤဘၣ်.

¹³ယစံၣ်တဲၤတဲလီၤန့ၢ်သုတၢ်သးခုကစီၣ်, အဆိကတၢၢ်တဘျီလၢမနုၤအဃိလဲၣ်န့ၣ်, သုသ့ၣ်နီၣ်ထီၣ်က့ၤလီၤ. မ့ၢ်ဒၣ်လၢယအိၣ်တဆူၣ်အဃိလီၤ.

¹⁴ဘၣ်ဆၣ်ဒီး, ယနီၢ်ခိအတၢ်ဆူးအတၢ်ဆါမ့ၢ်ကဲထီၣ်တၢ်ကီ တၢ်ခဲဖးဒိၣ်လၢသုဂီၢ်သနာ်က့သုတကွၢ်တလီၤယၤမ့ၢ်ဂ့ၤညိ ကွံာ်ယၤမ့ၢ်ဂ့ၤန့ၣ်ဘၣ်. မ့မ့ၢ်သုတူၢ်လိာ်ယၤဒ်သုကတူၢ်လိာ်ကလူးလၢမူခိၣ် အသိး, ဒီးသုတူၢ်လိာ်ယၤဒ်သုကတူၢ်လိာ်ယ့ၣ်ၡူးခရံာ် အသိးလီၤ.

¹⁵သုသူၣ်ခုသးခုတ့ၢ်ဒိၣ်မးလီၤ. အခဲအံၤတၢ်မနုၤမၤအသး န့ၣ်လဲၣ်. ယကစၢ်ဒၣ်ယဲယစံးသ့လၢသုအူခွဲးထီၣ်သုမဲာ်ချံ တဖၣ်မ့ၢ်သ့ဒီးသုကအူခွဲးထီၣ်ဒီးဟ့ၣ်လီၤယၤန့ၣ်လီၤ.

¹⁶ယစံးဘၣ်တဲဘၣ်သုတၢ်မ့ၢ်တၢ်တီအဃိအခဲအံၤ, မ့ၢ်ယကဲထီၣ်သုဒုၣ်သုဒါလံဧါ.

¹⁷ပှၤအဂၤသ့ၣ်တဖၣ်အံၤဒုးနဲၣ်အတၢ်သးအိၣ်အဒိၣ်အယိာ်လၢ သုပူၤ, ဘၣ်ဆၣ်အဝဲသ့ၣ်အတၢ်တိာ်သူၣ်ပာ်သးတဖၣ်တမ့ၢ် တၢ်လၢအဂ့ၤဘၣ်. တၢ်လၢအဝဲသ့ၣ်သးအိၣ်န့ၣ်, မ့ၢ်ဒၣ်အကမၤလီၤဖးသုဒီးယၤဒ်သိးသုကအိၣ်ဒီးတၢ်သးအိၣ်လၢ အဝဲသ့ၣ်အပူၤ, ဒ်အဝဲသ့ၣ်အိၣ်ဒီးတၢ်သးအိၣ်လၢသုပူၤအသိး န့ၣ်လီၤ.

¹⁸ဒီးခဲကနံၣ်အံၤတၢ်တိာ်ပာ်မ့ၢ်ဂ့ၤဒီး, တၢ်အိၣ်ဒီးတၢ်သးအိၣ်အဒိၣ်အယိာ်ဒ်သိးအံၤမ့ၢ်တၢ်လၢ အဂ့ၤလီၤ. အဝဲအံၤမ့ၢ်ဝဲတီဝဲထီဘိဒီးတမ့ၢ်ထဲလၢယအိၣ်ဒီး သုအခါဧိၤဘၣ်.

¹⁹ယဖိဆံးသးဘိသ့ၣ်ဧၢ, ဒ်မိၢ်တဂၤလၢအဆံးစၢ်ထီၣ်အဖိအသိး န့ၣ်, ယတူၢ်ဘၣ်တၢ်ဆါတမံၤဃီလၢသုဂီၢ်တုၤခရံာ်အက့ၢ်အဂီၤ ကဲထီၣ်လိၣ်ထီၣ်လၢသုပူၤန့ၣ်လီၤ.

²⁰ယဆၢမးလၢယကအိၣ်ဘၣ်ဒီးသုခဲကနံၣ်အံၤ, ဒ်သိးယကဒုးနဲၣ်ယတၢ်ပာ်သူၣ်ပာ်သးနီၢ်နီၢ်လၢသုဖီခိၣ်မ့ၢ်တၢ် ဒ်လဲၣ်န့ၣ်လီၤ. ယသးကိၢ်လၢသုဃိဒိၣ်မးလီၤ.

²¹ပျဲယသံကွၢ်သုဝဲလၢအအဲၣ်ဒိးအိၣ်လၢတၢ်သိၣ်တၢ်သီအဖီလာ် တဖၣ်ဒ်အံၤတက့ၢ်. တၢ်သိၣ်တၢ်သီစံးဝဲဒ်လဲၣ်န့ၣ်မ့ၢ်သုတနၢ် ဟူဘၣ်ဧါ.

²²စံးဝဲဒၣ်လၢစီၤအၤဘြၤဟၣ်အိၣ်ဒီးအဖိခွါခံဂၤ, တဂၤအိၣ်ဖျဲၣ်ထီၣ် လၢကုၢ်ပိာ်မုၣ်, ဒီးအဝဲတဂၤလၢသဘျ့မုၣ်လီၤ.

²³အဝဲဒၣ်အဖိခွါလၢကုၢ်ပိာ်မုၣ်တဂၤန့ၣ်အိၣ်ဖျဲၣ်ထီၣ်ဒ်တၢ်ဖံး တၢ်ညၣ်အကျဲအသိးလီၤ. မ့မ့ၢ်အဖိခွါလၢသဘျ့မုၣ်တဂၤန့ၣ်အိၣ်ဖျဲၣ်ထီၣ်ဒ် ကစၢ်ယွၤအၢၣ်လီၤတ့ၢ်အသိးန့ၣ်လီၤ.

²⁴တၢ်သ့ၣ်တဖၣ်အံၤ, တၢ်နၢ်ပၢၢ်အီၤဒ်တၢ်ဒိတၢ်တဲာ်အသိး သ့ဝဲလီၤ. ပိာ်မုၣ်ခံဂၤန့ၣ်ပာ်ဖျါထီၣ်တၢ်အၢၣ်လီၤအီလီၤခံ ခါလီၤ. အဝဲတဂၤလၢအဖိတဖၣ်အိၣ်ဖျဲၣ်ထီၣ်ဒ်ကုၢ်န့ၣ်မ့ၢ်ဝဲနီၢ် ဟၤကၢ်, ဒီးအဝဲဒၣ်မ့ၢ်တၢ်အၢၣ်လီၤအီလီၤအီၤလၢအဘၣ် တၢ်မၤအီၤဖဲကစၢၢ်စံၤနါန့ၣ်လီၤ.

²⁵နီၢ်ဟၤကၢ်, လၢအဘၣ်ထိၣ်သတြီၤအီၤဒီးကစၢၢ်စံၤနါလၢကီၢ်ဧ့ရ့းန့ၣ်, မ့ၢ်တၢ်ဒိတၢ်တဲာ်ဘၣ်ဃးမုၢ်မဆါတနံၤအံၤအဝ့ၢ် ယရူၤၡလ့ၣ်လီၤ. အဂ့ၢ်ဒ်အံၤအဝဲကဲကုၢ်ဒီးအဖိတဖၣ်လီၤ.

²⁶မ့မ့ၢ်ယရူၤၡလ့ၣ်လၢအဘၣ်ဃးဒီးမူခိၣ်တဝ့ၢ်န့ၣ်အိၣ်သဘျ့ဝဲ ဒီးအဝဲမ့ၢ်ပမိၢ်န့ၣ်လီၤ.

²⁷အဂ့ၢ်ဒ်အံၤ, တၢ်ကွဲးအသးစံးဝဲ, “သးခုတက့ၢ်, ပိာ်မုၣ်လၢအဖိတအိၣ်တဂၤဧၢ, ကိးပသူထီၣ်လၢတၢ်သးဖှံအပူၤ, ပှၤလၢအတတူၢ်ဘၣ်တၢ်ဟုးဆါနီတစု နၤဧၢ, အဂ့ၢ်ဒ်အံၤ, ပိာ်မုၣ်လၢအဝၤဟးသဒၣ်ကွံာ်အီၤ တဂၤန့ၣ်ကအိၣ်ဒီးအဖိအါန့ၢ် ပိာ်မုၣ်လၢအဝၤတဟးသဒၣ်အီၤ နီတဘျီဘၣ်တဂၤလီၤ” (ၡါ ၅၄:၁).

²⁸ဒီးခဲကနံၣ်အံၤ, ပဒီပုၢ်ဝဲၢ်သ့ၣ်ဧၢ, သုမ့ၢ်ကစၢ်ယွၤအဖိတဖၣ်လၢ အအိၣ်ထီၣ်ဝဲခီဖျိအတၢ်အၢၣ်လီၤအီလီၤ, ဒ်စီၤအံၤစဲးမ့ၢ်ဝဲ အသိးန့ၣ်လီၤ.

²⁹ဖဲအဆၢကတီၢ်အဝဲန့ၣ်, ဖိခွါလၢအဘၣ်တၢ်ဆံးစၢ်ထီၣ်အီၤလၢ တၢ်ဖံးတၢ်ညၣ်အကျဲတဂၤန့ၣ်, မၤအၢမၤနးဖိခွါလၢအအိၣ်ဖျဲၣ် ထီၣ်လၢကစၢ်ယွၤအသးစီဆှံတဂၤန့ၣ်လီၤ. ဒီးအခဲအံၤ, တၢ်မၤအသးဒ်န့ၣ်အသိးစ့ၢ်ကီးလီၤ.

³⁰ဘၣ်ဆၣ်ဒီးတၢ်ကွဲးအသးစံးဒ်လဲၣ်. စံးဝဲ, “ဟီထီၣ်ကွံာ်ကုၢ်ပိာ်မုၣ်ဒီးအဖိခွါတက့ၢ်. အဂ့ၢ်ဒ်အံၤ, ကုၢ်ပိာ်မုၣ်အဖိခွါတဒိးန့ၢ်ဃုာ်ပၢ်အတၢ်စုလီၢ်ခီၣ်ခိၣ်ဒီး သဘျ့မုၣ်အဖိခွါန့ၣ်ဘၣ်.”

³¹မ်ဒ်န့ၣ်ဒီး, ယဒီပုၢ်ဝဲၢ်သ့ၣ်ဧၢ, ပတမ့ၢ်ကုၢ်ပိာ်မုၣ်တဂၤအဖိ တဖၣ်ဘၣ်, မ့မ့ၢ် ပှၤသဘျ့မုၣ်တဂၤအဖိန့ၣ်လီၤ.