Read S'gaw Karen လံာ်စီၤယိၤၡူ 23 Bible Online

လံာ်စီၤယိၤၡူ 23 - S'gaw Karen bible

လံာ်စီၤယိၤၡူ 23

¹ဖဲယွၤဟ့ၣ်ဒုးအိၣ်ဘှံးအံၣ်စရ့လးလၢအဒုၣ်အဒါလၢအအိၣ်ဝးတရံးအီၤခဲလၢာ်ဝံၤအလီၢ်ခံဖးယံာ်ဒီးဖဲ စီၤယိၤၡူအသးအနံၣ်အလါပှၢ်ထီၣ်လံန့ၣ်,

²စီၤယိၤၡူကိးဖှိၣ်ပှၤအံၣ်စရ့လးဖိခဲလၢာ်, အပှၤသူၣ်က့သးပှၢ်, အခိၣ်အနၢ်, အပှၤစံၣ်ညီၣ်ကွီၢ်ဒီး အသုးခိၣ်သုးနၢ်တဖၣ်, ဒီးစံးဘၣ်အဝဲသ့ၣ်, “အခဲအံၤယသးပှၢ်ထီၣ်ဒီးယနံၣ်ယလါအါလံ,

³ဒီးသုထံၣ်ဘၣ်လံတၢ်လၢယွၤသုကစၢ်ယွၤမၤဘၣ်ပှၤကလုာ် တဖၣ်အံၤခဲလၢာ်လၢသုဂီၢ်, အဂ့ၢ်မ့ၢ်လၢယွၤသုကစၢ်ယွၤဒုးတၢ်လၢသုဂီၢ်အဃိန့ၣ်လီၤ.

⁴ကွၢ်ကွၢ်, ယနီၤလီၤန့ၢ်သုတၢ်န့ၢ်သါလၢသုဒူၣ်တဖၣ်အဂီၢ်လၢပှၤကလုာ်အအိၣ်လီၤတဲာ်ဒံးတဖၣ်အကီၢ်, ဃုာ်ဒီးပှၤကလုာ်လၢယမၤနၢၤတ့ၢ်လံခဲလၢာ်အကီၢ်စးထီၣ်လၢ ထံကျိယၢ်ဒ့ၣ်တုၤလၢမုၢ်ထီၣ်လၢပီၣ်လဲၣ်ဖးဒိၣ်မဲးဒံးယၢၣ်ရ့နယၢၣ်လၢမုၢ်နုာ်န့ၣ်လီၤ.

⁵ယွၤသုကစၢ်ယွၤကဒုးဂုၤက့ၤအဝဲသ့ၣ်လၢသုမဲာ်ညါ, ဒီးဟီထီၣ်ကွံာ်အီၤဖဲသုလဲၤထီၣ်ဒီးသုကမၤန့ၢ်အထံအကီၢ်ဒ်ယွၤသုကစၢ်အၢၣ်လီၤတ့ၢ်သုအသိးန့ၣ်လီၤ.

⁶လၢတၢ်န့ၣ်အဃိဒီး, အိၣ်ဂၢၢ်ကျၢၤလၢသုကဟံးဃာ်ဒီး မၤကယဲၢ်တၢ်ကွဲးအသးလၢစီၤမိၤၡ့အလံာ်တၢ်သိၣ်တၢ်သီအပူၤ, ဒီးဆူစုထွဲမ့ၢ်ဂ့ၤ, စုစ့ၣ်မ့ၢ်ဂ့ၤသုသုတဃၣ်ကွံာ်သုသးတဂ့ၤ.

⁷ဒီးသုတအိၣ်ဃါဃုာ်လိာ်သုသးဒီးပှၤကလုာ်လၢအအိၣ်လီၤတဲာ်လၢ သုကျါတဖၣ်အံၤတဂ့ၤ, သုသုတယၢၤထီၣ်ဘၣ်အကစၢ်တဖၣ် အမံၤတဂ့ၤ, သုသုတဆိၣ်တၢ်လၢအမဲာ်ညါဒီးမၤအဝဲသ့ၣ် အတၢ်မၤတဂ့ၤ, သုသုတတီၤလီၤလၢအဝဲသ့ၣ်အမဲာ်ညါတဂ့ၤ.

⁸မ့မ့ၢ်, အိၣ်စဲဘူးဒီးယွၤသုကစၢ်ယွၤဒ်သုမၤတ့ၢ် တုၤမုၢ်မဆါတနံၤအံၤအသိးန့ၣ်တက့ၢ်.

⁹ယွၤနီၣ်ထီၣ်ဟီထီၣ်ကွံာ်ပှၤကလုာ်ဖး ဒိၣ်ဒီးပှၤကလုာ်လၢအဂံၢ်ဆူၣ်တဖၣ်လၢသုမဲာ်ညါဒီးမ့မ့ၢ် လၢသုဝဲသ့ၣ်အဂီၢ်န့ၣ်, ပှၤဆၢထၢၣ်ပၢၢ်ဆၢသုသ့တုၤမုၢ်မဆါတနံၤအံၤတအိၣ်နီတဂၤဘၣ်န့ၣ်လီၤ.

¹⁰ပှၤလၢသုကျါတဂၤဒုးဃ့ၢ်ပှၤအဂၤတကထိသ့လီၤ. အဂ့ၢ်မ့ၢ်လၢယွၤသုကစၢ်ယွၤဒုးတၢ်လၢသုဂီၢ်ဒ်အအၢၣ်လီၤတ့ၢ်ဝဲအသိးအဃိန့ၣ်လီၤ.

¹¹လၢတၢ်န့ၣ်အဃိပလီၢ်သုသးဒ်သိးသုကအဲၣ်ယွၤသုကစၢ်ယွၤတက့ၢ်.

¹²သုမ့ၢ်ဃၣ်ကွံၢ်သုသးဒီးအိၣ်စဲဘူးဒီးပှၤကလုာ် လၢအအိၣ်လီၤတဲာ်လၢသုကျါတဖၣ်ဒီးဖျီလိာ်သုသးဒီးအဝဲသ့ၣ်န့ၣ်,

¹³သ့ၣ်ညါသပှၢ်ကတၢၢ်လၢယွၤသုကစၢ်ယွၤတနီၣ်ထီၣ်ဟီထီၣ် ပှၤကလုာ်တဖၣ်အံၤလၢသုမဲာ်ညါလၢၤဘၣ်. မ့မ့ၢ်, အဝဲသ့ၣ်ကကဲ ထီၣ်ပျံၤသကွီၤဒီးထုလၢသုဂီၢ်, နီၣ်ဖျ့လၢသုချၢအဂီၢ်ဒီး တၤဆှုၣ်တၤမဲလၢသုမဲာ်ချံအပူၤန့ၣ်လီၤ. တၢ်အံၤကမၤအသးတုၤလၢသုဟးဂီၤကွံာ်ခဲလၢာ်လၢကီၢ်လၢအဂ့ၤ လၢယွၤသုကစၢ်ယွၤဟ့ၣ်လီၤသုတဘ့ၣ်အံၤအပူၤန့ၣ်လီၤ.

¹⁴တၢ်ဆၢကတီၢ်တုၤဃီၤဝဲလၢယကသံအဂီၢ်လီၤ. ဒီးသုဝဲခဲလၢာ်သုသ့ၣ်ညါလၢသုသးကံၢ်ပူၤလၢယွၤသုကစၢ် ယွၤဟ့ၣ်လီၤသုတၢ်အဂ့ၤခဲလၢာ်လၢအအၢၣ်လီၤတ့ၢ်ဝဲန့ၣ်လီၤ. အတၢ်အၢၣ်လီၤကိးထံၣ်ဒဲးန့ၣ်မၤလၢပှဲၤဝဲလီၤ. တမၤလၢပှဲၤဝဲတအိၣ်နီတထံၣ်ဘၣ်.

¹⁵ဘၣ်ဆၣ်ဒ်အဝဲမၤလၢပှဲၤအတၢ်အၢၣ်လီၤဒီးသုကိးထံၣ်ဒဲး အသိးန့ၣ်, ဒ်န့ၣ်အသိး, အဝဲကမၤလၢပှဲၤအတၢ်မၤပျံၤမၤဖုးကိးထံၣ်ဒဲးလီၤ.

¹⁶သုမ့ၢ်လုၣ်သ့ၣ်ခါပတာ်ယွၤသုကစၢ်ယွၤအတၢ် အၢၣ်လီၤအီလီၤလၢအမၤလိာ်တ့ၢ်သုဒီးလဲၤ ဘူၣ်ထီၣ်ဘါထီၣ်ဒီးမၤကစၢ်အဂၤတဖၣ်အတၢ်န့ၣ်, လၢအတၢ်သးဒိၣ်အပူၤကစံၣ်ညီၣ်သု, ဒီးတယံာ်ဘၣ်ဒီးလၢကီၢ်အဂ့ၤလၢအဟ့ၣ်လီၤ တ့ၢ်သုတဘ့ၣ်အံၤအပူၤန့ၣ်, သုကဟးဂီၤကွံာ်ကိးဂၤန့ၣ်လီၤ.