Read S'gaw Karen ၂ ပ့းတရူး 2 Bible Online

၂ ပ့းတရူး 2 - S'gaw Karen bible

၂ ပ့းတရူး 2

¹လၢအပူၤကွံာ်ဝံအဘျၣ်တဖၣ်အိၣ်ထီၣ်လၢပှၤဂီၢ်မုၢ် အကျါ, ဒီးဒ်န့ၣ်အသိးသရၣ်အဘျၣ်တဖၣ်ကအိၣ်ထီၣ် လၢသုကျါန့ၣ်လီၤ. အဝဲသ့ၣ်ကဟဲစိာ်နုာ်တၢ်စူၢ်ကမၣ်နာ်ကမၣ်တဖၣ်လၢ ကမၤဟးဂီၤတၢ်, ဒီးအဝဲသ့ၣ်ကသမၢကစၢ်လၢအပှ့ၤက့ၤ အီၤ, သတးဒီးအဝဲသ့ၣ်ကဟဲစိာ်အတၢ်ဟးဂီၤဒၣ်ဝဲချ့ သဒံးန့ၣ်လီၤ.

²အန့ၣ်ဒၣ်လဲာ်, ပှၤအါဂၤကပိာ်ထွဲအဝဲသ့ၣ်အတၢ်ကလုာ်ကလိၤအကျဲ တဖၣ်အခံ, ဒီးလၢတၢ်လၢအဝဲသ့ၣ်မၤဝဲအဃိ, ပှၤဂၤတဖၣ်ကကတိၤအၢကတိၤသီတၢ်မ့ၢ်တၢ်တီအကျဲ န့ၣ်လီၤ.

³ဒီးလၢအတၢ်သူၣ်လီသးကွံဒိၣ်အပူၤ, သရၣ်အဘျၣ် တဖၣ်အံၤကဃုအဘျုးလၢသုဖီခိၣ်ခီဖျိအစံးဘၣ်တဲဘၣ် သုပူလၢပှၤကညီဒုးကဲထီၣ်အီၤတဖၣ်လီၤ. အဝဲသ့ၣ်အပှၤစံၣ်ညီၣ်ကွီၢ်အိၣ်ကတဲာ်ကတီၤအသးယံာ် တ့ၢ်လံ, ဒီးပှၤလၢအကမၤဟးဂီၤအီၤတဂၤန့ၣ်တမံသပ့ၤ ဝဲဘၣ်.

⁴ကလူးလၢအမၤတၢ်ဒဲးဘးတဖၣ်န့ၣ်, ကစၢ်ယွၤတပျၢ်ဖျဲး အီၤဘၣ်ဒီးတ့ၢ်လီၤကွံာ်အဝဲသ့ၣ်ဆူလရာ်အပူၤ, ဒီးဖဲန့ၣ်အဝဲသ့ၣ်ဘၣ်တၢ်စၢဃာ်အီၤလၢတၢ်ခံးတၢ်နၤ အပူၤဒီးအိၣ်ခိးမုၢ်စံၣ်ညီၣ်အနံၤန့ၣ်လီၤ.

⁵ကစၢ်ယွၤတပျၢ်ဖျဲးပှၤဟီၣ်ခိၣ်ဖိလၢပျၢၤလၢကစၢၤတဖၣ်ဘၣ်, ဒီးဒုးလုၣ်ဘၢကွံာ်ဟီၣ်ခိၣ်လၢအပှဲၤဒီးပှၤတယူးတယီၣ် ကစၢ်ယွၤလၢထံန့ၣ်လီၤ. ပှၤလၢအအုၣ်က့ၤခီၣ်က့ၤဝဲတဖၣ် မ့ၢ်ဒၣ်ထဲစီၤနိအၤလၢအစံၣ်တဲၤတဲလီၤတၢ်တီတၢ်လိၤ, ဒီးပှၤအဂၤနွံဂၤန့ၣ်လီၤ.

⁶ယွၤစံၣ်ညီၣ်ဝ့ၢ်စဒိၣ်ဒီးဝ့ၢ်ဂမိရၤဒီးမၤဟးဂီၤကွံာ်အီၤလၢ မ့ၣ်အူ, ဒီးဒုးကဲထီၣ်အီၤလၢတၢ်အဒိအတဲာ်လၢပှၤလၢ အတယူးတယီၣ်ယွၤအဂီၢ်န့ၣ်လီၤ.

⁷အဝဲမၤပူၤဖျဲးစီၤလိာ်, ပှၤအဂ့ၤတဂၤလၢအသးဘၣ်ကိၢ်ဘၣ်ဂီၤလၢပှၤအအၢအသီတဖၣ် အတၢ်ကလုာ်ကလိၤအဃိလီၤ.

⁸ပှၤအဂ့ၤတဂၤန့ၣ်, အိၣ်မူလၢအဝဲသ့ၣ်အကျါ, ဒီးတနံၤဝံၤတနံၤန့ၣ်အဝဲတူၢ်တၢ်လၢတၢ်သူၣ်အူသးကဲၤ အပူၤဖဲအထံၣ်ဒီးနၢ်ဟူဘၣ်အဝဲသ့ၣ်အတၢ်မၤအအၢ အသီတဖၣ်န့ၣ်လီၤ.

⁹လၢတၢ်န့ၣ်အဃိ, ကစၢ်ယွၤသ့ၣ်ညါကျဲလၢအကမၤပူၤဖျဲးပှၤယူးယီၣ်ယွၤလၢ အတၢ်နးတၢ်ဖှီၣ်တဖၣ်အပူၤ, ဒီးကဟံးဃာ်ပှၤအအၢအသီတဖၣ်လၢတၢ်သိၣ်ဃီၣ် အပူၤတုၤလၢမုၢ်စံၣ်ညီၣ်အနံၤ,

¹⁰လီၤဆီဒၣ်တၢ်ပှၤတဖၣ်လၢအပိာ်ထွဲအနီၢ်ခိအတၢ်သူၣ် ကတၢသးကတၢလၢအလီၤသးဘၣ်အၢတဖၣ်အခံ, ဒီးမၤတရီတပါယွၤအစိကမီၤန့ၣ်လီၤ. သရၣ်အဘျၣ်တဖၣ်အံၤမ့ၢ်ပှၤအဒူဒီးပာ်ကဖၢလၢအသး, ဒီးတဒုးနဲၣ်တၢ်ယူးယီၣ်တၢ်အစိအကမီၤလၢထးတဖၣ်ဘၣ်, မ့မ့ၢ်ကတိၤဒုၣ်ဒွဲၣ်အဝဲသ့ၣ်တခီန့ၣ်လီၤ.

¹¹ကလူးလၢအဂံၢ်ဆူၣ်ဘါဆူၣ်ဒီးအစိကမီၤဒိၣ်န့ၢ်ဒံးသရၣ် အဘျၣ်တဖၣ်အံၤဒၣ်လဲာ်, တပာ်တၢ်ကမၣ်ဒီးဒုၣ်ဒွဲၣ်အဝဲသ့ၣ်လၢကစၢ်ယွၤအမဲာ်ညါန့ၣ်ဘၣ်.

¹²မ့မ့ၢ်ပှၤသ့ၣ်တဖၣ်အံၤမၤတၢ်လၢတၢ်တဆိကမိၣ်ဆိကမး အပူၤဒ်ဆၣ်ဖိကီၢ်ဖိအရၢၢ်တဖၣ်လၢအဘၣ်တၢ်ဖှံလီၤအီၤလၢ တၢ်ကဖီၣ်န့ၢ်ဒီးမၤသံအီၤအဂီၢ်အသိးန့ၣ်လီၤ. အဝဲသ့ၣ်ကတိၤဒုၣ်ဒွဲၣ်စံးအၢတၢ်လၢအတနၢ်ပၢၢ်ဝဲတဖၣ်န့ၣ်လီၤ. အဝဲသ့ၣ်ကဘၣ်တၢ်မၤဟးဂီၤအီၤဒ်ဆၣ်ဖိကီၢ်ဖိအရၢၢ်တဖၣ် အသိး,

¹³ဒီးကတူၢ်ဘၣ်က့ၤတၢ်လၢအဒုးတူၢ်ပှၤဂၤန့ၣ်လီၤ. တၢ်မၤလၢပှဲၤနီၢ်ခိဖံးညၣ်အတၢ်သူၣ်ဝံၤသၣ်စ့ၤလၢမုၢ် ဆါခီန့ၣ်, အဝဲသ့ၣ်ပာ်ဝဲလၢအမ့ၢ်တၢ်မုာ်လၤသးဖှံ လီၤ. ဖဲအဝဲသ့ၣ်အီၣ်တၢ်အီတၢ်ဒီးသုန့ၣ်, ကဲထီၣ်တၢ်လီၤမဲာ်ဆှးဒီးတၢ်အသူးအသ့ၣ်တအိၣ်ဘၣ် အလီၢ်, ဒီးမုာ်လၤဒံးဒၣ်ဝဲလၢအတၢ်လီတၢ်ဝ့ၤအကျဲတဖၣ် အပူၤန့ၣ်လီၤ.

¹⁴အဝဲသ့ၣ်အမဲာ်ပှဲၤဝဲဒီးတၢ်သးအိၣ်မၤကမၣ်မုၣ်ကမၣ်ခွါ, ဒီးမၤတၢ်ဒဲးဘးတလၢမၤနီတဘျီဘၣ်. အဝဲသ့ၣ်ကွဲန့ၢ်လွဲန့ၢ် ပှၤလၢအဂံၢ်စၢ်ဘါစၢ်တဖၣ်ဆူတၢ်ဒဲးဘးအပူၤလီၤ. တၢ်သူၣ်လီသးကွံအသးဒိၣ်စိလၢအပူၤဒီးအဝဲသ့ၣ်အိၣ်လၢ ယွၤအတၢ်ဆိၣ်အၢအဖီလာ်လီၤ.

¹⁵အဝဲသ့ၣ်လဲၤသဒၣ်ကွံာ်ကျဲလၢအဘၣ်ဒီးဟးဖျိးကျဲလံလီၤ. အဝဲသ့ၣ်ပိာ်ထွဲကျဲလၢစီၤဘဧိၢ်အဖိခွါစီၤဘံးလၣ်ပိာ်တ့ၢ်ဝဲလၢ အမ့ၢ်တၢ်သးကွံစ့လၢအကမၤန့ၢ်ဝဲခီဖျိတၢ်မၤတၢ်လၢအတဘၣ်,

¹⁶ဒီးဘၣ်တၢ်သိၣ်ဃီၣ်အီၤလၢအတၢ်ဒဲးဘးအဃိလီၤ. အဝဲအကသ့ၣ်ယီၤတအုၣ်တဒုကတိၤထီၣ်တၢ်လၢပှၤကညီ အကလုၢ်ဒီးဆိကတီၢ်ကွံာ်ဝံအတၢ်ပျုၢ်တၢ်တြီးအတၢ်မၤန့ၣ်လီၤ.

¹⁷ပှၤသ့ၣ်တဖၣ်အံၤလီၤဂာ်ဒီးထံမူထီၣ်ပၢၤလၢထံတအိၣ် လၢၤဘၣ်, တၢ်အၢၣ်တဖၣ်လၢကလံၤမုၢ်အူဒီးဒံကွံာ်ဝဲ အသိး, ဒီးကစၢ်ယွၤကတဲာ်ကတီၤတၢ်လီၢ်လၢအဝဲသ့ၣ် အဂီၢ်လၢတၢ်ခံးယိာ်ကတၢၢ်အပူၤန့ၣ်လီၤ.

¹⁸အဝဲသ့ၣ်ကတိၤဒိၣ်ကတိၤသွါတၢ်လၢအခီပညီတအိၣ် တဖၣ်, ဒီးသူဝဲနီၢ်ခိအတၢ်သူၣ်ကတၢသးကတၢလုၢ်လၢ်အၢသီ တဖၣ်လၢအကကွဲန့ၢ်လွဲန့ၢ်ပှၤလၢအထူၣ်ဖျဲးထီၣ်သီလၢပှၤလၢ အအိၣ်မူလၢတၢ်ကမၣ်အပူၤတဖၣ်အကျါန့ၣ်လီၤ.

¹⁹သရၣ်အဘျၣ်တဖၣ်အံၤအၢၣ်လီၤအဝဲသ့ၣ်လၢကဟ့ၣ် အီၤတၢ်သဘျ့, မ့မ့ၢ်အဝဲသ့ၣ်အကစၢ်ဒၣ်ဝဲတခီကဲကုၢ်လၢလုၢ်လၢ် အၢသီလၢအမၤဟးဂီၤတၢ်တဖၣ်အဖီလာ်, အဂ့ၢ်ဒ်လဲၣ်န့ၣ်, ပှၤတဂၤဂၤမ့ၢ်ဒိးမၢအသးလၢတၢ်တမံၤမံၤဒီးအဝဲဒၣ် ကဲထီၣ်တၢ်တမံၤန့ၣ်အကုၢ်လီၤ.

²⁰ပှၤမ့ၢ်ထူၣ်ဖျဲးထီၣ်ကွံာ်လၢဟီၣ်ခိၣ်အတၢ်သံၣ်သူမီၢ်ကျာ် တဖၣ်ခီဖျိအတၢ်သ့ၣ်ညါပကစၢ်ဒီးပှၤအုၣ်က့ၤခီၣ်က့ၤပှၤ ယ့ၣ်ၡူးခရံာ်ဝံၤဒီး, မ့ၢ်ဘၣ်တၢ်ဖီၣ်န့ၢ်ဒီးမၤနၢၤက့ၤကဒီး အီၤလၢအဝဲသ့ၣ်န့ၣ်, ပှၤဒ်သိးအံၤတဖၣ်အတၢ်မ့ၢ်တၢ်လၢ အကတၢၢ်န့ၣ်, အၢဒိၣ်န့ၢ်ဒံးအတၢ်မ့ၢ်တၢ်လၢအခီၣ်ထံး တက့ၢ်န့ၣ်လီၤ.

²¹လၢအဝဲသ့ၣ်အဂီၢ်န့ၣ်, မ့ၢ်တသ့ၣ်ညါဘၣ်တ့ၢ်လံတၢ်တီတၢ်လိၤအကျဲနီတဘျီဘၣ်ဒီး ကဂ့ၤဒိၣ်န့ၢ်ဒံးအသ့ၣ်ညါဝဲဝံၤအလီၢ်ခံဃၣ်ဒူချၢကွံာ် အသးလၢတၢ်မၤလိာ်စီဆှံလၢတၢ်ဟ့ၣ်လီၤအဝဲသ့ၣ်, တက့ၢ်န့ၣ်လီၤ.

²²တၢ်လၢအမၤတ့ၢ်အသးဒီးအဝဲသ့ၣ်န့ၣ်, ဒုးနဲၣ်ဝဲလၢတၢ်ကတိၤဒိတဖၣ်မ့ၢ်ဝဲတီဝဲလီၤ. “ထွံၣ်အီၣ်ကဒါက့ၤတၢ်လၢအဘှီးလီၤဝဲ” ဒီး “ထိးလၢအဘၣ်တၢ်သ့စီအီၤ, က့ၤကဒါက့ၤဆူတၢ်ကလိာ်လၢကပံာ်ကျါ” န့ၣ်လီၤ.