Read S'gaw Karen ကလီးစဲ 3 Bible Online

ကလီးစဲ 3 - S'gaw Karen bible

ကလီးစဲ 3

¹သုဘၣ်တၢ်ဒုးဂဲၤဆၢထၢၣ်က့ၤသုလၢတၢ်သံဃုာ်ဒီးခရံာ်သတး ဒီး, သးအိၣ်ဆၢန့ၢ်ဘၣ်တၢ်ဘၣ်ဃးဒီးမူခိၣ်ဖဲခရံာ်ဆ့ၣ်နီၤဝဲလၢ ကစၢ်ယွၤအစုထွဲတခီန့ၣ်တက့ၢ်.

²သးစၢၢ်ဆၢလၢတၢ်ဘၣ်ဃးဒီးမူခိၣ်, ဒီးတဘၣ်သးစၢၢ်ဆၢလၢတၢ်ဘၣ်ဃးဒီးဟီၣ်ခိၣ်တဂ့ၤ.

³အဂ့ၢ်ဒ်အံၤ, သုသံတ့ၢ်ဃုာ်ဒီးခရံာ်, ဒီးသုတၢ်မူနီၢ်နီၢ်အိၣ်ခူသူၣ်ဃုာ်ဒီးခရံာ်လၢကစၢ်ယွၤ အပူၤလီၤ.

⁴သုတၢ်မူနီၢ်နီၢ်မ့ၢ်ခရံာ်ဒီးတုၤခရံာ်ဒုးနဲၣ်ဖျါကဒီးအသး အိၣ်ဒီးအစိကမီၤအလၤကပီၤန့ၣ်ဒီး, သုဝဲစ့ၢ်ကီးသုကအိၣ်ဖျါထီၣ်ဃုာ်ဒီးအီၤဒီးဒိးဃုာ်တၢ်လၤ ကပီၤဒီးအီၤန့ၣ်လီၤ.

⁵မ့မ့ၢ်ဒ်န့ၣ်ဒီး, တၢ်မိၣ်န့ၢ်သးလီလၢဟီၣ်ခိၣ်ချၢလၢအမၤတၢ် လၢသုပူၤဒ်တၢ်မၤကမၣ်မုၣ်ကမၣ်ခွါ, တၢ်ကလုာ်ကလိၤလၢအဟ့ၣ်လီၤအသးဆူတၢ် တကဆှီဘၣ်, တၢ်သူၣ်ကတၢသးကတၢ, တၢ်မိၣ်န့ၢ်သးလီအအၢအသီဒီးတၢ်သူၣ်လီ သးကွံတၢ်စုလီၢ်ခီၣ်ခိၣ်လၢအမ့ၢ်တၢ်တမံၤဃီဒီးတၢ်ဘါ တၢ်ဂီၤတၢ်ဖီၣ်တဖၣ်န့ၣ်, မၤသံကွံာ်ခဲလၢာ်တက့ၢ်.

⁶မ့ၢ်လၢတၢ်အၢတၢ်သီဒ်သိးအံၤတဖၣ်အဃိ, ကစၢ်ယွၤအတၢ်သးဒိၣ်ကဟဲဝဲဒီးကလီၤဘၣ်လၢပှၤလၢအတဒိ ကနၣ်ယွၤအကလုၢ်တဖၣ်အလိၤန့ၣ်လီၤ.

⁷လၢညါန့ၣ်, သုဝဲသုအိၣ်မူတ့ၢ်ဒ်တၢ်မိၣ်န့ၢ်သးလီတဖၣ်အံၤ အတၢ်မၢန့ၢ်ဆီၣ်ခံသုအသိး, ဖဲသုဒိးပၢဒိးဆှၢတ့ၢ်သုသးလၢတၢ်သ့ၣ်တဖၣ်န့ၣ်လီၤ.

⁸ဘၣ်ဆၣ်အခဲအံၤ, ညိကွံာ်တၢ်သူၣ်ဒိၣ်သးဖျိး, တၢ်သူၣ်ထီၣ်သးထီၣ်, တၢ်သူၣ်ဟ့သးဟ့ဒီးတၢ်ကတိၤစံးအၢစံးသီပှၤဂၤ, တၢ်ကတိၤဘၣ်အၢဘၣ်သီတဖၣ်တက့ၢ်. ဒီးတၢ်ကတိၤလၢအတကြၢးတဘၣ်တဖၣ်န့ၣ်, တဘၣ်ဒုးဟးထီၣ်အီၤလၢသုထးခိၣ်နီတဘီတဂ့ၤ.

⁹တဘၣ်ကတိၤလိာ်သုသးလၢတၢ်ကတိၤကဘျံးကဘျၣ်တဂ့ၤ. အဂ့ၢ်မ့ၢ်လၢသုပာ်တ့ၢ်ကွံာ်လံသုတၢ်အိၣ်မူဒီးလုၢ်လၢ် အလီၢ်လံၤတဖၣ်,

¹⁰ဒီးသုတူၢ်လိာ်စိာ်မူတ့ၢ်လံတၢ်အိၣ်မူအသီလၢအဘၣ် တၢ်မၤသီထီၣ်အီၤတဘိယူၢ်ဃီလၢကစၢ်ယွၤဒ်အက့ၢ်အဂီၤအသိး ဆူတၢ်သ့ၣ်ညါယွၤအလၢအပှဲၤအပူၤန့ၣ်လီၤ.

¹¹လၢတၢ်အိၣ်မူအသီအံၤအပူၤန့ၣ်, တၢ်ပာ်တၢ်အဒူၣ်အဆၢဒ် ပှၤကလုာ်အဂၤ, ဒီးပှၤယူဒၤဖိ, ပှၤဒိးတၢ်ကူးတရံးဒီးပှၤတဒိးဘၣ် တၢ်ကူးတရံး, ပှၤတခီထံတခီကီၢ်, ပှၤရၢၢ်ပှၤစၢၢ်, ပှၤကုၢ်ဖိဒီးပှၤသဘျ့ဖိတဖၣ်အိၣ်တသ့လၢၤဘၣ်. အဂ့ၢ်ဒ်အံၤ, ခရံာ်မ့ၢ်တၢ်ခဲလၢာ်ဒီးအိၣ်ဝဲဆိးဝဲလၢပှၤခဲလၢာ်အပူၤလီၤ.

¹²သုမ့ၢ်ကစၢ်ယွၤအပှၤဂီၢ်မုၢ်ပှၤလၢယွၤအဲၣ်ဒိးဃုထၢထီၣ်အီၤ လၢအကမ့ၢ်အတၢ်ဒၣ်ဝဲလီၤ. လၢတၢ်န့ၣ်အဃိ, ကူထီၣ်သိးထီၣ်တၢ်သူၣ်ကညီၤသးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်ပာ်သးကပုာ်လုး, တၢ်ဝံသးစူၤတဖၣ်တက့ၢ်.

¹³ဝံသးစူၤလိာ်သုသးဒီးတၢ်ပာ်ဒ့ၣ်ပာ်ကမၣ်လိာ်သုသးအလီၢ်မ့ၢ် အိၣ်ဒီးပျၢ်လိာ်သုတၢ်ကမၣ်သကိးသကိးတက့ၢ်. ပျၢ်လိာ်သုတၢ် ကမၣ်တဂၤဒီးတဂၤဒ်ကစၢ်ပျၢ်တ့ၢ်လံသုတၢ်ကမၣ်အသိးန့ၣ်တက့ၢ်.

¹⁴လၢတၢ်ခဲလၢာ်အဖီခိၣ်န့ၣ်, ပာ်ဖှိၣ်အါထီၣ်တၢ်အဲၣ်တၢ်ကွံလၢ အမ့ၢ်တၢ်လၢအစၢဖှိၣ်ဒီးဒုးကဲထီၣ်တၢ်ခဲလၢာ်လၢတၢ်တမံၤဃီ လၢလၢပှဲၤပှဲၤန့ၣ်တက့ၢ်.

¹⁵မ်ခရံာ်အတၢ်ဃူတၢ်ဖိးပၢတၢ်လၢသုသူၣ်ကံၢ်သးလဲအပူၤ တက့ၢ်. အဂ့ၢ်ဒ်အံၤကစၢ်ယွၤကိးသုဆူတၢ်ကဲထီၣ်နီၢ်တဂၤ ဃီလၢတၢ်အိၣ်ဖှိၣ်အပူၤဒ်သိးသုကကလၢၢ်ဘၣ်တၢ်ဃူ တၢ်ဖိးအံၤန့ၣ်လီၤ. ဒီးသုဘၣ်စံးဘျုးယွၤလီၤ.

¹⁶ခရံာ်အတၢ်ကစီၣ်မ်အမူလၢသုပူၤထူးထူးတီၤတီၤတက့ၢ်. သိၣ်လိသီလိဒီးသိၣ်က့ၤသီက့ၤလိာ်သုသးလၢတၢ်ကူၣ် သ့ကူၣ်ဘၣ်အပူၤတက့ၢ်. သးဝံၣ်ထါစံးထီၣ်ပတြၢၤဒီးထါသးဝံၣ်, ဒီးတၢ်ဘူၣ်တၢ်ဘါအတၢ်သးဝံၣ်အိၣ်ဒီးတၢ်စံးဘျုးစံးဖှိၣ် ကစၢ်ယွၤလၢသုသူၣ်ကံၢ်သးလဲအပူၤတက့ၢ်.

¹⁷ကယဲၢ်သုမၤတၢ်တမံၤလၢ်လၢ်န့ၣ်, လၢတၢ်ကတိၤမ့ၢ်ဂ့ၤ, တၢ်ဖံးတၢ်မၤမ့ၢ်ဂ့ၤ, မၤတၢ်ကိးမံၤဒဲးလၢကစၢ်ယ့ၣ်ၡူးအမံၤ အပူၤ, အိၣ်ဒီးတၢ်စံးထီၣ်ပတြၢၤပၢ်ယွၤခီဖျိအီၤတက့ၢ်.

¹⁸မါသ့ၣ်ဧၢ, ဒိးပၢသုသးလၢသုဝၤတက့ၢ်. အဂ့ၢ်ဒ်အံၤ, တၢ်န့ၣ်မ့ၢ်တၢ်လၢသုကြၢးမၤဝဲဒ်ပှၤခရံာ်ဖိတဖၣ်အသိး န့ၣ်လီၤ.

¹⁹ဝၤသ့ၣ်ဧၢ, အဲၣ်သုမါဒီးတဘၣ်ပာ်ဆူၣ်ပာ်ကိၤသုသးလၢ အဝဲသ့ၣ်အဖီခိၣ်တဂ့ၤ.

²⁰ဖိသ့ၣ်ဧၢ, စူၢ်သုမိၢ်သုပၢ်လၢတၢ်ကိးမံၤဒဲးအပူၤတက့ၢ်. အဂ့ၢ်ဒ်အံၤတၢ်န့ၣ်မ့ၢ်တၢ်လၢအဘၣ်ကစၢ်ယွၤအသးလီၤ.

²¹မိၢ်ပၢ်သ့ၣ်ဧၢ, တဘၣ်မၤအ့န့မၤအၢထီၣ်သီထီၣ်သုဖိတဖၣ် အသးလၢအကသးဟးဂီၤအဂီၢ်န့ၣ်တဂ့ၤ.

²²ကုၢ်သ့ၣ်ဧၢ, စူၢ်သုကစၢ်တဖၣ်လၢတၢ်ခဲလၢာ်အပူၤ, တမ့ၢ်ဘၣ်ထဲလၢအဝဲသ့ၣ်အမဲာ်ညါလၢအကထံၣ်ဝဲဒီးဘၣ် သူၣ်ဘၣ်သးဝဲအဂီၢ်န့ၣ်ဧိၤဘၣ်. မ့မ့ၢ်မၤသုဝဲလၢတၢ်သူၣ်တီသးရၤဒီးတၢ်ယူးယီၣ်ကစၢ် အပူၤတက့ၢ်.

²³တၢ်လၢသုမၤတမံၤလၢ်လၢ်န့ၣ်, မၤအီၤလၢတၢ်သူၣ်ခုသးခု အပူၤဒ်သုမၤတၢ်လၢကစၢ်အဂီၢ်ဒီးတမ့ၢ်ဘၣ်လၢပှၤကညီ အဂီၢ်အသိးန့ၣ်တက့ၢ်.

²⁴သ့ၣ်ညါသုဝဲလၢကစၢ်ကဟ့ၣ်သုတၢ်န့ၢ်သါလၢအကတီၤ ပာ်တ့ၢ်ဝဲလၢအပှၤဂီၢ်မုၢ်အဂီၢ်, ဒ်ခိၣ်ဖးအသိးန့ၣ်တက့ၢ်. အဂ့ၢ်ဒ်အံၤ, ခရံာ်မ့ၢ်ကစၢ်နီၢ်နီၢ်လၢသုမၤအတၢ်န့ၣ်လီၤ.

²⁵ဒီးပှၤမၤကမၣ်တၢ်ကိးဂၤဒဲးန့ၣ်ကဘၣ်တၢ်ဟ့ၣ်ကၣ်က့ၤအီၤဒ် အမၤတၢ်အသိးလီၤ. အဂ့ၢ်ဒ်အံၤကစၢ်ယွၤလၢအစံၣ်ညီၣ်တၢ်န့ၣ်, တကွၢ်မဲာ်ပှၤနီတဂၤဘၣ်.