Read S'gaw Karen ၂ တံၤမသ့း 1 Bible Online

၂ တံၤမသ့း 1 - S'gaw Karen bible

၂ တံၤမသ့း 1

¹လၢစီၤပီလူး, ယ့ၣ်ၡူးခရံာ်အပှၤတၢ်မၢဖိဒ်ကစၢ်ယွၤအတၢ်ဘၣ် အသးအသိး, လၢတၢ်မၢလီၤအီၤလၢအကတဲဖျါတၢ်အိၣ်မူလၢအဘၣ် တၢ်စံးပာ်တ့ၢ်အီၤလၢယ့ၣ်ၡူးခရံာ်အပူၤ,

²ဆူ စီၤတံၤမသ့း, ယဖိခွါသးဘိအအိၣ်, မ်ပၢ်ကစၢ်ယွၤဒီးပကစၢ်ယ့ၣ်ၡူးခရံာ်ဟ့ၣ်လီၤနၤတၢ်ဘျုး တၢ်ဖှိၣ်, တၢ်သးကညီၤဒီးတၢ်ဃူတၢ်ဖိးတက့ၢ်.

³ယစံးဘျုးကစၢ်ယွၤလၢယမၤအတၢ်လၢသးလၢအသ့ၣ်ညါ ဒၣ်တၢ်အဂ့ၤတီတီအပူၤ, ဒ်ယမိၢ်ပၢ်ဖံဖုလၢပျၢၤတဖၣ်မၤတ့ၢ်ဝဲ အသိးန့ၣ်လီၤ. ယစံးဘျုးအီၤဖဲယသ့ၣ်နီၣ်ထီၣ်နၤထီဘိလၢ ယတၢ်ထုကဖၣ်အပူၤ, လၢမုၢ်ဆါဆဲးလၢမုၢ်နၤန့ၣ်လီၤ.

⁴ယသ့ၣ်နီၣ်ထီၣ်က့ၤနမဲာ်ထံမဲာ်နိတဖၣ်, ဒီးယသးအိၣ်ထံၣ် ဘၣ်နၤဒိၣ်မးဒ်သိးယကလၢပှဲၤဒီးတၢ်သးခုအဂီၢ်န့ၣ်လီၤ.

⁵ယသ့ၣ်နီၣ်ထီၣ်တၢ်စူၢ်တၢ်နာ်တံၢ်နီၢ်လၢအအိၣ် လၢနပူၤ, တၢ်စူၢ်တၢ်နာ်တကလုာ်လၢအအိၣ်တ့ၢ်လၢနဖံနီၢ် လိၤအ့ၣ်ဒီးနမိၢ်နီၢ်အူၤနံက့ၤအပူၤန့ၣ်လီၤ. ဒီးယနာ်နီၢ်နီၢ်လၢအအိၣ်စ့ၢ်ကီးလၢနပူၤန့ၣ်လီၤ.

⁶လၢတၢ်ဂ့ၢ်အံၤအဃိ, ယဒုးသ့ၣ်နီၣ်ထီၣ်နၤလၢနကထိၣ် ဂဲၤထီၣ်တၢ်ဟ့ၣ်လၢကစၢ်ယွၤဟ့ၣ်လီၤတ့ၢ်နၤ, ဖဲယပာ်ယစုလၢနလိၤအခါန့ၣ်လီၤ.

⁷အဂ့ၢ်ဒ်လဲၣ်န့ၣ်, သးလၢကစၢ်ယွၤဟ့ၣ်လီၤတ့ၢ်ပှၤန့ၣ်တဒုး ကဲထီၣ်ပှၤလၢ, ပှၤလၢအပျံၤတၢ်ဘၣ်. မ့မ့ၢ်ယွၤအသးမၤပှဲၤ ပသးဒီးတၢ်စိတၢ်ကမီၤ, တၢ်အဲၣ်တၢ်ကွံ, ဒီးတၢ်ပၢၤသူၣ်ပၢၤသးန့ၣ်လီၤ.

⁸လၢတၢ်န့ၣ်အဃိ, တဘၣ်မဲာ်ဆှးလၢနကအုၣ်နသးလၢပကစၢ် အဂီၢ်တဂ့ၤ, ဒီးတဘၣ်မဲာ်ဆှးစ့ၢ်ကီးလၢယမ့ၢ်ပှၤဘၣ်တၢ်စၢ ဃာ်လၢခရံာ်အဃိတဂ့ၤ. မ့မ့ၢ်ဒိးဃုာ်တၢ်နးတၢ်ဖှီၣ်ဒီးယၤလၢတၢ်သးခုကစီၣ် အဂီၢ်, ဒ်ကစၢ်ယွၤဟ့ၣ်နၤတၢ်ဂံၢ်တၢ်ဘါလၢနကမၤအီၤအဂီၢ် အသိးန့ၣ်တက့ၢ်.

⁹အဝဲဒၣ်အုၣ်က့ၤခီၣ်က့ၤပှၤဒီးကိးထီၣ်ပှၤဒ်သိးပကမ့ၢ် အတၢ်ဒၣ်ဝဲ, တမ့ၢ်လၢတၢ်ဖံးတၢ်မၤလၢပမၤတ့ၢ်လံတဖၣ် အဃိဘၣ်. မ့မ့ၢ်, မ့ၢ်လၢအတၢ်တိာ်ဒီးအဘျုးအဖှိၣ်ဒၣ်ဝဲ အဃိန့ၣ်လီၤ. အဝဲဒၣ်ဟ့ၣ်လီၤပှၤတၢ်ဘျုးတၢ်ဖှိၣ်အံၤခီဖျိ ယ့ၣ်ၡူးခရံာ်, တချုးလၢဟီၣ်ခိၣ်ဘၣ်တၢ်တ့လီၤအီၤဒံးဒၣ် လဲာ်န့ၣ်လီၤ.

¹⁰ဘၣ်ဆၣ်ဒီးခဲကနံၣ်အံၤတၢ်ဘျုးတၢ်ဖှိၣ်အံၤဘၣ်တၢ်လီၣ် ဖျါထီၣ်န့ၢ်ပှၤခီဖျိပပှၤအုၣ်က့ၤခီၣ်က့ၤတၢ်, ယ့ၣ်ၡူးခရံာ် အတၢ်ဟဲန့ၣ်လီၤ. အဝဲဒၣ်မၤကတၢၢ်ကွံာ်တၢ်သံအစိကမီၤ ဒီးခီဖျိတၢ်သးခုကစီၣ်န့ၣ်, လီၣ်ဖျါထီၣ်တ့ၢ်တၢ်အိၣ်မူလၢ အသံတသ့ဘၣ်န့ၣ်လီၤ.

¹¹ကစၢ်ယွၤဃုထၢထီၣ်တ့ၢ်လံယၤဒ်ပှၤတၢ်မၢဖိဒီးသရၣ်သိၣ် လိတၢ်လၢယကစံၣ်တဲၤတဲလီၤတၢ်သးခုကစီၣ်အဂီၢ်,

¹²ဒီးလၢတၢ်န့ၣ်အဃိယတူၢ်ဘၣ်တၢ်သ့ၣ်တဖၣ်အံၤလီၤ. ဘၣ်ဆၣ်ဒီးယမဲာ်တဆှးဘၣ်. အဂ့ၢ်ဒ်အံၤ, ယသ့ၣ်ညါ ပှၤလၢယစူၢ်က့ၤနာ်က့ၤအီၤ, ဒီးယနာ်လၢတၢ်လၢတၢ်ဟ့ၣ်လီၤအးလီၤလၢယစုပူၤန့ၣ်, အဝဲကပၢၤဃာ်ကီၤဃာ်ဝဲတုၤမုၢ်နံၤခံကတၢၢ်န့ၣ်လီၤ.

¹³ဟံးဃာ်ဂၢၢ်ကျၢၤတၢ်ကတိၤအမ့ၢ်အတီတဖၣ်လၢယသိၣ် လိတ့ၢ်နၤ, ဒ်အမ့ၢ်တၢ်ဒိတၢ်တဲာ်လၢနကပိာ်ထွဲအီၤအဂီၢ်, ဒီးအိၣ်ဂၢၢ်ဆိးကျၢၤလၢတၢ်စူၢ်တၢ်နာ်ဒီးတၢ်အဲၣ်တၢ်ကွံ လၢအမ့ၢ်ပတၢ်လၢယ့ၣ်ၡူးခရံာ်အပူၤန့ၣ်တက့ၢ်.

¹⁴ခီဖျိသးစီဆှံအစိကမီၤလၢအအိၣ်မူလၢပပူၤန့ၣ်, ဟံးဃာ်တၢ်လုၢ်ဒိၣ်ပှ့ၤဒိၣ်တဖၣ်လၢအဘၣ်တၢ်ဟ့ၣ်လီၤအး လီၤတ့ၢ်လၢနစုပူၤန့ၣ်တက့ၢ်.

¹⁵နသ့ၣ်ညါလၢပှၤကိးဂၤဒဲးလၢကီၢ်အၤစံအပူၤ, ဃုာ်ဒီးစီၤဖူက့းလူးဒီးစီၤအ့းရံမိက့းန့ၤတဖၣ်ဟး သဒၣ်ကွံာ်ယၤလံန့ၣ်လီၤ.

¹⁶မ်ကစၢ်သူၣ်ကညီၤသးကညီၤစီၤအီးနံၤစံဖရူးအဟံၣ်ဖိဃီ ဖိတက့ၢ်. အဂ့ၢ်မ့ၢ်လၢအဝဲဒၣ်မၤမုာ်ထီၣ်ယၤအါဘျီအဃိ လီၤ. အဝဲတမဲာ်ဆှးလၢယအိၣ်ဘၣ်လၢဃိာ်ပူၤအဃိဘၣ်.

¹⁷မ့မ့ၢ်, တုၤအဟဲတုၤလၢဝ့ၢ်ရိမ့ၤတဘျီဃီစးထီၣ်ဃုယၤ တုၤအထံၣ်ယၤတစုန့ၣ်လီၤ.

¹⁸မ်ကစၢ်ပျဲအဒိးန့ၢ်ဘၣ်အတၢ်သူၣ်ကညီၤသးကညီၤ လၢမုၢ်နံၤခံကတၢၢ်န့ၣ်တက့ၢ်. အဝဲမၤတ့ၢ်တၢ်လၢယဂီၢ်ဖဲဝ့ၢ်အ့းဖ့းစူးအပူၤထဲလဲၣ်န့ၣ်, နသ့ၣ်ညါဂ့ၤဂ့ၤကစီဒီန့ၣ်လီၤ.