Read S'gaw Karen ယၤကိာ် 2 Bible Online

ယၤကိာ် 2 - S'gaw Karen bible

ယၤကိာ် 2

¹ယဒီပုၢ်ဝဲၢ်သ့ၣ်ဧၢ, ဒ်ပှၤတဖၣ်လၢအစူၢ်က့ၤနာ်က့ၤပကစၢ် ယ့ၣ်ၡူးခရံာ်, တၢ်လၤကပီၤကစၢ်တဂၤအသိး, သုတပာ်လီၤဆီပှၤဒ်အတၢ်အိၣ်ဖျါလၢခိအသိးန့ၣ်တဂ့ၤ.

²ပှၤထူးပှၤတီၤလၢအသိးပသံးထူဒီးကူကၤတၢ်လၢအဂ့ၤ တဂၤမ့ၢ်ဟဲဘၣ်ဆူသုတၢ်အိၣ်ဖှိၣ်, ဒီးပှၤဖှီၣ်ဖိယာ်ဖိလၢအကူကၤတၢ်ယာ်ဖျ့တဂၤမ့ၢ်ဟဲစ့ၢ်ကီး ဝဲန့ၣ်,

³သုမ့ၢ်ဒုးနဲၣ်တၢ်ယူးယီၣ်အါတက့ၢ်ဆူပှၤကူကၤတၢ်လၢ အဂ့ၤတဂၤဒီးစံးဘၣ်အီၤ, “ဟံးန့ၢ်တၢ်လီၢ်အဂ့ၤကတၢၢ်ဖဲအံၤ တက့ၢ်.” ဘၣ်ဆၣ်ဒီးပှၤဖှီၣ်ဖိယာ်ဖိတဂၤတခီသုစံးဘၣ် အီၤ, “ဆၢထၢၣ်ဖဲန့ၣ်” မ့တမ့ၢ် “ဆ့ၣ်နီၤဖဲယခီၣ်ကပၤလၢသ့ၣ်ဘၣ်ခိၣ်အံၤတက့ၢ်” ဒီး,

⁴အန့ၣ်ဒီးသုအိၣ်ဒီးတၢ်ကမၣ်လၢသုကွၢ်မဲာ်လိာ်သုသးကဒဲ ကဒဲဒီးလၢသုစံၣ်ညီၣ်တၢ်န့ၣ်, သန့ၤထီၣ်အသးလၢတၢ်ပာ်သူၣ်ပာ်သးအအၢအသီတဖၣ် အဖီခိၣ်န့ၣ်လီၤ.

⁵ယဒီပုၢ်ဝဲၢ်သးဘိသ့ၣ်ဧၢ, ဒိကနၣ်တက့ၢ်. ကစၢ်ယွၤဃုထၢပှၤအဖှီၣ်လၢဟီၣ်ခိၣ်အံၤဒ်သိး ကထူးဝဲတီၤဝဲလၢတၢ်စူၢ်တၢ်နာ်ဒီးမၤန့ၢ်ဘီမုၢ်လၢ အအၢၣ်လီၤတ့ၢ်ဝဲလၢပှၤလၢအအဲၣ်အီၤတဖၣ်အဂီၢ်န့ၣ်လီၤ.

⁶ဘၣ်ဆၣ်ဒီး, သုတယူးယီၣ်ပှၤဖှီၣ်ဖိတဖၣ်ဘၣ်. မ့ၢ်မတၤတဖၣ်ဆီၣ်ဘံးဆီၣ်ဘၢသုဒီးတွံၢ်သုဆူစံၣ်ညီၣ် ကွီၢ်တဖၣ်အမဲာ်ညါန့ၣ်လဲၣ်. မ့ၢ်ဒၣ်ပှၤထူးပှၤတီၤတဖၣ်လီၤ.

⁷အဝဲသ့ၣ်မ့ၢ်ပှၤတဖၣ်လၢကတိၤအၢသုမံၤအဂ့ၤလၢအဘၣ် တၢ်ဟ့ၣ်တ့ၢ်သုန့ၣ်လီၤ.

⁸သုမ့ၢ်စူၢ်ကစၢ်ယွၤအဘီမုၢ်အတၢ်သိၣ်တၢ်သီလၢ အဘၣ်တၢ်ထံၣ်န့ၢ်အီၤလၢတၢ်ကွဲးအသးအပူၤလၢအစံးဝဲ, “အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိး” န့ၣ်ဒီး, သုကမၤဘၣ်တၢ်လၢအဘၣ်တမံၤန့ၣ်လီၤ.

⁹ဘၣ်ဆၣ်ဒီး, သုမ့ၢ်ပာ်တၢ်အဒူၣ်အဆၢဒ်တၢ်အိၣ်ဖျါလၢခိ အသိးန့ၣ်ဒီး, သုမၤတၢ်ဒဲးဘး, ဒီးတၢ်သိၣ်တၢ်သီစံၣ်ညီၣ်သုဒ်ပှၤလုၣ်သ့ၣ်ခါပတာ်တၢ်သိၣ် တၢ်သီအသိးန့ၣ်လီၤ.

¹⁰ပှၤတဂၤဂ့ၤတဂၤဂ့ၤလၢအလုၣ်သ့ၣ်ခါပတာ်တၢ်မၤလိာ်တဘီ န့ၣ်, အတၢ်ကမၣ်အိၣ်ဝဲလၢအလုၣ်သ့ၣ်ခါပတာ်တၢ်မၤလိာ် ခဲလၢာ်န့ၣ်လီၤ.

¹¹ပှၤတဂၤဃီလၢအစံးဝဲ, “တဘၣ်မၤကမၣ်မုၣ်ကမၣ်ခွါတဂ့ၤ” န့ၣ်စံးစ့ၢ်ကီးဝဲ, “တဘၣ်မၤသံတၢ်တဂ့ၤ” န့ၣ်လီၤ. လၢတၢ်န့ၣ်အဃိ, သုမ့ၢ်တမၤကမၣ်မုၣ်ကမၣ်ခွါသနာ်က့, သုမ့ၢ်မၤသံတၢ်ဒီး, သုကဲထီၣ်ပှၤလုၣ်သ့ၣ်ခါပတာ်တၢ်သိၣ် တၢ်သီန့ၣ်လီၤ.

¹²ကတိၤဒီးမၤတၢ်ဒ်ပှၤတဖၣ်လၢအကဘၣ်တၢ်စံၣ်ညီၣ်အီၤ လၢတၢ်သိၣ်တၢ်သီလၢအမၤထူၣ်ဖျဲးတၢ်အသိးန့ၣ်တက့ၢ်.

¹³အဂ့ၢ်ဒ်လဲၣ်န့ၣ်, ကစၢ်ယွၤတမ့ၢ်လၢအကဒုးနဲၣ်တၢ်သးကညီၤဖဲအဝဲစံၣ်ညီၣ်ပှၤ တဂၤလၢအတအိၣ်ဒီးတၢ်သးကညီၤန့ၣ်ဘၣ်. ဘၣ်ဆၣ်ဒီး, တၢ်သးကညီၤမ့ၢ်တၢ်လၢအမၤနၢၤတၢ်စံၣ်ညီၣ်န့ၣ်လီၤ.

¹⁴ယဒီပုၢ်ဝဲၢ်သ့ၣ်ဧၢ, ပှၤတဂၤဂၤမ့ၢ်စံးဝဲလၢအဝဲအိၣ်ဒီးတၢ်စူၢ် တၢ်နာ်ဘၣ်ဆၣ်အတၢ်မၤမ့ၢ်တအုၣ်အသးဒ်န့ၣ်ဘၣ်ဒီး, အဘျုးအိၣ် မနုၤလဲၣ်. တၢ်စူၢ်တၢ်နာ်အဝဲန့ၣ်အုၣ်က့ၤခီၣ်က့ၤအီၤဘၣ်ကသ့ဧါ.

¹⁵ဒီပုၢ်ဝဲၢ်ခွါမ့တမ့ၢ်ဒီပုၢ်ဝဲၢ်မုၣ်မ့ၢ်အိၣ်ဝဲလၢအလိၣ်ဘၣ်တၢ်ကူ တၢ်သိးဒီးလၢအတအိၣ်ဒီးတၢ်အီၣ်လၢလၢလီၣ်လီၣ်ဘၣ်န့ၣ်,

¹⁶သုမ့ၢ်စံးဘၣ်အဝဲသ့ၣ်, “ကစၢ်ယွၤဆိၣ်ဂ့ၤသုလီၤ. မၤလၢၤသုသးဒီးအီၣ်လၢအီၣ်လၢအီတက့ၢ်.” ဘၣ်ဆၣ်ဒီးသုမ့ၢ်တဟ့ၣ်အဝဲသ့ၣ်လၢတၢ်အိၣ်မူအတၢ်လိၣ် တဖၣ်ဘၣ်ဒီး, အဘျုးအိၣ်မနုၤလဲၣ်.

¹⁷တၢ်စူၢ်တၢ်နာ်မ့ၢ်တၢ်ဒ်န့ၣ်အသိးလီၤ. မ့ၢ်အိၣ်ဒၣ်ထဲတၢ်စူၢ်တၢ်နာ်ဒီးတၢ်မၤမ့ၢ်တအိၣ်ဘၣ်န့ၣ်, မ့ၢ်တၢ်စူၢ်တၢ်နာ်လၢအသံန့ၣ်လီၤ.

¹⁸ဘၣ်ဆၣ်ဒီးပှၤတဂၤဂၤကစံးဝဲ, “ပှၤတဂၤအိၣ်ဒီးအတၢ်စူၢ် တၢ်နာ်, ဒီးအဂၤတဂၤအိၣ်ဒီးတၢ်မၤလီၤ.” ယတၢ်စံးဆၢမ့ၢ် အအံၤ, “ဒုးနဲၣ်ယၤပှၤတဂၤလၢအအိၣ်ဒီးတၢ်စူၢ်တၢ်နာ်လၢ အတအိၣ်ဘၣ်ဒီးတၢ်မၤန့ၣ်တက့ၢ်. ဒီးယကဒုးနဲၣ်သုယတၢ်စူၢ်တၢ်နာ်ခီဖျိယတၢ်မၤန့ၣ်လီၤ.”

¹⁹မ့ၢ်နနာ်လၢကစၢ်ယွၤအိၣ်ထဲတဂၤဧိၤန့ၣ်ဧါ. ဂ့ၤလီၤ. တၢ်နါတဖၣ်စ့ၢ်ကီးနာ်ဝဲဒ်န့ၣ်, ဒီးကနိးကစုာ်လၢတၢ်ပျံၤတၢ်ဖုး အပူၤလီၤ.

²⁰ပှၤဟးဂီၤဖိဧၢ, မ့ၢ်နသးအိၣ်လၢတၢ်ကဒုးနဲၣ်နၤတၢ်စူၢ်တၢ်နာ်လၢအတအိၣ် ဒီးတၢ်မၤန့ၣ်မ့ၢ်တၢ်လၢအတဂိာ်တသီၣ်ဘၣ်န့ၣ်ဧါ.

²¹ပပၢ်လၢပျၢၤစီၤအၤဘြၤဟၣ်ဘၣ်တၢ်ပာ်တီပာ်လိၤအီၤလၢ ကျဲဒ်လဲၣ်. မ့ၢ်ဒၣ်ခီဖျိအတၢ်မၤ, ဖဲအဝဲလုၢ်ထီၣ်အဖိခွါစီၤအံၤစဲးလၢတၢ်လုၢ်လီၢ်အဖီခိၣ် အခါန့ၣ်လီၤ.

²²မ့ၢ်သုတထံၣ်ဘၣ်ဧါ. အဝဲအတၢ်စူၢ်တၢ်နာ်ဒီးအတၢ်မၤ, မၤသကိးတၢ်န့ၣ်လီၤ. အတၢ်စူၢ်တၢ်နာ်ဘၣ်တၢ်မၤလၢမၤပှဲၤအီၤခီဖျိအတၢ်မၤန့ၣ်လီၤ.

²³ဒီးတၢ်ကွဲးအသးလၢအစံးဝဲ, “စီၤအၤဘြၤဟၣ်နာ်ကစၢ်ယွၤဒီးမ့ၢ်အတၢ်စူၢ်တၢ်နာ်အဃိ ဒီးကစၢ်ယွၤတူၢ်လိာ်အီၤဒ်ပှၤတီပှၤလိၤအသိး” အံၤလၢထီၣ်ပှဲၤထီၣ်ဝဲဒၣ်န့ၣ်လီၤ. ဒီးလၢတၢ်န့ၣ်အဃိ, စီၤအၤဘြၤဟၣ်ဘၣ်တၢ်ကိးအီၤလၢယွၤအတံၤသကိး န့ၣ်လီၤ.

²⁴သတးဒီး, သုထံၣ်လၢပှၤတဂၤဘၣ်တၢ်ပာ်တီပာ်လိၤအီၤလၢ အတၢ်မၤအဃိ, ဒီးတမ့ၢ်ဘၣ်ထဲလၢအတၢ်စူၢ်တၢ်နာ်တမံၤဧိၤ အဃိန့ၣ်ဘၣ်လီၤ.

²⁵ပှၤဃဲသဲမုၣ်နီၢ်ရၤဃးမ့ၢ်တၢ်ဒ်န့ၣ်အသိးစ့ၢ်ကီးလီၤ. အဝဲဘၣ်တၢ်ပာ်တီပာ်လိၤအီၤခီဖျိအတၢ်မၤလၢအမ့ၢ်ဝဲ တၢ်တူၢ်လိာ်ပှၤအံၣ်စရ့လးဖိအပှၤကွၢ်ဟုၣ်ကွၢ်စုာ်တၢ် တဖၣ်, ဒီးမၤစၢၤအဝဲသ့ၣ်ဒ်သိးအကဃ့ၢ်ပူၤဖျဲးကွံာ် အသးလၢကျဲအဂၤတဘိန့ၣ်လီၤ.

²⁶လၢတၢ်န့ၣ်အဃိ, ဒ်နီၢ်ခိလၢအတအိၣ်ဘၣ်ဒီးသးသံဝဲ အသိးန့ၣ်, တၢ်စူၢ်တၢ်နာ်လၢအတအိၣ်ဘၣ်ဒီးတၢ်မၤန့ၣ် သံဝဲစ့ၢ်ကီးန့ၣ်လီၤ.