Read S'gaw Karen ကလၤတံ 5 Bible Online

ကလၤတံ 5 - S'gaw Karen bible

ကလၤတံ 5

¹တၢ်လၢအအိၣ်ဒီးပှၤန့ၣ်မ့ၢ်တၢ်သဘျ့လီၤ. ခရံာ်ဒုးထူၣ်ဖျဲးထီၣ် ကွံာ်ပှၤလံ. လၢတၢ်န့ၣ်အဃိဒ်ပှၤသဘျ့တဖၣ်အသိး, အိၣ်ဂၢၢ်ဆိးကျၢၤဒီးသုတပျဲပှၤဒုးကဲထီၣ်ကဒီးသုလၢ ကုၢ်တဂ့ၤ.

²ဒိကနၣ်တက့ၢ်. ယၤ, စီၤပီလူးယစံးဘၣ်တဲဘၣ်သုလၢ, သုမ့ၢ်ဒိးတၢ်ကူးတရံးဒီး, အခီပညီခရံာ်မ့ၢ်တၢ်လၢအဘျုးတအိၣ်လၢသုဂီၢ်နီတမံၤ ဘၣ်န့ၣ်လီၤ.

³မၤကဒီးယဟ့ၣ်ပလီၢ်ပှၤတဂၤလၢ်လၢ်လၢအဒိးတၢ်ကူးတရံး န့ၣ်, လၢအဝဲကဘၣ်စူၢ်တၢ်သိၣ်တၢ်သီခဲလၢာ်လီၤ.

⁴သုဝဲသ့ၣ်တဖၣ်လၢအဂုာ်ကျဲးစၢးမၤလိၤမၤဘၣ်သုသးဒီး ကစၢ်ယွၤခီဖျိတၢ်စူၢ်တၢ်သိၣ်တၢ်သီန့ၣ်, သုထုးဖးကွံာ်သုသးလၢာ်လၢာ်ဆ့ဆ့ဒီးခရံာ်လီၤ. သုလီၤတဲာ်ကွံာ်လၢကစၢ်ယွၤအဘျုးအဖှိၣ်အပူၤ,

⁵မ့မ့ၢ်ပဝဲသ့ၣ်တဖၣ်အံၤ, ပတၢ်မုၢ်လၢ်မ့ၢ်ဝဲကစၢ်ယွၤကမၤလိၤ မၤဘၣ်ပှၤဒီးအီၤ, ဒီးတၢ်တမံၤအံၤမ့ၢ်ဝဲတၢ်လၢပခိးပဝဲလၢယွၤ အသးစီဆှံအစိကမီၤမၤတၢ်ခီဖျိပတၢ်စူၢ်တၢ်နာ်န့ၣ်လီၤ.

⁶အဂ့ၢ်ဒ်အံၤ, ဖဲပမ့ၢ်တၢ်တမံၤဃီဒီးယ့ၣ်ၡူးခရံာ်န့ၣ်, တၢ်ကူး တရံးမ့ၢ်ဂ့ၤ, တၢ်တဒိးတၢ်ကူးတရံးမ့ၢ်ဂ့ၤ, တမ့ၢ်တၢ်အလီၤ ဆီဘၣ်. မ့မ့ၢ်တၢ်အကါဒိၣ်တခီမ့ၢ်ဝဲတၢ်စူၢ်တၢ်နာ်လၢ အမၤတၢ်ခီဖျိတၢ်အဲၣ်တၢ်ကွံန့ၣ်လီၤ.

⁷သုမၤတ့ၢ်တၢ်ဂ့ၤမးလီၤ. မ့ၢ်မတၤတဂၤထိၣ်ဂဲၤသုဒ်သိး သုကဆိကတီၢ်ကွံာ်သုတၢ်စူၢ်တၢ်မ့ၢ်တၢ်တီန့ၣ်လဲၣ်. အဝဲဒၣ်ကွဲန့ၢ်လွဲန့ၢ်သုလၢကျဲဒ်လဲၣ်.

⁸တမ့ၢ်ကစၢ်ယွၤလၢအကိးန့ၢ်သုတဂၤမၤဝဲဘၣ်.

⁹တၢ်စံးဝဲ, “ကိၣ်မံၣ်တစဲးဖိမၤဖးထီၣ်ကိၣ်ဒီဖျၢၣ်ညါလီၤ.”

¹⁰ဘၣ်ဆၣ်ဒီး ယနာ်ဒံးယဲသုလီၤ. ပတၢ်အိၣ်မူလၢတၢ်တမံၤဃီဒီး ကစၢ်အပူၤန့ၣ်, ဒုးနာ်ယၤလၢသုတၢ်ထံၣ်တလီၤဆီဒီးယၤဘၣ်, ဒီးပှၤလၢအမၤတံာ်တာ်သုတဂၤမ့ၢ်မတၤဂ့ၤမတၤဂ့ၤန့ၣ်, ကဘၣ်တၢ်စံၣ်ညီၣ်အီၤလၢကစၢ်ယွၤန့ၣ်လီၤ.

¹¹မ့မ့ၢ်ယဲဒၣ်အံၤ, ယဒီပုၢ်ဝဲၢ်သ့ၣ်ဧၢ, ယမ့ၢ်စံၣ်တဲၤတဲလီၤဒံးလၢ တၢ်ဒိးတၢ်ကူးတရံးအလီၢ်အိၣ်န့ၣ်, ဘၣ်မနုၤအဃိ ပှၤမၤအၢမၤနးဒံးယၤလဲၣ်. မ့မ့ၢ်ဒ်န့ၣ်ဒီး, ယတၢ်စံၣ်တဲၤတဲလီၤဘၣ်ဃးခရံာ်အထူၣ်စုညါတဒုးအိၣ်ထီၣ် တၢ်ကီတၢ်ခဲဘၣ်.

¹²ယဆၢလၢပှၤလၢအမၤတံာ်တာ်သုတဖၣ်ကမၤတၢ်တုၤလၢ အကတၢၢ်ဒီးအကစၢ်ဒၣ်ဝဲကဒုးကဲထီၣ်အသးလၢပှၤဒ့ဒံၣ်ဖိ တဖၣ်လီၤ.

¹³မ့မ့ၢ်သုဝဲယဒီပုၢ်ဝဲၢ်သ့ၣ်ဧၢ, သုဘၣ်တၢ်ကိးသုဒ်သိးသုကဒိး န့ၢ်တၢ်သဘျ့လီၤ. ဘၣ်ဆၣ်တဘၣ်ပျဲသုတၢ်သဘျ့အံၤကဲထီၣ်တၢ် ကတိၤပူၤဖျဲးသုသးလၢသုကပျဲသုနီၢ်ခိအတၢ်အဲၣ်ဒိးတဖၣ် ပၢၤသုတဂ့ၤ. အခိၣ်တလိာ်, ပျဲတၢ်အဲၣ်တၢ်ကွံမၤတၢ်လၢသုကမၤစၢၤလိာ်သုသးတဂၤဒီး တဂၤန့ၣ်တက့ၢ်.

¹⁴အဂ့ၢ်ဒ်အံၤ, တၢ်သိၣ်တၢ်သီခဲလၢာ်ဘၣ်တၢ်ပာ်ဖှိၣ်အီၤလၢ တၢ်မၤလိာ်တထံၣ်အပူၤ “အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးတက့ၢ်” န့ၣ်လီၤ.

¹⁵ဘၣ်ဆၣ်ဒီး, သုမ့ၢ်မၤသုသးဒ်ဆၣ်ဖိကီၢ်ဖိအမံၤတဖၣ်, ဒီးမၤဘၣ် ဒိဘၣ်ထံး, မၤဆူးမၤဆါလိာ်သုသးန့ၣ်, ပလီၢ်သုသးတက့ၢ်. မ့တမ့ၢ်ဘၣ်ဒီးသုကမၤဟးဂီၤလိာ်သုသးတဂၤဒီးတဂၤလၢာ်လၢာ် ဆ့ဆ့န့ၣ်လီၤ.

¹⁶တၢ်လၢယစံးမ့ၢ်တၢ်အံၤလီၤ. ပျဲယွၤအသးပၢဆှၢသုတၢ်အိၣ်မူ တဖၣ်တက့ၢ်. ဒီးသုတမၤလၢထီၣ်ပှဲၤထီၣ်သုဖံးသုညၣ်အတၢ်သူၣ် လီသးကွံတဖၣ်တဂ့ၤ.

¹⁷အဂ့ၢ်ဒ်အံၤ, ပဖံးပညၣ်အတၢ်သူၣ်လီသးကွံန့ၣ် ထီဒါလိာ်အသးဒီးယွၤအသးအတၢ်အဲၣ်ဒိး, ဒီးယွၤအသးအတၢ်အဲၣ်ဒိးန့ၣ်ထီဒါလိာ်အသးဒီးပဖံးပညၣ် အတၢ်သူၣ်လီသးကွံန့ၣ်လီၤ. တၢ်ခံမံၤအံၤထီဒုၣ်ထီဒါလိာ် အသးအဃိ, တၢ်လၢသုဆၢမၤန့ၣ်သုမၤသုဝဲတသ့ဘၣ်.

¹⁸ယွၤအသးမ့ၢ်ဆှၢသုဒီး, သုတအိၣ်လၢတၢ်သိၣ်တၢ်သီအဖီ လာ်ဘၣ်.

¹⁹တၢ်လၢတၢ်ဖံးတၢ်ညၣ်အတၢ်မၤန့ၣ်, အိၣ်ဖျါဝဲဒၣ်ဆှံဆှံလီၤ. အိၣ်ဖျါဝဲဒၣ်ခီဖျိတၢ်မၤကမၣ်မုၣ်ကမၣ်ခွါ, တၢ်အိၣ်မူတကဆှီ, တၢ်ကလုာ်ကလိၤတဖၣ်,

²⁰တၢ်ဘါတၢ်ဂီၤတၢ်ဖီၣ်, တၢ်ဟိၣ်တၢ်ယီ, တၢ်ထီဒုၣ်ထီဒါ, တၢ်အ့ၣ်လိာ် ဆိးက့လိာ်, တၢ်သူၣ်က့ၣ်သးကါ, တၢ်သူၣ်ဒိၣ်သးထီၣ်, တၢ်သးဆူၣ်ဆၢမၤန့ၢ်တၢ်, တၢ်လီၤမုၢ်လီၤဖး, တၢ်စုတလီၤဃုာ်ဘၣ်,

²¹တၢ်သူၣ်က့ၣ်သးကါ, တၢ်မၤသံပှၤကညီ, တၢ်အီမူၤသံး, တၢ်မၤမူးဧိၤပွဲဧိၤ, ဒီးတၢ်မၤတၢ်အဂၤဒ်သိးအံၤတဖၣ်လီၤ. ဒ်လၢအပူၤကွံာ်အသိးန့ၣ်ယဟ့ၣ်ပလီၢ်ကဒီးသုခဲအံၤလီၤ. ပှၤလၢအမၤတၢ်ဒ်အံၤတဖၣ်န့ၣ်, တန့ၢ်ဘၣ်သါကစၢ်ယွၤအဘီ အမုၢ်ဘၣ်.

²²မ့မ့ၢ်ယွၤအသးန့ၣ်, ဒုးအိၣ်ထီၣ်တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်ကညီၤသးကညီၤ, တၢ်မၤဂ့ၤတၢ်, တၢ်သးတီ,

²³တၢ်ဆီၣ်လီၤသး, ဒီးတၢ်ပၢၤသူၣ်ပၢၤသးတဖၣ်န့ၣ်လီၤ. တၢ်သိၣ်တၢ်သီလၢအကထီဒါတၢ်ဒ်သိးအံၤတဖၣ်တအိၣ် ဝဲနီတထံၣ်ဘၣ်.

²⁴ဒီးပှၤလၢအဘၣ်ဃးဒီးယ့ၣ်ၡူးခရံာ်တဖၣ်န့ၣ်, မၤသံကွံာ်အတၢ်ဖံးတၢ်ညၣ်အသးဆၢန့ၢ်တၢ် ဒီး အတၢ်သူၣ်လီသးကွံခဲလၢာ်လံ.

²⁵ယွၤအသးဟ့ၣ်ပှၤတၢ်မူဒီးပကဘၣ်ပျဲအဝဲဒၣ်ပၢပတၢ်အိၣ်မူ တဖၣ်စ့ၢ်ကီးလီၤ.

²⁶ပတဘၣ်ပာ်ထီၣ်ထီပသး, မ့တမ့ၢ်မၤအ့န့လိာ်ပသးတဂၤဒီး တဂၤ, မ့တမ့ၢ်သူၣ်က့ၣ်သးကါလိာ်ပသးတဂၤဒီးတဂၤန့ၣ်ဘၣ်.