Read S'gaw Karen ၁ တံၤမသ့း 5 Bible Online

၁ တံၤမသ့း 5 - S'gaw Karen bible

၁ တံၤမသ့း 5

¹တဘၣ်ဒူပှၤလၢအသးပှၢ်န့ၢ်နၤအလိၤတဂ့ၤ. မ့မ့ၢ်ဃ့ကညးအီၤဒ် နကဃ့ကညးနပၢ်အသိးန့ၣ်တက့ၢ်. ပာ်ပှၤလၢအသးစၢ်န့ၢ်နၤဒ်နဒီပုၢ်ဝဲၢ်တဖၣ်အသိး,

²ပိာ်မုၣ်လၢအသးပှၢ်န့ၢ်နၤတဖၣ်ဒ်မိၢ်တဖၣ်အသိး, ဒီးပိာ်မုၣ်လၢအသးစၢ်န့ၢ်နၤတဖၣ်ဒ်နဒီပုၢ်ဝဲၢ်မုၣ်တဖၣ် အသိး, လၢတၢ်စီဆှံခဲလၢာ်အပူၤန့ၣ်တက့ၢ်.

³ဒုးနဲၣ်တၢ်ယူးယီၣ်ပာ်ကဲလၢမုၣ်ကမဲနီၢ်နီၢ်တဖၣ်န့ၣ်တက့ၢ်.

⁴ဘၣ်ဆၣ်မုၣ်ကမဲတဂၤမ့ၢ်အိၣ်ဒီးအဖိ, မ့တမ့ၢ်အလံၤတဖၣ်န့ၣ်ဒီး, အဝဲသ့ၣ်ကဘၣ်မၤလိဆိတၢ်မၤလၢပှဲၤအတၢ်ဘူၣ်တၢ်ဘါအမူ အဒါတဖၣ်လၢအဒူၣ်ဖိထၢဖိဒၣ်ဝဲအဂီၢ်, ဒီးလၢကျဲဒ်အံၤန့ၣ်မၤဘျုးက့ၤမိၢ်ပၢ်ဖံဖုတဖၣ်, အဂ့ၢ်မ့ၢ်လၢတၢ်အံၤမ့ၢ်တၢ်ဘၣ်ကစၢ်ယွၤအသးအဃိန့ၣ်လီၤ.

⁵မုၣ်ကမဲနီၢ်နီၢ်လၢပှၤအံးထွဲကွၢ်ထွဲအီၤတအိၣ်တဂၤန့ၣ်, ပာ်လီၤအတၢ်မုၢ်လၢ်လၢကစၢ်ယွၤအပူၤဒီးဘါထုကဖၣ် တၢ်တထံၣ်ဃီဒီးဃ့ကညးယွၤလၢကမၤစၢၤအီၤ, လၢမုၢ်ဆါဆဲးလၢမုၢ်နၤန့ၣ်လီၤ.

⁶မ့မ့ၢ်, မုၣ်ကမဲတဂၤလၢအဃုအတၢ်မုာ်တၢ်လၤဒၣ်ဝဲန့ၣ်, မူဘၣ်ဆၣ်ဒီးသံဝဲလံန့ၣ်လီၤ.

⁷မၤလိာ်အဝဲသ့ၣ်လၢတၢ်သိၣ်လိသီလိတဖၣ်အံၤ, ဒ်သိးပှၤသုတပာ်တၢ်ကမၣ်လၢအဝဲသ့ၣ်အလိၤနီတဂၤတဂ့ၤ အဂီၢ်န့ၣ်တက့ၢ်.

⁸ဘၣ်ဆၣ်ဒီး, ပှၤတဂၤဂၤမ့ၢ်တအံးထွဲကွၢ်ထွဲအဘူးအတံၢ်, လီၤဆီဒၣ်တၢ်အဟံၣ်ဖိဃီဖိဒူၣ်ဖိထၢဖိဒၣ်ဝဲဘၣ်ဒီး, အဝဲသမၢဘၣ်လံတၢ်စူၢ်တၢ်နာ်ဒီးမ့ၢ်ပှၤလၢအအၢန့ၢ်ဒံး ပှၤလၢအတစူၢ်တနာ်တၢ်တဂၤန့ၣ်လီၤ.

⁹မုၣ်ကမဲတဂၤဂ့ၤတဂၤဂ့ၤလၢအသးတပှဲၤထီၣ်ဒံးဘၣ်အနံၣ် ဃုဆံန့ၣ်, တဘၣ်ပာ်အီၤလၢမုၣ်ကမဲတဖၣ်အစရီအပူၤ တဂ့ၤ. လၢန့ၣ်အမဲာ်ညါ, အဝၤကဘၣ်အိၣ်ဒၣ်ထဲတဘျီဧိၤန့ၣ်လီၤ.

¹⁰ဒီးအမံၤကဘၣ်ဂ့ၤလၢအတၢ်မၤဂ့ၤတဖၣ်အဃိ, လၢအမ့ၢ်တ့ၢ်လံပိာ်မုၣ်တဂၤလၢအအံးကွၢ်ဒုးဒိၣ်ထီၣ်ဖိလံၤ ဂ့ၤဂ့ၤဘၣ်ဘၣ်, တူၢ်လိာ်သမှံၤသပျီၤတဖၣ်လၢအဟံၣ်ပူၤဃီပူၤ, သ့စီပှၤစီဆှံတဖၣ်အခီၣ်, မၤစၢၤပှၤဘၣ်ကီဘၣ်ခဲတဖၣ်, ဒီးဟ့ၣ်လီၤအသးလၢတၢ်မၤဂ့ၤတၢ်အပူၤန့ၣ်လီၤ.

¹¹မ့မ့ၢ်, မုၣ်ကမဲလၢအသးစၢ်ဒံးတဖၣ်န့ၣ်, တဘၣ်ပာ်အီၤလၢမုၣ်ကမဲတဖၣ်အစရီအပူၤတဂ့ၤ. အဂ့ၢ်ဒ်လဲၣ်န့ၣ်, ဖဲတၢ်ဖံးတၢ်ညၣ်အသးထိၣ်ဂဲၤထီၣ်အဝဲသ့ၣ်လၢ အကဟံးန့ၢ်အဝၤန့ၣ်, အဝဲသ့ၣ်ကဃၣ်ဒူချၢကွံာ်အသးလၢခရံာ်,

¹²ဒီး ကကဲထီၣ်ပှၤမၤကမၣ်တၢ်တဖၣ် မ့ၢ်လၢအလုၣ်သ့ၣ်ခါပတာ်အတၢ်အၢၣ်လီၤလၢညါဒီးအီၤ အဃိန့ၣ်လီၤ.

¹³အဝဲသ့ၣ်မၤန့ၢ်ပှၤကၢၣ်ပှၤကျူအလုၢ်အလၢ်, ဒီးဟးဝ့ၤဝီၤဝဲ တဟံၣ်စဲတဟံၣ်, ဒီးအၢန့ၢ်အန့ၣ်, အဝဲသ့ၣ်သီၣ်ဝံသဲကလၤလၢပှၤအဂ့ၢ်ဒီးနုာ်လီၤမၤသဘံၣ်ဘုၣ် အသးလၢပှၤဂၤအတၢ်ဂ့ၢ်အပူၤ, ဒီးကတိၤတၢ်လၢအတဂ့ၤ ကတိၤဝဲတဖၣ်န့ၣ်လီၤ.

¹⁴လၢတၢ်န့ၣ်အဃိ, ယသးအိၣ်လၢမုၣ်ကမဲလၢအသးစၢ်တဖၣ် ကဟံးန့ၢ်အဝၤ, အိၣ်ဖိအိၣ်လံၤ, ဒီးကွၢ်ထွဲအဟံၣ်အဃီတဖၣ်, ဒ်သိးဒီးပဒုၣ်ပဒါအသုတအိၣ်ဒီးတၢ်အခွဲးအယာ်လၢ အကကတိၤအၢကတိၤသီပှၤတဂ့ၤအဂီၢ်န့ၣ်လီၤ.

¹⁵မ့ၢ်အဂ့ၢ်ဒ်လဲၣ်န့ၣ်, မုၣ်ကမဲတနီၤဃၣ်ဒူချၢတ့ၢ်လံအသးလၢခရံာ်ဒ်သိးအကပိာ်ထီၣ် မုၣ်ကီၤလံၢ်အခံအဂီၢ်န့ၣ်လီၤ.

¹⁶ဘၣ်ဆၣ်ဒီး, ပိာ်မုၣ်လၢအစူၢ်က့ၤနာ်က့ၤတၢ်တဂၤဂၤအဒူၣ်ဖိထၢဖိ အပူၤမုၣ်ကမဲမ့ၢ်အိၣ်ဒီး, အဝဲကဘၣ်အံးထွဲကွၢ်ထွဲမုၣ်ကမဲတဖၣ်အံၤ ဒီးမ်အသုတပာ်ထီၣ်တၢ်ဝံတၢ်ယိးအဝဲအံၤလၢတၢ်အိၣ်ဖှိၣ် အဖီခိၣ်တဂ့ၤ. အဂ့ၢ်ဒ်လဲၣ်န့ၣ်, တၢ်အိၣ်ဖှိၣ်ကဘၣ်ကွၢ်ထွဲမၤ စၢၤမုၣ်ကမဲနီၢ်နီၢ်တဖၣ်န့ၣ်လီၤ.

¹⁷ပှၤသူၣ်က့သးပှၢ်လၢအမၤတၢ်ဂ့ၤဂ့ၤဒ်ခိၣ်နၢ်အသိးတဖၣ်န့ၣ်, တၢ်ကြၢးကွၢ်ဆိကမိၣ်တၢ်လၢအဝဲသ့ၣ်အဂီၢ်ဒီးဟ့ၣ်အီၤဘူးလဲခံစး, လီၤဆီဒၣ်တၢ်ပှၤတဖၣ်လၢအမၤတၢ်ဆူၣ်ဆူၣ်လၢတၢ်စံၣ် တဲၤတဲလီၤဒီးတၢ်သိၣ်လိသီလိတၢ်အပူၤန့ၣ်လီၤ.

¹⁸အဂ့ၢ်ဒ်အံၤ, တၢ်ကွဲးအသးစံးဝဲဒၣ်, “ဂီၤဖံးလၢအယီၢ် ဘုန့ၣ်, သုတဖျီၣ်ပသံးဃာ်အထးခိၣ်တဂ့ၤ.” ဒီး “ပှၤမၤတၢ်ဖိတဂၤန့ၣ်, ကြၢးန့ၢ်ဘၣ်အဘူးအလဲလီၤ.”

¹⁹တၢ်ပာ်တၢ်ကမၣ်လၢပှၤသူၣ်က့သးပှၢ်တဂၤဂၤအလိၤန့ၣ်, ပှၤအုၣ်အသးခံဂၤ, မ့တမ့ၢ်, သၢဂၤမ့ၢ်တအိၣ်ဘၣ်ဒီး, တဘၣ်ကနၣ်ဃုာ်တဂ့ၤ.

²⁰ပှၤလၢအမၤတၢ်ဒဲးဘးခဲလၢာ်န့ၣ်, သိၣ်ဃီၣ်အီၤလၢကမျၢၢ်အမဲာ်ညါ, ဒ်သိးပှၤဂၤတဖၣ်ကအိၣ်ဒီးတၢ်ပျံၤတၢ်ဖုးအဂီၢ်န့ၣ် တက့ၢ်.

²¹လၢကစၢ်ယွၤ, ဒီးယ့ၣ်ၡူးခရံာ်, ဒီးကလူးစီဆှံတဖၣ်အမဲာ်ညါ န့ၣ်, ယမၤလိာ်နၤလၢတၢ်သညူးသပှၢ်အပူၤလၢနကစူၢ်တၢ်သိၣ် တၢ်သီတဖၣ်အံၤ, တအိၣ်ဘၣ်ဒီးတၢ်အဲၣ်ဒိၣ်ဆံးအါစှၤတၢ်ဒီး တၢ်ကွၢ်မဲာ်တၢ်လၢနမၤတၢ်တမံၤဂ့ၤတမံၤဂ့ၤအပူၤန့ၣ် ဘၣ်လီၤ.

²²တၢ်ပာ်စုပှၤတဂၤဂ့ၤတဂၤဂ့ၤလၢအကမၤကစၢ်ယွၤ အတၢ်မၤန့ၣ်, တဘၣ်မၤအီၤချ့ချ့တဂ့ၤ. တဘၣ်မၤဘၣ်ဃးနသးဒီးပှၤဂၤအတၢ်ဒဲးဘးတဖၣ် တဂ့ၤ. အိၣ်စီအိၣ်ဆှံနဲဒၣ်တက့ၢ်.

²³တဘၣ်အီထဲထံတဂ့ၤ, မ့မ့ၢ်အီစပံးထံတဆံးတက့ၢ်လၢကမၤစၢၤ နကဖုအဂီၢ်, မ့ၢ်လၢနဆိးက့တလီၢ်လီၢ်အဃိန့ၣ်တက့ၢ်.

²⁴ပှၤတနီၤနီၤအတၢ်ဒဲးဘးတဖၣ်တၢ်ထံၣ်ဘၣ်အီၤဖျါဖျါ, ဒီးအတၢ်ဒဲးဘးတဖၣ်လဲၤလၢအမဲာ်ညါလၢတၢ်စံၣ်ညီၣ် အဂီၢ်န့ၣ်လီၤ. မ့မ့ၢ်, ပှၤအဂၤတဖၣ်အတၢ်ဒဲးဘးတဖၣ်န့ၣ်, ဘၣ်တၢ်ထံၣ်န့ၢ်ဒၣ်အီၤလၢခံန့ၣ်လီၤ.

²⁵ဒ်န့ၣ်အသိး, တၢ်မၤဂ့ၤတဖၣ်ဘၣ်တၢ်ထံၣ်န့ၢ်အီၤဖျါဖျါ, ဒီးလၢအတအိၣ်ဖျါတဖၣ်ဒၣ်လဲာ်န့ၣ် တၢ်ပာ်ခူသူၣ်အီၤတန့ၢ်ဘၣ်.