Read S'gaw Karen လံာ်စီၤယိၤၡူ 17 Bible Online

လံာ်စီၤယိၤၡူ 17 - S'gaw Karen bible

လံာ်စီၤယိၤၡူ 17

¹ဝံၤဒီးတၢ်နီၤလီၤန့ၢ်ထံကီၢ်လၢမနၤၡ့ၤအဒူၣ်အဂီၢ်မ့ၢ်လၢအဝဲ မ့ၢ်စီၤယိၤသးအဖိဝဲၢ်ကိအဃိန့ၣ်လီၤ. လၢမနၤၡ့ၤအဖိဝဲၢ်ကိ စီၤမၤကံၢ်လၢအမ့ၢ်စီၤ ကံးလဧးအပၢ်အဂီၢ်တၢ်နီၤလီၤန့ၢ်အီၤကီၢ်ကံးလဧးဒီးကီၢ်ဘၤၡၣ်လၢအအိၣ်လၢထံကျိယၢ်ဒ့ၣ်အမုၢ်ထီၣ်, မ့ၢ်လၢအဝဲမ့ၢ်သုးဖိလၢအဒူတဂၤအဃိန့ၣ်လီၤ.

²ဒီးတၢ်နီၤလီၤန့ၢ်စ့ၢ်ကီးမနၤၡ့ၤအဒူၣ်လၢအအိၣ်လီၤ တဲာ်တဖၣ်အဒူၣ်ဖိထၢဖိတဖၣ်လၢအမ့ၢ်စီၤအဘံဧ့စၢ်, စီၤဃ့လ့း, စီၤအၤစရံးအ့လး, စီၤၡက့ၣ်, ဒီးစီၤဃ့ဖ့ၢ်, ဒီးစီၤၡမံဒၤအဖိတဖၣ်အဂီၢ်န့ၣ်လီၤ. အဝဲသ့ၣ်မ့ၢ်စီၤယိၤသးအဖိခွါစီၤမနၤၡ့ၤအစၢၤပိာ်ခွါတဖၣ် ဒ်အဒူၣ်ဖိထၢဖိဒၣ်ဝဲအသိးန့ၣ်လီၤ.

³စီၤစလၤဖဃးလၢအမ့ၢ်စီၤဃ့ဖၢ်အဖိခွါ, စီၤကံးလဧးအလံၤ, စီၤမၤကံၢ်အလိၤ, စီၤမနၤၡ့ၤအလၤတဂၤန့ၣ်အဖိပိာ်ခွါတအိၣ်ဘၣ်. အိၣ်ဒၣ်ထဲအဖိမုၣ်တဖၣ်န့ၣ်လီၤ. အဝဲသ့ၣ်အမံၤမ့ၢ်ဝဲနီၢ်မၤလၤ, နီၢ်နိဧၤ, နီၢ်ဃၤကလၤ, နီၢ်မံးလကၤ, ဒီးနီၢ်တံးရစၢ်န့ၣ်လီၤ.

⁴အဝဲသ့ၣ်လဲၤဝဲဆူပှၤလုၢ်တၢ်အခိၣ်စီၤအလၤဧစၢ် ဒီးစီၤနိၣ်အဖိခွါစီၤယိၤၡူဒီးဆူပှၤခိၣ်ပှၤနၢ်တဖၣ်အအိၣ်ဒီးစံးဝဲ, “ယွၤမၤလိာ်စီၤမိၤၡ့လၢအကဟ့ၣ်ပှၤတၢ် န့ၢ်သါဒ်ပဘူးပတံၢ်အပိာ်ခွါတဖၣ်ဒိးန့ၢ်ဘၣ်ဝဲအသိးန့ၣ်လီၤ.” အဃိဒီး, ဒ်ယွၤမၤလိာ်တ့ၢ်အသိးအဝဲဒၣ်ဟ့ၣ်လီၤအဝဲသ့ၣ် အတၢ်န့ၢ်သါလၢအပၢ်အဒီပုၢ်ဝဲၢ်တဖၣ်အကျါန့ၣ်လီၤ.

⁵လၢတၢ်အံၤအဃိ, လၢကီၢ်ကံးလဧးဒီးကီၢ်ဘၤၡၣ်လၢထံကျိယၢ်ဒ့ၣ်အမုၢ်ထီၣ်တကပၤအမဲာ်ညါ, မနၤၡ့ၤအဒူၣ်ဒိးန့ၢ်ဘၣ်အါထီၣ်တၢ်နီၤလီၤဆံဆဲၣ်ပူ,

⁶မ့ၢ်လၢအဝဲအစၢၤအသွဲၣ်ပိာ်မုၣ်ဒီးအစၢၤအသွဲၣ်ပိာ်ခွါတဖၣ်ဒိးန့ၢ်ဘၣ်လံ ထံဧိၤကီၢ်ဧိၤအဃိန့ၣ်လီၤ. ကီၢ်ကံးလဧးဘၣ်တၢ်ဟ့ၣ်လီၤအီၤဆူမနၤၡ့ၤအစၢၤအသွဲၣ်လၢအအိၣ် လီၤတဲာ်တဖၣ်န့ၣ်လီၤ.

⁷မနၤၡ့ၤအကီၢ်ဆၢစးထီၣ်အသးဖဲအၤၡ့ၢ်အကီၢ်ဒီးလဲၤတုၤလၢ ဝ့ၢ်မံးကမ့သၤလၢဝ့ၢ်ၡက့ၣ်အမုၢ်ထီၣ်န့ၣ်လီၤ. အန့ၣ်ဝံၤဒီးကီၢ် ဆၢန့ၣ်လဲၤဆူကလံၤထံးတုၤလၢပှၤဧ့ၣ်တးပူၤဖိအိၣ်ဆိးအလီၢ်န့ၣ်လီၤ.

⁸ကီၢ်တးပူၤဘၣ်ဃးဒီးပှၤမနၤၡ့ၤ, မ့မ့ၢ်ဝ့ၢ်တးပူၤလၢအအိၣ် လၢမနၤၡ့ၤအကီၢ်ဆၢန့ၣ်ဘၣ်ဃးဒီးပှၤအ့ဖရဲၣ်ဖိန့ၣ်လီၤ.

⁹ဝံၤဒီးကီၢ်ဆၢန့ၣ်လဲၤလီၤဆူထံကျိဖိကၤနၤလီၤ. ဝ့ၢ်လၢထံကျိဖိအံၤအကလံၤထံးတဖၣ်မ့ၢ်အိၣ်လၢကီၢ် မနၤၡ့ၤအပူၤနာ်က့ဘၣ်ဃးဒီးပှၤအ့ဖရဲၣ်ဖိန့ၣ်လီၤ. မနၤၡ့ၤအကီၢ်ဆၢလဲၤသဃဲၤဒီး ထံကျိဖိအံၤအကလံၤစိးတကပၤဒီးလဲၤကတၢၢ်ဝဲဒၣ်လၢ ပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ.

¹⁰အ့ဖရဲၣ်အကီၢ်အိၣ်လၢကလံၤထံး ဒီးမနၤၡ့ၤအကီၢ်အိၣ်လၢကလံၤစိးဒီးပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ် မ့ၢ်အဝဲသ့ၣ်အမုၢ်နုာ်ကီၢ်ဆၢလီၤ. အၤၡ့ၢ်အကီၢ်အိၣ်လၢမုၢ်နုာ်ကလံၤစိးဒီး ယံးစၣ်ကၢ်အကီၢ်အိၣ်လၢမုၢ်ထီၣ်ကလံၤစိးန့ၣ်လီၤ.

¹¹လၢယံးစၣ်ကၢ်ဒီးအၤၡ့ၢ်အကီၢ်တဖၣ်အပူၤန့ၣ်, မနၤၡ့ၤအိၣ်ဒီးဝ့ၢ်ဘ့ၤသၡၣ်ဒီးဝ့ၢ်ယံးဘျၣ်ဃုာ်ဒီးဝ့ၢ်ဖိတဖၣ် လၢအအိၣ်ဝးတရံးအီၤ, ဃုာ်ဒီးဝ့ၢ်ဒိၢ်, (လၢပီၣ်လဲၣ်ကၢၢ်ခိၣ်) ဝ့ၢ်ဧ့ၣ်ဒိၢ်, ဝ့ၢ်တၤနး, ဝ့ၢ်မကံးဒိၤဒီးဝ့ၢ်ဖိတဖၣ်လၢအအိၣ်ဝးတရံးအီၤန့ၣ်လီၤ.

¹²ဘၣ်ဆၣ်ဒီး, ပှၤမနၤၡ့ၤဖိတဖၣ်ဟီထီၣ်ကွံာ်ပှၤလၢအအိၣ်လၢဝ့ၢ်တဖၣ်န့ၣ် တန့ၢ်ဘၣ်သတးဒီးပှၤကနၤဧၣ်ဖိတဖၣ်အိၣ်ဒံးဒၣ်ဖဲန့ၣ်န့ၣ်လီၤ.

¹³ဖဲပှၤအံၣ်စရ့လးဖိတဖၣ်အဂံၢ်အဘါဆူၣ်ထီၣ်အကတီၢ်ဒၣ်လဲာ်, အဝဲသ့ၣ်တဟီထီၣ်ပှၤကနၤဧၣ်ဖိတဖၣ်ခဲလၢာ်ဘၣ်, မ့မ့ၢ်မၢဆူၣ်အဝဲသ့ၣ်လၢအကမၤတၢ်လၢအဝဲသ့ၣ်အဂီၢ်န့ၣ်လီၤ.

¹⁴စီၤယိၤသးအစၢၤအသွဲၣ်တဖၣ်စံးဘၣ်စီၤယိၤၡူ, “ဘၣ်မနုၤအဃိနဟ့ၣ်ပှၤကီၢ်ထဲတပူဧိၤလၢပတၢ်န့ၢ်သါအဂီၢ်န့ၣ်လဲၣ်. ပမ့ၢ်ပှၤအအါတဖုမ့ၢ်လၢယွၤဆိၣ်ဂ့ၤပှၤအဃိလီၤ.”

¹⁵စီၤယိၤၡူစံးဆၢဝဲ, “သုမ့မ့ၢ်ပှၤအအါတဖုဒီးအ့ဖရဲၣ်အက စၢၢ်ကလိမ့ၢ်အံၣ်ကဲၣ်ဆိးလၢသုဂီၢ်ဒီး, လဲၤနုာ်ဆူသ့ၣ်ပှၢ်ကျါ ဒီးမၤပျီဟီၣ်ခိၣ်လၢသုဂီၢ်ဒၣ်သုဝဲလၢပှၤပရးစၤဖိဒီးပှၤနီၢ်ဒိၣ်ဖိ အကီၢ်ပူၤန့ၣ်တက့ၢ်.”

¹⁶အဝဲသ့ၣ်စံးဆၢဝဲ, “ကစၢၢ်ကလိအကီၢ်အံၤတလၢလၢပဂီၢ်ဘၣ်. ဘၣ်ဆၣ်ဒီးပှၤကနၤဧၣ်ဖိလၢပျီတဖၣ်န့ၣ်အိၣ်ဒီးလ့ၣ်ကဟၣ်ထးဒီးဒ်န့ၣ်အသိး, ပှၤလၢအအိၣ်လၢဝ့ၢ်ဘ့ၤသၡၣ်ဒီးဝ့ၢ်ဖိဝးတရံးအီၤတဖၣ်ဒီးပှၤ လၢအအိၣ်လၢဝ့ၢ်ယံးစရ့လးအကစၢၢ်ကဆူးတဖၣ်န့ၣ်အိၣ်စ့ၢ်ကီးဒီး လ့ၣ်ကဟၣ်ထးလီၤ.”

¹⁷စီၤယိၤၡူစံးဘၣ်အ့ဖရဲၣ်အဒူၣ်ဒီးမုၢ်ထီၣ်မနၤၡ့ၤအဒူၣ်, “သုမ့ၢ်နီၢ်နီၢ်ပှၤအအါတဖုဒီးသုစိသုကမီၤဒိၣ်ဝဲလီၤ. သုကဒိးန့ၢ်ဘၣ်တၢ်အါန့ၢ်တပူလီၤ.

¹⁸ကစၢၢ်ကလိအကီၢ်ကမ့ၢ်သုတၢ်လီၤ. မ့မ့ၢ်ဒၣ်လဲာ်သ့ၣ်ပှၢ်တပှၢ်န့ၣ်, သုကမၤပျီအီၤဒီးဟံးန့ၢ်အီၤတုၤလၢကီၢ်ဆၢအယံၤကတၢၢ်န့ၣ်လီၤ. မ့မ့ၢ်ပှၤကနၤဧၣ်ဖိတဖၣ်န့ၣ်, မ့ၢ်အိၣ်ဒီးအလ့ၣ်ကဟၣ်ထးဒီးအဂံၢ်အဘါမ့ၢ်ဆူၣ်ဒၣ်လဲာ်န့ၣ်, သုကဟီထီၣ်ကွံာ်အီၤန့ၣ်လီၤ.”