Read S'gaw Karen ၂ သ့းစၤလနံ 3 Bible Online

၂ သ့းစၤလနံ 3 - S'gaw Karen bible

၂ သ့းစၤလနံ 3

¹လၢခံကတၢၢ်န့ၣ်, ပဒီပုၢ်ဝဲၢ်သ့ၣ်ဧၢ, ဃ့ဘါထုကဖၣ်တၢ်လၢပဂီၢ်, ဒ်သိးကစၢ်အတၢ်ကစီၣ်ကရၤလီၤအသးချ့ချ့ကလဲာ်, ဒီးဖဲတၢ်လီၢ်ကိးပူၤဒဲးန့ၣ်, ကဘၣ်တၢ်တူၢ်လိာ်မၤလၤကပီၤအီၤ, ဒ်အမၤအသးလၢသုသိးသုကျါန့ၣ်တက့ၢ်.

²ဃ့ဘါထုကဖၣ်စ့ၢ်ကီးလၢကစၢ်ယွၤကဒုးပူၤဖျဲးပှၤဒီးပှၤတတီတလိၤ, ဒီးပှၤအၢပှၤသီတဖၣ်န့ၣ်တက့ၢ်. အဂ့ၢ်ဒ်အံၤပှၤကိးဂၤဒဲးတနာ်တၢ်ကစီၣ်အံၤဘၣ်.

³ဘၣ်ဆၣ်ဒီးကစၢ်အကလုၢ်တီဝဲဒီးအဝဲဒၣ်ကမၤဆူၣ်ထီၣ်သုသး အဂံၢ်အဘါဒီးခိးတြီဃာ်တၢ်အၢတၢ်သီတဂၤလၢသု န့ၣ်လီၤ.

⁴ပကစၢ်ဟ့ၣ်စ့ၢ်ကီးပှၤသးလၢအနာ်န့ၢ်သု, ဒီးပနာ်ပဝဲသပှၢ်ကတၢၢ်လၢသုမၤတ့ၢ်လံဒီးသုကမၤဒံး ဆူညါဒ်ပတဲဘၣ်သုအသိးန့ၣ်လီၤ.

⁵မ်ကစၢ်ဆှၢသုဆူတၢ်သ့ၣ်ညါနၢ်ပၢၢ်အါထီၣ်ကစၢ်ယွၤ အတၢ်အဲၣ်တၢ်ကွံဒီးတၢ်သ့တူၢ်တၢ်လၢအဟဲလၢခရံာ် အအိၣ်န့ၣ်တက့ၢ်.

⁶ပဒီပုၢ်ဝဲၢ်သ့ၣ်ဧၢ, ပမၤလိာ်သုလၢပကစၢ်ယ့ၣ်ၡူးခရံာ်အမံၤ အပူၤ, ဒ်သိးသုကဟးဆှဲးဒီပုၢ်ဝဲၢ်လၢအအိၣ်ကၢၣ်အိၣ်ကျူဒီး တမၤဘၣ်ဒ်ပတၢ်သိၣ်လိနဲၣ်ယုၤသုအသိးဘၣ်တဖၣ်န့ၣ်လီၤ.

⁷သုနီၢ်ကစၢ်ဒၣ်သုဝဲသုသ့ၣ်ညါဂ့ၤဂ့ၤဘၣ်ဘၣ်လၢသုကြၢး ကွၢ်လိမၤဒိးပှၤန့ၣ်လီၤ. ဖဲပအိၣ်ဒီးသုအဆၢကတီၢ်န့ၣ် ပတအိၣ်ကၢၣ်အိၣ်ကျူဘၣ်.

⁸ပတတူၢ်လိာ်စ့ၢ်ကီးပှၤတဂၤဂၤအတၢ်လုၢ်အီၣ်ကလီပှၤ ဘၣ်. မ့မ့ၢ်ပဖံးတၢ်မၤတၢ်လၢမုၢ်ဆါဒီးလၢမုၢ်နၤဒ်သိး ပသုတကဲထီၣ်တၢ်ဝံတၢ်ယိးလၢသုဝဲနီတဂၤအဂီၢ် တဂ့ၤန့ၣ်လီၤ.

⁹ပမၤဒ်သိးအံၤန့ၣ်, တမ့ၢ်လၢပတအိၣ်ဒီးတၢ်ခွဲးတၢ်ယာ်လၢ ပကဃ့သုတၢ်လုၢ်အီၣ်ပှၤအဃိဘၣ်. မ့ၢ်ဒ်သိးအကကဲထီၣ်တၢ်အဒိအတဲာ်လၢသုကပိာ်ထွဲအီၤ အဂီၢ်တခီန့ၣ်လီၤ.

¹⁰ဖဲပအိၣ်ဒီးသုအဆၢကတီၢ်န့ၣ် ပညီနုၢ်မၤလိာ်သုဒီးစံး, “ပှၤလၢအတမၤဘၣ်တၢ်န့ၣ်မ်အသုတအီၣ်တၢ်တဂ့ၤ” န့ၣ်လီၤ.

¹¹ပစံးတၢ်အံၤအဂ့ၢ်မ့ၢ်လၢပနၢ်ဟူလၢပှၤအိၣ်လၢသုကျါတနီၤ အိၣ်မူလၢတၢ်ကၢၣ်တၢ်ကျူအပူၤဒီးတမၤတၢ်နီတမံၤဘၣ်. မ့မ့ၢ်အိၣ်ထဲအမၤတံာ်တာ်တၢ်လၢပှၤဂၤအတၢ်ဂ့ၢ်တၢ်ကျိၤ အပူၤန့ၣ်လီၤ.

¹²လၢကစၢ်ယ့ၣ်ၡူးခရံာ်အမံၤအပူၤ, ပမၤလိာ်ဒီးဟ့ၣ်ပလီၢ်ပှၤသ့ၣ် တဖၣ်အံၤဒ်သိးအကအိၣ်မူတၢ်အိၣ်မူလၢအဘၣ်ဘျီးဘၣ်ဒါဒီး တၢ်မၤတၢ်လၢအကလုၢ်အီၣ်အသးသမူဒၣ်ဝဲအဂီၢ်န့ၣ်လီၤ.

¹³မ့မ့ၢ်သုဝဲဒီပုၢ်ဝဲၢ်သ့ၣ်ဧၢ, သုသုတလီၤဘှံးလၢသုမၤတၢ်အဂ့ၤ အဃိတဂ့ၤ.

¹⁴ပှၤမ့ၢ်အိၣ်ဝဲတဂၤဂၤလၢအဂ့ၢ်လိာ်လၢအကပိာ်ထွဲတၢ်သိၣ် လီၤသီလီၤလၢပဆှၢလီၤလၢတၢ်ပရၢတဘ့ၣ်အံၤအပူၤန့ၣ်, ပာ်သူၣ်ပာ်သးဒီးမၤဘၣ်ထွဲသုသးလၢအီၤနီတမံၤတဂ့ၤ. သုကဘၣ်မၤဒ်အံၤ, မ့ၢ်ဒ်သိးအဝဲကမဲာ်ဆှးလီၤက့ၤအသး အဂီၢ်န့ၣ်လီၤ.

¹⁵ဘၣ်ဆၣ်ဒီး တဘၣ်ပာ်သူၣ်ပာ်သးလၢအဖီခိၣ်ဒ်ဒုၣ်ဒါတဂၤ အသိးတဂ့ၤ. မ့မ့ၢ်ဟ့ၣ်ပလီၢ်ပဒီအီၤဒ်ဒီပုၢ်ဝဲၢ်တဂၤအသိးန့ၣ် တက့ၢ်.

¹⁶မ်ကစၢ်အနီၢ်ကစၢ်ဒၣ်ဝဲလၢအဒုးအိၣ်ထီၣ်တၢ်ဃူတၢ်ဖိးလၢ ပဂီၢ်န့ၣ်ဟ့ၣ်သုတၢ်ဃူတၢ်ဖိးကိးဆၢကိးကတီၢ်, လၢကျဲကိးဘိဒဲးအပူၤတက့ၢ်. မ်ကစၢ်အိၣ်ဒီးသုဝဲကိးဂၤဒဲးတက့ၢ်.

¹⁷လၢယစုလီၢ်ဒၣ်ယဲ, ယကွဲးတၢ်ကတိၤတဖၣ်အံၤလီၤ. တၢ်ဆၢဂ့ၤဆၢဝါလၢယၤ စီၤပီလူးအအိၣ်, ယဆဲးလီၤ ယမံၤဒ်သိးအံၤ, လၢတၢ်ပရၢကိးဘ့ၣ်ဒဲးအကတၢၢ်န့ၣ်လီၤ. ယကွဲးလံာ်လၢကျဲဒ်အံၤလီၤ.

¹⁸မ်ပကစၢ်ယ့ၣ်ၡူးခရံာ်အဘျုးအဖှိၣ်အိၣ်ဒီးသုကိးဂၤဒဲး တက့ၢ်.