Read S'gaw Karen လံာ်စီၤယိၤၡူ 2 Bible Online

လံာ်စီၤယိၤၡူ 2 - S'gaw Karen bible

လံာ်စီၤယိၤၡူ 2

¹ဒီးစီၤနိၣ်အဖိခွါစီၤယိၤၡူမၢလီၤပှၤကွၢ်ဟုၣ်ကွၢ် စုးတၢ်ခံဂၤလၢသူၣ်ဒဲလီၢ်ၡံးတံၣ်အိၣ်ဒီးတၢ်မၤလိာ်အဝဲသ့ၣ် လၢအကလဲၤတၢ်, ဒီးလၢတၢ်ခူသူၣ်အပူၤကကွၢ်ဃုသ့ၣ်ညါကီၢ်ကနၤဧၣ်, လီၤဆီဒၣ်တၢ်ဝ့ၢ်ယရံၤဃိန့ၣ်လီၤ. ဖဲအဝဲသ့ၣ်လဲၤတုၤလၢဝ့ၢ်န့ၣ်ဒီး, လဲၤနုာ်မံဝဲဖဲပှၤဃဲသဲမုၣ်နီၢ်ရၤဃးအဟံၣ်န့ၣ်လီၤ.

²ဝ့ၢ်ယရံၤဃိအစီၤပၤနၢ်ဟူဝဲလၢပှၤအံၣ်စရ့လးဖိတနီၤဟဲဝဲလၢမုၢ်နၤအံၤ လၢအကကွၢ်ဟုၣ်ကွၢ်စုးထံကီၢ်,

³သတးဒီးအဝဲဆှၢလီၤတၢ်ကစီၣ်ဆူနီၢ်ရၤဃးအအိၣ်ဒီးစံးဝဲ, “ပှၤလၢအအိၣ်လၢနဟံၣ်ပူၤတဖၣ်ဟဲလၢကကွၢ်ဟုၣ်ကွၢ်စုးထံကီၢ် ဒီဘ့ၣ်လီၤ. ဟဲစိာ်ထီၣ်အဝဲသ့ၣ်တက့ၢ်.”

⁴အဝဲစံးဆၢဝဲ, “မ့ၢ်, ပှၤဟဲတုၤလၢယဟံၣ်လီၤ. ဘၣ်ဆၣ်ယတသ့ၣ်ညါအဝဲသ့ၣ်ဟဲဖဲလဲၣ်န့ၣ်ဘၣ်.

⁵အဝဲသ့ၣ်ဟးထီၣ်ကွံာ်ဖဲမုၢ်လီၤနုာ်အကတီၢ်တ ချုးဒံးဘၣ်လၢဝ့ၢ်အတြဲၤဘၣ်တၢ်ကးတံၢ်အီၤန့ၣ်လီၤ. ယတသ့ၣ်ညါစ့ၢ်ကီးအဝဲသ့ၣ်ကလဲၤဖဲလဲၣ်ဘၣ်. ဘၣ်ဆၣ်နမ့ၢ်လူၤအဝဲသ့ၣ်ချ့ချ့ဒီးနကချုးန့ၢ်အဝဲသ့ၣ်ကစီ ဒီန့ၣ်လီၤ.”

⁶နီၢ်နီၢ်တခီ, နီၢ်ရၤဃးဒုးလဲၤထီၣ်ပှၤခံဂၤန့ၣ်ဆူဟံၣ် ခိၣ်ဒီးမၤဘၢအဝဲသ့ၣ်လၢခီမၤအဘိတဖၣ်လၢအအိၣ်လၢဟံၣ်ခိၣ် န့ၣ်လီၤ.

⁷စီၤပၤအပှၤတဖၣ်ဟးထီၣ်လၢဝ့ၢ်ပူၤ ဝံၤဒီးဝ့ၢ်တြဲၤဘၣ်တၢ်ကးတံၢ်အီၤန့ၣ်လီၤ. အဝဲသ့ၣ်လဲၤဒီးလူၤဃုပှၤအံၣ်စရ့လးဖိအပှၤကွၢ်ဟုၣ်ကွၢ်စုး တၢ်တုၤတၢ်လီၢ်ဖဲကျဲလၢအလဲၤခီဂာ်ထံကျိယၢ်ဒ့ၣ်န့ၣ်လီၤ.

⁸တချူးဒံးဘၣ်လၢပှၤကွၢ်ဟုၣ်ကွၢ်စုးတၢ်ခံဂၤအံၤမံဒံးဘၣ်န့ၣ်, နီၢ်ရၤဃးလဲၤထီၣ်ဆူဟံၣ်ခိၣ်,

⁹ဒီးစံးဘၣ်အဝဲသ့ၣ်, “ယသ့ၣ်ညါလၢယွၤဟ့ၣ်လီၤသုကီၢ်အံၤလီၤ. ပှၤကိးဂၤဒဲးလၢထံကီၢ်ပူၤအံၤပျံၤသုလီၤ.

¹⁰ပနၢ်ဟူတ့ၢ်လၢဖဲသုဟးထီၣ်လၢကီၢ်အဲၤကူပတူးအခါန့ၣ်, ယွၤမၤလီၤသံးကွံာ်ပီၣ်လဲၣ်ဂီၤလၢသုမဲာ်ညါန့ၣ်လီၤ. ပနၢ်ဟူစ့ၢ်ကီးလၢသုမၤသံပှၤအမိၢ်ဖိအစီၤပၤ ခံဂၤစီၤစံဃိၣ်ဒီးစီၤဧိာ်လၢအအိၣ်လၢထံကျိယၢ်ဒ့ၣ်အမုၢ် ထီၣ်တကပၤဒ်လဲၣ်အဂ့ၢ်န့ၣ်လီၤ.

¹¹ဖဲပနၢ်ဟူတၢ်အံၤတဘျီဃီဒီးပပျံၤတၢ်လီၤ. လၢသုဃိပတၢ်သူၣ်ဒူသးဒူလီၤမၢ်ကွံာ်လၢာ်လံ. ယွၤသုကစၢ်ယွၤအံၤမ့ၢ်ကစၢ်ယွၤလၢအအိၣ်လၢမူခိၣ်လၢထးဒီး လၢဟီၣ်ခိၣ်အံၤစ့ၢ်ကီးန့ၣ်လီၤ.

¹²ဒီးခဲကနံၣ်အံၤဆိၣ်လီၤသုသးလၢယွၤအမဲာ်ညါလၢသုကမၤဂ့ၤ ဘၣ်ယပှၤဟံၣ်ဖိဒ် ယမၤဂ့ၤဘၣ်သုအသိးဒီးဟ့ၣ်ယၤတၢ်ပနီၣ်တမံၤလၢယနာ်န့ၢ်သုကသ့ အဂီၢ်န့ၣ်တက့ၢ်.

¹³အၢၣ်လီၤယၤလၢသုကမၤပူၤဖျဲးယပၢ်ဒီးယမိၢ်, ယဒီပုၢ်ဝဲၢ်ခွါတဖၣ်ဒီးယဒီပုၢ်ဝဲၢ်မုၣ်တဖၣ်ဃုာ် ဒီးအဝဲသ့ၣ်အဒူၣ်ဖိထၢဖိခဲလၢာ်တက့ၢ်. တဘၣ်ပျဲပှၤမၤသံပှၤတဂ့ၤ.”

¹⁴ဒီးပှၤတဖၣ်န့ၣ်စံးဘၣ်အီၤ, “ပမ့ၢ်တမၤဒ်ပစံးအသိးဘၣ်ဒီး, မ်ကစၢ်ယွၤဟံးထီၣ်ကွံာ်ပသးသမူတဖၣ်တက့ၢ်. တၢ်လၢပမၤအံၤန့ၣ်နမ့ၢ်တတဲပှၤနီတဂၤဘၣ်ဒီး, ပအၢၣ်လီၤနၤလၢဖဲယွၤဟ့ၣ်လီၤပှၤကီၢ်အံၤန့ၣ်, ပကမၤနၤဂ့ၤဂ့ၤဒီးတီတီန့ၣ်လီၤ.”

¹⁵နီၢ်ရၤဃးအိၣ်လၢဟံၣ်တဖျၢၣ်လၢအအိၣ်လၢဝ့ၢ်ခိၣ်ဒူအဖီခိၣ်သ တးဒီးအဝဲဒၣ်စဲၤလီၤပှၤတဖၣ်အံၤလၢပဲတြီလၢပျံၤတဘိန့ၣ် လီၤ.

¹⁶အဝဲဒၣ်စံးဝဲ, “လဲၤဆူကစၢၢ်ကလိအကျါတက့ၢ်. မ့တမ့ၢ်ဘၣ်ဒီးစီၤပၤအပှၤတဖၣ်ကထံၣ်န့ၢ်သုလီၤ. အိၣ်ခူသူၣ်ဖဲန့ၣ်သၢသီတုၤအဝဲသ့ၣ်ဟဲက့ၤကဒါက့ၤတက့ၢ်. အန့ၣ်ဝံၤဒီးသုလဲၤဒၣ်လၢသုကျဲသ့လီၤ.”

¹⁷ပှၤတဖၣ်န့ၣ်စံးဘၣ်အီၤ, “ပကဟံးဃာ်တၢ်အၢၣ်လီၤလၢနမၢပမၤဒီးနၤန့ၣ်လီၤ.

¹⁸နဲနဘၣ်မၤတၢ်အံၤလီၤ. ဖဲပဟဲဒုးနထံနကီၢ်န့ၣ်, စၢဃာ်လုၣ်ဂီၤတဘိအံၤလၢပဲတြီလၢ နစဲၤလီၤပှၤန့ၣ်တက့ၢ်. ဒီးပာ်ဖှိၣ်နပၢ်, နမိၢ်, နဒီပုၢ်ဝဲၢ်ခွါတဖၣ်, ဒီးနပၢ်အဒူၣ်ဖိထၢဖိခဲလၢာ်လၢနဟံၣ်ပူၤတက့ၢ်.

¹⁹ပှၤတဂၤဂ့ၤတဂၤဂ့ၤမ့ၢ်ဟးထီၣ်လၢနဟံၣ်ပူၤဒီး, အတၢ်သံကမ့ၢ်ဒၣ်အတၢ်ကမၣ်ဒၣ်ဝဲန့ၣ်လီၤ. ဒီးတမ့ၢ်ပမူပဒါဘၣ်န့ၣ်လီၤ. ဘၣ်ဆၣ်ဒီး, ပှၤတဂၤဂ့ၤတဂၤဂ့ၤလၢအအိၣ်လၢနဟံၣ်ပူၤအံၤတၢ်မ့ၢ်ဘၣ်ဒိဘၣ် ထံးအီၤန့ၣ်, အဝဲန့ၣ်မ့ၢ်ပမူပဒါန့ၣ်လီၤ.

²⁰သနာ်က့, တၢ်လၢပမၤန့ၣ်, နမ့ၢ်တဲဘၣ်ပှၤတဂၤဂၤဒီး, တလိၣ်လၢပကဟံးဃာ်ပတၢ်အၢၣ်လီၤလၢနမၢပမၤဒီးနၤန့ၣ်ဘၣ်လီၤ.”

²¹အဝဲအၢၣ်လီၤဝဲဒီးပျၢ်ကွံာ်အဝဲသ့ၣ်န့ၣ်လီၤ. တုၤအဝဲသ့ၣ်ဟးထီၣ်ကွံာ်ဝဲဒီး, အဝဲစၢဃာ်လုၣ်ဂီၤတဘိလၢပဲတြီန့ၣ်လီၤ.

²²ပှၤကွၢ်ဟုၣ်ကွၢ်စုးတၢ်တဖၣ်လဲၤဆူကစၢၢ်ကလိအကျါဒီးအိၣ်ခူ သူၣ်ဝဲလီၤ. စီၤပၤအပှၤတဖၣ်ကွၢ်ဃုအဝဲသ့ၣ်သကုၤဆးဒးလၢသၢသီအတီၢ်ပူၤ ဘၣ်ဆၣ်ဒီးတထံၣ်န့ၢ်အဝဲသ့ၣ်ဘၣ်. အဃိ, အဝဲသ့ၣ်က့ၤကဒါက့ၤဆူဝ့ၢ်ယရံၤဃိန့ၣ်လီၤ.

²³ထဲန့ၣ်ဒီး, ပှၤကွၢ်ဟုၣ်ကွၢ်စူးတၢ်ခံဂၤဟဲက့ၤလီၤလၢကစၢၢ်က လိ, ခီဂာ်ထံကျိ, ဒီးက့ၤကဒါက့ၤဆူစီၤယိၤၡူအအိၣ်လီၤ. အဝဲသ့ၣ်စံးဘၣ်အီၤလၢတၢ်ခဲလၢာ်လၢအမၤအသးဒီးအဝဲသ့ၣ်န့ၣ် လီၤ.

²⁴ဒီးစံးဝဲဒၣ်, “ပသ့ၣ်ညါလီၤတံၢ်လၢယွၤဟ့ၣ်လီၤပှၤထံကီၢ်ဒီဘ့ၣ်လံ. ပှၤဖဲန့ၣ်ခဲလၢာ်ပျံၤပှၤဒိၣ်မးန့ၣ်လီၤ.”