Read S'gaw Karen ဧ့ၤဘြံၤ 4 Bible Online

ဧ့ၤဘြံၤ 4 - S'gaw Karen bible

ဧ့ၤဘြံၤ 4

¹လၢတၢ်န့ၣ်အဃိဖဲကစၢ်ယွၤအတၢ်စံးပာ်ဘၣ်ဃးဒီးတၢ်လဲၤ နုာ်ဆူအတၢ်အိၣ်ဘှံးအပူၤအိၣ်ဒံးဝဲလၢပဂီၢ်အဖၢမုၢ်အံၤ, မ်ပကပလီၢ်ပသးဒ်သိးပသုတဘၣ်တၢ်ထံၣ်န့ၢ်ပှၤလၢပလီၤ တိၢ်ကွံာ်လၢတၢ်ဒိးန့ၢ်ဘၣ်တၢ်အိၣ်ဘှံးအဝဲန့ၣ်နီတဂၤတဂ့ၤ အဂီၢ်န့ၣ်တက့ၢ်.

²အဂ့ၢ်ဒ်အံၤပဒိးန့ၢ်လံတၢ်သးခုကစီၣ်ဒ်အဝဲသ့ၣ်အသိးလီၤ. ဘၣ်ဆၣ်ဒီးတၢ်အကစီၣ်လၢအဝဲသ့ၣ်နၢ်ဟူဝဲန့ၣ်တကဲဘျုးလၢ အဝဲသ့ၣ်အဂီၢ်ဘၣ်. အဂ့ၢ်မ့ၢ်လၢအဝဲသ့ၣ်တတူၢ်လိာ်ဘၣ်ဝဲလၢတၢ်နာ်အပူၤ အဃိန့ၣ်လီၤ.

³လၢတၢ်အံၤအဃိပဝဲလၢအအိၣ်ဒီးတၢ်နာ်တဖၣ်ကဒိးန့ၢ်ဘၣ်တၢ် အိၣ်ဘှံးလၢကစၢ်ယွၤစံးပာ်တ့ၢ်လံဝဲန့ၣ်လီၤ. တၢ်မၤအသးဒ် အစံးတ့ၢ်ဝဲအသိး, “ယသးဒိၣ်ထီၣ်ဒီးဆိၣ်လီၤယသးသပှၢ်ကတၢၢ်လၢ, ‘အဝဲသ့ၣ်တလဲၤနုာ်ဘၣ်ဆူယတၢ်အိၣ်ဘှံးအပူၤလ့ၤတက့ၤဘၣ် န့ၣ်လီၤ.’ ” တၢ်ဖံးတၢ်မၤဝံၤတ့ၢ်လံဝဲလၢအတ့လီၤဟီၣ်ခိၣ်အကတီၢ်လံၤလံၤ သနာ်က့စံးတ့ၢ်ဝဲတၢ်အံၤလီၤ.

⁴အဂ့ၢ်ဒ်အံၤတၢ်ကွဲးအသးစီဆှံအိၣ်ဝဲတတီၤလၢအကတိၤ တၢ်ဘၣ်ဃးဒီးမုၢ်နွံနံၤတနံၤဒ်အံၤ, “ကစၢ်ယွၤအိၣ်ဘှံးတ့ၢ်ဝဲလၢမုၢ်နွံနံၤတနံၤလၢအတၢ်ဖံးတၢ် မၤခဲလၢာ်န့ၣ်လီၤ.”

⁵တၢ်ဂ့ၢ်တမံၤဃီအံၤဘၣ်တၢ်စံးတ့ၢ်ကဒီးလၢအဂ့ၢ်, “အဝဲသ့ၣ်တလဲၤနုာ်ဘၣ်ဆူကီၢ်ဖဲယကဟ့ၣ်တ့ၢ်အဝဲသ့ၣ် လၢတၢ်အိၣ်ဘှံးန့ၣ်အပူၤနီတခီၣ်ဘၣ်.”

⁶ပှၤလၢအနၢ်ဟူဆိတၢ်သးခုအကစီၣ်တဖၣ်န့ၣ်တဒိးန့ၢ်ဘၣ်တၢ် အိၣ်ဘှံးန့ၣ်ဘၣ်. အဂ့ၢ်မ့ၢ်လၢအတစူၢ်တနာ်တၢ်အဃိလီၤ. ပှၤအိၣ်ဒံးဝဲတနီၤလၢအဘၣ်တၢ်ဒုးနုာ်အီၤဆူတၢ်အိၣ်ဘှံး အံၤအပူၤလီၤ.

⁷တၢ်အံၤအိၣ်ဖျါထီၣ်ခီဖျိကစၢ်ယွၤဃုထၢပာ်လီၤမုၢ်နံၤလီၤ ဆီလၢအဘၣ်တၢ်ကိးအီၤလၢ “မုၢ်တနံၤအံၤ” န့ၣ်လီၤ. အါနံၣ်အါလါဝံၤအလီၢ်ခံတၢ်ကတိၤလၢအဘၣ်တၢ်ယၢၤထီၣ် တ့ၢ်လံအံၤဘၣ်တၢ်စံးကတိၤအီၤခီဖျိစီၤဒၤဝံး, “တၢ်တနံၤအံၤဖဲသုနၢ်ဟူအကလုၢ်ဒီး မၤကိၤသုခိၣ်တဂ့ၤ.”

⁸စီၤယိၤၡူမ့ၢ်ဟ့ၣ်တ့ၢ်လံအဝဲသ့ၣ်လၢတၢ်အိၣ်ဘှံးလၢ ကစၢ်ယွၤစံးပာ်တ့ၢ်လၢအဂ့ၢ်ဒီး, တမ့ၢ်လၢကစၢ်ယွၤကစံးကဒီးဘၣ်ထွဲဒီးမုၢ်နံၤအဂၤတနံၤ အဂ့ၢ်လၢၤဘၣ်လီၤ.

⁹လၢတၢ်အံၤအဃိ, တၢ်အိၣ်ဘှံးဒ်လၢကစၢ်ယွၤအတၢ်အိၣ် ဘှံးလၢမုၢ်နွံနံၤတနံၤန့ၣ်, အိၣ်ဒံးဝဲလၢကစၢ်ယွၤအပှၤဂီၢ်မုၢ် အဂီၢ်လီၤ.

¹⁰အဂ့ၢ်ဒ်အံၤ, ပှၤတဂၤလၢ်လၢ်လၢအဒိးန့ၢ်ဘၣ်တၢ်အိၣ်ဘှံးလၢ ကစၢ်ယွၤစံးပာ်န့ၣ်ကဆိကတီၢ်ကွံာ်လၢအတၢ်ဖံးတၢ်မၤဒ် ကစၢ်ယွၤအိၣ်ဘှံးက့ၤလၢတၢ်ဖံးတၢ်မၤအပူၤအသိးန့ၣ်လီၤ.

¹¹လၢတၢ်န့ၣ်အဃိမ်ပကကျဲးစၢးအဂ့ၤကတၢၢ်ဒ်သိးပကဒိး န့ၢ်ဘၣ်တၢ်အိၣ်ဘှံးအဝဲန့ၣ်, ဒ်သိးပသုတလီၤတဲာ်ကွံာ်ဒ်အဝဲသ့ၣ်အသိးလၢအတစူၢ် တနာ်တၢ်အဃိနီတဂၤတဂ့ၤအဂီၢ်န့ၣ်တက့ၢ်.

¹²အဂ့ၢ်ဒ်အံၤယွၤအကလုၢ်ကထါန့ၣ်မူဝဲဒီးမၤတၢ်သ့ဒီး အကနၣ်အ့ၣ်န့ၢ်ဒံးနးလၢအကနၣ်အိၣ်ခံကပၤလၢာ်တက့ၢ် လီၤ. အဝဲဆဲးဖျိတၢ်ပၢၢ်တုၤတၢ်အကံၢ်အလဲဒီးနီၤဖးသး သမူဒီးနီၢ်သး, တၢ်အဆၢဒီးတၢ်အနူာ်ကံၢ်န့ၣ်လီၤ. အဝဲစံၣ်ညီၣ်ပဲာ်ဖးနီၤဖးပှၤကညီအသးအတၢ်ဆိကမိၣ်ဒီး အတၢ်ဆၢမိၣ်န့ၢ်သးလီတဖၣ်န့ၣ်လီၤ.

¹³တၢ်ဘၣ်တ့အိၣ်ခူသူၣ်လၢကစၢ်ယွၤအမဲာ်ညါတသ့နီတမံၤ ဘၣ်. အိၣ်ဘ့ၣ်ဆ့လၢကစၢ်ယွၤလၢပကဘၣ်ဟ့ၣ်ထီၣ် က့ၤတၢ်စံးဆၢလၢပတၢ်ဖံးတၢ်မၤအဂီၢ်တဂၤအမဲာ်ညါခဲလၢာ်လီၤ.

¹⁴ဒ်ပအိၣ်ဒီးပှၤလုၢ်တၢ်အခိၣ်အဒိၣ်ကတၢၢ်ယ့ၣ်ၡူးကစၢ်ယွၤ အဖိခွါတဂၤလၢအလဲၤခီဖျိတ့ၢ်မူခိၣ်, ယွၤအိၣ်တၢ်အလီၢ် အသိးန့ၣ်, မ်ပကဟံးဃာ်ဂၢၢ်ဂၢၢ်ကျၢၤကျၢၤပတၢ်စူၢ်တၢ်နာ် တက့ၢ်.

¹⁵ပပှၤလုၢ်တၢ်အခိၣ်အဒိၣ်ကတၢၢ်အံၤ တမ့ၢ်ပှၤလၢအနၢ် ပၢၢ်စၢၤပတၢ်ဂံၢ်စၢ်ဘါစၢ်တသ့ဘၣ်တဂၤန့ၣ်ဘၣ်. မ့ၢ်ပှၤတဂၤလၢအဘၣ်တၢ်လ့ပစီအီၤလၢကျဲကိးဘိဒဲးဒ်ပဝဲဒၣ် အသိးဘၣ်ဆၣ်အတၢ်ဒဲးဘးတအိၣ်ဘၣ်.

¹⁶လၢတၢ်န့ၣ်အဃိလၢတၢ်သူၣ်ဂၢၢ်သးကျၢၤအပူၤ, မ်ပသုးဘူးပသးဆူကစၢ်ယွၤအလီၢ်ပစိာ်, ဖဲတၢ်ဘျုးတၢ်ဖှိၣ်အိၣ်ဝဲဒၣ်အလီၢ်န့ၣ်တက့ၢ်. ဖဲန့ၣ်ပကထံၣ်န့ၢ်တၢ်သးကညီၤဒီးတၢ်ဘျုးတၢ်ဖှိၣ်လၢ အကမၤစၢၤပှၤဖဲပလိၣ်ဘၣ်အီၤအဆၢအကတီၢ်န့ၣ်လီၤ.