Read S'gaw Karen လံာ်ပှၤစံၣ်ညီၣ်ကွီၢ် 3 Bible Online

လံာ်ပှၤစံၣ်ညီၣ်ကွီၢ် 3 - S'gaw Karen bible

လံာ်ပှၤစံၣ်ညီၣ်ကွီၢ် 3

¹မၤသးဒ်န့ၣ်ဒီးယွၤပာ်လီၤတဲာ်ပှၤကလုာ်တနီၤလၢကီၢ်ပူၤဒ်သိး ကမၤကွၢ်ပှၤအံၣ်စရ့လးဖိတဖၣ်လၢအတလဲၤခီဖျိဘၣ်ဒံးတၢ်ဒုး တၢ်ယၤလၢကီၢ်ကနၤဧၣ်အပူၤန့ၣ်လီၤ.

²အဝဲမၤတၢ်အံၤမ့ၢ်ဒ်သိးကသိၣ်လိပှၤအံၣ်စရ့လးဖိတစိၤဘၣ်တစိၤလၢတၢ်ဒုးတၢ်ယၤအဂ့ၢ်, လီၤဆီဒၣ်တၢ်ပှၤလၢအတလဲၤခီဖျိ ဘၣ်ဒံးတၢ်ဒုးတၢ်ယၤနီတဘျီဘၣ်တဖၣ်န့ၣ်လီၤ.

³ပှၤတဖၣ်လၢအအိၣ်လီၤတဲာ်လၢကီၢ်ပူၤမ့ၢ်ဝဲ, ပှၤဖလ့ၡသးဖိ အပဒိၣ်ယဲၢ်ဂၤ, ပှၤကနၤဧၣ်ဖိခဲလၢာ်, ပှၤစံဒိၣ်ဖိတဖၣ်, ဒီးပှၤဃံၤဝံဖိတဖၣ်လၢအအိၣ်ဆိးလၢလဘၤနိၣ်အကစၢၢ်ကလိအကျါ စးထီၣ်လၢကစၢၢ်ဘဧၤလးဃ့ရမိၣ်တုၤလၢဝ့ၢ်ဃမါသးအတၢ်ဟဲနုာ်ဟးထီၣ်အကျဲန့ၣ်လီၤ.

⁴အဝဲသ့ၣ်ကမ့ၢ်တၢ်မၤကွၢ်လၢပှၤအံၣ်စရ့လးဖိအဂီၢ်ဒ်သိး တၢ်ကထံၣ်ဘၣ်ဝဲလၢ ပှၤအံၣ်စရ့လးဖိတဖၣ်မ့ၢ်အဒိကနၣ်မ့တမ့ၢ် တဒိကနၣ်ဘၣ်တၢ်မၤလိာ်တဖၣ်လၢယွၤဟ့ၣ်လီၤတ့ၢ်အမိၢ်ပၢ်ဖံဖု လၢပျၢၤတဖၣ်ခီဖျိစီၤမိၤၡ့ အဂ့ၢ်န့ၣ်လီၤ.

⁵လၢတၢ်န့ၣ်အဃိကီၢ်အံၣ်စရ့လးအပှၤဂီၢ်မုၢ်အိၣ်ဝဲဆိးဝဲလၢပှၤကနၤဧၣ်ဖိ, ပှၤဃံၤဝံဖိ, ပှၤအမိၢ်ဖိ, ပှၤပရးစၤဖိဒီးပှၤယဘူၣ်ဖိတဖၣ်အကျါန့ၣ်လီၤ.

⁶ဒီးအဝဲသ့ၣ်ထီၣ်ဖိန့ၢ်မါလိာ်အသးဒီးပှၤကလုာ်တဖၣ်န့ၣ်, ဒီးဘူၣ်ထီၣ်ဘါထီၣ်အဝဲသ့ၣ်အကစၢ်တဖၣ်န့ၣ်လီၤ.

⁷ကီၢ်အံၣ်စရ့လးအပှၤဂီၢ်မုၢ်သးပ့ၤနီၣ်ကွံာ်အကစၢ်ယွၤ, ဒီးမၤတၢ်ဒဲးဘးထီဒါအီၤ, ဒီးဘူၣ်ထီၣ်ဘါထီၣ်ဘဧၤလးဒီး အၡ့ရၤအတၢ်ဂီၤတၢ်ဖီၣ်တဖၣ်လီၤ.

⁸မၤသးဒ်န့ၣ်ဒီးယွၤသးဒိၣ်ထီၣ်ပှၤအံၣ်စရ့လးဖိဒီးပျဲကီၢ်မ့းစပတၤမံအစီၤပၤကူၡၣ်ရံးၡၤသဲၣ် မၤနၢၤအဝဲသ့ၣ်ဒီးအဝဲပၢပှၤအံၣ်စရ့လးဖိဃိးနံၣ်န့ၣ်လီၤ.

⁹တုၤနုၤတစုပှၤအံၣ်စရ့လးဖိတဖၣ်ကိးထီၣ်ယွၤဒီးအဝဲဆှၢလီၤ ပှၤတဂၤလၢအမၤထူၣ်ဖျဲးထီၣ်အဝဲသ့ၣ်န့ၣ်လီၤ. ပှၤအံၤမ့ၢ်ဝဲစီၤကၤလ့းအပုၢ်ပိာ်ခွါစီၤကနးစးအဖိခွါ စီၤဧီၤသန့လးန့ၣ်လီၤ.

¹⁰ယွၤအသးလီၤဘၣ်လၢအဝဲအလိၤဒီးအဝဲကဲထီၣ်ပှၤအံၣ်စရ့လးဖိ အခိၣ်န့ၣ်လီၤ. စီၤဧီၤသန့လးလဲၤဒုးတၢ်ယၤတၢ်ဒီး ယွၤဟ့ၣ်အီၤတၢ်မၤနၢၤလၢကီၢ်မံးစပတၤမံအစီၤပၤအဖီခိၣ်လီၤ.

¹¹ဒီးတၢ်မုာ်တၢ်ခုၣ်အိၣ်လၢကီၢ်ပူၤအနံၣ်လွံၢ်ဆံဝံၤအလီၢ်ခံ ဒီးစီၤဧီၤသန့လးသံဝဲဒၣ်န့ၣ်လီၤ.

¹²ကီၢ်အံၣ်စရ့လးအပှၤဂီၢ်မုၢ်မၤကဒီးတၢ်ဒဲးဘးထီဒါယွၤန့ၣ် လီၤ. လၢတၢ်အံၤအဃိယွၤဒုးဆူၣ်ထီၣ်ကီၢ်မိၤအးအစီၤပၤဧ့းကလိၣ် အဂံၢ်အဘါအါန့ၢ်ပှၤအံၣ်စရ့လးဖိန့ၣ်လီၤ.

¹³ဒီးစီၤပၤဧ့းကလိၣ်ပာ်ဖှိၣ်အသးဒီးပှၤအမိၢ်ဖိ, ဒီးပှၤဧမၤလ့းဖိ, ဒီးမၤနၢၤပှၤအံၣ်စရ့လးဖိဒီးမၤန့ၢ်ဝ့ၢ်ယရံၤဃိလၢအမ့ၢ် သ့ၣ်စူၣ်ပလိၣ်အဝ့ၢ်န့ၣ်လီၤ.

¹⁴ဒီးပှၤအံၣ်စရ့လးဖိတဖၣ်ဘၣ်တၢ်ပၢအီၤလၢစီၤပၤဧ့းကလိၣ် တဆံဃိးနံၣ်န့ၣ်လီၤ.

¹⁵တုၤနုၤတစုပှၤအံၣ်စရ့လးဖိတဖၣ်ကိးထီၣ်ယွၤဒီးအဝဲဆှၢလီၤ ပှၤတဂၤလၢကမၤထူၣ်ဖျဲးထီၣ်အဝဲသ့ၣ်န့ၣ်လီၤ. ပှၤအံၤမ့ၢ်ဝဲ ပှၤဘံၣ်ယၤမံၣ်ဖိစီၤက့ရၤအဖိခွါစီၤအ့ဟူာ်န့ၣ်လီၤ. ဒီးစီၤအ့ဟူာ်မ့ၢ်ပှၤအစုဆူၣ်လၢစုစ့ၣ်တခီန့ၣ်လီၤ. အံၣ်စရ့လးအပှၤဂီၢ်မုၢ်ဆှၢလီၤစီၤအ့ဟူာ်ဆူကီၢ်မိၤအးအစီၤ ပၤစီၤဧ့းကလိၣ်အအိၣ်ဃုာ်ဒီးတၢ်ဟ့ၣ်တဖၣ်လၢအဂီၢ်န့ၣ်လီၤ.

¹⁶စီၤအ့ဟူာ်မၤနးအကနၣ်အ့ၣ်ခံခီလိာ်လၢအထီအိၣ်တပျၢ်တဘ့ၣ်လၢအဂီၢ်လီၤ. အဝဲစၢထီၣ်နးန့ၣ်လၢအကံၣ်ဒုၣ်အထွဲအလိၤလၢ အတၢ်ကူတၢ်သိးအဖီလာ်လီၤ.

¹⁷အန့ၣ်ဝံၤဒီးအဝဲလဲၤစိာ်တၢ်ဟ့ၣ်တဖၣ်ဆူစီၤပၤဧ့းကလိၣ်လၢ အမ့ၢ်ပှၤအဘီၣ်ဒိၣ်မးတဂၤအအိၣ်န့ၣ်လီၤ.

¹⁸ဖဲစီၤအ့ဟူာ်ဟ့ၣ်လီၤအီၤလၢတၢ်ဟ့ၣ်တဖၣ်ဝံၤန့ၣ်အဝဲတဲဘၣ်ပှၤ လၢအစိာ်တၢ်ဟ့ၣ်တဖၣ်လၢကက့ၤကဒါက့ၤဆူဟံၣ်န့ၣ်လီၤ.

¹⁹ဘၣ်ဆၣ်ဒီးစီၤအ့ဟူာ်အကစၢ်ဒၣ်ဝဲဃၣ်ကဒါက့ၤအသးဖဲလၢၢ်စိးပျၤအသးတဖၣ် အလီၢ်ဘူးဒီးဝ့ၢ်ကံးလကၤလးဒီးက့ၤကဒါက့ၤဝဲ ဆူစီၤပၤဧ့းကလိၣ်အအိၣ်ဒီးစံး, “စီၤပၤဖးဒိၣ်ဧၢ, ယအိၣ်ဒီးတၢ်ကစီၣ်ခူသူၣ်တမံၤလၢနဂီၢ်န့ၣ်လီၤ.” လၢတၢ်န့ၣ်အဃိစီၤပၤဟ့ၣ်လီၤအကလုၢ်ဆူအခ့အပှၤတဖၣ်အအိၣ်, “ပာ်တီၢ်ပှၤထဲခံဂၤဧိၤတက့ၢ်”. ဒီးအခ့အပှၤတဖၣ်ဟးထီၣ် ကွံာ်ဝဲခဲလၢာ်လီၤ.

²⁰အန့ၣ်တစုဖဲစီၤပၤဆ့ၣ်နီၤထဲတဂၤဧိၤလၢတၢ်ကိၢ်ခါအနီ, ဒၢးလၢတၢ်ခိၣ်ဒုးအဖီခိၣ်အပူၤအခါန့ၣ်, စီၤအ့ဟူာ်လဲၤဃီၤဆူအအိၣ်ဒီးစံးဘၣ်အီၤ, “ယအိၣ်ဒီးယွၤအတၢ်ကစီၣ်တမံၤလၢနဂီၢ်လီၤ.” ဒီးစီၤပၤဆၢထၢၣ်ဝဲလီၤ.

²¹စီၤအ့ဟူာ်ထုးထီၣ်နးလၢအအိၣ်လၢအကံၣ်ဒုၣ်အထွဲတကပၤန့ၣ် လၢအစုစ့ၣ်ဒီးဆဲးဖျိစီၤပၤအဟၢဖၢန့ၣ်လီၤ.

²²ဒီးနးဒီဘ့ၣ်ညါလဲၤနုာ်ဃုာ်ဒီးအတိၢ်ခဲလၢာ်ဒီးအဟၢဖၢအသိကးဘၢနးန့ၣ်လီၤ. စီၤအ့ဟူာ်တထုးထီၣ်ကဒါက့ၤနးလၢစီၤပၤ အဟၢဖၢအပူၤဘၣ်, ဒီးနးန့ၣ်ဆဲးဖျိအသးတုၤလၢအချၢ, ဒီးတၢ်ဘၣ်အၢဘၣ်သီတဖၣ်ဟဲထီၣ်ဝဲန့ၣ်လီၤ.

²³စီၤအ့ဟူာ်ဟးထီၣ်ဆူတၢ်ချၢဒီးကးတံာ်တြဲၤဒီးဝံာ်တံၢ်ဝဲ လၢနီၣ်ဝံာ်န့ၣ်လီၤ.

²⁴ဒီးတုၤစီၤအ့ဟူာ်ဟးထီၣ်ကွံာ်ဝံၤဒီးတၢ်ခ့တၢ်ပှၤတဖၣ်ဟဲက့ၤဒီးထံၣ်ဝဲလၢတြဲၤကးတံာ်အသးလီၤ. ဘၣ်ဆၣ်ဒီးအဝဲသ့ၣ်ဆိကမိၣ်ဒၣ်ဝဲလၢစီၤပၤအိၣ်လၢဒၢးပူၤဒီး အိၣ်ဘှံးအိၣ်သါန့ၣ်လီၤ.

²⁵အဝဲသ့ၣ်အိၣ်ခိးဝဲယံာ်တုၤအဆိကမိၣ်ဝဲလၢကြၢးလဲၤနုာ်လံဘၣ်ဆၣ်ဒီး ဖဲစီၤပၤတအိးထီၣ်တြဲၤန့ၣ်အဝဲသ့ၣ်ဟံးန့ၢ်နီၣ်ဝံာ်ခံဒီးအိးထီၣ်ဝဲလီၤ. ဒီးဖဲန့ၣ်အဝဲသ့ၣ်အကစၢ်လီၤဃံၤသံဝဲလၢသ့ၣ်ဘၣ်ခိၣ်န့ၣ်လီၤ.

²⁶စီၤအ့ဟူာ်ဟးထီၣ်ကွံာ်ဖဲအဝဲသ့ၣ်အိၣ်ခိးဒံးတၢ်အဖၢမုၢ်လီၤ. အဝဲလဲၤခီပတာ်လၢၢ်စိးပျၤသးအလီၢ်ဒီးဃ့ၢ်ပူၤဖျဲးဝဲဆူဝ့ၢ်စ့ဧ့ၢ်ရၤ အပူၤလီၤ.

²⁷ဖဲအဝဲတုၤဆူကီၢ်အ့ဖရဲၣ်ကစၢၢ်ကလိဒီး, အဝဲအူထီၣ်ကွဲၤဒ်သိးကကိးဃီၤကီၢ်အံၣ်စရ့လးအပှၤပိာ်ခွါတဖၣ်လၢကလဲၤထီၣ်ဒုးတၢ်အဂီၢ်လီၤ. ဒီးအဝဲဆှၢပှၤတဖၣ်န့ၣ်ဆူတၢ်ပၢၤခိၣ်န့ၣ်လီၤ.

²⁸အဝဲစံးဝဲ, “ပိာ်ယခံတက့ၢ်. ယွၤဟ့ၣ်လီၤသုတၢ်မၤနၢၤလၢ သုဒုၣ်သုဒါပှၤမိၤအးဖိတဖၣ်အဖီခိၣ်လံ.” မၤသးဒ်န့ၣ်ဒီးအဝဲသ့ၣ်ပိာ်ထီၣ်စီၤအ့ဟူာ်အခံ ဒီးမၤန့ၢ်တၢ်လီၢ်တတီၤဖဲပှၤမိၤအးဖိတဖၣ်ကခီထံကျိယၢ်ဒ့ၣ်န့ၣ်လီၤ. အဝဲသ့ၣ်တပျဲဘၣ်ပှၤကခီဂာ်တၢ်နီတဂၤဘၣ်န့ၣ်လီၤ.

²⁹လၢမုၢ်နံၤအဝဲန့ၣ်, အဝဲသ့ၣ်မၤသံပှၤမိၤအးအသုးဖိလၢအဂ့ၤကတၢၢ်တကလးဒီးပှၤတပူၤဖျဲးဘၣ်နီတဂၤဘၣ်.

³⁰ဒီးလၢနံၤအဝဲန့ၣ်ပှၤအံၣ်စရ့လးဖိမၤနၢၤကွံာ်ပှၤမိၤအးဖိ ဒီးဖဲန့ၣ်တၢ်မုာ်တၢ်ခုၣ်အိၣ်လၢကီၢ်အပူၤအနံၣ်ဃိးဆံန့ၣ်လီၤ.

³¹ပှၤခိၣ်ပှၤနၢ်လၢခံတဂၤန့ၣ်မ့ၢ်ဝဲစီၤဧးနးအဖိခွါစီၤၡးမကၢ်န့ၣ်လီၤ. အဝဲစ့ၢ်ကီးမၤပူၤဖျဲးပှၤအံၣ်စရ့လးဖိခီဖျိအမၤသံပှၤ ဖလ့ၡသးဖိအဂၤဃုကယၤ လၢနီၣ်ဆဲးကျီၢ်တဘီန့ၣ်လီၤ.