Read S'gaw Karen ၁ တံၤမသ့း 1 Bible Online

၁ တံၤမသ့း 1 - S'gaw Karen bible

၁ တံၤမသ့း 1

¹လၢစီၤပီလူး, ယ့ၣ်ၡူးခရံာ်အပှၤတၢ်မၢဖိတဂၤဒ်ကစၢ်ယွၤ ပတၢ်အုၣ်က့ၤခီၣ်က့ၤကစၢ်ဒီးယ့ၣ်ၡူးခရံာ်ပတၢ်မုၢ်လၢ်အတၢ် ဟ့ၣ်လီၤအကလုၢ်အသိး,

²ဆူ, စီၤတံၤမသ့း, ယဖိခွါနီၢ်နီၢ်လၢတၢ်စူၢ်တၢ်နာ်အပူၤအအိၣ်, မ်ပၢ်ကစၢ်ယွၤဒီးပကစၢ်ယ့ၣ်ၡူးခရံာ်ဟ့ၣ်လီၤနၤ တၢ်ဘျုးတၢ်ဖှိၣ်, တၢ်သးကညီၤ, ဒီးတၢ်ဃူတၢ်ဖိးတက့ၢ်.

³ယအဲၣ်ဒိးလၢနကအိၣ်လၢဝ့ၢ်အ့းဖ့းစူးအပူၤ, ဒ်ယမၢန့ၢ်ဆီၣ်ခံနၤဖဲယလဲၤဆူကီၢ်မၤက့းဒနံအခါအသိးန့ၣ် လီၤ. ပှၤအိၣ်ဖဲန့ၣ်တနီၤ သိၣ်လီၤသီလီၤတၢ်စူၢ်ကမၣ်နာ်ကမၣ် တဖၣ်, သတးဒီးနကဘၣ်ဟ့ၣ်လီၤနကလုၢ်လၢ အဝဲသ့ၣ်ကဆိကတီၢ်ကွံာ်ဝဲအဂီၢ်လီၤ.

⁴စံးဘၣ်တဲဘၣ်အဝဲသ့ၣ်လၢအသုတမၤလၢာ်အဆၢကတီၢ် လၢတၢ်စံၣ်ဃဲၤတဲဃဲၤလၢပျၢၤတဖၣ်ဒီးတၢ်ယၢၤထီၣ်ဖးထီ တၢ်ဟဲလီၤစၢၤတဖၣ်န့ၣ်တဂ့ၤ. တၢ်သ့ၣ်တဖၣ်အံၤဒုးအိၣ်ထီၣ်ဒၣ်တၢ်ဂ့ၢ်လိာ်ဘှီလိာ်တဖၣ်ဒီး တမၤထီၣ်မၤထီကစၢ်ယွၤအတၢ်ကူၣ်ထီၣ်ဖးလီၤလၢ တၢ်သ့ၣ်ညါအီၤသ့ဒၣ်ထဲလၢတၢ်စူၢ်တၢ်နာ်န့ၣ်ဘၣ်.

⁵တၢ်ဟ့ၣ်လီၤကလုၢ်အံၤ, အတၢ်တိာ်မ့ၢ်ဒ်သိးအကထိၣ်ဟူးထိၣ် ဂဲၤတၢ်အဲၣ်တၢ်ကွံလၢအဟဲထီၣ်ဝဲလၢသးလၢအကဆှီတဖျၢၣ် အပူၤ, သးလၢအသ့ၣ်ညါဒၣ်တၢ်ဆှံဆှံ, ဒီးတၢ်စူၢ်တၢ်နာ်နီၢ်နီၢ် အပူၤန့ၣ်လီၤ.

⁶ပှၤတနီၤဃၣ်ကွံာ်အသးလၢတၢ်သ့ၣ်တဖၣ်အံၤဒီးလဲၤကမၣ် ဆူတၢ်ကတိၤသကိးတၢ်လၢအခီပညီတအိၣ်တဖၣ်အပူၤ န့ၣ်လီၤ.

⁷အဝဲသ့ၣ်အဲၣ်ဒိးကဲထီၣ်ကစၢ်ယွၤအတၢ်သိၣ်တၢ်သီအသရၣ် တဖၣ်, ဘၣ်ဆၣ်ဒီးအဝဲသ့ၣ်တနၢ်ပၢၢ်က့ၤအတၢ်ကတိၤဒၣ်ဝဲ တဖၣ်မ့ၢ်ဂ့ၤ, တၢ်ဂ့ၢ်တၢ်ကျိၤတဖၣ်လၢအဝဲသ့ၣ်စံးကတိၤ ဝဲလၢအဂ့ၢ်လၢတၢ်စူၢ်ဂၢၢ်နာ်ကျၢၤအပူၤတဖၣ်မ့ၢ်ဂ့ၤန့ၣ်ဘၣ်.

⁸ပသ့ၣ်ညါလၢယူဒၤအတၢ်သိၣ်တၢ်သီန့ၣ်, ဂ့ၤဝဲဖဲပသူအီၤဒ်အကြၢးဘၣ်တၢ်သူအီၤအသိး န့ၣ်လီၤ.

⁹ပကဘၣ်သ့ၣ်နီၣ်ထီၣ်က့ၤလၢတၢ်သိၣ်တၢ်သီတဖၣ်ဘၣ်တၢ် ဒုးအိၣ်ထီၣ်အီၤတမ့ၢ်လၢပှၤအဂ့ၤအဝါတဖၣ်အဂီၢ်ဘၣ်. မ့မ့ၢ်တခီ, မ့ၢ်လၢပှၤမၤကမၣ်တၢ်သိၣ်တၢ်သီတဖၣ်, ပှၤအၢပှၤသီတဖၣ်, ပှၤတယူးတယီၣ်ယွၤဒီးမၤတၢ်ဒဲးဘးတဖၣ်, ပှၤလၢအတၢ် အဲၣ်ထူအဲၣ်ယွၤမ့ၢ်ဂ့ၤ, တၢ်အိၣ်မူလၢသူၣ်လၢသးမ့ၢ်ဂ့ၤ တအိၣ်ဘၣ်တဖၣ်, ပှၤလၢအမၤသံအပၢ်မ့တမ့ၢ်အမိၢ် တဖၣ်, ပှၤလၢအမၤသံပှၤကညီတဖၣ်,

¹⁰ပှၤမၤကမၣ်မုၣ်ကမၣ်ခွါတဖၣ်, ပှၤအဲၣ်တလ့ၤအဲၣ်တဘီတၢ် တဖၣ်, ပှၤဟုၣ်ဖီၣ်န့ၢ်ပှၤကညီဝံၤဃ့စ့တဖၣ်, ပှၤလၢအလီတၢ်ဒီးအုၣ်အသးကဘျံးကဘျၣ်, မ့တမ့ၢ်မၤတၢ်တမံၤမံၤလၢအထီဒါလိာ်အသးဒီးတၢ်သိၣ်လိ သီလိအမ့ၢ်အတီတဖၣ်အဂီၢ်န့ၣ်လီၤ.

¹¹တၢ်သိၣ်လိသီလိအံၤဘၣ်တၢ်ထံၣ်န့ၢ်အီၤလၢတၢ်သးခု ကစီၣ်အပူၤ, လၢတၢ်ဟ့ၣ်လီၤအီၤလၢယစုပူၤဒ်သိးယကတဲ ဖျါထီၣ်အီၤအဂီၢ်, ဒီးမ့ၢ်တၢ်သးခုကစီၣ်လၢအဟဲလၢကစၢ်ယွၤလၢအအိၣ်ဒီး အလၤကပီၤဒီးဘၣ်တၢ်စံးထီၣ်ပတြၢၤအီၤတဂၤအအိၣ် န့ၣ်လီၤ.

¹²ယစံးဘျုးပကစၢ်ယ့ၣ်ၡူးခရံာ်, လၢအဟ့ၣ်တ့ၢ်လံယၤတၢ်ဂံၢ် တၢ်ဘါလၢယတၢ်မၤအဂီၢ်အဃိန့ၣ်လီၤ. ယစံးဘျုးအီၤလၢအပာ်ယၤလၢပှၤအကလုၢ် တီဒီးဃုထၢထီၣ်ယၤလၢယကမၤအတၢ်မၤအဂီၢ်,

¹³ဖဲလၢအပူၤကွံာ်ယကတိၤအၢကတိၤသီအီၤ, မၤနးမၤဖှီၣ်အီၤ, ဒီးကတိၤဒုၣ်ဒွဲၣ်အီၤအခါဒၣ်လဲာ်န့ၣ်လီၤ. ဘၣ်ဆၣ်ဒီး, ကစၢ်ယွၤသးကညီၤယၤမ့ၢ်လၢယတအိၣ်ဒီးတၢ်စူၢ် တၢ်နာ်ဒံးဘၣ်ဒီးယတသ့ၣ်ညါတၢ်လၢယမၤဘၣ်တဖၣ် အဃိလီၤ.

¹⁴ဒီးပကစၢ်လူလီၤဂၢ်လီၤအဘျုးအဖှိၣ်အါအါကလဲာ်လၢယလိၤ, ဒီးဟ့ၣ်ယၤတၢ်စူၢ်တၢ်နာ်ဒီးတၢ်အဲၣ်တၢ်ကွံလၢအအိၣ်လၢ ယ့ၣ်ၡူးခရံာ်အပူၤန့ၣ်လီၤ.

¹⁵အအံၤမ့ၢ်တၢ်ကတိၤအမ့ၢ်အတီလၢပှၤဂ့ၤတူၢ်လိာ်ဒီးနာ် အီၤလၢာ်လၢာ်ဆ့ဆ့, လၢယ့ၣ်ၡူးခရံာ်ဟဲလီၤဆူဟီၣ်ခိၣ်ချၢဒ်သိးအကအုၣ်က့ၤ ခီၣ်က့ၤပှၤတၢ်ဒဲးဘးဖိတဖၣ်လၢယမ့ၢ်အဒိၣ်ကတၢၢ်တဂၤ န့ၣ်လီၤ.

¹⁶ဘၣ်ဆၣ်ဒီးကစၢ်ယွၤသးကညီၤယၤ, မ့ၢ်ဒ်သိးယ့ၣ်ၡူးခရံာ်ကဒုးနဲၣ်အတၢ်ဝံသးစူၤအလၢ အပှဲၤလၢယၤ, ပှၤတၢ်ဒဲးဘးဖိအအၢကတၢၢ်တဂၤ, ဒ်သိးကကဲထီၣ်တၢ်အဒိအတဲာ်လၢပှၤလၢအကနာ် က့ၤအီၤလၢခံဒီးဒိးန့ၢ်ဘၣ်တၢ်မူအထူအယိာ်တဖၣ် အဂီၢ်န့ၣ်လီၤ.

¹⁷စီၤပၤလၢအပၢတၢ်လီၤထူလီၤယိာ်လၢအသံတသ့ ဒီးတၢ်ထံၣ်အီၤတသ့, ကစၢ်ယွၤထဲတဂၤဧိၤအံၤ, မ်တၢ်ယူးယီၣ်ဒီးတၢ်လၤကပီၤအိၣ်ဒီးအီၤအစိၤစိၤ အဃၣ်ဃၣ်တက့ၢ်. အၤမ့ၣ်.

¹⁸ယဖိခွါစီၤတံၤမသ့းဧၢ, ယဟ့ၣ်လီၤနၤတၢ်မၤလိာ်အံၤမ့ၢ်ဒၣ်တၢ်မၤပိာ်ထွဲဝံအတၢ် ကတိၤတဖၣ်လၢအကတိၤတ့ၢ်ဝဲလၢအပူၤကွံာ်ဘၣ်ဃးဒီးနၤ န့ၣ်လီၤ. သူတၢ်ကတိၤတဖၣ်အံၤဒ်စုကဝဲၤတဖၣ်အသိး, ဒ်သိးနကဒုးတၢ်ဂ့ၤဂ့ၤဘၣ်ဘၣ်အဂီၢ်,

¹⁹ဒီးပၢၤဃာ်နတၢ်စူၢ်တၢ်နာ်ဒီးသးလၢအသ့ၣ်ညါဒၣ် တၢ်ဆှံဆှံန့ၣ်တက့ၢ်. ပှၤတနီၤတဒိကနၣ်သးလၢအသ့ၣ်ညါ ဒၣ်တၢ်န့ၣ်ဘၣ်အဃိ, အတၢ်စူၢ်တၢ်နာ်လီၤပှီၢ်ကွံာ်ဝဲဒၣ်န့ၣ်လီၤ.

²⁰လၢအဝဲသ့ၣ်အကျါမ့ၢ်စီၤဟူၤမ့းနဲဒီးစီၤအလ့းစၣ်ဒြူးလၢ ယစံၣ်ညီၣ်တ့ၢ်ဒီးဟ့ၣ်လီၤကွံာ်အီၤဆူမုၣ်ကီၤလံၢ်အစုပူၤ, ဒ်သိးတၢ်အံၤကကဲထီၣ်တၢ်သိၣ်လိအဝဲသ့ၣ်လၢကဆိကတီၢ် အတၢ်ကတိၤတရီတပါယွၤအဂီၢ်န့ၣ်လီၤ.