Read S'gaw Karen ၁ တံၤမသ့း 2 Bible Online

၁ တံၤမသ့း 2 - S'gaw Karen bible

၁ တံၤမသ့း 2

¹မ့မ့ၢ်ဒ်န့ၣ်ဒီး, အဆိကတၢၢ်န့ၣ်ယသဆၣ်ထီၣ်သုခံလၢသု ကသကွံၢ်ကညးတၢ်, ဘါထုကဖၣ်တၢ်, ဃ့တၢ်လၢပှၤဂၤအဂီၢ်, ဒီးစံးထီၣ်ပတြၢၤကစၢ်ယွၤလၢပှၤခဲလၢာ်အဂီၢ်,

²လၢစီၤပၤတဖၣ်အဂီၢ်ဒီးပဒိၣ်ပပှၢ်ခဲလၢာ်အဂီၢ်, ဒ်သိးပကအိၣ်မူဘၣ်ခုၣ်ခုၣ်မုာ်မုာ်လၢတၢ်ယူးယီၣ် ကစၢ်ယွၤဒီးလၢတၢ်လီၤယူးယီၣ်ပာ်ကဲလၢကျဲကိးဘိ ဒဲးအပူၤအဂီၢ်န့ၣ်တက့ၢ်.

³တၢ်အံၤမ့ၢ်တၢ်အဂ့ၤဒီးမၤသးခုကစၢ်ယွၤပတၢ်အုၣ်က့ၤ ခီၣ်က့ၤကစၢ်,

⁴လၢအသးအိၣ်လၢပှၤကိးဂၤဒဲးကတုၤလၢတၢ်အုၣ်က့ၤခီၣ်က့ၤ ဒီးကဒိးန့ၢ်တၢ်သ့ၣ်ညါတၢ်မ့ၢ်တၢ်တီအဂီၢ်န့ၣ်လီၤ.

⁵အဂ့ၢ်ဒ်အံၤကစၢ်ယွၤအိၣ်တဂၤ, ဒီးပှၤအိၣ်ဝဲတဂၤလၢအမၤဃူလိာ်ဖိးလိာ်က့ၤယွၤဒီး ပှၤကညီဒီးအဝဲဒၣ်မ့ၢ်ပှၤကညီ, ယ့ၣ်ၡူးခရံာ်,

⁶လၢအဟ့ၣ်လီၤအသးလၢတၢ်ပှ့ၤက့ၤပှၤဟီၣ်ခိၣ်ဖိခဲလၢာ် အဂီၢ်န့ၣ်လီၤ. တၢ်အဝဲအံၤမ့ၢ်တၢ်အုၣ်အသးဘၣ်ဆၢဘၣ် ကတီၢ်လၢကစၢ်ယွၤသးအိၣ်လၢပှၤခဲလၢာ်ကတုၤလၢတၢ် အုၣ်က့ၤခီၣ်က့ၤအဂ့ၢ်န့ၣ်လီၤ.

⁷ဒီးလၢတၢ်အံၤအဂီၢ်, ယဘၣ်တၢ်မၢလီၤယၤဒ်တၢ်မၢဖိတဂၤ အသိး, ဒီးသရၣ်လၢအကသိၣ်လိပှၤကလုာ်ဂၤတဖၣ်ဒီးဒ်သိး ယကတဲဖျါထီၣ်တၢ်စူၢ်တၢ်နာ်ဒီးတၢ်မ့ၢ်တၢ်တီအကစီၣ် အဂီၢ်န့ၣ်လီၤ. ယတကတိၤတၢ်ကဘျံးကဘျၣ်ဘၣ်. ယကတိၤတၢ်မ့ၢ်တၢ်တီလီၤ.

⁸လၢတၢ်အိၣ်ဖှိၣ်အတၢ်ဘူၣ်ထီၣ်ဘါထီၣ်အလီၢ်ကိးပူၤ ဒဲးန့ၣ်, ယသးအိၣ်လၢပိာ်ခွါတဖၣ်ကဃ့ဘါထုကဖၣ်, ပိာ်ခွါလၢအပာ်စီဆှံအသးလၢကစၢ်ယွၤအဂီၢ်ဒီးသ့ယူာ်ထီၣ် အစုလၢတၢ်ထုကဖၣ်အပူၤတအိၣ်ဘၣ်ဒီးတၢ်သူၣ်ဒိၣ်သးဖျိး တၢ်ဂ့ၢ်လိာ်ဘှီလိာ်, တဖၣ်န့ၣ်လီၤ.

⁹ယသးအိၣ်စ့ၢ်ကီးလၢပိာ်မုၣ်တဖၣ်ကပာ်အသးသညူးသပှၢ်ဒီး ကပလီၢ်သူၣ်ပလီၢ်သးလၢအတၢ်ကူတၢ်သိးတဖၣ်ဒီးကကူ တၢ်ကၤတၢ်လၢအကြၢးအဘၣ်, ဒီးအသုတကယၢကယဲအခိၣ်လၢတၢ်သံၣ်ခိၣ်သူ, ဒီးတၢ်ဆှီးထီၣ်အခိၣ်လၢထူဧိၤလွဲဧိၤဒီးတၢ်မျၢ်ပလဲ တဖၣ်, ဒီးအသုတကူကၤတၢ်ကူတၢ်ကၤလၢအပှ့ၤဒိၣ် တဖၣ်တဂ့ၤ.

¹⁰မ့မ့ၢ်, လၢအဝဲသ့ၣ်ကမၤတၢ်မၤအဂ့ၤတဖၣ်လၢအကြၢးဒီး ပိာ်မုၣ်လၢအစံးလီၤအသးလၢအအဲၣ်ထူအဲၣ်ယွၤန့ၣ်လီၤ.

¹¹ပိာ်မုၣ်တဖၣ်ကြၢးမၤလိတၢ်လၢတၢ်ကစုဒုဒီးတၢ်ဆီၣ် လီၤသူၣ်ဆီၣ်လီၤသးအပူၤန့ၣ်လီၤ.

¹²ယတဟ့ၣ်အဝဲသ့ၣ်အခွဲးလၢကသိၣ်လိတၢ်, မ့တမ့ၢ်, အိၣ်ဒီးအစိကမီၤလၢပိာ်ခွါတဖၣ်အဖီခိၣ်န့ၣ်ဘၣ်. အဝဲသ့ၣ်ကဘၣ်အိၣ်ဘှီၣ်ဝဲဒၣ်န့ၣ်လီၤ.

¹³အဂ့ၢ်ဒ်လဲၣ်န့ၣ်, စီၤအၤဒၣ်ဘၣ်တၢ်တ့လီၤအီၤလၢညါဒီးနီၢ်အံၣ်အုဘၣ်တၢ် တ့လီၤအီၤလၢခံန့ၣ်လီၤ.

¹⁴ဒီးစီၤအၤဒၣ်တမ့ၢ်ပှၤလၢအဘၣ်တၢ်လီန့ၢ်အီၤဘၣ်. မ့မ့ၢ်ပှၤလၢအဘၣ်တၢ်လီန့ၢ်အီၤဒီးမၤကမၣ်ကစၢ်ယွၤ အတၢ်သိၣ်တၢ်သီန့ၣ်မ့ၢ်ပိာ်မုၣ်လီၤ.

¹⁵ဘၣ်ဆၣ်ဒီးပိာ်မုၣ်မ့ၢ်အိၣ်ဂၢၢ်ဆိးကျၢၤလၢတၢ်စူၢ် တၢ်နာ်, တၢ်အဲၣ်တၢ်ကွံ, ဒီးတၢ်စီတၢ်ဆှံအပူၤအိၣ်ဒီးတၢ်ပာ်သး သညူးသပှၢ်န့ၣ်, အဝဲကဘၣ်တၢ်အုၣ်က့ၤခီၣ်က့ၤအီၤခီဖျိလၢအအိၣ်ဖိအိၣ်လံၤ အဃိန့ၣ်လီၤ.