Read S'gaw Karen လံာ်စီၤယိၤၡူ 9 Bible Online

လံာ်စီၤယိၤၡူ 9 - S'gaw Karen bible

လံာ်စီၤယိၤၡူ 9

¹အံၣ်စရ့လးအတၢ်မၤနၢၤအံၤဘၣ်တၢ်သ့ၣ်ညါအီၤလၢစီၤပၤတဖၣ်လၢ ထံကျိယၢ်ဒ့ၣ်အမုၢ်နုာ်လၢကစၢၢ်ကလိတဖၣ်, လၢကစၢၢ်ခီၣ်ထံးတဖၣ်, ဒီးလၢပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်အဃၢၤ, ဒီးလၢကလံၤစိးန့ၣ်ယံၤဝဲတုၤလၢလဘၤနိၣ်, လၢအမ့ၢ်ပှၤဃ့ၤသးဖိ, ပှၤအမိၢ်ဖိ, ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိ, ဒီးပှၤယဘူၣ်ဖိ အစီၤပၤတဖၣ်အအိၣ်န့ၣ်လီၤ.

²အဝဲသ့ၣ်ပာ်ဖှိၣ်ထီၣ်အသးခဲလၢာ်လၢအသးတဖျၢၣ်ဃီလၢကဒုးစီၤ ယိၤၡူဒီးပှၤအံၣ်စရ့လးဖိအဂီၢ်န့ၣ်လီၤ.

³ဘၣ်ဆၣ်ဒီးပှၤကံးဘိၣ်ဖိလၢအမ့ၢ် ပှၤဃံၤဝံဖိတဖၣ်နၢ်ဟူတၢ်လၢစီၤယိၤၡူမၤတ့ၢ်ဘၣ်ဝ့ၢ်ယရံၤဃိဒီးဝ့ၢ်ဂဲ,

⁴ဒီးအဝဲသ့ၣ်ပာ်လီၤအသးလၢကလီန့ၢ်အီၤလီၤ. အဝဲသ့ၣ်လဲၤစိာ်တၢ်အီၣ်တနီၤ, ဒီးတီၣ်ထီၣ်ထၢၣ်လီၢ်လံၤဒီး စပံးထံအဒၢလီၢ်လံၤတဖၣ်လၢအကသ့ၣ်ယီၤတဖၣ်အလိၤဒီးလဲၤတၢ်လီၤ.

⁵အဝဲသ့ၣ်ကူကၤထီၣ်တၢ်ကူတၢ်ကၤအလီၢ်လံၤဖီဃးတဖၣ်ဒီးခီၣ်ဖံး လၢအဘၣ်တၢ်ဆးကျးအီၤ, ဒီးကိၣ်လၢအစိာ်ဝဲလၢအသကိးစ့ၢ်ကီးဃ့ထီဒီးကုၤထီၣ်ဝဲ လီၤ.

⁶ဝံၤဒီးအဝဲသ့ၣ်လဲၤဝဲဆူသူၣ်ဒဲ အလီၢ်လၢဝ့ၢ်ကံးလကၤလးဒီးစံးဘၣ်စီၤယိၤၡူဒီးပှၤအံၣ်စရ့လးဖိတဖၣ်, “ပဟဲလၢကီၢ်လၢအယံၤတဘ့ၣ်လီၤ. ပအဲၣ်ဒိးလၢနကမၤတၢ်အၢၣ်လီၤအီ လီၤဒီးပှၤလီၤ.”

⁷ဘၣ်ဆၣ်ဒီးပှၤအံၣ်စရ့လးဖိတဖၣ်စံးဘၣ်ပှၤဃ့ၤဝံဖိတဖၣ်, “ဘၣ်တဘၣ်သုအိၣ်သုဆိးလၢပကျါအဃိဒီး, ပမၤတၢ်အၢၣ်လီၤအီ လီၤဒီးသုကသ့ဒ်လဲၣ်.”

⁸အဝဲသ့ၣ်စံးဘၣ်စီၤယိၤၡူ, “ပမ့ၢ်နခ့နပှၤတဖၣ်လီၤ.” ဒီးစီၤယိၤၡူစံးဘၣ်အဝဲသ့ၣ်, “သုမ့ၢ်မတၤတဖၣ်လဲၣ်. ဒီးသုဟဲဖဲလဲၣ်ခီလဲၣ်.”

⁹အဝဲသ့ၣ်စံးဘၣ်အီၤ, “ပဝဲနခ့နပှၤတဖၣ်အံၤပဟဲလၢထံကီၢ်လၢအယံၤတဘ့ၣ်, မ့ၢ်လၢပနၢ်ဟူဘၣ်ယွၤနကစၢ်အဂ့ၢ်အဃိလီၤ. ပနၢ်ဟူဘၣ်တၢ်ခဲလၢာ်လၢအဝဲမၤဝဲလၢကီၢ်အဲၤကူပတူး အပူၤ,

¹⁰ဒီးတၢ်လၢအမၤဘၣ်ပှၤအမိၢ်ဖိအစီၤ ပၤခံဂၤလၢထံကျိယၢ်ဒ့ၣ်အမုၢ်ထီၣ်ဃ့ၡဘိၣ်အစီၤပၤစံ ဃိၣ်, ဒီးဘၤၡၣ်အစီၤပၤဧိာ်လၢအအိၣ်ဝဲလၢဧၤၡၤတြိးန့ၣ်လီၤ.

¹¹ဒီးပခိၣ်ပနၢ်တဖၣ်ဒီးကယဲၢ်မ့ၢ်ပှၤအိၣ်လၢပကီၢ်ပူၤ ခဲလၢာ်စံးဘၣ်ပှၤလၢပကဟံးန့ၢ်တၢ်အီၣ်တၢ်အီလၢပတၢ်လဲၤထံၣ် လိာ်သုအဂီၢ်ဒီးစံးဘၣ်သု, ပမ့ၢ်သုခ့သုပှၤတဖၣ်လီၤ. အခဲအံၤမၤတၢ်အၢၣ်လီၤအီလီၤဒီးပှၤတက့ၢ်.

¹²ကွၢ်ပကိၣ်တက့ၢ်. ဖဲပဟးထီၣ်လၢပဟံၣ်လၢပကထံၣ်လိာ်ပသးဒီးသုအဂီၢ်န့ၣ်, ပကိၣ်အံၤလၢၤဒံးဝဲအဖၢလီၤ. ဘၣ်ဆၣ်ကွၢ်တက့ၢ်. အခဲအံၤဃ့ထီဒီးကုၤထီၣ်လံ.

¹³ဖဲပမၤပှဲၤစပံးထံဒၢတၢ်ဖံးတဖၣ်အံၤအခါ, မ့ၢ်တၢ်အသီလီၤ. ဘၣ်ဆၣ်ကွၢ်တက့ၢ်. ယာ်လၢာ်လံ. ပကူပကၤဒီးပခီၣ်ဖံးတ ဖၣ်စ့ၢ်ကီးလီၢ်လံၤဒီးယာ်ကွံာ်လၢပတၢ်ဟဲယံၤဝဲအဃိလီၤ.”

¹⁴ပှၤအံၣ်စရ့လးဖိတဖၣ်တူၢ်လိာ်တၢ်အီၣ်တနီၤလၢအဝဲသ့ၣ်ဟဲစိာ် ဝဲ, ဘၣ်ဆၣ်ဒီး အဝဲသ့ၣ်တဃ့တၢ်ဟ့ၣ်ကူၣ်လၢ ယွၤလၢတၢ်ဂ့ၢ်အံၤ ဘၣ်.

¹⁵ဒီးစီၤယိၤၡူမၤတၢ်ဃူတၢ်ဖိးအတၢ်အၢၣ်လီၤအီလီၤဒီးအဝဲ သ့ၣ်လၢအကပျဲအဝဲသ့ၣ်အိၣ်မူအဂီၢ်န့ၣ်လီၤ. ဒီးပှၤအံၣ်စရ့လးဖိအခိၣ်အနၢ်တဖၣ်ဆိၣ်လီၤအသးလၢအကဟံးဃာ် ဂၢၢ်ကျၢၤတၢ်အၢၣ်လီၤအီလီၤအံၤန့ၣ်လီၤ.

¹⁶အဝဲသ့ၣ်မၤတၢ်အၢၣ်လီၤအီလီၤဝံၤသၢသီအလီၢ်ခံန့ၣ်, ပှၤအံၣ်စရ့လးဖိတဖၣ်သ့ၣ်ညါဘၣ်ဝဲလၢပှၤသ့ၣ်တဖၣ် အံၤမ့ၢ်ဒၣ်ပှၤလၢအခိၣ်အဃၢၤဒီးအိၣ်ဆိးလၢအဝဲသ့ၣ်အသိးအကျါ န့ၣ်လီၤ.

¹⁷သတးဒီးအံၣ်စရ့လးဖိတဖၣ်ဟးထီၣ်ဒီးသၢသီတသီ န့ၣ်လဲၤတုၤဝဲလၢအဝဲသ့ၣ်အဝ့ၢ်တဖၣ်လၢအမ့ၢ်ကံးဘိၣ်, ကဖံရၤ, ဘအ့ရိး, ဒီးကံးရယးယဧၤရံၣ်န့ၣ်လီၤ.

¹⁸ဘၣ်ဆၣ်ဒီးပှၤအံၣ်စရ့လးဖိတဖၣ်မၤသံအဝဲသ့ၣ်တသ့ဘၣ်. မ့ၢ်လၢအဝဲသ့ၣ်အခိၣ်အနၢ်တဖၣ်ဆိၣ်လီၤတ့ၢ်လံအသးလၢယွၤ, အံၣ်စရ့လးအကစၢ်ယွၤ, အမံၤအပူၤအဃိန့ၣ်လီၤ. ပှၤဂီၢ်မုၢ်ခဲလၢာ်ကဒူးကဒ့ၣ်တၢ်ထီဒါပှၤခိၣ်ပှၤနၢ်တဖၣ်န့ၣ် လီၤ.

¹⁹ဘၣ်ဆၣ်ဒီးအဝဲသ့ၣ်စံးဆၢဝဲ, “ပဆိၣ်လီၤပသးဒီးအဝဲသ့ၣ်လၢယွၤ, အံၣ်စရ့လးအကစၢ်ယွၤအမံၤအပူၤအဃိ, ပထိးဘူးအဝဲသ့ၣ်တသ့ဘၣ်န့ၣ်လီၤ.

²⁰မ့ၢ်လၢပဆိၣ်လီၤပသးလံအဃိပဘၣ်ပျဲအိၣ်မူအဝဲသ့ၣ်န့ၣ်လီၤ. ပမ့ၢ်တမၤဒ်န့ၣ်ဘၣ်ဒီး, ကစၢ်ယွၤအတၢ်သးဒိၣ်ကလီၤဘၣ်ပှၤလီၤ.”

²¹ဒီးပှၤခိၣ်ပှၤနၢ်တဖၣ်စံးဘၣ်အဝဲသ့ၣ်, “ပျဲအဝဲသ့ၣ်အိၣ်မူတက့ၢ်. ဘၣ်ဆၣ်ဒီးအဝဲသ့ၣ်ကဘၣ်ကျီသ့ၣ်မုၣ်ဒီးကဘၣ်ဒၢၣ်ထံလၢပဝဲ ခဲလၢာ်အဂီၢ်န့ၣ်လီၤ.” အဝဲအံၤမ့ၢ်တၢ်လၢပှၤခိၣ်ပှၤနၢ်တဖၣ်ဟ့ၣ်ကူၣ်ဝဲန့ၣ်လီၤ.

²²စီၤယိၤၡူဟ့ၣ်လီၤအကလုၢ်လၢပှၤက ဟဲကိးပှၤကံးဘိၣ်ဖိတဖၣ်ဆူအအိၣ်ဒီးအဝဲသံကွၢ်အဝဲသ့ၣ်, “ဘၣ်မနုၤအဃိသုလီပှၤဒီးစံးလၢသုဟဲလၢတၢ်လီၢ်ဖးယံၤ န့ၣ်လဲၣ်. တၢ်နီၢ်နီၢ်တခီသုအိၣ်ဒၣ်ဖဲအံၤလီၤ.

²³မ့ၢ်လၢသုမၤတၢ်ဒ်အံၤအဃိ, သုဘၣ်တၢ်ဆိၣ်အၢဒီးသုကမ့ၢ်ဒၣ်ကုၢ်ထီဘိဒီးသုကဘၣ်ကျီ သ့ၣ်မုၣ်ဒီးဒၢၣ်ထံလၢယကစၢ်ယွၤအဟံၣ်အဂီၢ်န့ၣ်လီၤ.”

²⁴အဝဲသ့ၣ်စံးဆၢက့ၤစီၤယိၤၡူ, “ပမၤတၢ်အံၤမ့ၢ်လၢပဘၣ်တၢ်စံးဘၣ်တဲဘၣ်ပှၤလၢယွၤနကစၢ်ယွၤ မၤလိာ်တ့ၢ်အခ့အပှၤစီၤမိၤၡ့ လီၤတံၢ်လီၤဆဲးလၢအကဟ့ၣ်လီၤသုလၢကီၢ်ဒီဘ့ၣ်ညါ, ဒီးသုကဘၣ်မၤသံပှၤလၢကီၢ်ပူၤခဲလၢာ်ဖဲသုလဲၤထီၣ်ဒုးတၢ် အဃိန့ၣ်လီၤ. သတးဒီးပပျံၤတၢ်လၢပသးသမူအဂီၢ်ဒိၣ်မးဒီးပပျံၤနၤအဃိ, ပမၤဘၣ်တၢ်အံၤန့ၣ်လီၤ.

²⁵ဒီး, ကွၢ်ကွၢ်, ခဲအံၤပအိၣ်လၢနစုပူၤလီၤ. တၢ်လၢနဆိက မိၣ်လၢအဘၣ်ဒီးဂ့ၤလၢနမဲာ်န့ၣ်, မၤဘၣ်ပှၤတက့ၢ်.”

²⁶ဒီးတၢ်လၢစီၤယိၤၡူမၤဝဲန့ၣ်မ့ၢ်တၢ်အံၤလီၤ. အဝဲဒီဒၣ်အဝဲ သ့ၣ်ဒီးတပျဲပှၤအံၣ်စရ့လးဖိမၤသံအဝဲသ့ၣ်ဘၣ်န့ၣ်လီၤ.

²⁷ဘၣ်ဆၣ်ဒီး, တကတီၢ်ဃီန့ၣ်အဝဲဒုးကဲထီၣ်အဝဲသ့ၣ်လၢကုၢ်တဖၣ် လၢအကျီသ့ၣ်မုၣ်ဒီးဒၢၣ်ထံလၢပှၤအံၣ်စရ့လးဖိတဖၣ်အဂီၢ်ဒီး လၢယွၤအတၢ်လုၢ်လီၢ်အဂီၢ်န့ၣ်လီၤ. အဝဲသ့ၣ်မၤတၢ်မၤအံၤတုၤလီၤလၢမုၢ်မဆါတနံၤအံၤလၢတၢ်လီၢ် ဖဲယွၤဃုထၢလၢပှၤကဘူၣ်ထီၣ်ဘါထီၣ်အီၤအဂီၢ်န့ၣ်လီၤ.