Read S'gaw Karen လံာ်စီၤယိၤၡူ 18 Bible Online

လံာ်စီၤယိၤၡူ 18 - S'gaw Karen bible

လံာ်စီၤယိၤၡူ 18

¹ပှၤအံၣ်စရ့လးဖိတဖၣ်မၤနၢၤကီၢ်န့ၣ်ဝံၤဒီး, အဝဲသ့ၣ်ခဲလၢာ်ပာ်ဖှိၣ်အသးဖဲဝ့ၢ်ၡံလိၤ ဒီးသူၣ်ထီၣ်တၢ်ဘူၣ်ထီၣ်ဘါထီၣ်ယွၤအဒဲန့ၣ်လီၤ.

²ဒီးပှၤအံၣ်စရ့လးဖိအဒူၣ်အိၣ်ဝဲနွံဒူၣ်လၢအတန့ၢ်ဘၣ်ဒံး အတၢ်န့ၢ်သါန့ၣ်လီၤ.

³စီၤယိၤၡူစံးဘၣ်ပှၤအံၣ်စရ့လးဖိ, “မ့ၢ်သုကခိးဒံးတၢ်ဆံးယံာ်တချုးလၢသုလဲၤနုာ်ဒီးမၤန့ၢ် ကီၢ်လၢယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤဟ့ၣ်လီၤသုန့ၣ်လဲၣ်.

⁴ဃုထၢန့ၢ်ယၤလၢပှၤတဒူၣ်သၢဂၤပှၤတဒူၣ်သၢဂၤစုာ်စုာ်န့ၣ်တက့ၢ်. ယကမၢလီၤအဝဲသ့ၣ်လဲၤတၢ်လၢကီၢ်ဒီဘ့ၣ်ညါဒ်သိးအကကွဲးနီၣ် ကွဲးဃါတၢ်လီၢ်လၢအတၢ်န့ၢ်သါအဂီၢ်ဝံၤဒီးဟဲက့ၤကဒါက့ၤဆူ ယအိၣ်န့ၣ်လီၤ.

⁵အဝဲသ့ၣ်ကနီၤဖးလီၤကီၢ်အံၤနွံပူၤလၢအဂီၢ်ဒၣ်ဝဲန့ၣ်လီၤ. ယူဒၤအဒူၣ်ကအိၣ်လၢအလီၢ်ဒၣ်ဝဲလၢကလံၤထံး, ဒီးစီၤယိၤသးကအိၣ်လၢအလီၢ်ဒၣ်ဝဲလၢကလံၤစိးန့ၣ်လီၤ.

⁶ကွဲးလီၤတၢ်နီၤဖးလီၤနွံပူၤအံၤအဂ့ၢ်အကျိၤဒီးဟဲစိာ်အီၤဆူ ယအိၣ်တက့ၢ်. အန့ၣ်ဒီးယကဖးတၢ်လၢသုဂီၢ်ဖဲအံၤလၢယွၤ ပကစၢ်ယွၤအမဲာ်ညါန့ၣ်လီၤ.

⁷နာ်သက့, ပှၤလ့ၤဝံဖိတဖၣ်တဒိးန့ၢ်ဘၣ်တၢ်နီၤလီၤအံၤဃုာ်ဒီးသုဘၣ်. မ့ၢ်လၢယွၤအပှၤလုၢ်တၢ်အခိၣ်အတၢ်မၤမ့ၢ်အဝဲသ့ၣ်အတၢ်န့ၢ်သါအဃိ န့ၣ်လီၤ. ဒီးကး, ရူၤဘ့ၣ်ဒီးမုၢ်ထီၣ်မနၤၡ့ၤအဒူၣ်တဖၣ်ဒိးန့ၢ်ဘၣ်တ့ၢ် လံအကီၢ်လၢထံကျိယၢ်ဒ့ၣ်အမုၢ်ထီၣ်လၢယွၤအခ့အပှၤစီၤမိၤၡ့ ဟ့ၣ်လီၤအဝဲသ့ၣ်န့ၣ်လီၤ.”

⁸ပှၤလၢကလဲၤဒီးကွဲးနီၣ်ကွဲးဃါ တၢ်လီၢ်တၢ်ကျဲအဂီၢ်န့ၣ်စီၤယိၤၡူဟ့ၣ်လီၤတၢ်နဲၣ်ကျဲလၢအစံး ဝဲ, “လဲၤလၢကီၢ်ဒီဘ့ၣ်ညါဒီးကွဲးနီၣ်ကွဲးဃါဒီးဟဲက့ၤကဒါ က့ၤဆူယအိၣ်တက့ၢ်. အန့ၣ်ဒီးယကဖးတၢ်လၢသုဂီၢ်ဖဲအံၤလၢယွၤ အမဲာ်ညါလၢဝ့ၢ်ၡံလိၤန့ၣ်လီၤ.”

⁹အန့ၣ်ဒီး, ပှၤန့ၣ်တဖၣ်လဲၤတၢ်လၢကီၢ်ဒီဘ့ၣ်ညါဒီးနီၤဖးလီၤကီၢ်နွံပူ ဃုာ်ဒီးအဝ့ၢ်တဖၣ် ဒ်လဲၣ်ဒ်လဲၣ်န့ၣ်ကွဲးလီၤဝဲလၢလံာ်ပူၤန့ၣ်လီၤ. ဝံၤဒီးအဝဲသ့ၣ်က့ၤကဒါက့ၤဆူစီၤယိၤၡူအအိၣ်လၢသူၣ်ဒဲ အလီၢ်ဖဲဝ့ၢ်ၡံလိၤန့ၣ်လီၤ.

¹⁰ဒီးစီၤယိၤၡူဖးတၢ်လၢအဝဲသ့ၣ်အဂီၢ်လၢယွၤအမဲာ်ညါဖဲ ဝ့ၢ်ၡံလိၤန့ၣ်လီၤ. ဒီးဖဲန့ၣ်န့ၣ်စီၤယိၤၡူနီၤဖးလီၤထံကီၢ်လၢပှၤအံၣ်စရ့လး ဖိအဂီၢ်ဒ်အတၢ်နီၤဖးအိၣ်ဝဲအသိးန့ၣ်လီၤ.

¹¹တၢ်နီၤဖးလီၤဘံၣ်ယၤမံၣ်အဒူၣ်ဒ်အဒူၣ်ဖိထၢဖိအိၣ်ဝဲအသိး, ဒီးကီၢ်လၢတၢ်နီၤလီၤန့ၢ်အီၤမ့ၢ်ဝဲဖဲယူဒၤဒီးယိၤသးအဘၢၣ်စၢၤန့ၣ်လီၤ.

¹²ဒီးအကီၢ်ဆၢလၢကလံၤစိးစးထီၣ်အသးဖဲထံကျိယၢ်ဒ့ၣ် ဒီးလဲၤထီၣ်ဆူဝ့ၢ်ယရံၤဃိအကလံၤစိးတၢ်ပၤလီၤဒီးလဲၤထီၣ်ဆူ မုၢ်နုာ်ခီဖျိကစၢၢ်ကလိအလီၢ်တုၤလီၤလၢ ဘ့ၤသအၤဝ့ၣ်အပှၢ်မုၢ်ကနၢန့ၣ်လီၤ.

¹³ဝံၤဒီးကီၢ်ဆၢန့ၣ်လဲၤဆူတၢ်ပၤလီၤလၢဝ့ၢ်လူးစးအကလံၤထံး (ဘၣ်တၢ်ကိးစ့ၢ်ကီးလၢဘ့ၤသ့လး) ဒီးဆူဝ့ၢ်ဧးတၤရိးအးဒၢ်, လၢအအိၣ်လၢကစၢၢ်လၢအအိၣ်လၢဝ့ၢ်အကလံၤထံးလာ်ခီ အလိၤန့ၣ်လီၤ.

¹⁴ဝံၤဒီးကီၢ်ဆၢန့ၣ်လဲၤဆူအဂၤတကျိၤဒၣ်, စးထီၣ်လၢကစၢၢ်အံၤ အမုၢ်နုာ်တကပၤဒီးလီၤဆူကလံၤထံးဒီးလဲၤဆူ ဝ့ၢ်ကံးရယးဘဧၤလး (မ့တမ့ၢ်ကီၢ်ကံးရယးယဧၤရံၣ်) လၢအဘၣ်ဃးဒီးယူဒၤအဒူၣ်လီၤ. အဝဲအံၤမ့ၢ်မုၢ်နုာ်အကီၢ်ဆၢန့ၣ်လီၤ.

¹⁵ကလံၤထံးအကီၢ်ဆၢစးထီၣ်အသးဖဲဝ့ၢ်ကံးရးယးယဧၤရံၣ်အကနူၤထံး ဒီးလဲၤဆူန့ဖတိၤအထံထီၣ်ပၢၢ်န့ၣ်လီၤ.

¹⁶ဝံၤဒီးလဲၤဆူကစၢၢ်တဖျၢၣ်အကတၢၢ်လၢအအိၣ်လၢ ပှၤဟံၣ်နိၣ်ဖိအတၢ်ပၢၤခိၣ်လၢကစၢၢ်ကဆူးအမဲာ်ညါ, လၢအအိၣ်လၢပှၤနီၢ်ဒိၣ်ဖိအတၢ်ပၢၤခိၣ်လၢကစၢၢ်ကဆူးလၢကလံၤစိးတခီ, ဒီးလဲၤလီၤဆူဟံၣ်နိၣ်တၢ်ပၢၤခိၣ်လၢကစၢၢ်ကဆူးလၢ ဝ့ၢ်ယဘူၣ်အဃၢၤလၢကလံၤထံးတခီ, ဒီးလဲၤလီၤဆူဧ့ၣ်ရိၤက့လးအထံထီၣ်ပၢၢ်လီၤ.

¹⁷ဝံၤဒီးလဲၤထီၣ်ဆူကလံၤစိးတခီဆူဧ့ၣ်ၡ့မ့ၣ်အထံထီၣ်ပၢၢ်ဒီးဆူ ဝ့ၢ်ကလံလိးလၢအအိၣ်ကွၢ်ဆၢၣ်မဲာ်လိာ်အသးဒီးအဒူမ့ၣ်ကျဲ ကဆူးန့ၣ်လီၤ. ဝံၤဒီးကီၢ်ဆၢန့ၣ်လဲၤလီၤဆူစီၤရူၤဘ့ၣ်အဖိ ခွါစီၤဘိဟၣ်အလၢၢ်တဖျၢၣ်အအိၣ်,

¹⁸ဒီးလဲၤဆူယၢ်ဒ့ၣ်အတၢ်ပၢၤခိၣ်လၢကစၢၢ်ကဆူးအကလံၤစိးတခီဒီး လဲၤလီၤဆူယၢ်ဒ့ၣ်အတၢ်ပၢၤခိၣ်လၢကစၢၢ်ကဆူးန့ၣ်လီၤ.

¹⁹ဝံၤဒီးကီၢ်ဆၢန့ၣ်လဲၤဆူဝ့ၢ်ဘ့ၤသဃါကလၤအဃၢၤလၢက လံၤစိးတခီ, ဒီးကတၢၢ်ဝဲဖဲပီၣ်လဲၣ်အံသၣ်ဖဲထံကျိယၢ်ဒ့ၣ် ကလံၤထံးအကတၢၢ်န့ၣ်လီၤ. အဝဲအံၤမ့ၢ်ကလံၤထံးအကီၢ်ဆၢန့ၣ်လီၤ.

²⁰ထံကျိယၢ်ဒ့ၣ်မ့ၢ်မုၢ်ထီၣ်အကီၢ်ဆၢန့ၣ်လီၤ. အအံၤမ့ၢ်ကီၢ်ဆၢတဖၣ်လၢဘံၣ်ယၤမံၣ်အဒူၣ်အတၢ်န့ၢ်သါဒ်အဒူၣ်အထၢ အိၣ်ဝဲအသိးန့ၣ်လီၤ.

²¹ဝ့ၢ်တဖၣ်လၢအဘၣ်ဃးဒီးဘံၣ်ယၤမံၣ်အဒူၣ်, ဒ်အဒူၣ်ဖိထၢဖိ အိၣ်ဝဲအသိးန့ၣ်မ့ၢ်ဝဲ, ယရံၤဃိ, ဘ့ၤသဃါကလၤ, ဧ့မဲးကစံး,

²²ဘ့ၤသဧါရဘၤ, စမၤရဲၣ်, ဘ့ၤသ့လး,

²³ဧၤဝံၣ်, ပါရၤ, ဧိၤဖြၤ,

²⁴ကဖၢ်ဧမိနဲ, ဧိးဖနံၤ, ဒီးက့ဘၤလီၤ. မ့ၢ်ဝ့ၢ်တဆံခံဝ့ၢ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ် န့ၣ်လီၤ.

²⁵အိၣ်စ့ၢ်ကီးဒီးဝ့ၢ်ကံးဘိၣ်, ရၤမါ, ဘအ့ရိး, မံးစပၤ, ကဖံရၤ, မိစၤ,

²⁷ရ့က့ၣ်, ယံရဖၤအ့လး, တၤရါလး,

²⁸စ့လၤ, အ့လ့ာ်, ယဘူၣ် (မ့တမ့ၢ်ယရူၤၡလ့ၣ်) က့ဘဧး, ဒီးကံးရယးန့ၣ်လီၤ. မ့ၢ်ဝ့ၢ်တဆံလွံၢ်ဝ့ၢ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ. အအံၤမ့ၢ်ဘံၣ်ယၤမံၣ်အဒူၣ်အတၢ်န့ၢ်သါဒ်အဒူၣ်အထၢအိၣ်ဝဲအသိးန့ၣ်လီၤ.