Read S'gaw Karen လံာ်ပှၤစံၣ်ညီၣ်ကွီၢ် 20 Bible Online

လံာ်ပှၤစံၣ်ညီၣ်ကွီၢ် 20 - S'gaw Karen bible

လံာ်ပှၤစံၣ်ညီၣ်ကွီၢ် 20

¹ဒီးအံၣ်စရ့လးအပှၤဂီၢ်မုၢ်လၢအအိၣ်လၢဒၣ်လၢကလံၤစိးတုၤလၢ ဘ့ၤၡဘၤလၢကလံၤထံး, ဒီးလၢကံးလဧးလၢမုၢ်ထီၣ်ခဲလၢာ်ပာ်ဖှိၣ်ထီၣ်အသးတဖုဃီလၢ ယွၤအမဲာ်ညါဖဲမံးစပၤန့ၣ်လီၤ.

²ဒီးအံၣ်စရ့လးအဒူၣ်ခဲလၢာ်အခိၣ်အနၢ်တဖၣ်အိၣ်ဖဲယွၤအပှၤဂီၢ် မုၢ်ပာ်ဖှိၣ်ထီၣ်အသးအလီၢ်န့ၣ်လီၤ. ဒီးပှၤသုးဖိလဲၤတၢ်လၢအခီၣ်အိၣ်ဝဲလွံၢ်ကလီၢ်န့ၣ်လီၤ.

³ဒီးဖဲအကတီၢ်န့ၣ်ပှၤဘံၣ်ယၤမံၣ်ဖိတဖၣ်နၢ်ဟူဝဲလၢအံၣ်စရ့လးအဒူၣ်အဂၤခဲလၢာ် ပာ်ဖှိၣ်ထီၣ်အသးဖဲမံးစပၤန့ၣ်လီၤ. ပှၤအံၣ်စရ့လးဖိတဖၣ်သံကွၢ်ဝဲ, “တဲဘၣ်ပှၤလၢတၢ်မၤအၢမၤသီတမံၤအံၤမၤတ့ၢ်အသးဒ်လဲၣ်အဂ့ၢ်န့ၣ်တက့ၢ်.”

⁴ပှၤလ့ၤဝံဖိလၢအသံၣ်မါဘၣ်တၢ်မၤသံအီၤန့ၣ်စံးဆၢဝဲဒၣ်, “ယၤဒီးယသံၣ်မါပလဲၤဆူဝ့ၢ်ကံဘဧၤအိၣ်လၢကီၢ်ဘံၣ်ယၤမံၣ် အပူၤဒ်သိးပကအိၣ်ကတီၢ်ဖဲန့ၣ်တနၤလီၤ.

⁵ဒီးပှၤကံဘဧၤဖိတဖၣ်ဟဲကဝီၤဃးဟံၣ်လၢမုၢ်နၤန့ၣ်လၢကမၤန့ၢ် ယၤအဂီၢ်လီၤ. အဝဲသ့ၣ်တိာ်သူၣ်ပာ်သးလၢကမၤသံယၤနာ်သက့ အဝဲသ့ၣ်မၤတရီတပါယသံၣ်မါဒီးပိာ်မုၣ်န့ၣ်သံဝဲလီၤ.

⁶ဒီးယဟံးန့ၢ်ပိာ်မုၣ်အစိၣ်န့ၣ်ဒီးဒီၣ်တဲာ်အီၤတကူာ်တကူာ်ဒီး ဆှၢလီၤဆူအံၣ်စရ့လးအဒူၣ်တဖၣ်တကူာ်စုာ်စုာ်န့ၣ်လီၤ. ပှၤတဖုအံၤမၤတ့ၢ်တၢ်အၢတၢ်သီဒီးတၢ်ဒဲးဘးလၢပကျါလီၤ.

⁷သုဝဲလၢအအိၣ်ဖဲအံၤခဲလၢာ်မ့ၢ်ပှၤအံၣ်စရ့လးဖိတဖၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ်ပကမၤအီၤဒ်လဲၣ်.”

⁸ဒီးပှၤဂီၢ်မုၢ်ခဲလၢာ်ဆၢထၢၣ်ဒီးစံး, “ပဝဲလၢအအိၣ်လၢဒဲ အပူၤမ့ၢ်ဂ့ၤ, ဟံၣ်အပူၤမ့ၢ်ဂ့ၤ, တက့ၤဘၣ်ဆူဟံၣ်နီတဂၤဘၣ်.

⁹ပကမၤတၢ်ဒ်အံၤလီၤ. ပကဖီၣ်တၢ်ဖးဒီးဃုထၢပှၤတနီၤလၢကဒုးကံ ဘဧၤန့ၣ်လီၤ.

¹⁰ပှၤဆံဆဲၣ်ပူတပူၤလၢအံၣ်စရ့လးအပူၤကဟ့ၣ်တၢ်အီၣ်တၢ်အီလၢ သုးမုၢ်အဂီၢ်ဒီးပှၤအဂၤတဖၣ်န့ၣ်ကလဲၤစံၣ်ညီၣ်ကံဘဧၤ လၢအတၢ်ဒဲးဘးလၢအမၤတ့ၢ်ဝဲလၢအံၣ်စရ့လးအပူၤအဃိန့ၣ်လီၤ.”

¹¹ပှၤကိးဂၤဒဲးလၢအံၣ်စရ့လးအပူၤပာ်ဖှိၣ်ထီၣ်အသးလၢတၢ်တိာ် တမံၤဃီ, လၢအကဒုးဝ့ၢ်န့ၣ်လီၤ.

¹²ဒီးအံၣ်စရ့လးအဒူၣ်တဖၣ်ဆှၢလီၤပှၤစိာ်တၢ်ကစီၣ်သကုၤ ဘံၣ်ယၤမံၣ်အဒူၣ်အကီၢ်ပူၤဒ်သိးကစံးဝဲ, “တၢ်မၤအၢမၤသီလၢသုမၤတ့ၢ်အံၤန့ၣ်မ့ၢ်တၢ်မနုၤလဲၣ်.

¹³ဟ့ၣ်လီၤပှၤလၢပှၤအိၣ်ဒီးလုၢ်လၢ်သကဲးပဝာ်အၢသီတဖၣ်လၢကံဘဧၤအပူၤန့ၣ် ဒ်သိးပကမၤသံအီၤဒီးသုးကွံာ်တၢ်အၢတၢ်သီအံၤလၢအံၣ်စရ့လးပူၤတက့ၢ်.” ဘၣ်ဆၣ်ဒီးပှၤဘံၣ်ယၤမံၣ်ဖိ တဖၣ်တပာ်ကဲဘၣ်အံၣ်စရ့လးအဒူၣ်အဂၤတဖၣ်ဘၣ်.

¹⁴ဒီးပှၤအိၣ်လၢဘံၣ်ယၤမံၣ်အဝ့ၢ်ခဲလၢာ်အပူၤတဖၣ်ဟဲဆူကံး ဘဧၤဒ်သိးအကဒုးပှၤအံၣ်စရ့လးဖိအဂၤတဖၣ်လီၤ.

¹⁵အဝဲသ့ၣ်ကိးထီၣ်ပှၤသုးဖိခံကလးဃုကထိလၢအဝ့ၢ်တဖၣ် အပူၤလၢမုၢ်နံၤအဝဲန့ၣ်လီၤ. လၢန့ၣ်မဲာ်ညါကံဘဧၤအဝ့ၢ်ဖိတဖၣ်ပာ်ဖှိၣ်ပှၤပိာ်ခွါလၢအစု စ့ၣ်ဆူၣ်နွံကယၤဂၤလၢအဘၣ်တၢ်ဃုထၢအီၤလီၤဆီန့ၣ်လီၤ.

¹⁶အဝဲသ့ၣ်ကိးဂၤဒဲးန့ၣ်ကွံာ်လၢၢ်လၢနီၣ်ဘျုးသ့တုၤခိၣ်သူတဘိဒၣ်လဲာ်, ကွံာ်ဝဲဘၣ်န့ၣ်လီၤ.

¹⁷ဒီးအံၣ်စရ့လးအဒူၣ်အဂၤတဖၣ်ပာ်ဖှိၣ်ထီၣ်ပှၤသုးဖိလၢဒိးသိၣ်လိတ့ၢ်အသး အဂၤလွံၢ်ကလီၢ်န့ၣ်လီၤ.

¹⁸ဒီးပှၤအံၣ်စရ့လးဖိတဖၣ်လဲၤဆူတၢ်ဘူၣ်တၢ်ဘါအလီၢ်ဖဲ ဘ့ၤသ့လးဒီးသံကွၢ်ကစၢ်ယွၤ, “မ့ၢ်မတၤအဒူၣ်ကဘၣ်ဒုးပှၤဘံၣ်ယၤမံၣ်ဖိတဖၣ်အဆိကတၢၢ်လဲၣ်.” ဒီးယွၤစံးဆၢဝဲဒၣ်, “ပှၤယူဒၤဖိအဒူၣ်လီၤ.”

¹⁹ဒီးပှၤအံၣ်စရ့လးဖိတဖၣ်စးထီၣ်လၢအတၢ်လဲၤလၢခံတဂီၤဒီး သူၣ်ဒဲဖဲဝ့ၢ်ကံဘဧၤအဃၢၤန့ၣ်လီၤ.

²⁰အဝဲသ့ၣ်လဲၤဒ်သိးကဒုးပှၤဘံၣ်ယၤမံၣ်အသုးမုၢ်ဒီးပာ်လီၤ အသုးဖိကွၢ်ဃီၤတၢ်ဆူဝ့ၢ်န့ၣ်လီၤ.

²¹ဘံၣ်ယၤမံၣ်အသုးမုၢ်ဟဲထီၣ်ဆူဝ့ၢ်အချၢဒီးတချုးမုၢ်လီၤနုာ် န့ၣ်မၤသံကွံာ်အံၣ်စရ့လးအသုးဖိခံကလးခံကထိန့ၣ်လီၤ.

²²တုၤနုၤတစု, ပှၤအံၣ်စရ့လးဖိတဖၣ်လဲၤဆူတၢ်ဘူၣ်တၢ်ဘါအလီၢ် ဒီးသူၣ်အုးသးအုးလၢယွၤအမဲာ်ညါတုၤမုၢ်ဟါလီၤတစုန့ၣ်လီၤ. အဝဲသ့ၣ်သံကွၢ်ယွၤ, “ဂ့ၤပလဲၤကဒီးတစုဒီးဒုးတၢ်ထီဒါ ပဒီပုၢ်ဝဲၢ်ပှၤဘံၣ်ယၤမံၣ်ဖိတဖၣ်ဧါ.” ဒီးယွၤစံးဝဲဒၣ်, “လဲၤထီဒါအီၤတက့ၢ်.”

²³လၢတၢ်န့ၣ်အဃိ, အံၣ်စရ့လးအသုးမုၢ်အသးဆူၣ်ထီၣ်ဒီးပာ်လီၤ ကဒီးအသုးမုၢ်အလီၢ်ဒ်လၢအပူၤကွံာ်တနံၤအသိးန့ၣ်လီၤ.

²⁴အဝဲသ့ၣ်လဲၤထီၣ်ထီဒါဘံၣ်ယၤမံၣ်အသုးမုၢ်ခံစုတစုန့ၣ်လီၤ.

²⁵ဒီးပှၤဘံၣ်ယၤမံၣ်ဖိတဖၣ်ဟဲထီၣ်လၢကံဘဧၤခံစုတစုဒီးအအံၤ တဘျီန့ၣ် မၤသံကွံာ်ပှၤအံၣ်စရ့လးအသုးမုၢ်ဒီးသိၣ်လိတ့ၢ်အသးတဖၣ်ခဲလၢာ် တကလးဃိးကထိန့ၣ်လီၤ.

²⁶တုၤနုၤတစု, ပှၤအံၣ်စရ့လးဖိခဲလၢာ်လဲၤထီၣ်ဆူဘ့ၤသ့လးဒီး ဟီၣ်ဝဲယၢၤဝဲလီၤ. အဝဲသ့ၣ်ဆ့ၣ်နီၤဖဲန့ၣ်လၢယွၤအမဲာ်ညါဒီးတၢ်အီၣ်တုၤမုၢ်ဟါလီၤတစုန့ၣ်လီၤ. အဝဲသ့ၣ်ဒုၣ်တၢ်အီၣ်ဒီးလုၢ်တၢ်လုၢ်မၤဃူမၤဖိး ဒီးတၢ်လုၢ်မ့ၣ်အူလၢကစၢ်ယွၤအမဲာ်ညါလီၤ.

²⁷ကစၢ်ယွၤအတၢ်အၢၣ်လီၤအီၤလီၤအတလါအိၣ်ဖဲဘ့ၤသ့လး လၢမုၢ်နံၤတဖၣ်န့ၣ်အပူၤဒီးစီၤအၤဟရိၣ်အလံၤ, စီၤအလၤဧစၢ်အဖိခွါစီၤဖံနဃၤကဲခိၣ်ကဲနၢ်ကွၢ်ထွဲအီၤလီၤ.

²⁸ပှၤဂီၢ်မုၢ်သံကွၢ်ယွၤ, “ဂ့ၤပလဲၤထီၣ်ဒုးကဒီးပဒီပုၢ်ဝဲၢ် ပှၤဘံၣ်ယၤမံၣ်ဖိတဖၣ်ဧါ. မ့တမ့ၢ်ပကဘၣ်ဆိကတီၢ်လဲၣ်.” ဒီးယွၤစံးဆၢဝဲဒၣ်, “ဒုးတက့ၢ်. ခဲမုၢ်ဆ့ၣ်တနံၤန့ၣ်ယကဟ့ၣ်သုလၢတၢ်မၤနၢၤလၢအဝဲသ့ၣ် အဖီခိၣ်လီၤ.

²⁹ဒီး, ပှၤအံၣ်စရ့လးဖိတဖၣ်ပာ်လီၤခူသူၣ်ပှၤသုးဖိတနီၤဝးတရံးကံးဘဧၤန့ၣ်လီၤ.

³⁰ဒီး, လၢသၢသီတသီန့ၣ်, အဝဲသ့ၣ်လဲၤထီၣ်ထီဒါပှၤဘံၣ်ယၤမံၣ်ဖိ အသုးမုၢ်ဒီးပာ်လီၤအသုးဖိလၢတၢ်ဒုးအဂီၢ်, ကွၢ်ဃီၤတၢ်ဆူ ကံးဘဧၤ, ဒ်အမၤတ့ၢ်ဝဲလၢညါအသိးန့ၣ်လီၤ.

³¹ပှၤဘံၣ်ယၤမံၣ်ဖိတဖၣ်ဟဲထီၣ်ဒ်သိးကဒုးတၢ်ဒီး ဘၣ်တၢ်ဆှၢအီၤယံၤထီၣ်ဒီးဝ့ၢ်လီၤ. ဒ်လၢညါအသိး, အဝဲသ့ၣ်စးထီၣ်မၤသံ ပှၤအံၣ်စရ့လးဖိတနီၤလၢဝ့ၢ်အချၢလၢကျဲလဲၤဆူဘ့ၤသ့လး ဒီးကံဘဧၤအလိၤန့ၣ်လီၤ. အဝဲသ့ၣ်မၤသံပှၤအံၣ်စရ့လးဖိအဂၤသၢဆံဃၣ်ဃၣ်န့ၣ်လီၤ.

³²ပှၤဘံၣ်ယၤမံၣ်ဖိတဖၣ်စံးဝဲ, “ပမၤနၢၤအဝဲသ့ၣ်ဒ်လၢညါ အသိးလီၤ.” ဘၣ်ဆၣ်ဒီး, ပှၤအံၣ်စရ့လးဖိတဖၣ်ဂုၤက့ၤဆူလီၢ်ခံဒီးဆှၢ အဝဲသ့ၣ်ဆူကျဲမုၢ်တဖၣ်အလိၤယံၤဒီးဝ့ၢ်န့ၣ်လီၤ.

³³မၤသးဒ်န့ၣ်ဒီး, ဖဲအံၣ်စရ့လးအသုးမုၢ်မိၢ်ပှၢ်ဂုၤက့ၤဆူလီၢ် ခံဒီးပာ်ဖှိၣ်ကဒါက့ၤအသးဖဲဘဧၤလးတၤမၢ်န့ၣ်, ပှၤသုးဖိတဖၣ်လၢအကဝီၤဃးကံးဘဧၤဖဲလ့အိၣ်ဝးတရံးဝ့ၢ် အလီၢ်န့ၣ်ဃ့ၢ်သဖှိထီၣ်သတူၢ်ကလာ်လၢအတၢ်အိၣ်ခူသူၣ် အလီၢ်တဖၣ်န့ၣ်လီၤ.

³⁴ပှၤအဂၤတကလးလၢဘၣ်တၢ်ဃုထၢအီၤလီၤဆီလၢပှၤ အံၣ်စရ့လးဖိအကျါဒုးဝ့ၢ်ကံဘဧၤဒီးတၢ်ဒုးန့ၣ်ဆူၣ်ဝဲလီၤ. ပှၤဘံၣ်ယၤမံၣ်ဖိတဖၣ်တသ့ၣ်ညါလီၤအသးလၢကဘၣ်တၢ်မၤဟးဂီၤကွံာ်အီၤဘၣ်.

³⁵ယွၤဟ့ၣ်အံၣ်စရ့လးလၢကမၤနၢၤဘံၣ်ယၤမံၣ်အသုးမုၢ်လီၤ. ပှၤအံၣ်စရ့လးမၤသံကွံာ်အဒုၣ်အဒါခံကလးယဲၢ်ကထိတကယၤဂၤ လၢမုၢ်နံၤအဝဲန့ၣ်အပူၤလီၤ.

³⁶ဒီးပှၤဘံၣ်ယၤမံၣ်ဖိတဖၣ်သ့ၣ်ညါလၢအဘၣ်တၢ်မၤနၢၤကွံာ်အီၤလီၤ. ပှၤအံၣ်စရ့လးဖိအသုးမုၢ်မိၢ်ပှၢ်ဂုၤက့ၤအသးလၢပှၤဘံၣ်ယၤ မံၣ်ဖိတဖၣ်အအိၣ်န့ၣ်မ့ၢ်လၢအဝဲသ့ၣ်သန့ၤအသးလၢအပှၤ တဖၣ်လၢအပာ်လီၤခူသူၣ်ဝဲဝးတရံးကံးဘဧၤအဃိန့ၣ်လီၤ.

³⁷ပှၤတဖၣ်အံၤဃ့ၢ်ချ့ချ့ဆူကံးဘဧၤဒီးရၤလီၤအသးသကုၤဝ့ၢ် အပူၤဒီးမၤသံပှၤကိးဂၤဒဲးန့ၣ်လီၤ.

³⁸ဒီးအံၣ်စရ့လးအသုးမုၢ်မိၢ်ပှၢ်ဒီးပှၤလၢအိၣ်ခူသူၣ်တဖၣ်အိၣ် ဒီးတၢ်ပနီၣ်တမံၤလီၤ. ဖဲအဝဲသ့ၣ်ထံၣ်မ့ၣ်အူလုၣ်ခုၣ်ထီၣ်လၢဝ့ၢ်ပူၤန့ၣ်,

³⁹ပှၤအံၣ်စရ့လးဖိအိၣ်လၢတၢ်ဒုးပျီတဖၣ်ကဘၣ်ဃၣ်ကဒါက့ၤအသး န့ၣ်လီၤ. အကတီၢ်အံၤန့ၣ်, ပှၤဘံၣ်ယၤမံၣ်ဖိတဖၣ်မၤသံတ့ၢ်ပှၤအံၣ်စရ့လးဖိအဂၤသၢဆံဝံၤလံ. အဝဲသ့ၣ်စံးလီၤအသး, “ပမၤနၢၤလံအဝဲသ့ၣ်ဒ်လၢညါအသိးလံ.”

⁴⁰တုၤနုၤတစု, တၢ်ပနီၣ်အိၣ်ဖျါထီၣ်ဝဲလီၤ. မ့ၣ်အူလုၣ်ဖးဒိၣ်ခုၣ်ထီၣ်လၢဝ့ၢ်ပူၤလီၤ. ပှၤဘံၣ်ယၤမံၣ်ဖိတဖၣ်ကွၢ်ကဒါက့ၤအလီၢ်ခံဒီး ကမၢကမၣ်ဖဲအထံၣ်ဝဲလၢမ့ၣ်အူအီၣ်ထီၣ်ဝ့ၢ်ဒီဖျၢၣ်ညါန့ၣ်လီၤ.

⁴¹ပှၤအံၣ်စရ့လးဖိတဖၣ်ဃၣ်တရံးက့ၤအသးဒီးပှၤဘံၣ်ယၤမံၣ်ဖိ တဖၣ်တၢ်ပျံၤတၢ်ဖုးဖးဒိၣ်လီၤဘၣ်အီၤမ့ၢ်လၢအသ့ၣ်ညါလီၤက့ၤအသး လၢကဘၣ်တၢ်မၤဟးဂီၤကွံာ်အီၤအဃိန့ၣ်လီၤ.

⁴²ဒီးပှၤဘံၣ်ယၤမံၣ်ဖိတဖၣ်ဂုၤက့ၤအလီၢ်ခံဒီးဃ့ၢ်ကွံာ်ဆူတၢ်ပျီပူၤန့ၣ်လီၤ. ဘၣ်ဆၣ်ဒီးအဝဲသ့ၣ်တပူၤဖျဲးဘၣ်. အဝဲသ့ၣ်ဘၣ်တၢ်ချုးန့ၢ်အီၤလၢသုးမုၢ်မိၢ်ပှၢ်ဒီးပှၤလၢအဟဲထီၣ် လၢဝ့ၢ်ပူၤတဖၣ်အဘၢၣ်စၢၤဒီးဘၣ်တၢ်မၤဟးဂီၤကွံာ်အီၤလီၤ.

⁴³ဒီးပှၤအံၣ်စရ့လးဖိတဖၣ်ကဝီၤန့ၢ်အဒုၣ်အဒါဒီးလူၤဝဲဒီး မၤသံဝဲတုၤလၢတၢ်လီၢ်တတီၤဖဲဝ့ၢ်ကံးဘဧၤအမုၢ်ထီၣ်န့ၣ်လီၤ.

⁴⁴ဘံၣ်ယၤမံၣ်အသုးဖိအဂ့ၤကတၢၢ်အဂၤတကလးဃိးကထိဘၣ် တၢ်မၤသံကွံာ်အီၤန့ၣ်လီၤ.

⁴⁵သုးဖိအဂၤတဖၣ်ဃၣ်တရံးအသးဒီးဃ့ၢ်ဆူတၢ်ပျီပူၤဖဲလ့ရံးမိၣ် အလီၢ်န့ၣ်လီၤ. ဒီးလၢအကျါပှၤအဂၤယဲၢ်ကထိ ဘၣ်တၢ်မၤသံကွံာ်အီၤလၢကျဲမုၢ်ဖီခိၣ်လီၤ. ပှၤအံၣ်စရ့လးဖိတဖၣ်လူၤ အဝဲသ့ၣ်ဆူညါတုၤလၢဝ့ၢ်ကံဒိၣ်ဒီးမၤသံပှၤအဂၤခံကထိလီၤ.

⁴⁶လၢမုၢ်တနံၤန့ၣ်ပှၤဘံၣ်ယၤမံၣ်ဖိဘၣ်တၢ်မၤသံကွံာ်အီၤခဲလၢာ် အဂၤခံကလးယဲၢ်ကထိလီၤ. အဝဲသ့ၣ်မ့ၢ်ပှၤသုးဖိအဒူတဖၣ်ကိးဂၤဒဲးလီၤ.

⁴⁷ဘၣ်ဆၣ်ဒီးပှၤအဂၤဃုကယၤဂၤဃ့ၢ်ပူၤဖျဲးကွံာ်ဆူတၢ်ပျီပူၤ ဖဲလ့ရံးမိၣ်အလီၢ်လီၤ. ဒီးအိၣ်ဝဲဖဲန့ၣ်လွံၢ်လါလီၤ.

⁴⁸ပှၤအံၣ်စရ့လးဖိတဖၣ်ဃၣ်တရံးထီဒါ ပှၤဘံၣ်ယၤမံၣ်ဖိလၢအအိၣ်လီၤတဲာ်ခဲလၢာ်, ပိာ်ခွါပိာ်မုၣ်, ဖိသၣ်တဖၣ်ဒီးကယဲၢ်ဆၣ်ဖိကီၢ်ဖိ တဖၣ်စ့ၢ်ကီးလီၤ. ဒီးအဝဲသ့ၣ်ဆူးထီၣ်ကွံာ်ကယဲၢ်ဝ့ၢ်တဖၣ်လၢ အအိၣ်လၢတၢ်လီၢ်ဖဲန့ၣ်လီၤ.