Read S'gaw Karen ဖံလံးပံၤ 1 Bible Online

ဖံလံးပံၤ 1 - S'gaw Karen bible

ဖံလံးပံၤ 1

¹လၢ, စီၤပီလူးဒီးစီၤတံၤမသ့း, ယ့ၣ်ၡူးခရံာ်အခ့အပှၤတဖၣ် ဆူ, ကစၢ်ယွၤအပှၤဂီၢ်မုၢ် ဖဲဝ့ၢ်ဖံလံးပံၤခဲလၢာ်လၢအမ့ၢ် တၢ်တမံၤဃီဒီးယ့ၣ်ၡူးခရံာ်, ဃုာ်ဒီးတၢ်အိၣ်ဖှိၣ်အခိၣ်အနၢ်ဒီး ပှၤလၢအမၤစၢၤတၢ်တဖၣ်အအိၣ်,

²မ်ပပၢ်ကစၢ်ယွၤဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုး တၢ်ဖှိၣ်ဒီးတၢ်ဃူတၢ်ဖိးတက့ၢ်.

³တဘျီလၢ်လၢ်ဖဲယဆိကမိၣ်ထီၣ်သုဂ့ၢ်န့ၣ်, ယစံးဘျုးယကစၢ် ယွၤလၢသုဃိလီၤ.

⁴ဒီးတဘျီလၢ်လၢ်ဖဲယဃ့ဘါထုကဖၣ်တၢ်လၢသုဂီၢ်န့ၣ်, ယဘါထုကဖၣ်လၢတၢ်သးခုအပူၤ,

⁵မ့ၢ်လၢသုတၢ်မၤစၢၤတ့ၢ်ယၤလၢတၢ်သးခုကစီၣ်အတၢ်ဖံး တၢ်မၤအပူၤစးထီၣ်လၢမုၢ်နံၤအခီၣ်ထံးကတၢၢ်တနံၤတုၤခဲအံၤ အဃိန့ၣ်လီၤ.

⁶ဒီးလၢတၢ်န့ၣ်အဃိယနာ်ယဲဒၣ်လၢကစၢ်ယွၤ, လၢအစးထီၣ်အတၢ်မၤအဂ့ၤတမံၤအံၤလၢသုပူၤန့ၣ်, ကမၤဒံးဝဲဆူညါတုၤအလၢထီၣ်ပှဲၤထီၣ်ဝဲတစုဖဲယ့ၣ်ၡူးခရံာ် အမုၢ်တနံၤန့ၣ်လီၤ.

⁷သုအိၣ်လၢယသးပူၤထီဘိလီၤ. လၢတၢ်န့ၣ်အဃိ, ယပာ်ယသးလၢသုဖီခိၣ်ဒ်အံၤန့ၣ်မ့ၢ်တၢ်လၢအဘၣ်လီၤ. အဂ့ၢ်ဒ်အံၤ, တၢ်ဘျုးတၢ်ဖှိၣ်လၢကစၢ်ယွၤဟ့ၣ်လီၤယၤန့ၣ် သုဒိးန့ၢ်ဃုာ်အီၤဒီးယၤ, ဖဲယအိၣ်လၢဃိာ်ပူၤအဆၢကတီၢ် ခဲအံၤမ့ၢ်ဂ့ၤ, ဒီးဖဲယအိၣ်ဒီးတၢ်သဘျ့လၢယကကတိၤဒီဒၣ်ဒီး မၤဂၢၢ်မၤကျၢၤတၢ်သးခုကစီၣ်အခါမ့ၢ်ဂ့ၤန့ၣ်လီၤ.

⁸ကစၢ်ယွၤမ့ၢ်ပှၤအုၣ်အသးလၢယကတိၤတၢ်မ့ၢ်တၢ်တီ, ဖဲယစံးယဲလၢယတၢ်အဲၣ်ဘၣ်သုခဲလၢာ်န့ၣ်ဟဲထီၣ်ဝဲဒၣ်လၢ ယ့ၣ်ၡူးခရံာ်အကစၢ်ဒၣ်ဝဲအသးပူၤန့ၣ်လီၤ.

⁹ယဃ့ဘါထုကဖၣ်ဒ်သိးသုတၢ်အဲၣ်တၢ်ကွံကဒိၣ်ထီၣ် အါထီၣ်ဆူညါကွ့ၢ်ကွ့ၢ်, ဃုာ်ဒီးတၢ်သ့ၣ်ညါအမ့ၢ်အတီ ဒီးတၢ်စံၣ်ညီၣ်ပဲာ်ဖးနီၤဖးတၢ်ဘၣ်အပူၤ,

¹⁰ဒ်သိးသုကသ့ဃုထၢတၢ်အဂ့ၤကတၢၢ်န့ၣ်လီၤ. အန့ၣ်တစုသုကပူၤဖျဲးဒီးတၢ်တစီတဆှံခဲလၢာ်, ဒီးတၢ်ပာ်တၢ်ကမၣ်လၢသုလိၤဖဲခရံာ်အမုၢ်တနံၤ န့ၣ်လီၤ.

¹¹သုတၢ်အိၣ်မူတဖၣ်ကဘၣ်တၢ်မၤပှဲၤအီၤဒီးတၢ်ဂ့ၤ တၢ်ဝါနီၢ်နီၢ်တဖၣ်လၢထဲဒၣ်ယ့ၣ်ၡူးခရံာ်ဒုးအိၣ်ထီၣ် အီၤသ့, လၢယွၤလၤကပီၤဒီးတၢ်စံးထီၣ်ပတြၢၤကစၢ်ယွၤ အဂီၢ်န့ၣ်လီၤ.

¹²ယဒီပုၢ်ဝဲၢ်သ့ၣ်ဧၢ, ယအဲၣ်ဒိးသုသ့ၣ်ညါလၢတၢ်လၢအမၤတ့ၢ်အသးဒီးယၤ တဖၣ်, ကဲထီၣ်တၢ်မၤစၢၤနီၢ်နီၢ်လၢတၢ်သးခုကစီၣ် အတၢ်လဲၤထီၣ်လဲၤထီအဂီၢ်လီၤ.

¹³လၢတၢ်အံၤအဃိ, သုးဖိလၢအခိးစီၤပၤအနူၢ်အစီၤကိးဂၤဒဲး, ဒီးပှၤဂၤတဖၣ်လၢအအိၣ်ဝဲဖဲအံၤခဲလၢာ်သ့ၣ်ညါဝဲလၢ ယအိၣ်ဘၣ်လၢဃိာ်ပူၤန့ၣ်မ့ၢ်လၢယမ့ၢ်ခရံာ်အခ့အပှၤတဂၤ အဃိလီၤ.

¹⁴ဒီးယတၢ်ဘၣ်အိၣ်လၢဃိာ်ပူၤအံၤဟ့ၣ်အါထီၣ်ယဒီပုၢ်ဝဲၢ် တဖၣ်အတၢ်နာ်လၢကစၢ်အပူၤသတးဒီး, အဝဲသ့ၣ်အသးဒူဒိၣ်ထီၣ်ကိးဆၢကိးကတီၢ်ဒဲးလၢအကစံၣ် တဲၤတဲလီၤယွၤအတၢ်ကစီၣ်လၢတၢ်သးဒူအပူၤန့ၣ်လီၤ.

¹⁵မ့ၢ်ဒၣ်ကယၢာ်, အဝဲသ့ၣ်တနီၤစံၣ်တဲၤတဲလီၤခရံာ်အဂ့ၢ်မ့ၢ်လၢ အဝဲသ့ၣ်အသးက့ၣ်, ဒီးအ့ၣ်လိာ်ဆိးက့လိာ်အသး, ဘၣ်ဆၣ်ဒီးအဂၤတနီၤစံၣ်တဲၤတဲလီၤတၢ်လၢတၢ်ပာ်လီၤ သးတီတီလိၤလိၤအပူၤန့ၣ်လီၤ.

¹⁶အဝဲသ့ၣ်မၤတၢ်အံၤလၢတၢ်အဲၣ်တၢ်ကွံအဃိလီၤ. အဂ့ၢ်ဒ်အံၤ, အဝဲသ့ၣ်သ့ၣ်ညါလၢကစၢ်ယွၤဟ့ၣ်ယၤတၢ်မၤဘၣ်ဃးဒီး တၢ်ဒီဒၣ်တၢ်သးခုကစီၣ်န့ၣ်လီၤ.

¹⁷ပှၤအဂၤတဖၣ်တစံၣ်တဲၤတဲလီၤခရံာ်အဂ့ၢ်လၢတၢ်သးတီ အပူၤဘၣ်, မ့မ့ၢ်တခီ, လၢအသးဆူၣ်မၤန့ၢ်တၢ်လၢအကစၢ်ဒၣ်ဝဲအဘျုးအဂီၢ်န့ၣ်လီၤ. အဝဲသ့ၣ်ဆိကမိၣ်ဝဲလၢအကမၤအါထီၣ်တၢ်ကီတၢ်ခဲလၢ ယဂီၢ်ဖဲယအိၣ်လၢဃိာ်ပူၤအဆၢကတီၢ်န့ၣ်လီၤ.

¹⁸ဒ်လဲၣ်ဂ့ၤဒ်လဲၣ်ဂ့ၤန့ၣ်, တဘၣ်တၢ်နီတမံၤဘၣ်. ယသးခုယဲလၢတၢ်မၤတ့ၢ်အသးတဖၣ်အဃိလီၤ. တၢ်ပာ်သူၣ်ပာ်သးကမၣ်မ့ၢ်ဂ့ၤ, ဘၣ်မ့ၢ်ဂ့ၤ, ခရံာ်အဂ့ၢ်မ့ၢ်ဘၣ်တၢ်စံၣ်တဲၤတဲလီၤအီၤတသ့ဖဲအသ့လၢကျဲ တဘိဂ့ၤတဘိဂ့ၤန့ၣ်ဒီး, ယကသးခုဒံးယဲဆူညါန့ၣ်လီၤ.

¹⁹အဂ့ၢ်ဒ်အံၤယသ့ၣ်ညါယဲဒၣ်လၢခီဖျိသုတၢ်ထုကဖၣ်ဒီးတၢ်မၤ စၢၤလၢအဟဲလၢယ့ၣ်ၡူးခရံာ်အသးန့ၣ်, ယကဘၣ်တၢ်မၤထူၣ် ဖျဲးယၤန့ၣ်လီၤ.

²⁰ယတၢ်အဲၣ်ဒိးဒီးတၢ်မုၢ်လၢ်အဒိၣ်အယိာ်မ့ၢ်ဒ်သိးယသု တလီၤတိၢ်လၢယမူဒါတဂ့ၤ, မ့မ့ၢ်ကိးဆၢကတီၢ်ဒဲးဒီးလီၤဆီဒၣ် တၢ်ခဲကနံၣ်အံၤ, ယကလၢပှဲၤဒီးတၢ်သးဒူ, ဒ်သိးယမူမ့ၢ်ဂ့ၤ, ယသံမ့ၢ်ဂ့ၤခရံာ်ကဘၣ်တၢ်မၤလၤကပီၤအီၤလၢယနီၢ်ဒီဂၤညါန့ၣ်လီၤ.

²¹အဂ့ၢ်ဒ်အံၤတၢ်မူမ့ၢ်တၢ်မနုၤလဲၣ်. လၢယဂီၢ်, မ့ၢ်ခရံာ်န့ၣ်လီၤ. မ့မ့ၢ်ဒ်န့ၣ်ဒီး, တၢ်သံကဟဲစိာ်တၢ်ဘျုးအါဒိၣ်တက့ၢ်လီၤ.

²²ဘၣ်ဆၣ်ဒီး, လၢယအိၣ်မူဒံးယဲဆူညါအဃိ, ယမၤတၢ်လၢအဘျုးအိၣ်တဖၣ်မ့ၢ်သ့ဒိၣ်တက့ၢ်န့ၣ်, ယကြၢးဃုထၢဖဲလဲၣ်တမံၤလဲၣ်န့ၣ်ယတသ့ၣ်ညါလီၤတံၢ်ဘၣ်.

²³ယဘၣ်တၢ်ဆီၣ်သနံးယၤလၢတၢ်ခံမံၤအဘၢၣ်စၢၤလီၤ. ယသးအိၣ်ဒိၣ်မးလၢယကပာ်တီၢ်တၢ်အိၣ်မူအံၤဒီးက့ၤအိၣ်မူဘၣ် ဒီးခရံာ်လီၤ. အန့ၣ်မ့ၢ်တၢ်လၢအဂ့ၤဒိၣ်ဒၣ်တၢ်တက့ၢ်လီၤ.

²⁴ဘၣ်ဆၣ်ဒီး, ဒ်သိးယမၤစၢၤသုကသ့န့ၣ်အကါဒိၣ်တက့ၢ်လၢ ယအိၣ်မူဒံးယဲန့ၣ်လီၤ.

²⁵ယသးတဒ့ဒီလၢတၢ်ဂ့ၢ်အံၤဘၣ်. ဒီးလၢတၢ်န့ၣ်အဃိယသ့ၣ်ညါလၢယကအိၣ်မူဒံးလီၤ. ယကအိၣ်မူဒံးဒီးသုခဲလၢာ်ဒ်သိးကမၤအါထီၣ်သုတၢ်လဲၤထီၣ် လဲၤထီဒီးသုတၢ်သးခုလၢတၢ်စူၢ်တၢ်နာ်အပူၤန့ၣ်လီၤ.

²⁶ဒ်သိးဖဲယလဲၤကဒီးဆူသုအိၣ်န့ၣ်, သုကဒိးန့ၢ်အါထီၣ်တၢ်ဂ့ၢ်လၢသုကပာ်ကဖၢလၢသုသးလၢ ယဃိလၢသုတၢ်အိၣ်မူလၢယ့ၣ်ၡူးခရံာ်အပူၤန့ၣ်လီၤ.

²⁷အခဲအံၤ, တၢ်လၢအကါဒိၣ်န့ၣ်မ့ၢ်ဝဲသုတၢ်အိၣ်မူအကျဲကြၢးမ့ၢ်ဝဲဒ် ခရံာ်အတၢ်သးခုကစီၣ်လိၣ်ဘၣ်ဝဲအသိး, ဒ်သိးယလဲၤထံၣ်လိာ် သုသ့မ့ၢ်ဂ့ၤ, တသ့မ့ၢ်ဂ့ၤ, ယကနၢ်ဟူဘၣ်ယဲလၢသုဆၢထၢၣ်ဂၢၢ်ကျၢၤအိၣ်ဒီးတၢ်တိာ်ပာ် တမံၤဃီဒီးလၢတၢ်အဲၣ်ဒိးတမံၤဃီအပူၤ, သုဒုးသကိးတၢ်လၢတၢ်စူၢ်တၢ်နာ်ဘၣ်ဃးဒီးတၢ်သးခုကစီၣ် အဂီၢ်န့ၣ်လီၤ.

²⁸တဘၣ်ပျံၤသုဒုၣ်သုဒါတဖၣ်တဂ့ၤ. အိၣ်ဒီးတၢ်သူၣ်ဒူသးဒူ ထီဘိ, ဒီးတၢ်အံၤကဒုးထံၣ်သ့ၣ်ညါအဝဲသ့ၣ်လၢအဝဲသ့ၣ် ကဃၣ်ကွံာ်, ဒီးသုဝဲသုကမၤနၢၤတၢ်လီၤ. အဂ့ၢ်ဒ်အံၤ, ကစၢ်ယွၤမ့ၢ်ပှၤလၢအဟ့ၣ်သုတၢ်မၤနၢၤန့ၣ်လီၤ.

²⁹သုဘၣ်တၢ်ဟ့ၣ်သုအခွဲးအယာ်လၢသုကဖံးတၢ်မၤတၢ်လၢ ခရံာ်အဂီၢ်, တမ့ၢ်ထဲလၢသုစူၢ်သုနာ်အီၤအဂီၢ်ဘၣ်, မ့မ့ၢ်လၢသုကတူၢ်တၢ်လၢအဂီၢ်စ့ၢ်ကီးန့ၣ်လီၤ.

³⁰သုဝဲဒီးယၤ ပအိၣ်ဒီးတၢ်ဒုးတၢ်ယၤတမံၤဃီလီၤ. မ့ၢ်တၢ်ဒုးတၢ်ယၤတမံၤဃီလၢသုထံၣ်ယဒုးတ့ၢ်အီၤလၢ အပူၤကွံာ်, ဒီးဒ်သုနၢ်ဟူတ့ၢ်အသိး, ယဒုးဒံးယဲခဲအံၤန့ၣ်လီၤ.