Read S'gaw Karen ၁ တံၤမသ့း 4 Bible Online

၁ တံၤမသ့း 4 - S'gaw Karen bible

၁ တံၤမသ့း 4

¹ယွၤအသးစံးဝဲလီၤတံၢ်လီၤဆဲးလၢပှၤတနီၤကစူးကွံာ်ညိကွံာ် တၢ်စူၢ်တၢ်နာ်အံၤလၢမုၢ်နံၤခံကတၢၢ်တဖၣ်အပူၤန့ၣ်လီၤ. အဝဲသ့ၣ်ကစူၢ်သးလၢအလီတၢ်တဖၣ်ဒီးကပိာ်ထွဲတၢ်ဝံတၢ်နါ တဖၣ်အတၢ်သိၣ်လိသီလိအခံန့ၣ်လီၤ.

²တၢ်သိၣ်လိသီလိတဖၣ်အံၤကဘၣ်တၢ်ရၤလီၤအီၤလၢ ပှၤလီတၢ်ဝ့ၤတၢ်, ပှၤပာ်မၤအသးတဖၣ်လၢအသးလၢအသ့ၣ်ညါဒၣ်တၢ်ဘၣ် တၢ်မၤသံကွံာ်အီၤဒ်ထးလူအီၣ်သံကွံာ်အီၤအသိးန့ၣ်လီၤ.

³ပှၤဒ်သိးအံၤတဖၣ်သိၣ်လီၤသီလီၤဝဲလၢတၢ်န့ၢ်ဖိန့ၢ်မါန့ၣ်, မ့ၢ်တၢ်ကမၣ်ဒီးတၢ်အီၣ်တၢ်အီတနီၤနီၤန့ၣ်, ဂ့ၤဘၣ်တၢ်ဟးဆှဲး အီၤန့ၣ်လီၤ. ဘၣ်ဆၣ်ဒီးတၢ်အီၣ်တဖၣ်န့ၣ်, ယွၤတ့လီၤပာ်လီၤဝဲလၢပှၤစူၢ်က့ၤနာ်က့ၤတၢ်ဒီးသ့ၣ်ညါ တၢ်မ့ၢ်တၢ်တီတဖၣ်ကစံးထီၣ်ပတြၢၤတၢ်အဘျုးအဖှိၣ်ဝံၤ, ကအီၣ်ဝဲအဂီၢ်န့ၣ်လီၤ.

⁴တၢ်ကိးမံၤဒဲးလၢကစၢ်ယွၤတ့လီၤပာ်လီၤန့ၣ်ဂ့ၤဝဲဒၣ်လီၤ. တၢ်တဂ့ၤညိကွံာ်အီၤနီတမံၤဘၣ်. တၢ်ကိးမံၤဒဲးန့ၣ်ကြၢးဘၣ်တၢ်တူၢ်လိာ်အီၤလၢတၢ် စံးထီၣ်ပတြၢၤတၢ်အဘျုးအဖှိၣ်အပူၤ,

⁵အဂ့ၢ်မ့ၢ်လၢကစၢ်ယွၤအကလုၢ်ကထါဒီးတၢ်ထုကဖၣ် ဒုးကဲထီၣ်အီၤတၢ်လၢယွၤတူၢ်လိာ်အီၤသ့ဝဲအဃိန့ၣ်လီၤ.

⁶နမ့ၢ်ဟ့ၣ်လီၤတၢ်သိၣ်လိသီလိတဖၣ်အံၤဆူဒီပုၢ်ဝဲၢ်တဖၣ် အအိၣ်, ဒ်နလုၢ်အီၣ်လုၢ်အီလီၤက့ၤနသးလၢ သူၣ်ဂ့ၤသးကျိၤ လၢတၢ်စူၢ်တၢ်နာ်အတၢ်ကတိၤတဖၣ်အသိးဒီးလၢတၢ်သိၣ်လိ သီလိအမ့ၢ်အတီတဖၣ်လၢနပိာ်ထွဲတ့ၢ်အခံအဃိန့ၣ်, နကမ့ၢ်ယ့ၣ်ၡူးခရံာ်အခ့အပှၤလၢအဂ့ၤန့ၣ်လီၤ.

⁷ဘၣ်ဆၣ်ဒီး, ပဒ့ၣ်ဟးဆှဲးတၢ်တသ့ၣ်ညါထူတသ့ၣ်ညါယွၤအတၢ်စံၣ် ဃဲၤတဲဃဲၤလၢပျၢၤလၢအဘျုးအဖှိၣ်တအိၣ်ဘၣ်တဖၣ်န့ၣ် တက့ၢ်. သိၣ်လီၤဒၣ်နသးလၢတၢ်အိၣ်မူယူးယီၣ်ယွၤအဂီၢ် န့ၣ်တက့ၢ်.

⁸နီၢ်ခိအတၢ်ဟူးတၢ်ဂဲၤအိၣ်ဒီးအဘျုးအဖှိၣ်တနီၤ, မ့မ့ၢ်သးအတၢ်ဟူးတၢ်ဂဲၤအဘျုးအဖှိၣ်အိၣ်ဝဲလၢကျဲခဲလၢာ်, မ့ၢ်လၢအအိၣ်ဒီးတၢ်အၢၣ်လီၤအီလီၤဘၣ်ဃးတၢ်မူလၢဆၢ ကတီၢ်ခဲအံၤအဂီၢ်မ့ၢ်ဂ့ၤ, တၢ်မူလၢခဲကိာ်တဃၣ်အဂီၢ်မ့ၢ်ဂ့ၤ အဃိန့ၣ်လီၤ.

⁹တၢ်ကတိၤတထံၣ်အံၤမ့ၢ်ဝဲတီဝဲဒီးကြၢးဘၣ်တၢ်တူၢ်လိာ် အီၤဒီးနာ်အီၤလၢပှၤခဲလၢာ်န့ၣ်လီၤ.

¹⁰ပဂဲၤပျုၢ်ဒီးမၤတၢ်ဆူၣ်ဆူၣ်, မ့ၢ်လၢပပာ်ပတၢ်မုၢ်လၢ်လၢ ကစၢ်ယွၤလၢအမူဝဲတဂၤအပူၤ, လၢအမ့ၢ်ပှၤအုၣ်က့ၤခီၣ်က့ၤ ပှၤခဲလၢာ်, ဒီးလီၤဆီဒၣ်တၢ်ပှၤလၢအစူၢ်က့ၤနာ်က့ၤတၢ်တဖၣ် အဃိန့ၣ်လီၤ.

¹¹မၤလိာ်ဒီးသိၣ်လိအဝဲသ့ၣ်လၢတၢ်သ့ၣ်တဖၣ်အံၤတက့ၢ်.

¹²တဘၣ်ပျဲပှၤနီတဂၤကွၢ်တလီၤနၤမ့ၢ်လၢနမ့ၢ်ပှၤသးစၢ်အဃိ တဂ့ၤ. မ့မ့ၢ်ကဲထီၣ်တၢ်ဒိဂ့ၤတဲာ်ဘၣ်လၢပှၤစူၢ်က့ၤနာ်က့ၤတၢ် တဖၣ်အဂီၢ်လၢနတၢ်ကတိၤ, လၢနတၢ်မၤ, လၢနတၢ်အဲၣ်တၢ်ကွံ, လၢတၢ်စူၢ်တၢ်နာ်, ဒီးတၢ်စီတၢ်ဆှံအပူၤန့ၣ်တက့ၢ်.

¹³တချုးယဟဲဒံးဘၣ်ဒီး, ဟ့ၣ်လီၤနတၢ်ဆၢကတီၢ်ဒီးတၢ်ကျဲးစၢးလၢတၢ်ဖးန့ၢ်ပှၤဂီၢ်မုၢ် လၢတၢ်ကွဲးအသးစီဆှံတဖၣ်, ဒီးလၢတၢ်စံၣ်တဲၤတဲလီၤတၢ်ဒီးလၢတၢ်သိၣ်လိသီလိတၢ် အဂီၢ်န့ၣ်တက့ၢ်.

¹⁴သးအတၢ်ဟ့ၣ်လၢအအိၣ်လၢနပူၤ, လၢအဘၣ်တၢ်ဟ့ၣ်လီၤနၤဖဲဝံတဖၣ်ကတိၤတၢ်ဒီးပှၤသူၣ်က့သးပှၢ် တဖၣ်ပာ်ထီၣ်အစုလၢနလိၤအခါန့ၣ်, ပာ်ကဲဒီးသူအီၤထီဘိတက့ၢ်.

¹⁵မၤတၢ်သ့ၣ်တဖၣ်အံၤဒီးဟ့ၣ်လီၤနသးဆူအပူၤဒ်သိးဒီး နတၢ်ဒိၣ်ထီၣ်ထီထီၣ်ကဘၣ်တၢ်ထံၣ်အီၤလၢပှၤခဲလၢာ် တက့ၢ်.

¹⁶နကစၢ်ဒၣ်နဲပလီၢ်နသးဒီးပလီၢ်စ့ၢ်ကီးနသးလၢနတၢ်သိၣ်လိ သီလိတက့ၢ်. မၤတၢ်သ့ၣ်တဖၣ်အံၤထီဘိတက့ၢ်. အဂ့ၢ်ဒ်အံၤ, နမ့ၢ်မၤဒ်န့ၣ်ဒီးနကအုၣ်က့ၤခီၣ်က့ၤနသးဒၣ်နဲ, ဒီးပှၤလၢအနၢ်ဟူတၢ်လၢနၤတဖၣ်စ့ၢ်ကီးလီၤ.