Read S'gaw Karen ၁ သ့းစၤလနံ 2 Bible Online

၁ သ့းစၤလနံ 2 - S'gaw Karen bible

၁ သ့းစၤလနံ 2

¹ပဒီပုၢ်ဝဲၢ်သ့ၣ်ဧၢ, သုနီၢ်ကစၢ်ဒၣ်သုဝဲသုသ့ၣ်ညါလၢ ပတၢ်လဲၤအိၣ်သကိးသုအိၣ်ဒီးအဘျုးအဖှိၣ်ကစီဒီန့ၣ်လီၤ.

²သုသ့ၣ်ညါလၢတချုးပဟဲဒံးဘၣ်ဆူသုအိၣ်န့ၣ်ပဘၣ်တၢ်မၤနးမၤ ဖှီၣ်ဒီးကတိၤတရီတပါပှၤဖဲဝ့ၢ်ဖံလံးပံၤဒ်လဲၣ်န့ၣ်လီၤ. ဒီးတၢ်ထီဒါအိၣ်ဝဲအဒိၣ်အမုၢ်သနာ်က့, ပကစၢ်ယွၤဟ့ၣ်ပှၤတၢ်သးဒူဒ်သိးပကတဲဘၣ်သုတၢ်ကစီၣ် အမုာ်လၢအဟဲလၢအဝဲဒၣ်အအိၣ်န့ၣ်လီၤ.

³ပတၢ်သဆၣ်ထီၣ်သုခံန့ၣ်တမ့ၢ်လၢတၢ်ကမူၤကမၣ်အပူၤမ့ၢ်ဂ့ၤ, တၢ်ပာ်သူၣ်ပာ်သးအတကဆှီတဖၣ်အပူၤမ့ၢ်ဂ့ၤန့ၣ်ဘၣ်. ပတဂုာ်ကျဲးစၢးလီန့ၢ်စ့ၢ်ကီးပှၤနီတဂၤဘၣ်.

⁴မ့မ့ၢ်ထီဘိန့ၣ်ပစံးကတိၤတၢ်လၢကစၢ်ယွၤသးအိၣ်လၢ ပကကတိၤန့ၣ်လီၤ. အဂ့ၢ်ဒ်အံၤ, အဝဲဒၣ်ပာ်ပှၤဒ်ပှၤလၢအကြၢးဝဲဘၣ်ဝဲလၢတၢ်ကဟ့ၣ်လီၤတၢ်သး ခုကစီၣ်ဆူအစုပူၤလီၤ. ပတဂုာ်ကျဲးစၢးမၤတၢ်ဘၣ်ပှၤကညီအသး ဘၣ်. မ့မ့ၢ်ပဂုာ်ကျဲးစၢးမၤကစၢ်ယွၤလၢအထံၣ်နုာ်တၢ်လၢပသူၣ်ကံၢ် သးလဲပူၤတဂၤအတၢ်ဘၣ်အသးလီၤ.

⁵သုသ့ၣ်ညါသုဝဲဂ့ၤဂ့ၤလၢပတဟဲဆူသုအိၣ်, အိၣ်ဒီးတၢ်စံးပတြၢၤထးခိၣ်ဖံးလာ်သုဘၣ်. တၢ်ကတိၤလၢပစံးကတိၤအီၤန့ၣ်, တမ့ၢ်စ့ၢ်ကီးလၢအကကးဘၢတၢ်သူၣ်လီသးကွံအဂီၢ်န့ၣ်ဘၣ်. ကစၢ်ယွၤမ့ၢ်ပှၤအုၣ်အသးလၢပဂီၢ်လီၤ.

⁶ပတဂုာ်ကျဲးစၢးဒိးန့ၢ်တၢ်စံးထီၣ်ပတြၢၤလၢသုအိၣ်မ့ၢ်ဂ့ၤ, လၢပှၤဂၤအအိၣ်မ့ၢ်ဂ့ၤန့ၣ်ဘၣ်.

⁷ဒ်ခရံာ်အပှၤတၢ်မၢဖိတဖၣ်အသိးန့ၣ်, ပမ့ၢ်ဃ့ဆူၣ်တၢ်လၢ သုအိၣ်န့ၣ်, ကြၢးဝဲဘၣ်ဝဲကစီဒီသနာ်က့ပတမၤဘၣ်. မ့မ့ၢ်ဖဲပအိၣ်ဒီးသုအဆၢကတီၢ်န့ၣ်ပဘၣ်ထွဲဒီးသုခုၣ်ခုၣ် မုာ်မုာ်, ဒ်မိၢ်တဂၤအံးထွဲကွၢ်ထွဲအဖိတဖၣ်အသိးန့ၣ်လီၤ.

⁸မ့ၢ်လၢပအဲၣ်ဘၣ်သုအဃိပအိၣ်ကတဲာ်ကတီၤပသးတမ့ၢ်ထဲလၢ ပကဒုးသ့ၣ်ညါသုလၢတၢ်သးခုကစီၣ်အဂ့ၢ်န့ၣ်ဘၣ်. မ့မ့ၢ်ပအိၣ်ကတဲာ်ကတီၤဒၣ်လဲာ်ပသးလၢပကဟ့ၣ်လီၤ ပသးသမူလၢသုဂီၢ်လီၤ. သုလုၢ်ဒိၣ်ပှ့ၤဒိၣ်ဒိၣ်မးလၢပဂီၢ်လီၤ.

⁹ပမၤတ့ၢ်တၢ်ဆူၣ်ဆံးအါလဲၣ်န့ၣ်သုကသ့ၣ်နီၣ်ထီၣ်လီၤ. ယဒီပုၢ်ဝဲၢ်သ့ၣ်ဧၢ, ပမၤတ့ၢ်တၢ်မုၢ်ဆါဆဲးလၢမုၢ်နၤဒ်သိးဖဲပစံၣ် တဲၤတဲလီၤန့ၢ်သုတၢ်သးခုကစီၣ်ဟဲလၢကစၢ်ယွၤအအိၣ် အဖၢမုၢ်, သုသုတဘၣ်လၢာ်ဘူၣ်လၢာ်စ့ၤလၢပဂီၢ်တဂ့ၤအဂီၢ် န့ၣ်လီၤ.

¹⁰သုဝဲဒီးကစၢ်ယွၤစ့ၢ်ကီးမ့ၢ်ပှၤအုၣ်အသးလၢပဂီၢ်လၢပတၢ် မၤဘၣ်သုဝဲပှၤစူၢ်က့ၤနာ်က့ၤခရံာ်တဖၣ်, မ့ၢ်တၢ်လၢအကဆှီ, တီဝဲလိၤဝဲ, ဒီးပူၤဖျဲးဒီးတၢ်ကမူၤကမၣ်န့ၣ်လီၤ.

¹¹သုသ့ၣ်ညါလၢပမၤစၢၤသုဝဲတဂၤဘၣ်တဂၤဒ်ပၢ်တဂၤမၤစၢၤ အဖိဒၣ်ဝဲတဖၣ်အသိးန့ၣ်လီၤ.

¹²ပဟ့ၣ်ဆူၣ်ဒီးမၤမုာ်ထီၣ်သုသး, ဒီးပသဆၣ်ထီၣ်သုခံတဘိ ယူၢ်ဃီ, ဒ်သိးသုကအိၣ်မူတၢ်အိၣ်မူလၢအဘၣ်ကစၢ်ယွၤအသး, ယွၤလၢအကိးဃီၤသုဒ်သိးသုကဒိးန့ၢ်ဃုာ်သကိးအဝဲအဘီ အမုၢ်ဒီးအလၤကပီၤဒၣ်ဝဲန့ၣ်လီၤ.

¹³ဒီးတၢ်ဂ့ၢ်အိၣ်ဒံးဝဲအဂၤတမံၤလၢဘၣ်မနုၤအဃိပစံးဘျုးစံး ဖှိၣ်ကစၢ်ယွၤထီဘိတဘိယူာ်ဃီလဲၣ်န့ၣ်လီၤ. ဖဲပဟဲဆှၢန့ၢ်သုကစၢ်ယွၤအတၢ်ကစီၣ်န့ၣ်, သုနၢ်ဟူဒီးတူၢ်လိာ်အီၤဒ်တၢ်ကစီၣ်ဟဲလၢကစၢ်ယွၤအအိၣ်အသိး, ဒီးတမ့ၢ်ဝဲဒ်တၢ်ကစီၣ်ဟဲလၢပှၤကညီအအိၣ်အသိးဘၣ်လီၤ. သပှၢ်ကတၢၢ်, တၢ်ကစီၣ်အဝဲအံၤဟဲလၢကစၢ်ယွၤအအိၣ်န့ၣ်လီၤ. အဂ့ၢ်ဒ်အံၤ, ကစၢ်ယွၤမၤတၢ်လၢသုဝဲလၢအစူၢ်က့ၤနာ်က့ၤတၢ် တဖၣ်အပူၤန့ၣ်လီၤ.

¹⁴ပဒီပုၢ်ဝဲၢ်သ့ၣ်ဧၢ, တၢ်လၢအမၤအသးဒီးသုတဖၣ်န့ၣ်မ့ၢ်တၢ်တမံၤဃီလၢအမၤတ့ၢ် အသးဒီးကစၢ်ယွၤအတၢ်အိၣ်ဖှိၣ်လၢကီၢ်ယူဒၤအပူၤ, ပှၤတဖၣ်လၢအဘၣ်ဃးဒီးယ့ၣ်ၡူးခရံာ်န့ၣ်လီၤ. သုတူၢ်ဘၣ်တၢ်တမံၤဃီလၢသုပှၤကလုာ်တဖၣ်အစုပူၤ, ဒ်အဝဲသ့ၣ်တူၢ်ဘၣ်တၢ်လၢပှၤယူဒၤဖိအစုပူၤအသိး န့ၣ်လီၤ.

¹⁵အဝဲသ့ၣ်တဖၣ်န့ၣ်, မ့ၢ်ပှၤလၢအမၤသံကစၢ်ယ့ၣ်ၡူးဒီးမၤသံ တ့ၢ်ဝံတဖၣ်, ဒီးမၤအၢမၤနးပဝဲဒၣ်န့ၣ်လီၤ. အဝဲသ့ၣ်မၤတၢ်တဘၣ်ကစၢ်ယွၤအသးဆံးဒိၣ်လဲၣ်. အဝဲသ့ၣ်အၢသီလၢပှၤကိးဂၤဒဲးအဖီခိၣ်ဆံးဒိၣ်လဲၣ်.

¹⁶အဝဲသ့ၣ်ဂုာ်ကျဲးစၢးတြီဒၣ်လဲာ်ပှၤဒ်သိးတၢ်ကစီၣ်လၢ အကဟဲစိာ်န့ၢ်တၢ်အုၣ်က့ၤခီၣ်က့ၤန့ၣ်, ပသုတစံၣ်တဲၤတဲလီၤန့ၢ်ပှၤကလုာ်ဂၤတဖၣ်တဂ့ၤန့ၣ်လီၤ. အဝဲအံၤမ့ၢ်တၢ်လၢအမၤလၢထီၣ်ပှဲၤထီၣ်တၢ်ဒဲးဘးခဲ လၢာ်လၢအဝဲသ့ၣ်မၤတ့ၢ်ဝဲထီဘိန့ၣ်လီၤ. ဒီးခဲကနံၣ်အံၤကစၢ်ယွၤအတၢ်သးထီၣ်တုၤအိၣ်အဝဲသ့ၣ် လံန့ၣ်လီၤ.

¹⁷ဒီပုၢ်ဝဲၢ်သ့ၣ်ဧၢ, မ့မ့ၢ်ပဝဲသ့ၣ်တဖၣ်အံၤ, ဖဲပဘၣ်အိၣ်လီၤဖးဒီးသုတစိၢ်တလီၢ်လၢနီၢ်ခိနီၢ်ခီဒီး တမ့ၢ်ဘၣ်လၢတၢ်ဆိကမိၣ်အပူၤန့ၣ်, ပသးသယုၢ်ဘၣ်သုအဒိၣ်အအါဒီးပဂုာ်ကျဲးစၢးပဝဲသပှၢ် ပှၢ်ဒ်သိးပကထံၣ်ဘၣ်က့ၤကဒီးသုန့ၣ်လီၤ.

¹⁸ပအဲၣ်ဒိးလဲၤအိၣ်သကိးကဒီးသုလီၤ. ယနီၢ်ကစၢ်ဒၣ်ယဲ, ယဂုာ်ကျဲးစၢးလဲၤကဒါက့ၤဆူသုအိၣ်အါန့ၢ်တဘျီ, ဘၣ်ဆၣ်မုၣ်ကီၤလံၢ်တြီပှၤလီၤ.

¹⁹သုဆိကမိၣ်လၢပတၢ်ပာ်ကဖၢလၢပသးအလီၢ်ဒီးပတၢ်သးခု ကမ့ၢ်တၢ်မနုၤလဲၣ်. မ့ၢ်ဒၣ်သုလီၤ. ဒီးသုကမ့ၢ်ပတၢ်မၤနၢၤအပနီၣ်လၢပကပာ်ကဖၢလၢပသးအဒိၣ် ကတၢၢ်လၢပကစၢ်ယ့ၣ်ၡူးအမဲာ်ညါဖဲအဟဲဝဲန့ၣ်လီၤ.

²⁰သပှၢ်ကတၢၢ်, သုမ့ၢ်ပတၢ်ပာ်ကဖၢလၢပသးအလီၢ်ဒီးပတၢ် သးခုန့ၣ်လီၤ.