Read S'gaw Karen လံာ်ပှၤစံၣ်ညီၣ်ကွီၢ် 6 Bible Online

လံာ်ပှၤစံၣ်ညီၣ်ကွီၢ် 6 - S'gaw Karen bible

လံာ်ပှၤစံၣ်ညီၣ်ကွီၢ် 6

¹မၤကဒီးတစု, အံၣ်စရ့လးအပှၤဂီၢ်မုၢ်မၤတၢ်ဒဲးဘးထီဒါယွၤ အဃိဒီး, အဝဲပျဲကီၢ်မံးဒယၣ်အပှၤဂီၢ်မုၢ်ပၢအဝဲသ့ၣ်နွံနံၣ်လီၤ.

²ပှၤမံးဒယၣ်ဖိတဖၣ်အဂံၢ်အဘါဆူၣ်န့ၢ်ဒံးအံၣ်စရ့လး, ဒီးအံၣ်စရ့လးအပှၤဂီၢ်မုၢ်ပာ်ခူသူၣ်အသးလၢလၢၢ်ကအိလ့ကအိတဖၣ်အပူၤ ဒီးတၢ်လီၢ်ပူၤဖျဲးအဂၤတဖၣ်လၢကစၢၢ်ကလိအကျါန့ၣ် လီၤ.

³တဘျီလၢ်လၢ်ဖဲပှၤအံၣ်စရ့လးဖိတဖၣ်သူၣ်လီၤဖျးလီၤတၢ်ချံတမံၤမံၤန့ၣ်, ပှၤမံးဒယၣ်ဖိတဖၣ်ဟဲဃုာ်ဒီးပှၤဧမၤလ့းဖိဒီးပှၤအဒူၣ်တဖၣ် လၢအအိၣ်လၢမဲးမုၢ်ခိၣ်, ဒီးဒုးအဝဲသ့ၣ်လီၤ.

⁴အဝဲသ့ၣ်သူၣ်လီၤအဒဲလၢကီၢ်ပူၤဒီးမၤဟးဂီၤကွံာ်တၢ်မုၢ်တၢ် ဘိပၢၢ်တုၤဆူကလံၤထံးဝးတရံးဝ့ၢ်ဂါစၤအလီၢ်ကဝီၤန့ၣ်လီၤ. အဝဲသ့ၣ်စိာ်ကွံာ်သိ, ဂီၤဘုၣ်ဂီၤဖံးဒီးကသ့ၣ်ယီၤတဖၣ်ခဲလၢာ် ဒီးတပာ်လီၤတဲာ်တ့ၢ်တၢ်နီတမံၤလၢ ပှၤအံၣ်စရ့လးဖိတဖၣ်ကအိၣ်မူဝဲဆူညါအဂီၢ်ဘၣ်.

⁵အဝဲသ့ၣ်ဟဲဝဲဃုာ်ဒီးအဆၣ်ဖိကီၢ်ဖိတဖၣ်ဒီးဒဲတဖၣ်အါဝဲဂီၢ်ဝဲဒ်သိးဒွဲၣ်ဧိၤတြၤဧိၤန့ၣ်လီၤ. အဝဲသ့ၣ်ဒီးအကီၤလၤအူးတဖၣ်အါဝဲတုၤဒၣ်လဲာ်တၢ်ဂံၢ်အီၤတသ့ဘၣ်လီၤ. အဝဲသ့ၣ်ဟဲဒီးမၤဟးဂူာ်ဟးဂီၤကီၢ်န့ၣ်လီၤ.

⁶ဒီးပှၤအံၣ်စရ့လးဖိမၤစၢၤလီၤအသးလၢကထီဒါအဝဲသ့ၣ်တသ့ဘၣ်န့ၣ်လီၤ.

⁷တုၤနုၤတစု, အံၣ်စရ့လးအပှၤဂီၢ်မုၢ်ကိးပသူထီၣ်ဆူယွၤအအိၣ် လၢတၢ်မၤစၢၤအဂီၢ်ထီဒါပှၤမံးဒယၣ်ဖိတဖၣ်န့ၣ်လီၤ.

⁸ဒီးယွၤဆှၢလီၤန့ၢ်အဝဲသ့ၣ်လၢဝံတဂၤလၢအဟဲစိာ်န့ၢ်အီၤတၢ်ကစီၣ်ဒ်လာ်အံၤလၢယွၤ, အံၣ်စရ့လးအကစၢ်ယွၤအအိၣ်န့ၣ်လီၤ. “ယထုးထီၣ်သုလၢတၢ်မၢကဲကုၢ်အလီၢ်လၢကီၢ်အဲၤကူပတူးအပူၤန့ၣ်လီၤ.

⁹ယအုၣ်က့ၤခီၣ်က့ၤသုလၢပှၤအဲၤကူပတူးဖိတဖၣ်အစုပူၤဒီးလၢ ပှၤဂီၢ်မုၢ်လၢအဒုးတၢ်ထီဒါသုလၢကီၢ်အံၤအပူၤန့ၣ်လီၤ. ယဟီထီၣ်ကွံာ်အဝဲသ့ၣ်ဖဲသုဟဲထီၣ်ဒုးတၢ်, ဒီးယဟ့ၣ်လီၤသုလၢအဝဲသ့ၣ်အကီၢ်န့ၣ်လီၤ.

¹⁰ယတဲဘၣ်သုလၢယမ့ၢ်ယွၤ, သုကစၢ်ယွၤဒီးသုတကြၢးဘူၣ်ထီၣ်ဘါထီၣ်ပှၤအမိၢ်ဖိတဖၣ်လၢသုအိၣ်သုဆိးလၢအကီၢ်ပူၤခဲအံၤ, အကစၢ်တဖၣ်ဘၣ်န့ၣ်လီၤ. ဘၣ်ဆၣ်ဒီးသုတဒိကနၣ်ဘၣ်ယၤဘၣ်.”

¹¹အန့ၣ်ဝံၤဒီး, ယွၤအကလူးန့ၣ်ဟဲဆူသဝီဧိးဖြၤဒီးဆ့ၣ်နီၤလၢ သ့ၣ်သ့ထိးဖၣ်တထံးအဖီလာ်လၢအဘၣ်ဃးဒီးစီၤယိၤအၣ်လၢအမ့ၢ် ပှၤအဘံၤဧ့စ့ၢ်ဖိန့ၣ်လီၤ. အဝဲအဖိခွါစီၤကံးဒဧိၣ်န့ၣ်တီၢ်ခူသူၣ်ဘုကၠူၣ်တနီၤလၢနီၣ် စံၢ်စပံးသၣ်အလီၢ်ဒ်သိးပှၤမံးဒယၣ်ဖိတဖၣ်အသုတထံၣ်အီၤတဂ့ၤန့ၣ်လီၤ.

¹²ယွၤအကလူးအိၣ်ဖျါထီၣ်လၢအမဲာ်ညါဒီးစံးဘၣ်အီၤ, “ယွၤအိၣ်ဒီးနၤ, ပှၤအဒူဒီးအဂံၢ်အဘါဆူၣ်တဂၤဧၢ”.

¹³စီၤကံးဒဧိၣ်စံးဘၣ်အီၤ, “တၢ်ဒိၣ်ဧၢ, ယွၤမ့ၢ်အိၣ်ဒီးပှၤ န့ၣ်ဘၣ်မနုၤကယဲၢ်တၢ်ခဲလၢာ်အံၤမၤအသးဒီးပှၤန့ၣ်လဲၣ်. ကယဲၢ်တၢ်လီၤလးတဖၣ်လၢပပၢ်တဖၣ်တဲပှၤဘၣ်ဃးယွၤထုးထီၣ် အဝဲသ့ၣ်လၢကီၢ်အဲၤကူပတူးအပူၤ, တၢ်လၢယွၤမၤညီနုၢ်အီၤတဖၣ်န့ၣ်မၤအသးဒ်လဲၣ်. ယွၤညိကွံာ်တ့ၢ်လံပှၤ, ဒီးပာ်လီၤတဲာ်ပှၤလၢပှၤမံးဒယၣ်ဖိတဖၣ်အတၢ်သးကညီၤအပူၤလံ.”

¹⁴တုၤနုၤတစု, ယွၤစံးဘၣ်အီၤ, “လဲၤထီၣ်ဒီးနဂံၢ်ဆူၣ်ဘါဆူၣ်ဖးဒိၣ်ခဲလၢာ်ဒီးအုၣ်က့ၤခီၣ်က့ၤပှၤအံၣ်စရ့လးဖိလၢ ပှၤမံးဒယၣ်ဖိတဖၣ်အစုပူၤတက့ၢ်. ယနီၢ်ကစၢ်ဒၣ်ယဲ, ယဆှၢလီၤနၤလီၤ”.

¹⁵စီၤကံးဒဧိၣ်စံးဆၢဝဲဒၣ်, “ဘၣ်ဆၣ်ဒီးယအုၣ်က့ၤခီၣ်က့ၤအံၣ်စရ့လးကသံဒ်လဲၣ်. ယဒူၣ်ဖိထၢဖိမ့ၢ်ပှၤအဂံၢ်အဘါစၢ်ကတၢၢ်လၢမနၤၡ့ၤအဒူၣ်အကျါန့ၣ်လီၤ. ဒီးယမ့ၢ်ပှၤအဆံးကတၢၢ်လၢယဒူၣ်ဖိထၢဖိလၢအကါတဒိၣ်ဘၣ် အကျါန့ၣ်လီၤ.”

¹⁶ဒီးယွၤစံးဆၢဝဲ, “နမၤတၢ်တမံၤန့ၣ်သ့, မ့ၢ်လၢယမၤစၢၤနၤအဃိန့ၣ်လီၤ. နကတီၢ်သဘှံးပှၤမံးဒယၣ်ဖိတဖၣ်ညီညီဒ်အဝဲသ့ၣ်မ့ၢ်ပှၤတဂၤဧိၤ အသိးန့ၣ်လီၤ.”

¹⁷စီၤကံးဒဧိၣ်စံးဝဲ, “နမ့ၢ်ဘၣ်သူၣ်ဘၣ်သးလၢယၤဒီးဟ့ၣ်ယၤ တၢ်အုၣ်သးတမံၤမံၤလၢနမ့ၢ်ယွၤနီၢ်နီၢ်တက့ၢ်.

¹⁸တချုးလၢယဟဲစိာ်တၢ်လုၢ်မၤဘူၣ်တၢ်အီၣ်တၢ်အီတုၤဒံးဘၣ်ဒီး ဝံသးစူၤဟးထီၣ်ကွံာ်ဖဲအံၤတဂ့ၤ.” ယွၤအကလူးစံးဝဲဒၣ်, “ယကအိၣ်တုၤလၢနဟဲက့ၤတစုလီၤ.”

¹⁹မၤသးဒ်န့ၣ်ဒီးစီၤကံဒဧိၣ်က့ၤနုာ်ဆူအဟံၣ်ပူၤဒီးဖီထီၣ် မဲာ်တဲးလဲးအစၢ်ဖိတဒုဒီးကိၣ်ကမူၣ်နာ်တဝာ်ဃၣ်ဃၣ်လၢကမၤဝဲ ကိၣ်တအိၣ်ဘၣ်ဒီးကိၣ်မံၣ်အဂီၢ်လီၤ. အဝဲဒၢနုာ်တၢ်ဖံးတၢ်ညၣ်လၢတီၣ်တဖျၢၣ်အပူၤဒီးတၢ်ညၣ်အထံလၢ သပၢၤတဖျၢၣ်အပူၤဒီးလဲၤစိာ်ဝဲဆူ ယွၤအကလူးအိၣ်လၢသ့ၣ်သ့ထိးဖၣ်အဖီလာ်ဒီးဟ့ၣ်အီၤလၢတၢ်န့ၣ် တဖၣ်လီၤ.

²⁰ဒီးကလူးန့ၣ်စံးဘၣ်အီၤ, “ပာ်ထီၣ်တၢ်ညၣ်ဒီးကိၣ်န့ၣ်လၢလၢၢ်အံၤအဖီခိၣ်ဒီးလူလီၤတၢ်ညၣ်အထံလၢအလိၤတက့ၢ်.” ဒီးစီၤကံးဒဧိၣ်မၤဝဲဒ်န့ၣ်အသိးလီၤ.

²¹တုၤနုၤတစုယွၤအကလူးယူာ်ဃီၤအစုဒီးထိးဘၣ်တၢ်ညၣ်ဒီးကိၣ် န့ၣ်လၢနီၣ်ထိးဘိလၢအစိာ်ဃာ်ဝဲလၢအစုန့ၣ်လီၤ. ဒီးမ့ၣ်အူ ဟဲထီၣ်လၢလၢၢ်ပူၤဒီးအီၣ်ကွံာ်တၢ်ညၣ် ဒီးကိၣ်န့ၣ်လီၤ. အန့ၣ်ဝံၤဒီးကလူးန့ၣ်ဟါမၢ်ကွံာ်ဝဲဒၣ်လီၤ.

²²တုၤနုၤတစု, စီၤကံးဒဧိၣ်သ့ၣ်ညါလီၤတံၢ်ဝဲလၢအထံၣ်ဘၣ်လံယွၤအကလူးန့ၣ်ဒီး စံးဝဲဒၣ်လၢတၢ်ပျံၤတၢ်ဖုးဖးဒိၣ်အပူၤ, “သ့တၢ်လၢာ်ကစၢ်, ယွၤဧၢ, ယထံၣ်ဘၣ်လံနကလူးမဲာ်သကိးမဲာ်လံ.”

²³ဘၣ်ဆၣ်ဒီးယွၤစံးဘၣ်အီၤ, “မ်တၢ်ဃူတၢ်ဖိးအိၣ်ဒီးနၤတက့ၢ်. ပျံၤတၢ်တဂ့ၤ. နတသံဘၣ်.”

²⁴စီၤကံးဒဧိၣ်ဘှီထီၣ်တၢ်လုၢ်လီၢ်တဖျၢၣ်ဖဲန့ၣ်လၢယွၤအဂီၢ်, ဒီးကိးဝဲအမံၤလၢ, “ယွၤၡၤလိၣ်” အခီပညီ, “ယွၤမ့ၢ်တၢ်ဃူတၢ်ဖိး” န့ၣ်လီၤ. (တၢ်လုၢ်လီၢ်န့ၣ်အိၣ်ဒံးဝဲဖဲဧိးဖြၤလၢအဘၣ်ဃး ဒီးအဘံၤဧ့စ့ၢ်အဒူၣ်အထၢန့ၣ်လီၤ.)

²⁵ဒီးမုၢ်နၤအဝဲန့ၣ်ယွၤစံးဘၣ်စီၤကံးဒဧိၣ်, “ဟံးန့ၢ်နပၢ်အကျီၢ်ဖါတံၢ်ဒီးကျီၢ်ဖါတံၢ်အဂၤတဒုလၢအသးအိၣ်နွံနံၣ်, မၤလီၤပှီၢ်ကွံာ်နပၢ်အတၢ်လုၢ်လီၢ်လၢအမၤဝဲလၢဘဧၤလးအဂီၢ်ဒီး ကျီတဲာ်ကွံာ်တၢ်ပနီၣ်ဘၣ်ဃးဒီးကစၢ်မုၢ်အၡ့ရၤလၢအအိၣ်လၢ အကပၤန့ၣ်တက့ၢ်.

²⁶ဘှီထီၣ်တၢ်လုၢ်လီၢ်ဂ့ၤဂ့ၤတခါလၢ ယွၤနကစၢ်ယွၤအဂီၢ်လၢတၢ်လီၤပှီၢ်အံၤအဖီခိၣ်တက့ၢ်. အန့ၣ်ဝံၤဒီးဟံးန့ၢ်ကျီၢ်ဖါခံဒုတဒုန့ၣ်ဒီးဆိၣ်ကဲၤထီၣ်အီၤဒီဒု ဒ်တၢ်လုၢ်မၤဘူၣ်တမံၤအသိး, သူကစၢ်မုၣ်အၡ့ရၤအပနီၣ်လၢနကျီတဲာ်ကွံာ်အီၤန့ၣ်ဒ်သ့ၣ်မုၣ်အသိးတက့ၢ်.”

²⁷မၤသးဒ်န့ၣ်ဒီး, စီၤကံးဒဧိၣ်ကိးထီၣ်အခ့အပှၤ အဂၤတဆံဒီးမၤဝဲဒ်ယွၤစံးဘၣ်အီၤအသိးန့ၣ်လီၤ. မ့ၢ်လၢအဝဲပျံၤဘၣ်အဒူၣ်ဖိ ထၢဖိဒီးပှၤဝ့ၢ်ဖိတဖၣ်အဃိမၤဝဲလၢမုၢ်ဆါခီတဘူၣ်ဘၣ်, သတးဒီးမၤတၢ်န့ၣ်လၢ မုၢ်နၤအကတီၢ်န့ၣ်လီၤ.

²⁸တုၤပှၤဝ့ၢ်ဖိဂဲၤထၢၣ်ဂီၤဂီၤလၢမုၢ်ဆ့ၣ်ထီၣ်တနံၤန့ၣ်, ထံၣ်ဘၣ်ဝဲလၢဘဧၤလးအတၢ်လုၢ်လီၢ်ဒီးအၡ့ရၤအတၢ်ပနီၣ် ဘၣ်တၢ်ကျီတဲာ်ကွံာ်အီၤ, ဒီးကျီၢ်ဖါခံဒုတဒုန့ၣ်ဘၣ်တၢ်ဆိၣ်ကဲၤထီၣ်အီၤလၢ တၢ်လုၢ်လီၢ်လၢတၢ်ဘှီထီၣ်အီၤအဖီခိၣ်ဖဲန့ၣ်လီၤ.

²⁹အဝဲသ့ၣ်သံကွၢ်လိာ်အသးတဂၤဒီးတဂၤ, “မတၤမၤတၢ်အံၤလဲၣ်.” အဝဲဃုသ့ၣ်ညါဝဲဒီးထံၣ်န့ၢ်ဝဲလၢစီၤယိၤအၣ်အဖိခွါစီၤကံးဒဧိၣ် မၤတၢ်အံၤန့ၣ်လီၤ.

³⁰တုၤနုၤတစု, အဝဲသ့ၣ်စံးဘၣ်စီၤယိၤအၣ်, “ဟဲစိာ်နဖိခွါဖဲအံၤဒ်သိးပကမၤသံအီၤတက့ၢ်. အဝဲမၤလီၤပှီၢ်ဘဧၤလးအတၢ်လုၢ်လီၢ်ဒီးအၡ့ရၤအတၢ်ပနီၣ်အိၣ်လၢအဃၢၤန့ၣ်လံ.”

³¹ဘၣ်ဆၣ်ဒီးစီၤယိၤအၣ်စံးဘၣ်ပှၤလၢအဟဲထီဒါအီၤတဖၣ်န့ၣ်, “မ့ၢ်သုဆၢထၢၣ်လၢဘဧၤလးအဂီၢ်ဧါ. မ့ၢ်သုဒီဒၣ်အီၤဧါ. ပှၤတဂၤဂ့ၤတဂၤဂ့ၤလၢအဆၢထၢၣ်လၢဘဧၤလးအဂီၢ်န့ၣ် ကဘၣ်တၢ်မၤသံအီၤတချုးမုၢ်ဆ့ၣ်ထီၣ်န့ၣ်လီၤ. ဘဧၤလးမ့မ့ၢ်ကစၢ်ဒီး, မ်အဒီဒၣ်လီၤအသးတက့ၢ်. တၢ်လုၢ်လီၢ်လၢအဘၣ်တၢ်မၤလီၤပှီၢ်ကွံာ်အီၤန့ၣ်မ့ၢ်အဝဲအတၢ်လီၤ.”

³²စးထီၣ်ဖဲန့ၣ်စီၤကံးဒဧိၣ်ဘၣ်တၢ်သ့ၣ်ညါအီၤဒ်စီၤယရူၤဘဧၤလးလီၤ. အဂ့ၢ်ဒ်အံၤစီၤယိၤအၣ်စံး, “မ်ဘဧၤလးဒီဒၣ်လီၤအသးတက့ၢ်. တၢ်လုၢ်လီၢ်လၢဘၣ်တၢ်မၤလီၤပှီၢ်ကွံာ်အီၤန့ၣ်မ့ၢ်အတၢ်လီၤ.”

³³ဒီးကယဲၢ်ပှၤမံးဒယၣ်ဖိခဲလၢာ်, ပှၤဧမၤလ့းဖိဒီးပှၤအဒူၣ်တဖၣ်လၢမဲးမုၢ်ခိၣ်ပာ်ဖှိၣ်ထီၣ်အသး, ဒီးခီဂာ်ထံကျိယၢ်ဒ့ၣ်ဒီးသူၣ်လီၤအဒဲဖဲ ယံးစရ့လးအတၢ်ပျီပူၤန့ၣ်လီၤ.

³⁴ယွၤအသးလီၤဘၣ်လၢစီၤကံးဒဧိၣ်အလိၤ, ဒီးအဝဲအူထီၣ်ကွဲၤ ဒ်သိးကကိးဖှိၣ်ပှၤအဘံၤဧ့စ့ၢ်အဒူၣ်ဖိထၢဖိလၢအကပိာ်အခံန့ၣ်လီၤ.

³⁵အဝဲဆှၢလီၤပှၤစိာ်တၢ်ကစီၣ်တဖၣ်သကုၤပှၤမနၤၡ့ၤဖိအကီၢ်ခံကပၤလိာ် လၢကကိးအဝဲသ့ၣ်ဒ်သိးအကပိာ်ထွဲအခံန့ၣ်လီၤ. အဝဲဆှၢလီၤပှၤစိာ်တၢ်ကစီၣ်တဖၣ်ဆူပှၤအၤၡ့ၢ်, ပှၤစဘူလိၣ်ဒီးပှၤနးသၤလံအဒူၣ်တဖၣ်အအိၣ်ဒီး အဝဲသ့ၣ်စ့ၢ်ကီးဟဲပာ်ဖှိၣ်ထီၣ်အသးဒီးအီၤန့ၣ်လီၤ.

³⁶တုၤနုၤတစု, စီၤကံးဒဧိၣ်စံးဘၣ်ကစၢ်ယွၤ, “နစံးလၢနပာ်လီၤတ့ၢ်နသးလၢနကသူယၤလၢတၢ်နအုၣ်က့ၤခီၣ်က့ၤအံၣ်စရ့လးအဂီၢ်န့ၣ်လီၤ.

³⁷ဂ့ၤလံ. ယကပာ်လီၤသိဆူၣ်တနီၤလၢဟီၣ်ခိၣ်အလိၤဖဲပယီၢ်ဘုကၠူၣ်အလီၢ်လီၤ. လၢမုၢ်ဆ့ၣ်ထီၣ်န့ၣ်ပစီၤထံမ့ၢ်အိၣ်ဒၣ်ထဲလၢသိဆူၣ်အလိၤဒီး မ့ၢ်တအိၣ်လၢဟီၣ်ခိၣ်လိၤဘၣ်ဒီး ယကသ့ၣ်ညါလၢနကသူယၤလၢ တၢ်အုၣ်က့ၤခီၣ်က့ၤအံၣ်စရ့လးအဂီၢ်န့ၣ်လီၤ.”

³⁸ဒီးတၢ်မၤအသးဒ်န့ၣ်လီၤတံၢ်လီၤဆဲးလီၤ. ဖဲစီၤကံးဒဧိၣ်ဂဲၤဆၢထၢၣ်ဂီၤဂီၤလၢခံတနံၤန့ၣ် အဝဲဝံာ်သိဆူၣ်ဒီးမၤန့ၢ်ဝဲပစီၤထံပှဲၤလၢလီခီတဖျၢၣ်န့ၣ်လီၤ.

³⁹တုၤနုၤတစုစီၤကံးဒဧိၣ်စံးဘၣ်ကစၢ်ယွၤ, “သးဒိၣ်လၢ်ယၤတဂ့ၤ, ပျဲယကတိၤတၢ်ဆူညါထဲတဘျီဧိၤတက့ၢ်. ဝံသးစူၤပျဲယမၤကွၢ်ကဒီးတၢ်ဆူညါထဲတဘျီဧိၤလၢသိဆူၣ်န့ၣ်တက့ၢ်. အအံၤတဘျီန့ၣ်ပျဲသိဆူၣ်အိၣ်ဃ့ထီဒီးဟီၣ်ခိၣ်ဘၣ်စီၣ်ဝဲတက့ၢ်.”

⁴⁰ဒီးလၢမုၢ်နၤအဝဲန့ၣ်ကစၢ်ယွၤမၤဝဲတၢ်ဒ်န့ၣ်လီၤ. လၢခံတနံၤမုၢ်ဆ့ၣ်ထီၣ်န့ၣ်သိဆူၣ်ဃ့ထီဝဲလီၤ. မ့မ့ၢ်ဟီၣ်ခိၣ်န့ၣ်စုၣ်စီၣ်ဝဲဒီးပစီၤထံန့ၣ်လီၤ.