Read S'gaw Karen လံာ်ပှၤစံၣ်ညီၣ်ကွီၢ် 16 Bible Online

လံာ်ပှၤစံၣ်ညီၣ်ကွီၢ် 16 - S'gaw Karen bible

လံာ်ပှၤစံၣ်ညီၣ်ကွီၢ် 16

¹ဘၣ်တနံၤစီၤၡံၣ်ၡိၣ်လဲၤဆူပှၤဖလ့ၡသးဖိအဝ့ၢ်ဂါစၤဒီးဖဲန့ၣ် ထံၣ်လိာ်ပှၤဃဲသဲမုၣ်တဂၤဒီးမံဃုာ်ဒီးအီၤလီၤ.

²ဒီးပှၤဂါစၤဖိတဖၣ်သ့ၣ်ညါဝဲလၢစီၤၡံၣ်ၡိၣ်အိၣ်ဖဲန့ၣ်အဃိ အဝဲသ့ၣ်ကဝီၤဃးတၢ်လီၢ်န့ၣ်ဒီးခိးအီၤသီတနၤကျၢၤလၢဝ့ၢ်အပဲတြီန့ၣ်လီၤ. အဝဲသ့ၣ်အိၣ်ဃိကလာ်ဒီနၤဒီးဆိကမိၣ်လၢအသးပူၤ, “ပကခိးတုၤမုၢ်ဆ့ၣ်ထီၣ်ဒီးပကမၤသံကွံာ်အီၤလီၤ.”

³ဘၣ်ဆၣ်ဒီးစီၤၡံၣ်ၡိၣ်အိၣ်လၢလီၢ်မံခိၣ်တုၤဒၣ်ဖးဖီမုၢ်လီၤ. ဝံၤဒီးအဝဲဂဲၤဆၢထၢၣ်ဟံးဃာ်ဝ့ၢ်အတြဲၤ, ထုးထီၣ်ကွံာ်အီၤဃုာ်ဒီးတြဲၤတဖၣ်, တြဲၤအထူၣ်တဖၣ်, နီၣ်ဝံၣ်ခံဒီးတၢ်အဂၤခဲလၢာ်လီၤ. အဝဲပာ်ထီၣ်တၢ်တဖၣ်န့ၣ်လၢအဖံဘၣ်ခိၣ်ဒီးစိာ်ကွံာ်အီၤဆူ တၢ်လူၢ်ဒီခိၣ်ဖဲတၢ်ကွၢ်စိဃီၤဝ့ၢ်ဃ့ဘြိၣ်န့ၣ်လီၤ.

⁴တၢ်န့ၣ်အလီၢ်ခံ, စီၤၡံၣ်ၡိၣ်အဲၣ်ဘၣ်ပိာ်မုၣ်တဂၤလၢအမံၤမ့ၢ် နီၢ်ဒလံလၤလၢအအိၣ်ဝဲဖဲစိရ့းအတၢ်ပျီပူၤန့ၣ်လီၤ.

⁵ပှၤဖလ့ၡသးဖိအစီၤပၤယဲၢ်ဂၤလဲၤဆူပိာ်မုၣ်အိၣ်ဒီးစံး, “လွဲန့ၣ်စီၤၡံၣ်ၡိၣ်ဒ်သိးအကတဲဘၣ်နၤလၢ ဘၣ်မနုၤအဃိအဂံၢ်အဘါဆူၣ်ဝဲထဲန့ၣ်ညါဒီးပမၤနၢၤအီၤ, စၢအီၤဒီးမၤစၢ်လီၤအဂံၢ်အဘါကသ့ဒ်လဲၣ်အဂ့ၢ်တက့ၢ်. ပဝဲတဂၤစုာ်စုာ်ကဟ့ၣ်နၤစ့နီၢ်အဘ့ၣ်တကထိတကယၤန့ၣ်လီၤ.”

⁶မၤသးဒ်န့ၣ်, ဒီးနီၢ်ဒလံလၤစံးဘၣ်စီၤၡံၡိၣ်, “ဝံသးစူၤတဲဘၣ်ယၤတၢ်မနုၤမၤဆူၣ်ထီၣ်နဂံၢ်နဘါဆူၣ်ဆူၣ်ကလဲာ်န့ၣ်လဲၣ်. ပှၤမ့ၢ်အဲၣ်ဒိးစၢဃာ်နၤဒ်သိး အကမၤစၢ်လီၤနၤန့ၣ်မၤဝဲကသ့ဒ်လဲၣ်.”

⁷စီၤၡံၣ်ၡိၣ်စံးဆၢ, “အဝဲသ့ၣ်မ့ၢ်စၢယၤလၢချံၣ်အပျံၤအသံ ကစဲာ်နွံဘိန့ၣ်ယဂံၢ်ယဘါကစၢ်လီၤဒ်ပှၤဂၤအသိးန့ၣ်လီၤ.”

⁸မၤသးဒ်န့ၣ်ဒီး, ပှၤဖလ့ၡသးဖိအစီၤပၤတဖၣ်ဟဲစိာ်န့ၢ်ဝဲ နီၢ်ဒလံလၤလၢချံၣ်အပျံၤအသံကစဲၣ်နွံဘိဒီးအဝဲစၢဃာ်စီၤၡံၣ်ၡိၣ်န့ၣ်လီၤ.

⁹အဝဲအိၣ်ဒီးပှၤတနီၤခိးတၢ်လၢဒၢးအဂၤတဒၢးသတးဒီးကိးပသူ ထီၣ်ဝဲ, “စီၤၡံၣ်ၡိၣ်ဧၢ, ပှၤဖလ့ၡသးဖိတဖၣ်ဟဲလံ.” ဘၣ်ဆၣ်ဒီးစီၤၡံၣ်ၡိၣ်မၤထီၣ်တဲာ်ကွံာ်ချံၣ်အပျံၤတဖၣ်န့ၣ် ဒ်လုၣ်ဖျ့ဖိတဖၣ်တဲာ်ကွံာ်ဖဲအဘၣ်လၢမ့ၣ်အူအခါအသိးန့ၣ်လီၤ. မၤသးဒ်န့ၣ်ဒီး, အဝဲသ့ၣ်တသ့ၣ်ညါစီၤၡံၣ်ၡိၣ်အဂံၢ်အဘါအတၢ်ခူ သူၣ်ဒံးဘၣ်န့ၣ်လီၤ.

¹⁰ဒီးနီၢ်ဒလံလၤစံးဘၣ်စီၤၡံၣ်ၡိၣ်, “ကွၢ်ကွၢ်, နမၤပျုၢ်ယၤဒီးနတတဲဘၣ်ယၤတၢ်မ့ၢ်တၢ်တီဘၣ်. ဝံသးစူၤတဲယၤလၢပှၤစၢဃာ်နၤကသ့ဒ်လဲၣ်န့ၣ်တက့ၢ်.”

¹¹အဝဲစံးဆၢပိာ်မုၣ်န့ၣ်, “အဝဲသ့ၣ်မ့ၢ်စၢယၤလၢပျံၤအသီလၢ ပှၤတသူဘၣ်အီၤနီတဘျီဒံးဘၣ်န့ၣ်ယဂံၢ်ယဘါကစၢ်ဝဲဒ်ပှၤဂၤ အသိးန့ၣ်လီၤ.”

¹²မၤသးဒ်န့ၣ်ဒီး, နီၢ်ဒလံလၤမၤန့ၢ်ပျံၤအသီတဖၣ်ဒီးစၢအီၤလီၤ. ဒီးကိးထီၣ်ဝဲ, “စီၤၡံၣ်ၡိၣ်ဧၢ, ပှၤဖလ့ၡသးဖိတဖၣ်ဟဲလံ.” ပှၤပိာ်ခွါတဖၣ်ခိးတၢ်လၢဒၢးအဂၤတဒၢးအပူၤန့ၣ်လီၤ. ဘၣ်ဆၣ်ဒီးအဝဲမၤထီၣ်တဲာ်ကွံာ်ပျံၤတဖၣ်လၢ အစုဒုၣ်အလိၤဒ်လုၣ်ဖျ့ဖိအသိးန့ၣ်လီၤ.

¹³ဒီးနီၢ်ဒလံလၤစံးဘၣ်စီၤၡံၡိၣ်, “နမၤပျုၢ်ယၤတုၤခဲအံၤဒီးနတတဲယၤလၢတၢ်မ့ၢ်တၢ်တီဘၣ်. တဲဘၣ်ယၤလၢပှၤစၢဃာ်နၤကသ့ဒ်လဲၣ်န့ၣ်တက့ၢ်.” အဝဲစံးဆၢ, “နမ့ၢ်ထါယခိၣ်သူနွံပျ့လၢထၣ်အပူၤဒီးမၤဃံးတံၢ်အီၤလၢ နီၣ်ပျၤစူတဘိန့ၣ်ယဂံၢ်ယဘါကစၢ်လီၤဝဲဒ်ပှၤဂၤအသိးန့ၣ်လီၤ.”

¹⁴တုၤနုၤတစု, နီၢ်ဒလံလၤမၤမံအီၤ, ဟံးန့ၢ်အခိၣ်သူနွံပျ့ ဒီးထါအီၤလၢထၣ်အပူၤန့ၣ်လီၤ. ဒီးမၤဃံးတံၢ်အီၤလၢနီၣ်ပျၤစူတဘိ ဝံၤကိးထီၣ်ဝဲ, “စီၤၡံၣ်ၡိၣ်ဧၢ, ပှၤဖလ့ၡသးဖိတဖၣ်ဟဲလံ.” ဘၣ်ဆၣ်ဒီးအဝဲပၢၢ်ထီၣ်ဒီးထုးထီၣ်ကွံာ်အခိၣ်သူလၢထၣ်အပူၤန့ၣ်လီၤ.

¹⁵မၤသးဒ်န့ၣ်ဒီး, နီၢ်ဒလံလၤစံးဘၣ်အီၤ, “နတအဲၣ်ယၤနီၢ်နီၢ်ဘၣ် ဒီးနစံးလၢနအဲၣ်ယၤကသ့ဒ်လဲၣ်. နမၤပျုၢ်တ့ၢ်ယၤသၢဘျီ ဒီးနတတဲဘၣ်ဒံးယၤလၢတၢ်မနုၤမၤဆူၣ်ထီၣ် နဂံၢ်နဘါဒိၣ်ဒိၣ်ကလဲာ်အဂ့ၢ်န့ၣ်ဘၣ်.”

¹⁶ဒီးပိာ်မုၣ်န့ၣ်သံကွၢ်ဆူၣ်အီၤတနံၤဘၣ်တနံၤလီၤ. အဝဲအသးအ့န့ဒီးလီၤဘှံးဝဲလၢပိာ်မုၣ်အံၤမၤတံာ်တာ်အီၤ လၢတၢ်န့ၣ်အဃိ,

¹⁷တုၤဒၣ်လဲာ်လၢခံကတၢၢ်န့ၣ်တဲဘၣ်ပိာ်မုၣ်န့ၣ်လၢတၢ်မ့ၢ်တၢ်တီ, “ယခိၣ်သူန့ၣ်တဘၣ်တၢ်လူၤအီၤနီတစုဘၣ်. ယဘၣ်တၢ်ပာ်စီဆှံထီၣ်ယၤဆူကစၢ်ယွၤအအိၣ် ဒ်ပှၤနစၤရံဖိတဂၤအသိးစးထီၣ်လၢယအိၣ်ဖျဲၣ်ထီၣ်အကတီၢ်န့ၣ်လီၤ. ယခိၣ်သူမ့ၢ်ဘၣ်တၢ်လူၤအီၤဒီး ယဂံၢ်ယဘါကလီၤမၢ်ကွံာ်ဝဲဒီးယဂံၢ်ယဘါကစၢ်လီၤဝဲဒ်ပှၤဂၤအသိး န့ၣ်လီၤ.”

¹⁸ဖဲနီၢ်ဒလံလၤသ့ၣ်ညါသပှၢ်တၢၢ်လၢအဝဲတဲဘၣ်အီၤတၢ်မ့ၢ်တၢ်တီလံန့ၣ်, အဝဲဆှၢလီၤတၢ်ကစီၣ်ဆူပှၤဖလ့ၡသးဖိအစီၤပၤတဖၣ်အအိၣ်ဒီးစံး, “ဟဲကဒီးတဘျီတက့ၢ်. အဝဲတဲဘၣ်ယၤတၢ်မ့ၢ်တၢ်တီ လံ.” တုၤနုၤတစု, အဝဲသ့ၣ်ဟဲဒီးစိာ်ဃုာ်ဒီးတိၢ်တဖၣ်န့ၣ်လီၤ.

¹⁹ဒီးနီၢ်ဒလံလၤမၤမံစီၤၡံၣ်ၡိၣ်လၢအကံၣ်ဒုၣ်အလိၤဝံၤဒီး ကိးန့ၢ်ပှၤတဂၤလၢကလူၤကွံာ်စီၤၡံၣ်ၡိၣ်အခိၣ်သူနွံပျ့န့ၣ်လီၤ. ဒီးပိာ်မုၣ်န့ၣ်စးထီၣ်မၤဆါအီၤနးနးကလဲာ်မ့ၢ်လၢ အဂံၢ်အဘါလီၤမၢ်ကွံာ်ဝဲအဃိလီၤ.

²⁰တုၤနုၤတစု, ပိာ်မုၣ်န့ၣ်ကိးထီၣ်ဝဲ, “စီၤၡံၣ်ၡိၣ်ဧၢ, ပှၤဖလ့ၡသးဖိတဖၣ်ဟဲလံ.” အဝဲပၢၢ်ထီၣ်ဒီးဆိကမိၣ်ဝဲ, “ယကထူၣ်ဖျဲးထီၣ်ဒ်ကိးဘျီဒဲးအသိးန့ၣ်လီၤ.” အဝဲတသ့ၣ်ညါဝဲလၢယွၤလဲၤသဒၣ်ကွံာ်အီၤလံန့ၣ်ဘၣ်.

²¹ပှၤဖလ့ၡသးဖိတဖၣ်ဖီၣ်န့ၢ်အီၤဒီးထုးထီၣ်ကွံာ်အမဲာ်ချံလီၤ. ဒီးအဝဲသ့ၣ်လဲၤစိာ်အီၤဆူဝ့ၢ်ဂါစၤ, စၢအီၤလၢထးသွဲတိၢ်ဘီတဖၣ်ဒီးမၢအဂူာ်ဆၢၣ်ဂူာ်လၢဃိာ်ပူၤန့ၣ်လီၤ.

²²ဘၣ်ဆၣ်ဒီးအခိၣ်သူထီၣ်ကဒါက့ၤဝဲလီၤ.

²³ဒီးပှၤဖလ့ၡသးဖိအစီၤပၤတဖၣ်ပာ်ဖှိၣ်ထီၣ်အသးဒ်သိးအကလုၢ် ထီၣ်တၢ်လုၢ်ဖးဒိၣ်တမံၤဆူအကစၢ်ဒၤကိၣ်န့ၣ်လီၤ. အဝဲသ့ၣ်သးဝံၣ်ထီၣ်တၢ်စံးဝဲ, “ပကစၢ်ဟ့ၣ်လံပှၤလၢတၢ်မၤနၢၤ ပဒုၣ်ပဒါစီၤၡံၣ်ၡိၣ်လံ.”

²⁴အဝဲသ့ၣ်မုာ်လၤသးခုသကိးဒီးစံး, “ကိးစီၤၡံၣ်ၡိၣ်ဒီးမ်ပကမၢအမၤသးဖှံပှၤတက့ၢ်.”

²⁵ဖဲအဝဲသ့ၣ်ဟဲစိာ်ထီၣ်စီၤၡံၣ်ၡိၣ်လၢဃိာ်ပူၤန့ၣ်အဝဲသ့ၣ်မၢ အမၤသးဖှံအီၤဒီးမၢအဆၢထၢၣ်လၢတၢ်အထူၣ်တဖၣ်အကဆူးန့ၣ်လီၤ. ဖဲပှၤဂီၢ်မုၢ်ထံၣ်အီၤန့ၣ်အဝဲသ့ၣ်သးဝံၣ်စံးထီၣ်ပတြၢၤအကစၢ်, “ပကစၢ်ဟ့ၣ်လံပှၤလၢတၢ်မၤနၢၤပဒုၣ်ပဒါလၢ အမၤဟးဂူာ်ဟးဂီၤပကီၢ်ဒီးမၤသံတ့ၢ်ပှၤအါဂၤန့ၣ်လံ.”

²⁶စီၤၡံၣ်ၡိၣ်စံးဘၣ်ဖိသၣ်ပိာ်ခွါလၢအဟံးအစုနဲၣ်အီၤကျဲန့ၣ်, “ပျဲယထိးဘၣ်ထူၣ်လၢအစိာ်ဃာ်တၢ်သူၣ်ထီၣ်တက့ၢ်. တၢ်မိၣ်သန့ၤလီၤယသးလၢအီၤလီၤ.”

²⁷ဒီးတၢ်သူၣ်ထီၣ်န့ၣ်ပှဲၤဝဲဒီးပိာ်မုၣ်ပိာ်ခွါတဖၣ်လီၤ. ပှၤဖလ့ၡသးဖိအစီၤပၤယဲၢ်ဂၤလၢာ်အိၣ်ဖဲန့ၣ်ဒီးပိာ်မုၣ်ပိာ် ခွါခဲလၢာ်ကအိၣ်ဝဲအဂၤသၢကထိလၢတၢ်သူၣ်ထီၣ်ဖီခိၣ်လၢ အကွၢ်ကီစီၤၡံၣ်ၡိၣ်မၤသးဖှံအဝဲသ့ၣ်န့ၣ်လီၤ.

²⁸တုၤနုၤတစု, စီၤၡံၣ်ၡိၣ်ဘါထုကဖၣ်, “တၢ်ဒိၣ်ကစၢ်ဧၢ, သ့ၣ်နီၣ်ထီၣ်က့ၤလၢ်ယၤတက့ၢ်. ကစၢ်ယွၤဧၢ, ဟ့ၣ်ယၤတၢ်ဂံၢ်တၢ်ဘါထဲအအံၤတစု ဒ်သိးယကဟ့ၣ်ကၣ်ပှၤဖလ့ၡသးဖိတဖၣ်လၢယမဲာ်ချံခံဖျၢၣ်အဂီၢ်န့ၣ်တက့ၢ်.”

²⁹မၤသးဒ်န့ၣ်ဒီး, စီၤၡံၣ်ၡိၣ်ဟံးဃာ်ထူၣ်အိၣ်လၢတၢ်ခၢၣ်သးခံထူၣ်လၢအစိာ်ဃာ် တၢ်သူၣ်ထီၣ်န့ၣ်လီၤ. ပာ်အစုလၢအလိၤတခီတထူၣ်ဒီးဆီၣ်ဝဲဒၣ်လီၤ.

³⁰ဒီးကိးထီၣ်ဝဲ, “မ်ယသံဃုာ်ဒီးပှၤဖလ့ၡသးဖိတဖၣ်တက့ၢ်.” ဒီးအဝဲဆီၣ်ဝဲလၢအဂံၢ်အဘါခဲလၢာ်ဒီး တၢ်သူၣ်ထီၣ်လီၤပှီၢ်လၢစီၤပၤယဲၢ်ဂၤဒီးပှၤခဲလၢာ်အလိၤလီၤ. စီၤၡံၣ်ၡိၣ်မၤသံပှၤဖဲအသံအခါအံၤအါန့ၢ်ဒံးအမၤသံတ့ၢ်ဝဲ ဖဲအမူဒံးအဖၢမုၢ်န့ၣ်လီၤ.

³¹ဒီးအဒီပုၢ်ဝဲၢ်ခွါတဖၣ်ဒီးအဒူၣ်ဖိထၢဖိအဂၤတဖၣ်ဟဲဟံးန့ၢ်က့ၤအစိၣ်လီၤ. အဝဲသ့ၣ်က့ၤစိာ်အီၤဒီးခူၣ်လီၤအီၤလၢဝ့ၢ်စိးရၤဒီးအ့ၤ ၡကိလးအဘၢၣ်စၢၤလၢအပၢ်စီၤမၤနိအသွၣ်ခိၣ်လီၤ. အဝဲကဲတ့ၢ်ပှၤအံၣ်စရ့လးဖိအခိၣ်အနံၣ်ခံဆံန့ၣ်လီၤ.