Read S'gaw Karen လံာ်စီၤယိၤၡူ 12 Bible Online

လံာ်စီၤယိၤၡူ 12 - S'gaw Karen bible

လံာ်စီၤယိၤၡူ 12

¹အအံၤမ့ၢ်ထံကီၢ်အစီၤပၤတဖၣ်လၢ ပှၤအံၣ်စရ့လးဖိတဖၣ်မၤနၢၤတ့ၢ်ဒီးဟံးန့ၢ်လံအကီၢ်လၢထံကျိယၢ်ဒ့ၣ်အမုၢ်ထီၣ်တကပၤ စးထီၣ်လၢအၢ်နိၣ်တၢ်ပၢၤခိၣ် ထီၣ်ဆူထံကျိယၢ်ဒ့ၣ်တၢ်ပၢၤခိၣ်တုၤလၢကစၢၢ်ဃ့ရမိၣ်လၢကလံၤ စိးန့ၣ်လီၤ. အဝဲသ့ၣ်မၤနၢၤစီၤပၤခံဂၤန့ၣ်လီၤ.

²တဂၤမ့ၢ်ဝဲစီၤစံဃိၣ်, ပှၤအမိၢ်ဖိအစီၤပၤလၢအပၢတၢ်ဖဲဝ့ၢ်ဃ့ၡဘိၣ်လီၤ. အဘီမုၢ်ပၣ်ဃုာ်ဒီးကီၢ်ကံးလဧးတဝာ်, စးထီၣ်လၢဝ့ၢ်ဧရိၤဧ့ၢ် (လၢအအိၣ်လၢထံကျိအၢ်နိၣ်အတၢ်ပၢၤခိၣ်အထိးနါ) ဒီးလၢဝ့ၢ်လၢအအိၣ်လၢတၢ်ပၢၤခိၣ်န့ၣ်အခၢၣ်သး, ပၢၢ်တုၤလၢထံကျိယးဘိးလၢအအိၣ်လၢဧၣ်မိၣ်အကီၢ်ဆၢ,

³ဒီးပၣ်ဃုာ်ဒီးထံကျိယၢ်ဒ့ၣ် အတၢ်ပၢၤခိၣ်စးထီၣ်လၢပီၣ်လဲၣ်ကၤလံၤလါကလံၤထံး ဆူဘ့ၤသၤယၡံမိး (ပီၣ်လဲၣ်အံသၣ်အမုၢ်ထီၣ်) ဒီးတုၤဆူကစၢၢ်ပံးစကၤအခီၣ်ထံးန့ၣ်လီၤ.

⁴အဝဲသ့ၣ်မၤနၢၤကီၢ်ဘၤၡၣ်အစီၤပၤစ့ၢ်ကီး, လၢအမ့ၢ်ပှၤနီၢ်ဒိၣ်ဖိလၢအအိၣ်လီၤတဲာ် အကျါတဂၤဒီးအဝဲပၢတၢ်ဖဲဝ့ၢ်ဧၤၡတြိးဒီးဝ့ၢ်အ့ဒြံၤန့ၣ်လီၤ.

⁵အဝဲအဘီမုၢ်ပၣ်ဃုာ်ဒီးကစၢၢ်ဃ့ရမိၣ်, ဝ့ၢ်စၤလကး, ဒီးကီၢ်ဘၤၡၣ်ခဲလၢာ်ပၢၢ်တုၤလၢကၡူၢ်ဒီးမၤကးအကီၢ်ဆၢတဖၣ်, ပၣ်ဃုာ်ဒီးကီၢ်ကံးလဧးတဝာ်ပၢၢ်တုၤလၢဝ့ၢ်ဃ့ၡဘိၣ် အစီၤပၤစံဃိၣ်အကီၢ်န့ၣ်လီၤ.

⁶စီၤပၤခံဂၤအံၤဘၣ်တၢ်မၤနၢၤအီၤလၢစီၤမိၤၡ့ဒီးပှၤအံၣ်စရ့လးဖိ န့ၣ်လီၤ. ယွၤအခ့အပှၤစီၤမိၤၡ့ဟ့ၣ်လီၤအကီၢ်ဆူရူၤဘ့ၣ်ဒီးကးအဒူၣ် ဖိတဖၣ်ဒီးမနၤၡ့ၣ်အဒူၣ်တဝာ်လၢအတၢ်န့ၢ်သါအဂီၢ်န့ၣ်လီၤ.

⁷စီၤယိၤၡူဒီးပှၤအံၣ်စရ့လးဖိတဖၣ်မၤနၢၤစီၤပၤခဲလၢာ်လၢအအိၣ် လၢထံကျိယၢ်ဒ့ၣ်အမုၢ်နုာ်, စးထီၣ်လၢဝ့ၢ်ဘဧၤလးကးလၢလဘၤ နိၣ်ကစၢၢ်ကဆူးအတၢ်ပၢၤခိၣ်တုၤလၢကစၢၢ်ဃၤလးလၢကလံၤထံး ဘူးဒီးကီၢ်စ့ဧၢ်န့ၣ်လီၤ. စီၤယိၤၡူနီၤဖးဒီးဟ့ၣ်လီၤကီၢ်အံၤဆူပှၤအံၣ် စရ့လးဖိအဒူၣ်တဖၣ်လၢကကဲထီၣ်အတၢ်န့ၢ်သါအဂၢၢ်အကျၢၤအဂီၢ် န့ၣ်လီၤ.

⁸တၢ်နီၤလီၤအံၤမ့ၢ်ဝဲကစၢၢ်ကလိအကီၢ်, မုၢ်နုာ်ကစၢၢ်ဂံၢ်ထံးတဖၣ်, ထံကျိယၢ်ဒ့ၣ်အတၢ်ပၢၤခိၣ်ဒီး အကစၢၢ်ဂံၢ်ထံးတဖၣ်မုၢ်ထီၣ်အတၢ်ပၤလီၤတဖၣ်, ဒီးကီၢ်လၢအဃ့ထီလၢကလံၤထံးန့ၣ်လီၤ. ကီၢ်အံၤမ့ၢ်တ့ၢ်ပှၤဃ့ၤသးဖိ, ပှၤအမိၢ်ဖိ, ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိ, ဒီးပှၤယဘူၣ်ဖိအလီၢ်အိၣ်လီၢ်ဆိးန့ၣ်လီၤ.

⁹ပှၤအံၣ်စရ့လးဖိတဖၣ်မၤနၢၤဝ့ၢ်လၢလာ်တဖၣ်အံၤအစီၤပၤတဖၣ် န့ၣ်လီၤ. ယရံၤဃိ, ဂဲ (ဘူးဒီးဘ့ၤသ့လး)

¹⁰ယရူၤၡလ့ၣ်, ဃ့ဘြိၣ်, ယၢ်မူသး, လၤကံၣ်, ဧ့းကလိၣ်, က့စ့ၢ်, ဒဘံၢ်, က့ဒ့ၢ်, ဃိၢ်မါ, ဧရး, လံးဘနၤ, ဧဒူးလၣ်, မးက့ဒၤ, ဘ့ၤသ့လး, တးပူၤ, ဃ့ဖ့ၢ်, အဖ့း, လးၡၤရိၣ်, မၤဒိၣ်, ဃါစိၢ်, ၡံးမံရိၣ်မရိၣ်, အၤကၡး, တၤနး, မကံဒိၤ, က့ဒ့ၣ်, ယၤကနၣ် (လၢကၢ်မ့ၤလးအပူၤ), ဒိၢ် (လၢပီၣ်လဲၣ်ကၢၢ်နံၤ), ကံးလကၤလး (လၢကၤလံၤလါ) ဒီးတံးရစၢ်ဒီးစီၤပၤခဲလၢာ်မ့ၢ်ဝဲသၢဆံတဂၤန့ၣ်လီၤ.