Read S'gaw Karen ၂ တံၤမသ့း 4 Bible Online

၂ တံၤမသ့း 4 - S'gaw Karen bible

၂ တံၤမသ့း 4

¹လၢကစၢ်ယွၤဒီးယ့ၣ်ၡူးခရံာ်လၢအကစံၣ်ညီၣ်ပှၤအမူဒီးပှၤအသံ တဂၤအမဲာ်ညါ, ဒီးမ့ၢ်လၢအဝဲကဟဲပၢတၢ်ဒ်စီၤပၤတဂၤအသိးအဃိ, ယမၤလိာ်နၤလၢတၢ်သညူးသပှၢ်အပူၤ,

²လၢနကစံၣ်တဲၤတဲလီၤတၢ်သးခုကစီၣ်ဒီးဂုာ်လိာ်တဲဖျါထီၣ်အီၤ (တၢ်ဆၢကတီၢ်ဘၣ်မ့ၢ်ဂ့ၤ, တဘၣ်မ့ၢ်ဂ့ၤ) ဒီးဒုးနာ်ပှၤ, သိၣ်ဃီၣ်ဒီးဟ့ၣ်ဂံၢ်ဟ့ၣ်ဘါပှၤ, အိၣ်ဒီးတၢ်သးစူၤဖဲနသိၣ်လိတၢ်အခါန့ၣ်လီၤ.

³တၢ်ဆၢကတီၢ်ကဟဲဝဲဖဲပှၤတဒိကနၣ်လၢၤတၢ်သိၣ်လိသီလိလၢအမ့ၢ် အတီဘၣ်, မ့မ့ၢ်ကပိာ်ထွဲတၢ်သူၣ်လီသးကွံတဖၣ်အခံဒီးကပာ်ဖှိၣ်သရၣ် တဖၣ်အါထီၣ်အါထီၣ်လၢ အဝဲသ့ၣ်အကစၢ်ဒၣ်ဝဲအဂီၢ်, လၢအကစံးဘၣ်တဲဘၣ်အီၤတၢ်လၢအဝဲသ့ၣ်ဘၣ်အသး ဒီးသးအိၣ်နၢ်ဟူဝဲတဖၣ်န့ၣ်လီၤ.

⁴အဝဲသ့ၣ်ကဃၣ်ကွံာ်အသးလၢတၢ်ဒိကနၣ်တၢ်မ့ၢ်တၢ်တီဒီးအသးကစၢၢ် ဆၢလၢပူတဖၣ်လၢပှၤကညီဒုးကဲထီၣ်အီၤန့ၣ်လီၤ.

⁵မ့မ့ၢ်နဲဒၣ်အံၤ, ပၢၤနသးလၢတၢ်မၤအသးကိးမံၤဒဲးအပူၤတက့ၢ်. တူၢ်တၢ်နးတၢ်ဖှီၣ်, မၤပှၤစံၣ်တဲၤတဲလီၤတၢ်သးခုအကစီၣ်အတၢ် မၤဒီးမၤနမူနဒါခဲလၢာ် ဒ်ကစၢ်ယွၤအခ့အပှၤတဂၤအသိးတက့ၢ်.

⁶မ့မ့ၢ်ယဲတခီ, နၣ်ရံၣ်တုၤဃီၤဝဲလၢယကဘၣ်တၢ်လုၢ်ထီၣ်ယၤအဂီၢ်လံ. တၢ်ဆၢကတီၢ်ဟဲတုၤအိၣ်ယၤလၢယကပာ်တ့ၢ်တၢ်အိၣ်မူအံၤန့ၣ်လံ.

⁷တၢ်ဒုးလၢအဂ့ၤန့ၣ်ယဒုးလံ, တၢ်ဃ့ၢ်န့ၣ်ယဃ့ၢ်လံ, ယပၢၤဃာ်တၢ်နာ်န့ၣ်လံ.

⁸ဒီးခဲကနံၣ်အံၤ, တၢ်မၤနၢၤအခိၣ်ဖးလၢအမ့ၢ်တၢ်မၤဘၣ်လိာ်က့ၤယၤဒီးကစၢ်ယွၤ န့ၣ် အိၣ်ခိးပာ်စၢၤယၤလံ. မ့ၢ်ခိၣ်ဖးလၢကစၢ်, ပှၤစံၣ်ညီၣ်တီတၢ်တဂၤကဟ့ၣ်လီၤယၤလၢမုၢ်နံၤအဝဲန့ၣ်, ဒီးထဲယၤတဂၤဧိၤတမ့ၢ်ဘၣ်, မ့ၢ်ကယဲၢ်ပှၤခဲလၢာ်လၢအအိၣ်ခိးကွၢ်လၢ် အဝဲကအိၣ်ဖျါထီၣ်အဂီၢ်စ့ၢ်ကီးန့ၣ်လီၤ.

⁹ဂုာ်ကျဲးစၢးဟဲဆူယအိၣ်ချ့ချ့တက့ၢ်. စီၤဒ့မၤအဲၣ်တၢ်လၢအဘၣ်ဃးဒီးဟီၣ်ခိၣ်အံၤသတးဒီးဟးသဒၣ် ကွံာ်ယၤ ဒီးလဲၤဆူဝ့ၢ်သ့းစၤလနံလံ. စီၤကြံစကံၣ်လဲၤဆူကီၢ်ကလၤတံ ဒီးစီၤတံတူးဆူကီၢ်ဒၤလမါတံၤန့ၣ်လီၤ.

¹¹ပှၤအိၣ်ဒီးယၤထဲစီၤလူၤကၣ်တဂၤဧိၤန့ၣ်လီၤ. ကိးန့ၢ်စီၤမၢ်ကူးဒီးမၢအဟဲဒီးနၤတက့ၢ်. အဂ့ၢ်ဒ်အံၤ, အဝဲမၤစၢၤယၤလၢတၢ်မၤအပူၤသ့ဒီးကဲဘျုးလၢယဂီၢ်ဒိၣ်မး န့ၣ်လီၤ.

¹²ယမၢလီၤစီၤတူဃံၤကူးဆူဝ့ၢ်အ့းဖ့းစူးလီၤ. နမ့ၢ်ဟဲဒီး, ဟဲစိာ်ယဆ့ကၤဖးဒိၣ်လၢ ယပာ်တီၢ်ဖဲဝ့ၢ်တြိၤအါလၢစီၤကၢ်ပူးအအိၣ်န့ၣ်တက့ၢ်. ဟဲစိာ်ဃုာ်လံာ်အထူတဖၣ်, လီၤဆီဒၣ်တၢ်လံာ်တၢ်ဖံးတဖၣ် န့ၣ်တက့ၢ်.

¹⁴ပှၤပိာ်တိၢ်ပိာ်ထးစီၤအလ့းစၣ်ဒြူးတဂၤမၤအၢယၤဒိၣ်မးလီၤ. ကစၢ်ကဟ့ၣ်ကၣ်အီၤဒ်အမၤတ့ၢ်တၢ်အသိးန့ၣ်လီၤ.

¹⁵နကစၢ်ဒၣ်နဲပလီၢ်နသးလၢအီၤစ့ၢ်ကီးတက့ၢ်. အဂ့ၢ်ဒ်လဲၣ်န့ၣ်, အဝဲထီဒါပတၢ်သးခုကစီၣ်ဆူၣ်ဆူၣ်ကလဲာ်လီၤ.

¹⁶ဖဲယကတိၤဒီဒၣ်ယသးအဆိကတၢၢ်တဘျီန့ၣ်, ပှၤတဆၢထၢၣ်ဃုာ်ဒီးယၤနီတဂၤဘၣ်. ပှၤဟးသဒၣ်ကွံာ်ယၤခဲလၢာ်လီၤ. မ်ကစၢ်ယွၤအသုတပာ်တၢ်ကမၣ်လၢအဝဲသ့ၣ်အလိၤတဂ့ၤ.

¹⁷ဘၣ်ဆၣ်ဒီးကစၢ်အိၣ်ဒီးယၤဒီးဟ့ၣ်ယၤတၢ်ဂံၢ်တၢ်ဘါဒီးယတဲဖျါ ထီၣ်ဘၣ်တၢ်သးခုကစီၣ်အလၢအပှဲၤလၢပှၤကလုာ်ဂၤတဖၣ်ကနၢ်ဟူဘၣ် ဝဲအဂီၢ်န့ၣ်လီၤ. ဒီးယထူၣ်ဖျဲးထီၣ်ကွံာ်လၢတၢ်သံအကိာ်ပူၤန့ၣ်လီၤ.

¹⁸ဒီးကစၢ်ကမၤပူၤဖျဲးယၤလၢတၢ်အၢတၢ်သီခဲလၢာ်ဒီးကဟံးန့ၢ် ဒီးဆှၢယၤပူၤပူၤဖျဲးဖျဲး ဆူအမူခိၣ်ဘီမုၢ်အပူၤလီၤ. မ်တၢ်လၤကပီၤဘၣ်အီၤအစိၤစိၤအဃၣ်ဃၣ်န့ၣ်တက့ၢ်. အၤမ့ၣ်.

¹⁹ယဆှၢတၢ်ဆၢဂ့ၤဆၢဝါတဖၣ်ဆူနီၢ်ပြံစကံးလၤဒီးစီၤအကူလၤ ဒီးစီၤအီးနံၤစံဖရူးအဒူၣ်ဖိထၢဖိအအိၣ်လီၤ.

²⁰စီၤအ့ၤရၤစတူးအိၣ်တ့ၢ်ဝဲဖဲဝ့ၢ်ကရံၣ်သူး, ဒီးယပာ်တီၢ်စီၤတြီးဖံၤမူးလၢဝ့ၢ်မံလ့ၤတူးအပူၤ, မ့ၢ်လၢအဝဲဆိးက့အဃိလီၤ.

²¹ဂုာ်ကျဲးစၢးဒ်သိးနကဟဲတချုးလၢတၢ်ဂိၢ်ခါအကတီၢ်တုၤဒံးဘၣ် န့ၣ်တက့ၢ်. စီၤအူၤဘူလူး, စီၤပူဒံၣ်, စီၤလံနူးဒီးနီၢ်ကျီၢ်ဒံဆှၢ ဃီၤအတၢ်ဆၢဂ့ၤဆၢဝါတဖၣ်, ဒီးဒ်န့ၣ်အသိးဒီပုၢ်ဝဲၢ်ခရံာ်ဖိအဂၤတဖၣ်စ့ၢ်ကီးဆှၢဃုာ် အတၢ်ဆၢဂ့ၤဆၢဝါတဖၣ်န့ၣ်လီၤ.

²²မ်ကစၢ်အိၣ်ဒီးနသးတက့ၢ်. မ်ယွၤအဘျုးအဖှိၣ်အိၣ်ဒီးသုခဲလၢာ်တက့ၢ်.