Read S'gaw Karen ဧ့ၤဘြံၤ 13 Bible Online

ဧ့ၤဘြံၤ 13 - S'gaw Karen bible

ဧ့ၤဘြံၤ 13

¹တၢ်အဲၣ်ပုၢ်အဲၣ်ဝဲၢ်န့ၣ် မ်အအိၣ်တဘိယူၢ်ဃီတက့ၢ်.

²တဘၣ်သးပ့ၤနီၣ်တူၢ်တံၢ်တူၢ်သမှံၤတဂ့ၤ. အဂ့ၢ်ဒ်အံၤပှၤတနီၤနီၤလၢတၢ်တပာ်သူၣ်ပာ်သးဘၣ်အပူၤ တူၢ်လိာ်ဘၣ်ကလူးတဖၣ်လီၤ.

³သ့ၣ်နီၣ်ထီၣ်ပှၤလၢအအိၣ်လၢဃိာ်ပူၤတဖၣ်တုၤဒၣ်လဲာ်တၢ် ကမၤအသးဒီးသုဒ်သုလီၤဘၣ်ဃိာ်ဒီးအဝဲသ့ၣ်အသိးန့ၣ် တက့ၢ်. သ့ၣ်နီၣ်ထီၣ်ပှၤလၢအဘၣ်တၢ်မၤအၢမၤနးအီၤတဖၣ် ဒ်သုတူၢ်ဘၣ်တၢ်ဒ်သိးအဝဲသ့ၣ်န့ၣ်တက့ၢ်.

⁴မ်တၢ်န့ၢ်မါန့ၢ်ဝၤဒီးလီၢ်မံတဘၣ်အၢဘၣ်န့ၣ်, အိၣ်ဒီးအလၤကပီၤလၢပှၤခဲလၢာ်အကျါတက့ၢ်. အဂ့ၢ်ဒ်အံၤ, ကစၢ်ယွၤကစံၣ်ညီၣ်ပှၤလၢအမၤကမၣ်ပိာ်မုၣ် ပိာ်မၢၤဒီးပှၤလၢအအဲၣ်ဘၢတၢ်န့ၣ်လီၤ.

⁵လၢတၢ်အိၣ်မူအပူၤန့ၣ်အိၣ်သဘျ့ဒီးတၢ်အဲၣ်ကျိၣ်အဲၣ်စ့တ က့ၢ်. သးမံနဲဒီးတၢ်လၢအအိၣ်ဒီးနၤတက့ၢ်. အဂ့ၢ်ဒ်အံၤ အဝဲဒၣ်စံးတ့ၢ်လံဝဲ, “ယတညိကွံာ်ဘၣ်နၤဘၣ် ယတလဲၤ သဒၣ်ဘၣ်နၤဘၣ်.”

⁶လၢတၢ်အံၤအဃိပစံးပဝဲလၢတၢ်သးခူတလ့ၣ်အပူၤသ့ဝဲလၢ, “ကစၢ်မ့ၢ်ပှၤလၢအမၤစၢၤယၤ ယတပျံၤဘၣ်တၢ်ဘၣ်. ပှၤဟီၣ်ခိၣ်ဖိမၤယၤကသ့မနုၤတမံၤလဲၣ်.”

⁷သ့ၣ်နီၣ်ထီၣ်သုခိၣ်သုနၢ်လၢအစံးဘၣ်တဲဘၣ်သုလၢကစၢ်ယွၤ အကလုၢ်ကထါန့ၣ်တက့ၢ်. ကွၢ်ထံအဝဲသ့ၣ်အတၢ်ကျဲးစၢးအကတၢၢ်ဒီးမၤထွဲအတၢ်နာ် အခံန့ၣ်တက့ၢ်.

⁸မဟါဒီးမဆါအံၤဒီးအစိၤစိၤအဃၣ်ဃၣ်န့ၣ်, ယ့ၣ်ၡူးခရံာ်မ့ၢ်တၢ်ဒ် လီၢ်လီၢ်လီၤ.

⁹တဘၣ်ပျဲတၢ်သိၣ်လိအကလုာ်ကလုာ်ဒီးအလီၤတိၢ်လီၤဆီ တဖၣ်ထုးဝ့ၤဝီၤသုတဂ့ၤ. အဂ့ၢ်ဒ်အံၤ, ဂ့ၤဝဲလၢပဒိးန့ၢ်တၢ်ဂံၢ်တၢ်ဘါဘၣ်ဃးဒီးသူၣ်ဒီးသးလၢ ကစၢ်ယွၤအဘျုးအဖှိၣ်ဒီးတမ့ၢ်ဘၣ်လၢတၢ်အီၣ်တၢ်အီ အတၢ်သိၣ်တၢ်ဘျၢန့ၣ်ဘၣ်. အဂ့ၢ်မ့ၢ်လၢပှၤလၢစူၢ်တၢ်ဘျၢ တဖၣ်အံၤန့ၣ်, တန့ၢ်ဘျုးန့ၢ်ဖှိၣ်ဘၣ်ဝဲဘၣ်.

¹⁰ပှၤလုၢ်တၢ်အခိၣ်တဖၣ်လၢအမၤတၢ်လၢပှၤယူဒၤဖိအတၢ် ဘူၣ်တၢ်ဘါအလီၢ်န့ၣ်, တအိၣ်ဘၣ်ဒီးတၢ်အခွဲးအယာ်လၢအကအီၣ်တၢ်လၢပပာ်ထီၣ် ဝဲလၢပတၢ်လုၢ်လီၢ်အဖီခိၣ်န့ၣ်ဘၣ်.

¹¹အဂ့ၢ်ဒ်အံၤ, ဆၣ်ဖိကီၢ်ဖိ, လၢအသွံၣ်ဘၣ်တၢ်စိာ်နုာ်အီၤဆူတၢ်လီၢ်စီဆှံကတၢၢ်အပူၤ လၢပှၤလုၢ်တၢ်အခိၣ်အဒိၣ်ကတၢၢ်ဒ်တၢ်လုၢ်လၢတၢ်ဒဲးဘးအဂီၢ် အသိးန့ၣ်, ဘၣ်တၢ်ဆူးကဲၤထီၣ်အီၤလၢဒဲအချၢလီၤ.

¹²လၢတၢ်န့ၣ်အဃိ, ယ့ၣ်ၡူးဒိးသံစ့ၢ်ကီးအသးလၢဝ့ၢ် အချၢဒ်သိးဒီးကမၤကဆှီထီၣ်အပှၤဂီၢ်မုၢ်ခီဖျိအသွံၣ်ဒၣ် ဝဲန့ၣ်လီၤ.

¹³လၢတၢ်န့ၣ်အဃိ, မ်ပလဲၤသကိးဆူဒဲအချၢဒီးတူၢ်သကိးဃုာ်တၢ် ဒုၣ်ဒွဲၣ်ဒီးအီၤန့ၣ်တက့ၢ်.

¹⁴အဂ့ၢ်ဒ်လဲၣ်န့ၣ်, လၢဟီၣ်ခိၣ်အံၤဝ့ၢ်လၢအအိၣ်လီၤထူလီၤယိာ်လၢပဂီၢ် တအိၣ်ဘၣ်. မ့မ့ၢ်ပဃုဝ့ၢ်လၢအကဟဲအိၣ်ထီၣ်ဆူညါတဖျၢၣ်န့ၣ်လီၤ.

¹⁵ခီဖျိအဝဲဒၣ်န့ၣ်, မ်ပလုၢ်ထီၣ်သကိးပတၢ်စံးထီၣ်ပတြၢၤကစၢ်ယွၤ တဘိယူၢ်ဃီလၢအမ့ၢ်ပထးခိၣ်အတၢ်အၢၣ်လီၤအီလီၤယ့ၣ်ၡူးခရံာ် အမံၤန့ၣ်တက့ၢ်.

¹⁶တဘၣ်သးပ့ၤနီၣ်မၤဂ့ၤတၢ်ဒီးဟ့ၣ်နီၤတၢ်ဒီးပှၤဂၤတဂ့ၤ. အဂ့ၢ်ဒ်အံၤတၢ်လုၢ်ဒ်န့ၣ်တဖၣ်န့ၣ်ဘၣ်ကစၢ်ယွၤအသး လီၤ.

¹⁷စူၢ်သုခိၣ်သုနၢ်တဖၣ်အကလုၢ်ဒီးဆီၣ်လီၤသုသးလၢ အဝဲသ့ၣ်အဖီလာ်တက့ၢ်. အဂ့ၢ်ဒ်အံၤ, ဒ်ပှၤလၢအကဘၣ်ဟ့ၣ်ထီၣ်တၢ်စံးဆၢအသိး န့ၣ်အဝဲသ့ၣ်ဆိးသီဝဲလၢသုသးသမူအဂီၢ်လီၤ. သုမ့ၢ်စူၢ်အဝဲသ့ၣ်အကလုၢ်ဒီး, ကမၤဝဲအတၢ်မၤလၢတၢ်သူၣ်ခု သးခုအပူၤလီၤ. မ့တမ့ၢ်ဘၣ်ဒီးကမၤဝဲလၢတၢ်သူၣ်အုးသးအုး အပူၤ, ဒီးတၢ်န့ၣ်တကဲထီၣ်တၢ်မၤစၢၤလၢသုဂီၢ်ဘၣ်လီၤ.

¹⁸ဘါထုကဖၣ်တၢ်လၢပဂီၢ်တဘိယူၢ်ဃီတက့ၢ်. ပနာ်လၢပအိၣ်ဒီးသးလၢအသ့ၣ်ညါတၢ်လၢအတီ လၢအအဲၣ်ဒိးမၤတၢ်လၢအဂ့ၤအဘၣ်ဝဲကိးဆၢကိး ကတီၢ်လီၤ.

¹⁹ဒီးယသးအိၣ်ဃ့ကညးသုသပှၢ်ပှၢ်, လၢသုကဃ့ဘါထုကဖၣ်ကစၢ်ယွၤဒ်သိးအကဆှၢက့ၤယၤဆူ သုအိၣ်လၢအချ့န့ၣ်လီၤ.

²⁰ကစၢ်ယွၤဒုးဂဲၤထၢၣ်သမူထီၣ်က့ၤကစၢ်ယ့ၣ်ၡူးလၢအမ့ၢ် ပှၤကွၢ်သိဖးဒိၣ်လၢအတူၢ်သံအသးလၢအသိတဖၣ်အဂီၢ် ဒီးခီဖျိတၢ်အံၤန့ၣ်, တၢ်အၢၣ်လီၤအီလီၤအထူအယိာ်ဘၣ်တၢ်ဃံၤဃာ်အီၤန့ၣ်လီၤ.

²¹မ်တၢ်ဃူတၢ်ဖိးအကစၢ်ယွၤမၤလၢမၤပှဲၤသုလၢတၢ် အဂ့ၤခဲလၢာ်လၢသုလိၣ်ဘၣ်အီၤ, ဒ်သိးသုကမၤအတၢ်ဘၣ် အသး, ဒီးခီဖျိယ့ၣ်ၡူးခရံာ်န့ၣ်, မ်အဝဲမၤအတၢ်ဘၣ်အသး လၢပပူၤန့ၣ်တက့ၢ်. မ်ခရံာ်ဒိးဘၣ်တၢ်လၤကပီၤအစိၤစိၤ အဃၣ်ဃၣ်တက့ၢ်. အၤမ့ၣ်.

²²ဒီပုၢ်ဝဲၢ်သ့ၣ်ဧၢ, ယဃ့ကညးသုလၢသုကဒိကနၣ်တၢ်ဟ့ၣ်ဂံၢ်ဟ့ၣ်ဘါသု အတၢ်ကတိၤအံၤလၢတၢ်သးစူၤအပူၤ, အဂ့ၢ်မ့ၢ်လၢအတထီကဲၣ်ဆိးဘၣ်အဃိန့ၣ်လီၤ.

²³ယအဲၣ်ဒိးသုသ့ၣ်ညါလၢပဒီပုၢ်ဝဲၢ်စီၤတံၤမသ့းဘၣ်တၢ် ပျၢ်ပူၤဖျဲးအီၤလၢဃိာ်ပူၤလံ. အဝဲမ့ၢ်ဟဲဆိဆိဒီးအဝဲကအိၣ်ဒီးယၤဖဲယထံၣ်သုအဆၢ ကတီၢ်န့ၣ်လီၤ.

²⁴ဆှၢဘၣ်ပတၢ်ဆၢဂ့ၤဆၢဝါတဖၣ်ဆူသုခိၣ်သုနၢ်ခဲလၢာ် ဒီးဆူကစၢ်ယွၤအပှၤဂီၢ်မုၢ်ခဲလၢာ်အအိၣ်တက့ၢ်. သုဒီပုၢ်ဝဲၢ်လၢကီၢ်အံၤတလံတဖၣ်ဆှၢလီၤအတၢ်ဆၢဂ့ၤ ဆၢဝါတဖၣ်န့ၣ်လီၤ.

²⁵မ်ကစၢ်ယွၤအဘျုးအဖှိၣ်အိၣ်ဒီးသုခဲလၢာ်တက့ၢ်. အၤမ့ၣ်.