Read S'gaw Karen လံာ်စီၤယိၤၡူ 3 Bible Online

လံာ်စီၤယိၤၡူ 3 - S'gaw Karen bible

လံာ်စီၤယိၤၡူ 3

¹မုၢ်ဆ့ၣ်ထီၣ်တနံၤန့ၣ်, စီၤယိၤၡူဒီးအပှၤအံၣ်စရ့လးဖိခဲလၢာ်ဂဲၤဆၢထၢၣ်ဂီၤဂီၤ, ဟးထီၣ်ကွံာ်လၢသူၣ်ဒဲလီၢ်ၡံးတံၣ်, ဒီးလဲၤဝဲဆူထံ ကျိယၢ်ဒ့ၣ်ဒီးဖဲန့ၣ်အဝဲသ့ၣ်အိၣ်ခိး တၢ်လၢကခီဂာ်ဝဲအဂီၢ်န့ၣ်လီၤ.

²သၢသီအလီၢ်ခံဒီး, ပှၤအံၣ်စရ့လးဖိအခိၣ်အနၢ်တဖၣ်လဲၤခီဂာ်ပှၤသူၣ်ဒဲအလီၢ်ခဲလၢာ်

³ဒီးစံးဘၣ်ပှၤဂီၢ်မုၢ်, “ဖဲသုထံၣ်ဘၣ်ပှၤလ့ၤဝံဖိအပှၤလုၢ်တၢ်အခိၣ်တဖၣ်စိာ်ယွၤသု ကစၢ်ယွၤအတၢ်အၢၣ်လီၤအီလီၤအတလါဒီးသုဘၣ်ဟးထီၣ်လၢသုလီၢ် ဒီးလဲၤပိာ်အဝဲသ့ၣ်အခံန့ၣ်လီၤ.

⁴လၢအပူၤကွံာ်န့ၣ်သုတတုၤလၢတၢ်လီၢ်အံၤနီတဘျီဘၣ်အဃိ, အဝဲသ့ၣ်ကဒုးနဲၣ်သုကျဲလၢသုကဘၣ်ပိာ်အီၤန့ၣ်လီၤ. ဘၣ်ဆၣ်ဒီးတဘၣ်လဲၤဘူးဒီးတၢ်အၢၣ်လီၤအီလီၤအတလါတဂ့ၤ. အိၣ်လၢအလီၢ်ခံအပျၢ်ခံကထိဃၣ်ဃၣ်တက့ၢ်.”

⁵စီၤယိၤၡူစံးဘၣ်ပှၤဂီၢ်မုၢ်, “မၤကဆှီထီၣ်သုသး, အဂ့ၢ်မ့ၢ်လၢခဲဂီၤတနံၤယွၤကမၤတၢ်လီၤ လးတဖၣ်လၢသုကျါအဃိန့ၣ်လီၤ.”

⁶ဝံၤဒီးအဝဲစံးဘၣ်ပှၤလုၢ်တၢ်အခိၣ်တဖၣ်လၢကစိာ်ထီၣ် တၢ်အၢၣ်လီၤအီလီၤအတလါဒီးကလဲၤတၢ်လၢပှၤဂီၢ်မုၢ်အမဲာ်ညါ လီၤ. အဝဲသ့ၣ်မၤဝဲဒ်စီၤယိၤၡူစံးဘၣ်အီၤအသိးန့ၣ်လီၤ.

⁷ယွၤစံးဘၣ်စီၤယိၤၡူ, “တနံၤအံၤယကမၤလၤကပီၤနၤဒ်ပှၤဖးဒိၣ်တဂၤအသိးလၢပှၤအံၣ် စရ့လးဖိခဲလၢာ်အမဲာ်ညါ, ဒီးအဝဲသ့ၣ်ကသ့ၣ်ညါဝဲလၢယ အိၣ်ဒီးနၤဒ်ယအိၣ်တ့ၢ်ဒီးစီၤမိၤၡ့ အသိးန့ၣ်လီၤ.

⁸မၤလိာ်ပှၤလုၢ်တၢ်အခိၣ်တဖၣ်လၢအစိာ်တၢ်အၢၣ်လီၤအီလီၤအတလါလၢ, ဖဲအဝဲသ့ၣ်လဲၤတုၤထံကျိယၢ်ဒ့ၣ်န့ၣ်, အဝဲသ့ၣ်ကဘၣ်ယီၢ်လီၤထံစှၤခီၣ်ခါဒီးဆၢထၢၣ်ဖဲန့ၣ်တက့ၢ်.”

⁹အန့ၣ်ဒီးစီၤယိၤၡူစံးဘၣ်ပှၤဂီၢ်မုၢ်, “ဟဲဖဲအံၤဒီးဒိကနၣ်တၢ်လၢယွၤသုကစၢ်ယွၤစံးဘၣ်သုန့ၣ်တ က့ၢ်.

¹⁰ဖဲသုလဲၤထီၣ်ဆူညါဒီး, အဝဲကနီၣ်ထီၣ်ကွံာ်ပှၤကနၤဧၣ်ဖိ, ပှၤဃ့ၤသးဖိ, ပှၤဃံၤဝံဖိ, ပှၤပရးစၤဖိ, ပှၤကံၢ်ကၣ်ဖိ, ပှၤအမိၢ်ဖိ, ဒီးပှၤယဘူၣ်ဖိတဖၣ်သပှၢ်ကတၢၢ်န့ၣ်လီၤ. ဒီးသုကသ့ၣ်ညါလၢကစၢ်ယွၤလၢအမူဝဲတဂၤအိၣ်လၢသုကျါ,

¹¹ဖဲဟီၣ်ခိၣ်ဒီဘ့ၣ်အကစၢ်အတၢ်အၢၣ်လီၤအီလီၤအတလါလဲၤခီဂာ်ထံ ကျိယၢ်ဒ့ၣ်လၢသုမဲာ်ညါအဆၢကတီၢ်န့ၣ်လီၤ.

¹²အခဲအံၤဃုထၢပှၤတဆံခံ ဂၤလၢပှၤအံၣ်စရ့လးဖိတဆံခံဒူၣ်အကျါတဒူၣ်တဂၤစုာ်စုာ်န့ၣ် တက့ၢ်.

¹³ဒီးဖဲပှၤလုၢ်တၢ်အခိၣ် တဖၣ်လၢအစိာ်ဟီၣ်ခိၣ်ဒီဘ့ၣ်အယွၤအတၢ်အၢၣ်လီၤအီလီၤအတလါ, ဒီးယီၢ်လီၤထံစှၤခါန့ၣ်ဒီး, ယၢ်ဒ့ၣ်အထံလၢအယွၤလီၤကအိၣ်ပတုာ်ဝဲဒီးထံလၢအဟဲလီၤလၢထး ခီကအိၣ်ပတုာ်ဝဲဒီးအိၣ်ဖှိၣ်စိထီၣ်န့ၣ်လီၤ.”

¹⁴မ့ၢ်ကူးဘုအကတီၢ်ဒီးထံကျိယၢ်ဒ့ၣ်အထံလုၣ်ဘၢအကၢၢ်နံၤန့ၣ်လီၤ. ဖဲပှၤဂီၢ်မုၢ်ဟးထီၣ်လၢသူၣ်ဒဲအလီၢ်လၢကခီဂာ်ယၢ်ဒ့ၣ်န့ၣ်, ပှၤလုၢ်တၢ်အခိၣ်တဖၣ်လဲၤလၢအဝဲ သ့ၣ်အမဲာ်ညါစိာ်ဃုာ်ဒီးတၢ်အၢၣ်လီၤအီလီၤအတလါန့ၣ်လီၤ.

¹⁵တုၤပှၤလုၢ်တၢ်အခိၣ်တဖၣ်အခီၣ်လီၤဘျၢလၢထံကျါန့ၣ်ဒီး

¹⁶ထံန့ၣ်အိၣ်ပတုာ်ဝဲဒီးအိၣ်ဖှိၣ်စိထီၣ်အသးလၢတၢ်လီၢ်အယံၤဖဲ ဝ့ၢ်အၤဒၣ်လၢအအိၣ်ဘူးဒီးစၤရတၣ်န့ၣ်လီၤ. ထံလၢအယွၤလီၤဝဲဆူပီၣ်လဲၣ်သံန့ၣ်တယွၤလီၤလၢၤဘၣ်အဃိပှၤ ဂီၢ်မုၢ်တဖၣ်ခီဂာ်တၢ်ဆူဝ့ၢ်ယရံၤဃိသ့ဝဲန့ၣ်လီၤ.

¹⁷ဖဲပှၤဂီၢ်မုၢ်ခီဂာ်တၢ်လၢခိအခါ, ပှၤလုၢ်တၢ်အခိၣ်တဖၣ်လၢအ စိာ်ယွၤအတၢ်အၢၣ်လီၤအီလီၤအတလါန့ၣ်, အိၣ်ဆၢထၢၣ်လၢ ခိလၢယၢ်ဒ့ၣ်အခၢၣ်သးတုၤလၢပှၤဂီၢ်မုၢ်ခီဂာ်တၢ်လၢာ်တစု န့ၣ်လီၤ.