Read S'gaw Karen လံာ်စီၤယိၤၡူ 1 Bible Online

လံာ်စီၤယိၤၡူ 1 - S'gaw Karen bible

လံာ်စီၤယိၤၡူ 1

¹ယွၤအခ့အပှၤစီၤမိၤၡ့သံဝံၤအလီၢ်ခံန့ၣ်, ယွၤကတိၤတၢ်ဒီးပှၤလၢအမၤစၢၤစီၤမိၤၡ့, စီၤယိၤၡူလၢအမ့ၢ်စီၤနိၣ်အဖိခွါန့ၣ်လီၤ.

²အဝဲစံးဝဲ, “ယခ့ယပှၤစီၤမိၤၡ့သံလံ. အိၣ်ကတဲာ်ကတီၤသုသးခဲအံၤ, နၤဒီးပှၤအံၣ်စရ့လးဖိခဲလၢာ်, ဒီးလဲၤခီဂာ်ထံကျိယၢ်ဒ့ၣ်ဒီးလဲၤနုာ်ဆူကီၢ်လၢယဟ့ၣ်လီၤ အဝဲသ့ၣ်န့ၣ်တက့ၢ်.

³ယဟ့ၣ်လီၤသုတၢ်လီၢ်ခဲလၢာ်လၢသုခီၣ်ကယီၢ်လီၤဝဲ, ဒ်ယစံးဘၣ်တ့ၢ်စီၤမိၤၡ့အသိးန့ၣ်လီၤ.

⁴သုကီၢ်ဆၢကစးထီၣ်အသးလၢပှၢ်မုၢ်ကနၢလၢကလံၤထံးဒီးကတုၤဝဲ လၢလဘၤနိၣ်အကစၢၢ်တဖၣ်လၢကလံၤစိး, ဒီးလၢထံကျိဖးဒိၣ်ဖရၤသးလၢမုၢ်ထီၣ်တခီ, ဃ့ၤသးဖိအကီၢ်ဒီဘ့ၣ်, ဒီးတုၤလၢပီၣ်လဲၣ်ဖးဒိၣ်လၢမုၢ်နုာ် တခီန့ၣ်လီၤ.

⁵စီၤယိၤၡူဧၢ, လၢနတၢ်အိၣ်မူဒီတစိၤန့ၣ်, ပှၤထီဒါနၤတသ့ နီတဂၤဘၣ်. ဒ်ယအိၣ်တ့ၢ်ဒီးစီၤမိၤၡ့အသိးန့ၣ်, ယကအိၣ်ဒီးနၤလီၤ. ယကအိၣ်ဒီးနၤထီဘိတထံၣ်ဃီလီၤ. ယတလဲၤသ ဒၣ်နၤနီတစုဘၣ်.

⁶ပာ်ဆူၣ်နသးဒီးအိၣ်ဒီးတၢ်သးဒူတက့ၢ်. အဂ့ၢ်ဒ်အံၤ, နကမ့ၢ်ပှၤဂီၢ်မုၢ်အံၤအခိၣ်အနၢ် ဖဲအဝဲသ့ၣ်နုာ်လီၤဒီးန့ၢ်သါကီၢ်အံၤလၢယအၢၣ်လီၤတ့ၢ်အဝဲ သ့ၣ်အမိၢ်ပၢ်ဖံဖုလၢပျၢၤတဖၣ်န့ၣ်လီၤ.

⁷ထဲပာ်ဆူၣ်နသးဒီးအိၣ်ဒီးတၢ်သးဒူတက့ၢ်. ဒီးမၤလီၤတံၢ်နသးလၢနစူၢ်တၢ်သိၣ်တၢ်သီခဲလၢာ်လၢယခ့ယပှၤစီၤမိၤၡ့ ဟ့ၣ်လီၤနၤန့ၣ်တက့ၢ်. ဆူစုထွဲမ့ၢ်ဂ့ၤ, စုစ့ၣ်မ့ၢ်ဂ့ၤတဘၣ်ဃၣ်ကပၤကွံာ်နသးလၢအီၤ တဂ့ၤ. ဒီးဖဲနလဲၤတၢ်တပူၤလၢ်လၢ်န့ၣ်နကဘီၣ်ထီၣ်ညီထီၣ်လီၤ.

⁸ပလီၢ်နသးလၢလံာ်တၢ်သိၣ်တၢ်သီအံၤကဘၣ်တၢ်ဖးအီၤထီ ဘိလၢသုတၢ်ဘူၣ်တၢ်ဘါအပူၤတက့ၢ်. မၤလိဆိကမိၣ်အီၤမုၢ်ဆါဆဲးလၢမုၢ်နၤ, ဒီးမၤလီၤတံၢ်လၢ နကစူၢ်တၢ်ကွဲးအသးလၢအပူၤကိးထံၣ်ဒဲးန့ၣ်တက့ၢ်. အန့ၣ်ဒီးနကဘီၣ်ထီၣ်ညီထီၣ်ဒီးနမၤတၢ်ခဲလၢာ်ကကဲထီၣ်လိၣ်ထီၣ် ဝဲလီၤ.

⁹သ့ၣ်နီၣ်ထီၣ်လၢယမၤလိာ်တ့ၢ်နၤလၢနကပာ်ဆူၣ်နသးဒီးသူၣ်ဒူသး ဒူန့ၣ်တက့ၢ်. တဘၣ်ပျံၤတၢ်တဂ့ၤ, ဒီးတဘၣ်တ့ၢ်စၢ်လီၤနဂံၢ်နဘါတဂ့ၤ. ယၤ, ယွၤနကစၢ်အိၣ်ဒီးနၤဖဲနလဲၤတၢ်တပူၤလၢ်လၢ်န့ၣ်လီၤ.”

¹⁰အန့ၣ်ဝံၤဒီး, စီၤယိၤၡူမၤလိာ်ပှၤအံၣ်စရ့လးဖိအခိၣ်အနၢ်တဖၣ်

¹¹လၢအကလဲၤဆူပှၤသူၣ်ဒဲအလီၢ်ခဲလၢာ်ဒီးစံးဘၣ်ပှၤဂီၢ်မုၢ်, “ကတဲာ်ကတီၤတၢ်အီၣ်တၢ်အီတက့ၢ်. အဂ့ၢ်ဒ်အံၤ, လၢသၢသီအတီၢ်ပူၤသုကခီဂာ်ထံကျိယၢ်ဒ့ၣ်ဒ်သိးသု ကလဲၤနုာ်လီၤဒီးန့ၢ်သါကီၢ်လၢယွၤသု ကစၢ်ဟ့ၣ်လီၤသုန့ၣ်လီၤ.”

¹²စီၤယိၤၡူစံးဘၣ်ပှၤရူၤဘ့ၣ်ဖိဒီးပှၤကးဖိအဒူၣ်တဖၣ်, ဒီးပှၤမနၤၡ့ၣ်ဖိအဒူၣ်တဝာ်,

¹³သ့ၣ်နီၣ်ထီၣ်က့ၤယွၤအခ့အပှၤစီၤမိၤၡ့စံးဘၣ်တ့ၢ်သုလၢယွၤသု ကစၢ်ကဟ့ၣ်လီၤသုတၢ်လီၢ်လၢထံကျိယၢ်ဒ့ၣ်အမုၢ်ထီၣ်တက ပၤအံၤလၢသုကအိၣ်ဆိးလၢအပူၤအဂီၢ်န့ၣ်တက့ၢ်.

¹⁴သုဖိသုမါတဖၣ်, သုဖိသုလံၤတဖၣ်, ဒီးသုဆၣ်ဖိကီၢ်ဖိအဒၢတဖၣ်ကအိၣ်ကဆိးဖဲ အံၤ, မ့မ့ၢ်သုပှၤဒုးတၢ်ဖိလၢအစိာ်စုက ဝဲၤတဖၣ်ကခီဂာ်ဆိလၢအဒီပုၢ်ဝဲၢ်ပှၤ အံၣ်စရ့လးဖိတဖၣ်အမဲာ်ညါလၢကမၤစၢၤအဝဲသ့ၣ်အဂီၢ်,

¹⁵တုၤအနုာ်လီၤမၤန့ၢ်တၢ်လီၢ်လၢထံကျိယၢ်ဒ့ၣ်အမုၢ်နုာ်တကပၤလၢ ယွၤသုကစၢ်ဟ့ၣ်လီၤအဝဲသ့ၣ်န့ၣ်လီၤ. ဖဲပှၤအံၣ်စရ့လးဖိအဒူၣ်ခဲလၢာ်မၤန့ၢ်အလီၢ်အိၣ်လီၢ်ဆိးလၢ အဂီၢ်လံဒီး, သုကဟဲက့ၤဒီးအိၣ်ဆိးဖဲအံၤလၢသုလီၢ်ဒၣ် သုဝဲလၢထံကျိယၢ်ဒ့ၣ်အမုၢ်ထီၣ်တကပၤ, လၢယွၤအခ့အပှၤစီၤမိၤၡ့ဟ့ၣ်လီၤသုန့ၣ်လီၤ.”

¹⁶အဝဲသ့ၣ်စံးဆၢက့ၤစီၤယိၤၡူ, “ပကမၤတၢ်ခဲလၢာ်လၢနစံးဘၣ်တဲဘၣ်ပှၤဒီးပကလဲၤတၢ်တပူၤလၢ် လၢ်ဖဲနမၢလီၤပှၤန့ၣ်လီၤ.

¹⁷ဒ်ပဒိကနၣ်စီၤမိၤၡ့ထီဘိအသိးန့ၣ်ပကစူၢ်နၤဒီးမ်ယွၤနကစၢ် ယွၤကအိၣ်ဒီးနၤဒ်အအိၣ်တ့ၢ်ဒီးစီၤမိၤၡ့အသိးန့ၣ်တက့ၢ်.

¹⁸ပှၤတဂၤလၢ်လၢ်လၢအထီဒါနတၢ်စိတၢ်ကမီၤ, ဒီးတစူၢ်ဘၣ်နတၢ်မၤလိာ်တမံၤလၢ်လၢ်န့ၣ်, ကဘၣ်တၢ်မၤသံအီၤလီၤ. ထဲပာ်ဆူၣ်နသးဒီးအိၣ်ဒီးတၢ်သးဒူတက့ၢ်.”