Read S'gaw Karen လံာ်ပှၤစံၣ်ညီၣ်ကွီၢ် 11 Bible Online

လံာ်ပှၤစံၣ်ညီၣ်ကွီၢ် 11 - S'gaw Karen bible

လံာ်ပှၤစံၣ်ညီၣ်ကွီၢ် 11

¹ဒီးစီၤယံးဖသးမ့ၢ်ပှၤသုးဖိအဒူအဃိၤတဂၤလၢဝ့ၢ်ကံးလဧး ဒီးမ့ၢ်ပိာ်မုၣ်ဟးဂီၤတဂၤအဖိခွါန့ၣ်လီၤ. ဒီးအပၢ်စီၤကံးလဧးအိၣ်ဒီးအဖိခွါအဂၤတဖၣ်လၢအမါဒၣ်ဝဲလီၤ.

²ဒီးဖဲအဝဲသ့ၣ်ဒိၣ်ထီၣ်ဒီးအဝဲသ့ၣ်မၤဆူၣ်မၤနၢၤစီၤယံးဖသး လၢကဟးထီၣ်ကွံာ်လၢအဟံၣ်လီၤ. အဝဲသ့ၣ်စံးဘၣ်အီၤ, “နတန့ၢ်သါဘၣ်တၢ်နီတမံၤလၢပပၢ်အအိၣ်ဘၣ်. နမ့ၢ်ပိာ်မုၣ်အဂၤတဂၤအဖိခွါန့ၣ်လီၤ.”

³ဒီးစီၤယံးဖသးဟးထီၣ်ကွံာ်လၢအဒီပုၢ်ဝဲၢ်တဖၣ်အအိၣ်ဒီးလဲၤ အိၣ်ဝဲလၢကီၢ်တိာ်အပူၤလီၤ. ဖဲန့ၣ်ပှၤကလီကလီဖိတဖၣ်ဟဲအိၣ်ဖှိၣ် ရိဖှိၣ်လၢအအိၣ်ဒီးအဝဲသ့ၣ်လဲၤသကိးတၢ်ဒီးအီၤန့ၣ်လီၤ.

⁴ဒီးတယံာ်ဘၣ်အလီၢ်ခံန့ၣ်ပှၤဧၣ်မိၣ်ဖိတဖၣ်ဟဲဒ်သိး ကဒုးတၢ်ထီဒါပှၤအံၣ်စရ့လးဖိတဖၣ်န့ၣ်လီၤ.

⁵ဖဲတၢ်အံၤမၤအသးဒီး, ပှၤကီၢ်ကံးလဧးဖိအခိၣ်အနၢ်တဖၣ်လဲၤဆူ ကီၢ်တိာ်ဒ်သိးအကကိးန့ၢ်က့ၤစီၤယံးဖသၤန့ၣ်လီၤ.

⁶ဒီးအဝဲသ့ၣ်စံးဘၣ်အီၤ, “ဟဲဒီးပၢဆှၢပှၤဒ်သိးပဒုးပှၤဧၣ် မိၣ်ဖိတဖၣ်ကန့ၢ်အဂီၢ်တက့ၢ်.”

⁷ဘၣ်ဆၣ်ဒီးစီၤယံးဖသၤစံးဆၢဝဲဒၣ်, “သုသးဟ့ယၤတုၤဒၣ်လဲာ် သုမၤဆူၣ်ယၤဒ်သိးယကဟးထီၣ်ကွံာ်လၢယပၢ်အဟံၣ်လီၤ. ခဲအံၤတုၤတၢ်ကိၢ်တၢ်ဂီၤဘၣ်သုဒီးဘၣ်မနုၤသုဟဲဆူယအိၣ်န့ၣ်လဲၣ်.”

⁸ဒီးအဝဲသ့ၣ်စံးဘၣ်စီၤယံးဖသၤ, “ပဟဲဆူနအိၣ်ခဲအံၤမ့ၢ်လၢပအဲၣ်ဒိးနကလဲၤဃုာ်တၢ်ဒီးပှၤ ဒီးဒုးပှၤဧၣ်မိၣ်ဖိတဖၣ်ဒီး ဆှၢပှၤကံးလဧးဖိခဲလၢာ်အဃိန့ၣ်လီၤ.”

⁹ဒီးစီၤယံးဖသၤစံးဘၣ်အဝဲသ့ၣ်, “သုမ့ၢ်က့ၤကိးယၤဆူဟံၣ် ဒ်သိးယကဒုးပှၤဧၣ်မိၣ်ဖိတဖၣ်, ဒီးယွၤမ့ၢ်ဟ့ၣ်ယၤတၢ်မၤနၢၤန့ၣ်ယကကဲပှၤပၢသုန့ၣ်လီၤ.”

¹⁰ဒီးအဝဲသ့ၣ်စံးဆၢဝဲဒၣ်, “ပအၢၣ်လီၤအီလီၤပသးဒီးနၤလီၤ. ယွၤမ့ၢ်ပှၤအုၣ်အသးလၢပဘၢၣ်စၢၤလီၤ.”

¹¹မၤသးဒ်န့ၣ်ဒီး, စီၤယံးဖသၤလဲၤတၢ်ဒီးပှၤကံးလဧးဖိအခိၣ်အနၢ် တဖၣ်ဒီးပှၤဂီၢ်မုၢ်ဒုးကဲထီၣ်အီၤလၢပှၤပၢတၢ်ဒီးခိၣ်နၢ်လၢ အဝဲသ့ၣ်အဖီခိၣ်န့ၣ်လီၤ. ဒီးစီၤယံးဖသၤအၢၣ်လီၤအီလီၤတၢ်ဒီးဟံးထီၣ်မူဒါဖဲ ဝ့ၢ်မံးစပၤလၢယွၤအမဲာ်ညါန့ၣ်လီၤ.

¹²တုၤနုၤတစု, စီၤယံးဖသၤဆှၢလီၤပှၤစိာ်တၢ်ကစီၣ်တဖၣ်ဆူဧၣ်မိၣ် အစီၤပၤအအိၣ်ဒ်သိးကစံးဝဲ, “တၢ်ဂ့ၢ်လၢနဃုတၢ်ထီဒုၣ်ဒါလိာ်နသးဒီးပှၤမ့ၢ်မနုၤတမံၤလဲၣ်. ဘၣ်မနုၤနဘၣ်ဟဲနုာ်ဒုးပထံပကီၢ်န့ၣ်လဲၣ်.”

¹³ဒီးဧၣ်မိၣ်အစီၤပၤစံးဆၢစီၤယံးဖသၤအကလူးတဖၣ်, “ဖဲပှၤအံၣ်စရ့လးဖိတဖၣ်ဟးထီၣ်လၢကီၢ်အဲၤကူပတူးန့ၣ်အဝဲ သ့ၣ်ဂုာ်န့ၢ်ယထံယကီၢ်စးထီၣ်လၢ ထံကျိအၢ်နိၣ်တုၤလၢထံကျိယးဘိးဒီးထံကျိယၢ်ဒ့ၣ်လီၤ. ခဲအံၤနကဘၣ်ဟ့ၣ်က့ၤမုာ်မုာ်န့ၣ်လီၤ.”

¹⁴စီၤယံးဖသၤဆှၢလီၤကဒါက့ၤကလူးတဖၣ်ဆူဧၣ်မိၣ်အစီၤပၤ အအိၣ်ဃုာ်ဒီးတၢ်စံးဆၢအံၤလီၤ.

¹⁵တမ့ၢ်ပှၤအံၣ်စရ့လးဖိဂုာ်န့ၢ်မိၤအး, မ့တမ့ၢ်ဧၣ်မိၣ်အကီၢ် န့ၣ်ဘၣ်.

¹⁶တၢ်မၤအသးန့ၣ်မ့ၢ်ဒ်အံၤလီၤ. ဖဲပှၤအံၣ်စရ့လးဖိတဖၣ်ဟးထီၣ် လၢကီၢ်အဲၤကူပတူးန့ၣ်အဝဲသ့ၣ်လဲၤခီဂာ်မဲးမုၢ်ခိၣ်ဆူအၤကဘၣ် ပီၣ်လဲၣ်က့ၣ်ကျီၤတုၤလၢကၤဒ့ၣ်န့ၣ်လီၤ.

¹⁷တုၤနုၤတစု, အဝဲသ့ၣ်ဆှၢလီၤကလူးတဖၣ်ဆူကီၢ်အဒိၣ်အစီၤပၤ အအိၣ်ဒ်သိးကဃ့တၢ်ပျဲလၢကလဲၤခီဂာ်ဘၣ် အထံအကီၢ်န့ၣ်လီၤ. ဘၣ်ဆၣ်ဒီးကီၢ်အဒိၣ်အစီၤပၤတပျဲအဝဲသ့ၣ်ဘၣ်. အဝဲသ့ၣ်ဃ့စ့ၢ်ကီးတၢ်ပျဲလၢကီၢ်မိၤအးအစီၤပၤန့ၣ်လီၤ. အဝဲစ့ၢ်ကီးတဟ့ၣ်တၢ်ပျဲလၢအဝဲသ့ၣ်ကလဲၤခီဂာ်အထံအကီၢ်ဘၣ်. မၤသးဒ်န့ၣ်ဒီးပှၤအံၣ်စရ့လးဖိတဖၣ်အိၣ်ကတီၢ်ဖဲကၤဒ့ၣ်န့ၣ်လီၤ.

¹⁸တုၤနုၤတစု, အဝဲသ့ၣ်လဲၤခီဖျိမဲးမုၢ်ခိၣ်ဒီးလဲၤတရံးကီၢ်အဒိၣ်ဒီးကီၢ်မိၤအး တုၤအတုၤလၢကီၢ်မိၤအးအမုၢ်ထီၣ်ဖဲထံကျိအၢ်နိၣ်အဘးခီန့ၣ်လီၤ. အဝဲသ့ၣ်သူၣ်အဒဲဖဲန့ၣ်ဘၣ်ဆၣ်ဒီးတလဲၤခီဂာ်ထံကျိအၢ်နိၣ်ဘၣ်. အဂ့ၢ်ဒ်အံၤ, မ့ၢ်ဝဲကီၢ်မိၤအးအထံဆၢကီၢ်ဆၢန့ၣ်လီၤ.

¹⁹တုၤနုၤတစု, ပှၤအံၣ်စရ့လးဖိတဖၣ်ဆှၢလီၤကလူးတဖၣ်ဆူကီၢ် အမိၢ်အစီၤပၤစီၤစံဃိၣ်လၢဝ့ၢ်ဃ့ၡဘိၣ်, ဒီးဃ့အီၤတၢ်ပျဲဒ်သိးကလဲၤခီဂာ်အထံအကီၢ်ဆူအဝဲသ့ၣ်အကီၢ်ဒၣ်ဝဲန့ၣ်လီၤ.

²⁰ဘၣ်ဆၣ်ဒီးစီၤပၤစံဃိၣ်တပျဲပှၤအံၣ်စရ့လးဖိတဖၣ်မၤဒ်န့ၣ်ဘၣ်. အဝဲပာ်ဖှိၣ်အသုးမုၢ်ဒီဖုဒီးသူၣ်အဒဲဖဲဝ့ၢ်ယါစၤဒီးဒုး ပှၤအံၣ်စရ့လးဖိတဖၣ်န့ၣ်လီၤ.

²¹ဘၣ်ဆၣ်ဒီးယွၤ, အံၣ်စရ့လးအကစၢ်, ဟ့ၣ်ပှၤအံၣ်စရ့လးဖိတဖၣ်လၢတၢ်မၤနၢၤစီၤစံဃိၣ်ဒီးအသုးမုၢ်န့ၣ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ်ဟံးန့ၢ် ကယဲၢ်ပှၤအမိၢ်ဖိအိၣ်လၢထံကီၢ်န့ၣ်အပူၤအလီၢ်အကျဲခဲလၢာ်န့ၣ်လီၤ.

²²ဒီးအဝဲသ့ၣ်ဟံးန့ၢ်ပၢဘၣ်ကယဲၢ်ပှၤအမိၢ်ဖိတဖၣ်အလီၢ်အကျဲ စးထီၣ်လၢထံကျိအၢ်နိၣ် လၢကလံၤထံးတခီတုၤလၢထံကျိ ယးဘိးလၢကလံၤစိးတခီ, ဒီးလၢမဲးမုၢ်ခိၣ်လၢမုၢ်ထီၣ်တခီ တုၤလၢထံကျိယၢ်ဒ့ၣ်လၢမုၢ်နုာ်တခီန့ၣ်လီၤ.

²³မၤသးဒ်န့ၣ်ဒီးယွၤ, အံၣ်စရ့လးအကစၢ်နီၣ်ထီၣ်ကွံာ်ပှၤအမိၢ်ဖိ တဖၣ်လၢအပှၤဂီၢ်မုၢ်ပှၤအံၣ်စရ့လးဖိတဖၣ်အဂီၢ်န့ၣ်လီၤ.

²⁴မ့ၢ်နအဲၣ်ဒိးမၤန့ၢ်က့ၤအီၤဧါ. တၢ်လၢနကစၢ် “ကမိၣ်” ဟ့ၣ်နၤန့ၣ်နဟံးဃာ်အီၤသ့လီၤ. မ့မ့ၢ်ပဝဲဒၣ်အံၤပကဟံးဃာ် တၢ်ကိးမံၤဒဲးလၢယွၤ, ပကစၢ်ဟ့ၣ်လီၤပှၤန့ၣ်လီၤ.

²⁵မ့ၢ်နဆိကမိၣ်လီၤနသးလၢနဂ့ၤန့ၢ်မိၤအးအစီၤပၤစီၤဘၤလးလၢ အမ့ၢ်စီၤစံးပိၢ်အဖိခွါန့ၣ်ဧါ. မ့ၢ်အဝဲတၤပှၤအံၣ်စရ့လးဖိတစုစုဧါ. မ့ၢ်အဝဲဒုးတၢ်ထီဒါပှၤတစုစုဧါ.

²⁶ဒီးလၢအနံၣ်သၢကယၤအတီၢ်ပူၤန့ၣ်ပှၤအံၣ်စရ့လးဖိဟံးန့ၢ်ပၢ ဘၣ်ဝ့ၢ်ဃ့ၡဘိၣ်ဒီးဝ့ၢ်ဧရိၤဧ့ၢ်ဒီးဝ့ၢ်ဖိလၢအအိၣ်လၢအခိၣ်အဃၢၤတဖၣ်, ဒီးကယဲၢ်ဝ့ၢ်လၢအအိၣ်လၢထံကျိအၢ်နိၣ်အကၢၢ်ခိၣ်တဖၣ်န့ၣ်လီၤ. ဘၣ်မနုၤသုတဟံးန့ၢ်က့ၤအီၤလၢအခါဖဲန့ၣ်လဲၣ်.

²⁷ယတမၤကမၣ်သုတၢ်နီတမံၤဘၣ်. မ့ၢ်သုမၤကမၣ်ယၤခီဖျိသု ဒုးတၢ်ဒီးယၤလီၤ. ယွၤမ့ၢ်စံၣ်ညီၣ်ကွီၢ်လီၤ. တနံၤအံၤအဝဲကစံၣ်ညီၣ်တၢ်လၢပှၤအံၣ်စရ့လးဖိဒီးပှၤဧၣ်မိၣ် ဖိတဖၣ်အဘၢၣ်စၢၤန့ၣ်လီၤ.

²⁸ဘၣ်ဆၣ်ဒီးဧၣ်မိၣ်အစီၤပၤတဒိကနၣ်တၢ်ကစီၣ်လၢစီၤယံးဖသၤ အအိၣ်အံၤဘၣ်.

²⁹တုၤနုၤတစု, ယွၤအသးလီၤဘၣ်လၢစီၤယံးဖသၤအလိၤလီၤ. အဝဲလဲၤခီဂာ်ကီၢ်ကံးလဧး, ကီၢ်မနၤၡ့ၤ, ဒီးဟဲက့ၤဆူဝ့ၢ် မံးစပၤလၢကီၢ်ကံးလဧးအပူၤဒီးလဲၤဆူကီၢ်ဧၣ်မိၣ်န့ၣ်လီၤ.

³⁰ဒီးစီၤယံးဖသၤအၢၣ်လီၤယွၤ, “နမ့ၢ်ဒုးမၤနၢၤယၤလၢပှၤဧၣ် မိၣ်ဖိတဖၣ်န့ၣ်,

³¹ယကလုၢ်ထီၣ်ပှၤအဆိကတၢၢ်တဂၤလၢအဟဲထီၣ်လၢယဟံၣ်ပူၤဒ်သိး အကသဂၢၢ်ယၤဖဲယဟဲက့ၤလၢတၢ်မၤနၢၤအကတီၢ်န့ၣ်လီၤ. ယကလုၢ်ထီၣ်ပှၤတဂၤန့ၣ်ဆူနအိၣ်ဒ်တၢ်လုၢ်တၢ်ပာ်အသိးန့ၣ်လီၤ.”

³²မၤသးဒ်န့ၣ်, ဒီးစီၤယံးဖသၤလဲၤခီဂာ်ထံကျိဒ်သိးအကဒုးပှၤဧၣ် မိၣ်ဖိတဖၣ်ဒီးယွၤဟ့ၣ်အီၤတၢ်မၤနၢၤလီၤ.

³³အဝဲဒၣ်မၤဒၢၣ်ကွံာ်ပှၤဧၣ်မိၣ်ဖိတဖၣ်စးထီၣ်လၢဝ့ၢ်ဧရိၤဧ့ၢ် ပၢၢ်တုၤလၢဝ့ၢ်မံးနံးအခိၣ်အဃၢၤဝးတရံး, ဝ့ၢ်ခဲလၢာ်ခဲဆ့အဖျၢၣ်ခံဆံဒီးတုၤဒၣ်လဲာ်လၢ ဟ့းဘ့းလးကရၤမံ န့ၣ်လီၤ. တၢ်မၤသံမၤဝီဖးဒိၣ်အိၣ်ဖဲန့ၣ်ဒီးပှၤဧၣ်မိၣ်ဖိတဖၣ် ဘၣ်တၢ်မၤနၢၤကွံာ်အီၤလၢပှၤအံၣ်စရ့လးဖိတဖၣ်န့ၣ်လီၤ.

³⁴ဒီးဖဲစီၤယံးဖသၤက့ၤဆူအဟံၣ်အိၣ်လၢမံးစပၤန့ၣ်အဖိမုၣ်ဟဲ ထီၣ်လၢဟံၣ်ပူၤဒ်သိးအကသဂၢၢ်အီၤ, အိၣ်ဒီးတၢ်ဂဲၤကလံာ်ဒီးတၢ်ပှီၢ်ဒၢန့ၣ်လီၤ. အဝဲမ့ၢ်ဖိမုၣ်ထဲတဂၤဧိၤန့ၣ်လီၤ.

³⁵ဒီးဖဲအထံၣ်ဘၣ်အဖိမုၣ်န့ၣ်အဝဲဖှီယာ်အဆ့ကၤလၢတၢ်သးအုးအပူၤဒီးစံး, “အိ, ယဖိမုၣ်ဧၢ, နမၤသ့ၣ်ဖးယသးလီၤ. ဘၣ်မနုၤအဃိလၢနဘၣ်မ့ၢ်ပှၤမၤဘၣ်ဒိဆါယၤန့ၣ်လဲၣ်. ယမၤတ့ၢ်တၢ်အၢၣ်လီၤသညူးသပှၢ်ဆူယွၤဒီးယထုးက့ၤတသ့လၢၤဘၣ်.”

³⁶ဒီးအဖိမုၣ်စံးဘၣ်အီၤ, “နမ့ၢ်မၤတ့ၢ်တၢ်အၢၣ်လီၤဒီးယွၤ န့ၣ်မၤတၢ်ဒ်နစံးလၢနကမၤယၤအသိးန့ၣ်တက့ၢ်. အဂ့ၢ်ဒ်အံၤယွၤဟ့ၣ်လီၤနၤလၢနကဟ့ၣ်ကၣ်က့ၤနဒုၣ်နဒါပှၤဧၣ်မိၣ်ဖိတဖၣ်န့ၣ်လီၤ.”

³⁷ဘၣ်ဆၣ်ဒီးအဝဲဃ့တၢ်လၢအပၢ်, “မၤတၢ်တမံၤအံၤလၢယဂီၢ်တက့ၢ်. ပျဲယၤခံလါဒ်သိးယကလဲၤဟးဆူကစၢၢ်ကလိဃုာ်ဒီး ယတံၤသကိးတဖၣ်ဒီးသူၣ်အုးသးအုးမ့ၢ်လၢယကဘၣ်သံဒ်မုၣ်လိၤဘိတဂၤအသိးအဃိန့ၣ်တက့ၢ်.”

³⁸ဒီးအဝဲတဲဘၣ်အဖိမုၣ်လၢကလဲၤဝဲဒီးပျဲအီၤခံလါန့ၣ်လီၤ. အဖိမုၣ်ဒီးအတံၤသကိးတဖၣ်လဲၤဆူကစၢၢ်ကလိဒီးသူၣ်အုးသးအုး မ့ၢ်လၢအဝဲကဘၣ်သံမုၣ်ကနီၤဒီးအဖိတအိၣ်ဘၣ်အဃိန့ၣ်လီၤ.

³⁹ခံလါပူၤကွံာ်ဒီးအဝဲဟဲက့ၤဆူအပၢ်အအိၣ်လီၤ. ဒီးအပၢ်မၤတၢ်ဒ်အအၢၣ်လီၤယွၤအသိးဒီးအဖိမုၣ်သံဝဲဒ်မုၣ်လိၤဘိတဂၤအသိးန့ၣ်လီၤ. အဝဲအံၤမ့ၢ်ပှၤအံၣ်စရ့လးဖိတဖၣ်အလုၢ်အလၢ်အခီၣ်ထံး,

⁴⁰လၢပိာ်မုၣ်သးစၢ်တဖၣ်ကဟးထီၣ်တနံၣ်လွံၢ်သီ လၢအကသူၣ်အုးသးအုးလၢပှၤကံးလဧးဖိ စီၤယံးဖသၤအဖိမုၣ်အဂီၢ်န့ၣ်လီၤ.