Read S'gaw Karen ဧ့ၤဘြံၤ 7 Bible Online

ဧ့ၤဘြံၤ 7 - S'gaw Karen bible

ဧ့ၤဘြံၤ 7

¹စီၤမၤလကံစဒ့းအံၤမ့ၢ်ၡၤလ့ၣ်အစီၤပၤ, တၢ်ဒိၣ်ကတၢၢ်ထီကတၢၢ်ကစၢ်ယွၤအပှၤလုၢ်တၢ်အခိၣ် တဂၤလၢအလဲၤသဂၢၢ်ဒီးဆိၣ်ဂ့ၤစီၤအၤဘြၤဟၣ်ဖဲအဟဲ က့ၤလၢတၢ်မၤနၢၤဒီးမၤသံကွံာ်စီၤပၤတဖၣ်ဝံၤအလီၢ်ခံ န့ၣ်လီၤ.

²စီၤအၤဘြၤဟၣ်ဟ့ၣ်လီၤအီၤကယဲၢ်တၢ်လၢအဒိးန့ၢ်ဝဲ အပူတဆံတပူလီၤ. (အမံၤအဆိကတၢၢ်မၤလကံစဒ့း အခီပညီမ့ၢ်ဝဲ “တၢ်တီတၢ်လိၤအစီၤပၤ” လီၤ. အဝဲမ့ၢ်စ့ၢ်ကီးၡၤလ့ၣ်အစီၤပၤအခီပညီ “တၢ်ဃူတၢ်ဖိး အစီၤပၤ” န့ၣ်လီၤ.)

³တၢ်ကွဲးနီၣ်ကွဲးဃါဘၣ်ဃးဒီးအမိၢ်မ့ၢ်ဂ့ၤအပၢ်မ့ၢ်ဂ့ၤ အတၢ်ဟဲလီၤစၢၤလီၤသွဲၣ်မ့ၢ်ဂ့ၤအတၢ်အိၣ်ဖျဲၣ်မ့ၢ်ဂ့ၤ အတၢ်သံမ့ၢ်ဂ့ၤတအိၣ်ဘၣ်. အဝဲလီၤဂာ်ကစၢ်ယွၤအဖိခွါဒီးမ့ၢ်ဝဲပှၤလုၢ်တၢ်အခိၣ် တဂၤအစိၤစိၤအဃၣ်ဃၣ်လီၤ.

⁴အဝဲဒိၣ်ဝဲမုၢ်ဝဲဆံးအါလဲၣ်န့ၣ်သုသ့ၣ်ညါသ့ဝဲလီၤ. ပပၢ်ဖးဒိၣ်စီၤအၤဘြၤဟၣ်ဟ့ၣ်အီၤလၢတၢ်ခဲလၢာ်လၢ အဒိးန့ၢ်ဝဲလၢတၢ်ဒုးပျီပူၤအပူတဆံတပူန့ၣ်လီၤ.

⁵ဒီးပှၤလၢ အဟဲလီၤစၢၤလၢ စီၤလ့ၤဝံ, လၢအမ့ၢ်ပှၤလုၢ်တၢ် အခိၣ်တဖၣ်န့ၣ်, တၢ်သိၣ်တၢ်သီမၤလိာ်အီၤလၢအကဟံးန့ၢ်တၢ်ဆံဆဲၣ်ပူ တပူလၢအံၣ်စရ့လးအပှၤဂီၢ်မုၢ်အအိၣ်, ဒ်ပစံးတၢ်အသိး လၢအထံဖိကီၢ်ဖိကဒဲကဒဲအအိၣ်, ဖဲအထံဖိကီၢ်ဖိကဒဲ ကဒဲမ့ၢ်ပှၤဟဲလီၤစၢၤစ့ၢ်ကီးလၢစီၤအၤဘြၤဟၣ်အအိၣ်န့ၣ်လီၤ.

⁶ဘၣ်ဆၣ်ဒီးအံၤတမ့ၢ်ဘၣ်ပှၤဟဲလီၤစၢၤလၢစီၤလ့ၤဝံသနာ် က့, ဟံးန့ၢ်ဘၣ်တၢ်ဆံဆဲၣ်ပူတပူလၢစီၤအၤဘြၤဟၣ်အအိၣ် ဒီးဆိၣ်ဂ့ၤအီၤ, ပှၤတဂၤလၢအဒိးန့ၢ်ကစၢ်ယွၤအတၢ်အၢၣ်လီၤ တဖၣ်န့ၣ်လီၤ.

⁷ပှၤလၢအဆိၣ်ဂ့ၤတၢ်တဂၤန့ၣ်, ဒိၣ်န့ၢ်ပှၤလၢအဘၣ်တၢ်ဆိၣ်ဂ့ၤအီၤ တဂၤလီၤန့ၣ်, ပသးဒ့ဒီအလီၢ်တအိၣ်ဘၣ်.

⁸ဖဲအဘၣ်ဃးဒီးပှၤလုၢ်တၢ်အခိၣ်တဖၣ်, ပှၤလၢအဟံးန့ၢ်တၢ်ဆံဆဲၣ်ပူ တပူန့ၣ်, မ့ၢ်ပှၤလၢအသံသ့တဖၣ်ဘၣ်ဆၣ်ဖဲအဘၣ်ဃးဒီး စီၤမၤလကံစဒ့းန့ၣ်, ပှၤဟံးန့ၢ်တၢ်ဆံဆဲၣ်ပူတပူၤ မ့ၢ်ပှၤလၢအမူဝဲတဂၤဒ်တၢ်ကွဲးအသးအုၣ်တ့ၢ်အသး အသိးန့ၣ်လီၤ.

⁹ပမ့ၢ်ဘၣ်စံးန့ၣ်, ဖဲစီၤအၤဘြၤဟၣ် ဟ့ၣ်တၢ်ဆံဆဲၣ်ပူ တပူၤန့ၣ်, စီၤလ့ၤဝံ (လၢအစၢၤအသွဲၣ်တဖၣ် ဟံးန့ၢ်တၢ်ဆံဆဲၣ်ပူတပူ) ဟ့ၣ်စ့ၢ်ကီးဝဲလီၤ.

¹⁰အဂ့ၢ်ဒ်အံၤ, ဖဲစီၤမၤလကံစဒ့းလဲၤသဂၢၢ်စီၤအၤဘြၤဟၣ် အခါန့ၣ်, တအိၣ်ဖျဲၣ်ထီၣ်ဒံးဘၣ်, အဝဲအိၣ်ဖျဲၣ်ထီၣ်ဒၣ်လၢခံလီၤ.

¹¹ပှၤဂီၢ်မုၢ်ဒိးန့ၢ်တၢ်သိၣ်တၢ်သီခီဖျိပှၤလုၢ်တၢ်အခိၣ်လၢ အဘၣ်ဃးဒီးစီၤလ့ၤဝံန့ၣ်လီၤ. တၢ်လၢတၢ်ပှဲၤမ့ၢ်အိၣ်ဒီးပှၤလုၢ်တၢ်အခိၣ်လၢအဘၣ်ဃးဒီး စီၤလ့ၤဝံအံၤဒီးအလီၢ်ကအိၣ်ဒံးလၢပှၤလုၢ်တၢ်အခိၣ်အဂၤ တဂၤလၢအဘၣ်ဃးဒီးစီၤမၤလကံစဒ့းကအိၣ်ထီၣ်လၢ အတမ့ၢ်ဘၣ်တကလုာ်ဃီဒီးစီၤအၤဟရိၣ်ဘၣ်န့ၣ်ဧါ.

¹²အဂ့ၢ်ဒ်အံၤ, တုၤပှၤလုၢ်တၢ်အခိၣ်အလီၢ်မ့ၢ်ဘၣ်တၢ်ဆီတလဲ အီၤဒီးတၢ်သိၣ်တၢ်သီစ့ၢ်ကီးကဘၣ်တၢ်ဆီတလဲအီၤလီၤ.

¹³ပကစၢ်လၢတၢ်တဖၣ်အံၤဘၣ်တၢ်စံးကတိၤတ့ၢ်လၢအဂ့ၢ် တဂၤအံၤဘၣ်ဃးဒီးဒူၣ်အဂၤတဒူၣ်ဒီးပှၤဘၣ်ဃးဒီးဒူၣ်အံၤ တမၤတ့ၢ်တၢ်ဒ်ပှၤလုၢ်တၢ်အခိၣ်အသိးနီတဂၤဘၣ်.

¹⁴ပှၤသ့ၣ်ညါလီၤတံၢ်လီၤဆဲးလၢပကစၢ်ဟဲလီၤစၢၤဝဲလၢ စီၤယူဒၤအဒူၣ်ဒီးဖဲအဘၣ်ဃးဒီးဒူၣ်အံၤအဂ့ၢ်န့ၣ်, စီၤမိၤၡ့တယၢၤထီၣ်ပှၤလုၢ်တၢ်အခိၣ်တဖၣ်အဂ့ၢ်နီတမံၤဘၣ်.

¹⁵တၢ်ဂ့ၢ်အဝဲန့ၣ်ဖျါဂ့ၤထီၣ်ဆှံထီၣ်ဖဲပှၤလုၢ်တၢ်အခိၣ်အဂၤ တဂၤဟဲအိၣ်ထီၣ်ဝဲလၢအလီၤဂာ်ဒီးစီၤမၤလကံစဒ့းန့ၣ်လီၤ.

¹⁶အဝဲကဲထီၣ်ပှၤလုၢ်တၢ်အခိၣ်တမ့ၢ်ဘၣ်ဒ်တၢ်သိၣ်တၢ်သီဘၣ် ဃးဒီးနီၢ်ခိနီၢ်ခီအတၢ်ဟဲလီၤစၢၤလီၤသွဲၣ်အသိးန့ၣ်ဘၣ်. မ့မ့ၢ်ကဲထီၣ်ဝဲခီဖျိ သးသမူလၢအဟးဂီၤတသ့ဘၣ်အစိ အကမီၤန့ၣ်လီၤ.

¹⁷အဂ့ၢ်ဒ်အံၤတၢ်ကွဲးအသးအုၣ်တ့ၢ်အသးဒီးစံးဝဲ, နကမ့ၢ်ပှၤလုၢ်တၢ်အခိၣ်အစိၤစိၤအဃၣ်ဃၣ်တကလုာ်ဃီ ဒီးစီၤမၤလကံစဒ့းလီၤ.

¹⁸တၢ်သိၣ်တၢ်သီအလီၢ်လံၤဘၣ်တၢ်ပာ်ကပၤကွံာ်အီၤမ့ၢ်လၢ အဂံၢ်စၢ်ဘါစၢ်ဒီးအဘျုးတအိၣ်ဘၣ်အဃိလီၤ.

¹⁹အဂ့ၢ်ဒ်အံၤ, စီၤမိၤၡ့အတၢ်သိၣ်တၢ်သီမၤလၢထီၣ်ပှဲၤထီၣ်တၢ် တသ့ဘၣ်နီတမံၤဘၣ်. ဒီးအခဲအံၤတၢ်ဟ့ၣ်လီၤပှၤတၢ်မုၢ်လၢ် လၢ အဂ့ၤဒိၣ်တက့ၢ်, လၢပသုးဘူးပသးဆူ ကစၢ်ယွၤအအိၣ် သ့ဝဲခီဖျိအီၤန့ၣ်လီၤ.

²⁰အါန့ၢ်အန့ၣ်ကစၢ်ယွၤအတၢ်ဆိၣ်လီၤသးအိၣ်စ့ၢ်ကီးဝဲန့ၣ်လီၤ.

²¹ဖဲပှၤလုၢ်တၢ်အခိၣ်အဂၤတဖၣ်ဟံးထီၣ်ဖီၣ်ထီၣ်အတၢ်ဖံးတၢ် မၤန့ၣ်တၢ်ဆိၣ်လီၤသးဒ်သိးအံၤတအိၣ်ဘၣ်. ဘၣ်ဆၣ်ဒီး ဖဲယ့ၣ်ၡူးကဲထီၣ်ပှၤလုၢ်တၢ်အခိၣ်န့ၣ်အိၣ်ဃုာ်ဒီးကစၢ်ယွၤ အတၢ်ဆိၣ်လီၤအသးဒီးအီၤ, ဒီးစံးဝဲဒၣ်, “ကစၢ်မၤတ့ၢ်တၢ်အၢၣ်လီၤသမှံၤသပှၢ်တမံၤ ဒီးတထုးက့ၤဝဲဒၣ်ဘၣ်. ‘နကမ့ၢ်ပှၤလုၢ်တၢ်အခိၣ်အစိၤစိၤအဃၣ်ဃၣ်လီၤ.’ ”

²²အန့ၣ်ဒီးတၢ်လီၤဆီအံၤဒုးကဲထီၣ်စ့ၢ်ကီးယ့ၣ်ၡူးလၢတၢ် အၢၣ်လီၤအီလီၤလၢအဂ့ၤဒိၣ်ဒၣ်တၢ်တက့ၢ်အတၢ်အုၣ်ကီၤ န့ၣ်လီၤ.

²³တၢ်လီၤဆီအဂၤအိၣ်ဒံးတမံၤလၢပှၤလုၢ်တၢ်အခိၣ်လၢ အပူၤကွံာ်တဖၣ်အိၣ်အါဒံအါဂၤ, မ့ၢ်လၢအဝဲသ့ၣ်သံဝဲဒီးမၤအတၢ်မၤဆူညါတသ့ဘၣ် အဃိလီၤ.

²⁴ဘၣ်ဆၣ်ဒီးယ့ၣ်ၡူးမ့ၢ် ပှၤလုၢ်တၢ်အခိၣ်အဂၢၢ်အကျၢၤ, လၢအမူဝဲလီၤထူလီၤယိာ်အဃိလီၤ.

²⁵လၢတၢ်န့ၣ်အဃိ, အဝဲအုၣ်က့ၤခီၣ်က့ၤပှၤလၢအဟဲဆူ ကစၢ်ယွၤအအိၣ်ခီဖျိအီၤတဖၣ်န့ၣ်သ့ဝဲထီဘိဒ်အဝဲမူဝဲ လီၤစိၤလီၤထီလၢအကဃ့န့ၢ်တၢ်လၢအဝဲသ့ၣ်အဂီၢ်အသိး န့ၣ်လီၤ.

²⁶မ့မ့ၢ်ဒ်န့ၣ်ဒီး, ဂ့ၤဝဲဘၣ်ဝဲလၢပကအိၣ်ဒီးပှၤလုၢ်တၢ်အခိၣ်အဒိၣ် ကတၢၢ်ဒ်န့ၣ်အသိးတဂၤလၢအမၤပှဲၤကယဲၢ်ပတၢ်လိၣ်, လၢ အစီဝဲဆှံဝဲ, လၢပှၤပာ်တၢ်ကမၣ်လၢအလိၤအလီၢ်တအိၣ် ဘၣ်, လၢအတဘၣ်အၢဘၣ်သီဘၣ်, လၢအဘၣ်တၢ်ပာ် လီၤဆီအီၤဒီးပှၤတၢ်ဒဲးဘးဖိတဖၣ်အအိၣ်, ဒီးလၢအဘၣ်တၢ်ပာ်ထီၣ်ထီအီၤထီန့ၢ်မူခိၣ်တက့ၢ် န့ၣ်လီၤ.

²⁷အဝဲန့ၣ်, အလီၢ်တအိၣ်ဘၣ်လၢအကလုၢ်ထီၣ်ပာ်ထီၣ်တၢ်လုၢ် တဖၣ်ကိးနံၤဒဲး, အဆိလၢအတၢ်ဒဲးဘးဒၣ်ဝဲအဂီၢ်, လၢခံက့ၤလၢပှၤဂၤအဂီၢ်, ဒ်ပှၤလုၢ်တၢ်အခိၣ်အဒိၣ်ကတၢၢ် တဖၣ်န့ၣ်အသိးဘၣ်. အဝဲလုၢ်ထီၣ်တၢ်ထဲတဘျီဧိၤလၢအလၢဝဲပှဲၤဝဲလၢကိးဆၢ ကတီၢ်ဒဲးအဂီၢ်ဖဲအလုၢ်ထီၣ်အသးဒၣ်ဝဲန့ၣ်လီၤ.

²⁸သပှၢ်ကတၢၢ်, တၢ်သိၣ်တၢ်သီဃုထၢပာ်ထီၣ်ပှၤတဖၣ်လၢ အဂံၢ်စၢ်ဘါစၢ်လၢပှၤလုၢ်တၢ်အခိၣ်အဒိၣ်ကတၢၢ်အလီၢ် န့ၣ်လီၤ. ဘၣ်ဆၣ်ဒီးကစၢ်ယွၤအတၢ်ဆိၣ်လီၤအသးလၢ အဟဲလၢတၢ်သိၣ်တၢ်သီအလီၢ်ခံအံၤဃုထၢပာ်ထီၣ်ယွၤ အဖိခွါလၢအဘၣ်တၢ်မၤလၢပှဲၤတ့ၢ်လံအီၤအစိၤစိၤ အဃၣ်ဃၣ်တဂၤန့ၣ်လီၤ.