Read S'gaw Karen ၁ ပ့းတရူး 5 Bible Online

၁ ပ့းတရူး 5 - S'gaw Karen bible

၁ ပ့းတရူး 5

¹ယၤ, လၢအမ့ၢ်ပှၤသးပှၢ်တဂၤစ့ၢ်ကီး, ယဃ့ကညးဘၣ်တၢ်အိၣ်ဖှိၣ်သူၣ်က့သးပှၢ်တဖၣ်လၢ အအိၣ်လၢသုကျါန့ၣ်လီၤ. ယမ့ၢ်ပှၤအုၣ်အသးလၢခရံာ် အတၢ်နးတၢ်ဖှီၣ်တဖၣ်, အဂ့ၢ်ဒီးယကဒိးန့ၢ်ဃုာ်တၢ်လၤကပီၤလၢအကဘၣ်တၢ်လီၣ်ဖျါ ထီၣ်အီၤန့ၣ်လီၤ.

²ယဃ့ကညးသုလၢသုကမ့ၢ်ပှၤကွၢ်သိတဖၣ်လၢကအံးက့ၤ ကွၢ်က့ၤသိလၢကစၢ်ယွၤဟ့ၣ်လီၤသုတဖၣ်လၢတၢ်သူၣ်အိၣ် သးအိၣ်အပူၤဒ်ကစၢ်ယွၤဘၣ်အသးလၢသုကမၤအသိး, ဒီးတမ့ၢ်ဘၣ်လၢတၢ်မၢဆူၣ်သုအဃိန့ၣ်ဘၣ်. မၤသုတၢ်မၤတမ့ၢ်ဘၣ်လၢဘူးလဲအဃိဘၣ်, မ့မ့ၢ် လၢတၢ်သးအိၣ်မၤတၢ်နီၢ်နီၢ်အပူၤတက့ၢ်.

³တဘၣ်ကျဲးစၢးဒိၣ်စိလၢပှၤလၢတၢ်ဟ့ၣ်လီၤလၢသုစုပူၤတဖၣ် အဖီခိၣ်တဂ့ၤ. မ့မ့ၢ်တခီကဲထီၣ်တၢ်ဒိတၢ်တဲာ်လၢသိတဖုန့ၣ် အဂီၢ်တက့ၢ်.

⁴ဒီးတုၤပှၤကွၢ်သိအခိၣ်အိၣ်ဖျါထီၣ်ဒီး, သုကဒိးန့ၢ်ဘၣ်တၢ်လၤကပီၤအခိၣ်သလုးလၢအတၢ်ကပြုၢ် ကပြီၤတလီၤမၢ်ကွံာ်နီတစုဘၣ်န့ၣ်လီၤ.

⁵လၢကျဲဒ်န့ၣ်အသိး, သုဝဲလၢအသးစၢ်တဖၣ်သုကဘၣ်ဆီၣ်လီၤသုသးလၢပှၤ သးပှၢ်သ့ၣ်တဖၣ်အဖီလာ်န့ၣ်လီၤ. ဒီးသုဝဲသ့ၣ်ခဲလၢာ်သုကဘၣ်ကူထီၣ်သိးထီၣ်တၢ်ဆီၣ်လီၤသး အဆ့ကၤလၢသုကမၤစၢၤလိာ်သုသးတဂၤဒီးတဂၤအဂီၢ် န့ၣ်လီၤ. အဂ့ၢ်ဒ်အံၤ, တၢ်ကွဲးအသးစံးဝဲ, “ကစၢ်ယွၤထီဒါ ပှၤပာ်ထီၣ်ထီအသး, ဘၣ်ဆၣ်ဟ့ၣ်လီၤတၢ်ဘျုးတၢ်ဖှိၣ်လၢပှၤလၢအဆီၣ်လီၤအသး တဖၣ်န့ၣ်လီၤ” (ကူၣ်သ့ ၃:၃၄),

⁶မ့မ့ၢ်ဒ်န့ၣ်ဒီး, ဆီၣ်လီၤသုသးလၢကစၢ်ယွၤအစုကညီၢ် အဖီလာ်, ဒ်သိးအဝဲကစိာ်ထီၣ်ထီသုလၢအဆၢအကတီၢ် ဒၣ်ဝဲအဂီၢ်န့ၣ်တက့ၢ်.

⁷ပာ်ထီၣ်သုတၢ်ဘၣ်ယိၣ်ဘၣ်ဘီခဲလၢာ်လၢအဝဲဒၣ်အလိၤ တက့ၢ်. အဂ့ၢ်ဒ်အံၤအသးအိၣ်သုလီၤ.

⁸အိၣ်စီၣ်မဲာ်စီၣ်နါဒီးဆိးသီတက့ၢ်. သုဒုၣ်သုဒါမုၣ်ကီၤလံၢ်ဟးဝ့ၤဝီၤဒ်ခ့ယုၢ်ကညီၤရုၢ်ရုၢ် အသိးဒီးဃုပှၤလၢအကယူၢ်လီၤဝဲလီၤ.

⁹အိၣ်ဂၢၢ်ဆိးကျၢၤလၢသုတၢ်စူၢ်တၢ်နာ်အပူၤဒီးတြီအီၤ တက့ၢ်. အဂ့ၢ်ဒ်လဲၣ်န့ၣ်, သုသ့ၣ်ညါလၢသုဒီပုၢ်ဝဲၢ်ပှၤစူၢ်က့ၤနာ်က့ၤတၢ်သကိး သကိးဒီးသုတဖၣ်ဘၣ်လဲၤခီဖျိတၢ်နးတၢ်ဖှီၣ်တမံၤဃီ အံၤလၢဟီၣ်ခိၣ်ချၢလီၤ.

¹⁰ဒီးဖဲသုဒိးတၢ်နးတၢ်ဖှီၣ်တစိၢ်တလီၢ်ဝံၤဒီး, တၢ်ဘျုးတၢ်ဖှိၣ်ခဲလၢာ်အကစၢ်ယွၤလၢအကိးန့ၢ်သုလၢသုကဒိး န့ၢ်ဃုာ်အလၤကပီၤအထူအယိာ်လၢယ့ၣ်ၡူးခရံာ်အပူၤတဂၤန့ၣ်, အကစၢ်ဒၣ်ဝဲကမၤလၢပှဲၤသုဒီးဟ့ၣ်သုတၢ်ဂၢၢ်တၢ်ကျၢၤ, တၢ်ဂံၢ်တၢ်ဘါ, ဒီးတၢ်အခီၣ်ထံးလၢအဂၢၢ်အကျၢၤန့ၣ်လီၤ.

¹¹မ်တၢ်စိတၢ်ကမီၤအိၣ်ဒီးအီၤလီၤစိၤလီၤထီတက့ၢ်. အၤမ့ၣ်.

¹²ယကွဲးန့ၢ်သုလံာ်ပရၢဖုၣ်ကိာ်ဖိအံၤခီဖျိစီၤစံလၤလၢယပာ်အီၤဒ် ဒီပုၢ်ဝဲၢ်လၢအသးတီဒီးယၤတဂၤအတၢ်မၤစၢၤယၤအပူၤန့ၣ်လီၤ. ယသးအိၣ်ဟ့ၣ်ဆူၣ်ထီၣ်သုဂံၢ်သုဘါဒီးဟ့ၣ်ယတၢ်အုၣ်ယသး လၢတၢ်အံၤမ့ၢ်ကစၢ်ယွၤအဘျုးအဖှိၣ်နီၢ်နီၢ်လီၤ. ဆၢထၢၣ်ဂၢၢ်ကျၢၤလၢတၢ်အံၤအပူၤန့ၣ်တက့ၢ်.

¹³သုဒီပုၢ်ဝဲၢ်တၢ်အိၣ်ဖှိၣ်လၢဘၤဘူၤလိၣ်အပူၤ, လၢအဘၣ်တၢ်ဃုထၢစ့ၢ်ကီးအီၤလၢကစၢ်ယွၤ, ဆှၢန့ၢ်သုတၢ်ဆၢဂ့ၤဆၢဝါတဖၣ်, ဒီးယဖိခွါစီၤမၢ်ကူးစ့ၢ်ကီးဆၢဂ့ၤဆၢဝါသုလီၤ.

¹⁴ကတိၤဒိၣ်လိာ်သုသးတဂၤဒီးတဂၤလၢခရံာ်ဖိတၢ်အဲၣ်တၢ် ကွံအတၢ်နၢမူတက့ၢ်. မ်ကစၢ်ယွၤအတၢ်ဃူတၢ်ဖိးအိၣ်ဒီးသုဝဲခဲလၢာ်လၢ အဘၣ်ဃးဒီးခရံာ်န့ၣ်တက့ၢ်.