Read S'gaw Karen လံာ်ပှၤစံၣ်ညီၣ်ကွီၢ် 9 Bible Online

လံာ်ပှၤစံၣ်ညီၣ်ကွီၢ် 9 - S'gaw Karen bible

လံာ်ပှၤစံၣ်ညီၣ်ကွီၢ် 9

¹စီၤကံးဒဧိၣ်အဖိခွါစီၤအဘံၤမ့လ့းလဲၤဝဲဆူ အမိၢ်အဘူးအတံၢ်ခဲလၢာ်အိၣ်ဝဲဆိးဝဲအလီၢ်ဝ့ၢ်ၡက့ၣ်န့ၣ်လီၤ.

²ဒီးအဝဲစံးဘၣ်အဘူးအတံၢ်ဒ်သိးကသံကွၢ်ပှၤၡက့ၣ်ဖိတဖၣ်, “သုဘၣ်သုသးဒ်လဲၣ်. မ့ၢ်သုအဲၣ်ဒိးစီၤကံးဒဧိၣ်အဖိခွါအဂၤနွံဆံလၢာ်ပၢသုဧါ. မ့တမ့ၢ်ထဲတဂၤဧိၤပၢသုန့ၣ်ဧါ. သ့ၣ်နီၣ်ထီၣ်က့ၤလၢစီၤ အဘံၤမ့လ့းမ့ၢ်သုသွံၣ်သုထံဒီးသုဖံးသုညၣ်ဒၣ်ဝဲတက့ၢ်.”

³အဝဲအမိၢ်အဘူးအတံၢ်တဖၣ်ကတိၤတၢ်ဒီးပှၤၡက့ၣ်ဖိတဖၣ်, ဒီးပှၤၡက့ၣ်ဖိတဖၣ်ပာ်လီၤအသးလၢကပိာ်စီၤအဘံၤမ့လ့း အခံလီၤ. အဂ့ၢ်ဒ်အံၤ, အဝဲမ့ၢ်အဝဲသ့ၣ်အဘူးအတံၢ်အဃိန့ၣ်လီၤ.

⁴ဒီးအဝဲသ့ၣ်ဟ့ၣ်လီၤစီၤအဘံၤမ့လ့းလၢစ့နီၢ်အဘ့ၣ်နွံဆံလၢ အအိၣ်ဝဲလၢတၢ်အၢၣ်လီၤအီလီၤ အဘဧၤလးအတၢ်လုၢ်ဟံၣ်အပူၤန့ၣ် လီၤ. ဒီးအဝဲဒိးလဲန့ၢ်ပှၤအၢပှၤသီတဖၣ်လၢတိၢ်စ့အဝဲန့ၣ်ဒ်သိးကပိာ်အခံအဂီၢ်န့ၣ်လီၤ.

⁵ဒီးအဝဲလဲၤဆူအပၢ်အဟံၣ်ဖဲဝ့ၢ်ဧိးဖြၤဒီးမၤသံကွံာ်အဒီပုၢ်ဝဲၢ်ခွါအဂၤနွံဆံလၢအမ့ၢ် စီၤကံးဒဧိၣ်အဖိခွါတဖၣ်လၢလၢၢ်တဖျၢၣ်ဃီအဖီခိၣ်လီၤ. ဘၣ်ဆၣ်စီၤကံးဒဧိၣ်အဖိခွါအဆံးကတၢၢ်စီၤယိၤသၣ်တဂၤန့ၣ် အိၣ်ခူသူၣ်ဝဲအဃိတၢ်တမၤသံဘၣ်အီၤဘၣ်.

⁶တုၤနုၤတစု, ပှၤၡက့ၣ်ဖိဒီးပှၤမံးလိၤဖိအပိာ်ခွါတဖၣ် ပာ်ဖှိၣ်ထီၣ်အသးဒီးလဲၤဆူသ့ၣ်သ့ထိးဖၣ်စီဆှံဖဲဝ့ၢ်ၡက့ၣ်ဒီး ပာ်ထီၣ်စီၤအဘံၤမ့လ့းလၢစီၤပၤဖဲန့ၣ်လီၤ.

⁷ဖဲစီၤယိၤသၣ်နၢ်ဟူတၢ်ဂ့ၢ်အံၤန့ၣ်, အဝဲလဲၤဆူကစၢၢ်ကရံးစံၣ်အဒီခိၣ်ဒီးဆၢထၢၣ်ဖဲန့ၣ် ဒီးကိးပသူထီၣ်ဆူအဝဲသ့ၣ်အအိၣ်, “ဒိကနၣ်ယၤတက့ၢ်, ပှၤၡက့ၣ်ဖိသ့ၣ်ဧၢ, ဒီးကစၢ်ယွၤကဒိကနၣ်သုလီၤ.

⁸တၢ်စံးဝဲတဘျီ, သ့ၣ်တဖၣ်လဲၤတၢ်ဒ်သိးကဃုထၢစီၤပၤတဂၤလၢအဝဲသ့ၣ်အဂီၢ်န့ၣ်လီၤ. ဒီးအဝဲသ့ၣ်စံးဘၣ်သ့ၣ်စၤယံး, ကဲပစီၤပၤတက့ၢ်.

⁹ဒီးသ့ၣ်စၤယံးစံးဆၢဝဲဒၣ်, ဒ်သိးယကပၢသုအဂီၢ်န့ၣ်ယကဘၣ်ဆိ ကတီၢ်ယတၢ်ဟ့ၣ်ထီၣ်ယသိလၢ တၢ်သူအီၤလၢတၢ်မၤလၤကပီၤယွၤတဖၣ် ဒီးပှၤကညီတဖၣ်အဂီၢ်န့ၣ်လီၤ.

¹⁰တုၤနုၤတစု, သ့ၣ်တဖၣ်စံးဘၣ်ချၢၣ်ဒၢ, ဟဲနဲဒီးကဲပစီၤပၤတက့ၢ်.

¹¹ဘၣ်ဆၣ်ဒီးချၢၣ်ဒၢစံးဆၢဝဲဒၣ်ဒ်သိးယကပၢသုအဂီၢ်န့ၣ် ယကဘၣ်ဆိကတီၢ်ယတၢ်ဟ့ၣ်ထီၣ်ယတၤသၣ်အဂ့ၤဒီးအဝံၣ်အဆၢတဖၣ်န့ၣ်လီၤ.

¹²တုၤနုၤတစု, သ့ၣ်တဖၣ်စံးဘၣ်စပံးမုၢ်, ဟဲနဲဒီးကဲပစီၤပၤတက့ၢ်.

¹³ဘၣ်ဆၣ်ဒီးစပံးမုၢ်စံးဆၢဝဲဒၣ်, ဒ်သိးယကပၢသုအဂီၢ်န့ၣ်ယကဘၣ် ဆိကတီၢ်ယတၢ်ဟ့ၣ်ထီၣ်ယစပံးထံလၢ အဒုးသးခုယွၤတဖၣ်ဒီးပှၤကညီတဖၣ်န့ၣ်လီၤ.

¹⁴တုၤနုၤတစု, ကယဲၢ်သ့ၣ်ခဲလၢာ်စံးဘၣ်သ့ၣ်တၤဆှုၣ်တပှီာ်, ဟဲနဲဒီးကဲပစီၤပၤတက့ၢ်.

¹⁵ဒီးသ့ၣ်တၤဆှုၣ်စံးဆၢဝဲဒၣ်, သုမ့ၢ်သးအိၣ်သပှၢ်ကတၢၢ်လၢသုကဒုးကဲထီၣ်ယၤလၢသုစီၤပၤန့ၣ်, ဟဲဒီးအိၣ်ကဒုလၢယကဒုဖီလာ်တက့ၢ်. သုမ့ၢ်တဟဲဘၣ်ဒီးမ့ၣ်အူကဟးထီၣ်လၢယဒ့ယတြၢ်တဖၣ် အပူၤဒီးအီၣ်ကွံာ်လဘၤနိၣ်အသ့ၣ်ဆှိအ့ရ့းတဖၣ်န့ၣ်လီၤ.”

¹⁶ဒီးစီၤယိၤသၣ်စံးကဒီးဆူညါ, “ဒီးခဲကနံၣ်အံၤ, ဖဲသုဒုးကဲထီၣ်စီၤအဘံၤမ့လ့းလၢစီၤပၤအခါန့ၣ် မ့ၢ်သုပာ်သုသးတီတီလိၤလိၤသပှၢ်ကတၢၢ်ဧါ. မ့ၢ်သုပာ်ကဲစီၤကံးဒဧိၣ်အတၢ်သ့ၣ်နီၣ်ဒီးမၤတၢ်ဂ့ၤတၢ်ဘၣ်လၢ အဒူၣ်ဖိထၢဖိအဖီခိၣ်ဒ်အကြၢးဒီးအဝဲအတၢ်ဖံးတၢ်မၤတဖၣ်န့ၣ်ဧါ.

¹⁷သ့ၣ်နီၣ်ထီၣ်က့ၤလၢယပၢ်ဒုးတ့ၢ်တၢ်လၢသုဂီၢ်တက့ၢ်. အဝဲဟ့ၣ်လီၤအသးသမူဒ်သိးအကအုၣ်က့ၤခီၣ်က့ၤသုလၢပှၤမံးဒယၣ်ဖိတဖၣ်အစုပူၤန့ၣ်လီၤ.

¹⁸ဘၣ်ဆၣ်ဒီးမုၢ်မဆါတနံၤအံၤသုဃၣ်သုသးထီဒါယပၢ်အဟံၣ်ဖိဃီဖိလီၤ. သုမၤသံကွံာ်အဖိခွါအဂၤနွံဆံလၢလၢၢ်တဖျၢၣ်ဃီဖီခိၣ်, ဒီးထဲဒၣ်လၢအဝဲအဖိခွါစီၤအဘံၤမ့လ့း လၢအမၤန့ၢ်ဝဲလၢအကုၢ်ပိာ်မုၣ်, မ့ၢ်သုဘူးသုတံၢ်အဃိဧိၤန့ၣ်, သုဒုးကဲထီၣ်အီၤစီၤပၤလၢၡက့ၣ်လီၤ.

¹⁹ဒီးခဲကနံၣ်အံၤတၢ်လၢသုမၤစီၤကံးဒဧိၣ်ဒီးအဒူၣ်ဖိထၢဖိ လၢမုၢ်မဆါတနံၤအံၤန့ၣ်မ့မ့ၢ်စဲဃဲၤလၢတၢ်သူၣ်တီသးလိၤအပူၤဒီး မ်သုသးခုဃုာ်ဒီးစီၤအဘံၤမ့လ့းဒီးမ်အဝဲသးခုဃုာ်ဒီးသုတက့ၢ်.

²⁰မ့တမ့ၢ်ဘၣ်ဒ်န့ၣ်ဒီး, မ်မ့ၣ်အူကဲၤကပျီၤထီၣ်လၢစီၤအဘံၤမ့လ့းအပူၤ ဒီးအီၣ်ကွံာ်ၡက့ၣ်ဒီးမံးလိၤအပှၤပိာ်ခွါတဖၣ်တက့ၢ်. ဒီးမ်မ့ၣ်အူကဲၤကပျီၤထီၣ်လၢၡက့ၣ်ဒီးမံးလိၤအပှၤပိာ်ခွါတဖၣ်အပူၤ ဒီးအီၣ်ကွံာ်စီၤအဘံၤမ့လ့းန့ၣ်တက့ၢ်.”

²¹အန့ၣ်ဝံၤဒီးမ့ၢ်လၢအဝဲပျံၤအဒီပုၢ်ဝဲၢ်ခွါစီၤအဘံၤမ့လ့း အဃိစီၤယိၤသၣ်ဃ့ၢ်ကွံာ်ဒီးလဲၤအိၣ်ဝဲလၢဘ့ၢ်န့ၣ်လီၤ.

²²ဒီးစီၤအဘံၤမ့လ့းပၢအံၣ်စရ့လးသၢနံၣ်န့ၣ်လီၤ. တုၤနုၤတစုကစၢ်ယွၤဒုးအိၣ်ထီၣ်တၢ်ထီဒုၣ်ထီဒါလိာ်သးလၢ စီၤအဘံၤမ့လ့းဒီးပှၤၡက့ၣ်ဖိတဖၣ်အဘၢၣ်စၢၤ ဒီးအဝဲသ့ၣ်ပူထီၣ်ထီဒါစီၤအဘံၤမ့လ့းန့ၣ်လီၤ.

²³

²⁴တၢ်အံၤမၤအသးဒ်သိးစီၤအဘံၤမ့လ့းဒီးပှၤၡက့ၣ်ဖိလၢအဟ့ၣ်ဂံၢ်ဟ့ၣ်ဘါအီၤဒ်သိးအကမၤသံကွံာ် စီၤကံးဒဧိၣ်အဖိခွါအဂၤနွံဆံန့ၣ်, ကဒိးဘၣ်တၢ်ဒ်အတၢ်ကမၣ်အသိးအဂီၢ်န့ၣ်လီၤ.

²⁵ဒီးပှၤၡက့ၣ်ဖိတဖၣ်ပာ်လီၤပှၤခိးခူသူၣ်တၢ်ဖိလၢကစၢၢ်တဖၣ်အဒီခိၣ် လၢအကမၤသံစီၤအဘံၤမ့လ့းအဂီၢ်န့ၣ်လီၤ. အဝဲသ့ၣ်ဂုာ်ဆူၣ်ကယဲၢ်ပှၤလၢအလဲၤခီဂာ်အဝဲသ့ၣ်အကျဲန့ၣ်လီၤ. ဒီးတၢ်တဲဘၣ်စီၤအဘံၤမ့လ့းလၢတၢ်ဂ့ၢ်အံၤန့ၣ်လီၤ.

²⁶တုၤနုၤတစု, စီၤဧ့းဘ့းအဖိခွါစီၤကၤလးဟဲဝဲဆူၡက့ၣ်ဃုာ်ဒီးအဒီပုၢ်ဝဲၢ်တဖၣ် ဒီးပှၤၡက့ၣ်ဖိတဖၣ်သန့ၤအသးလၢအီၤလီၤ.

²⁷အဝဲသ့ၣ်ခဲလၢာ်လဲၤနုာ်ဆူပှၤၡက့ၣ်ဖိတဖၣ်အစပံးလီၢ် ဒီးဒဲးန့ၢ်စပံးသၣ်တဖၣ်ဒီးမၤန့ၢ်ဝဲစပံးထံဒီးမၤမူးသးဖှံန့ၣ်လီၤ. အဝဲသ့ၣ်လဲၤနုာ်ဆူပှၤၡက့ၣ်ဖိတဖၣ်အကစၢ်အတၢ်လုၢ်ဟံၣ်အပူၤ ဒီးအီမူၤအသးဒီးကတိၤဒုၣ်ဒွဲၣ်စီၤအဘံၤမ့လ့းန့ၣ်လီၤ.

²⁸စီၤကၤလးစံးဝဲဒၣ်, “ပဝဲပှၤပိာ်ခွါလၢၡက့ၣ်အပူၤတဖၣ်ပမ့ၢ်ပှၤဒ်လဲၣ်. ဘၣ်မနုၤပဘၣ်မၤစီၤအဘံၤမ့လ့းအတၢ်မၤန့ၣ်လဲၣ်. ဒ်လဲၣ်ဂ့ၤ, အဝဲမ့ၢ်မတၤလဲၣ်. မ့ၢ်စီၤကံးဒဧိၣ်အဖိခွါလီၤ. ဒီးစီၤစဘူလးဟဲစိာ်အဝဲအတၢ်မၤလိာ်တဖၣ် ဘၣ်ဆၣ်ဒီးဘၣ်မနုၤလၢပကဘၣ်မၤအတၢ်လဲၣ်. တီဒီးသုပၢ်ဖးဒိၣ်လၢပျၢၤစီၤဃမိၢ်လၢသုလီၤစၢၤလၢအီၤလၢ အသူၣ်ထီၣ်သုဒူၣ်သုထၢန့ၣ်တက့ၢ်.

²⁹ယဆၢကဲထီၣ်ခိၣ်နၢ်လၢပှၤဂီၢ်မုၢ်အံၤအဖီခိၣ်လီၤ. ယကသုးကွံာ်စီၤအဘံၤမ့လ့းဒီးယကစံးဘၣ်အီၤ, မၤအါထီၣ်နသုးမုၢ်အဂံၢ်အဘါဒီးဟဲထီၣ်ဒုးတၢ်တက့ၢ်.”

³⁰ဒီးဝ့ၢ်န့ၣ်အပဒိၣ်, စီၤစဘူလးအသးဒိၣ်ထီၣ်ဝဲဖဲအနၢ်ဟူတၢ်လၢစီၤကၤလးစံးဝဲဒၣ်န့ၣ်လီၤ.

³¹အဝဲဆှၢလီၤပှၤစိာ်တၢ်ကစီၣ်တဖၣ်ဆူစီၤအဘံၤမ့လ့းလၢ အအိၣ်ဖဲအရူမၤ, ဒ်သိးအကတဲဘၣ်အီၤလၢစီၤဧ့ဘ့းအဖိခွါစီၤကၤလး ဟဲဃုာ်ဒီးအဒီပုၢ်ဝဲၢ်တဖၣ်ဆူၡက့ၣ်ဒီးတမ့ၢ်ကပျဲနကလဲၤနုာ်ဆူဝ့ၢ်န့ၣ်အပူၤဘၣ်.

³²ဒီးခဲကနံၣ်အံၤ နဲဒၣ်ဒီးနပှၤတဖၣ်ကြၢးသုးအသးလၢမုၢ်နၤခါဒီးလဲၤအိၣ်ခူသူၣ်လၢစံာ်ပျီတဖၣ်အပူၤန့ၣ်လီၤ.

³³ခဲဂီၤကိာ်ဖဲမုၢ်ဟဲထီၣ်န့ၣ်လဲၤဒုးဝ့ၢ်ၡက့ၣ်သတူၢ်ကလာ်တက့ၢ်. တုၤနုၤတစု, ဖဲစီၤကၤလးဒီးအပှၤတဖၣ်ဟဲထီၣ်ထီဒါနၤန့ၣ် တီၢ်အီၤဆူၣ်ထဲသိးနမၤအီၤသ့န့ၣ်တက့ၢ်.

³⁴လၢတၢ်န့ၣ်အဃိစီၤအဘံၤမ့လ့းဒီးအပှၤတဖၣ်ခဲလၢာ်သုးအလီၢ်လၢမုၢ်နၤခါ ဒီးပာ်တဒၢအသးလၢဝ့ၢ်ၡက့ၣ်အချၢလွံၢ်ဖုန့ၣ်လီၤ.

³⁵ဖဲစီၤအဘံၤမ့လ့းဒီးအပှၤတဖၣ်ထံၣ်စီၤကၤလးဟဲထီၣ်ဒီးဆၢထၢၣ်လၢဝ့ၢ်အတြဲၤန့ၣ် အဝဲသ့ၣ်ဂဲၤထၢၣ်လၢအတၢ်အိၣ်သဒၢအလီၢ်န့ၣ်လီၤ.

³⁶တုၤစီၤကၤလးထံၣ်ဘၣ်အဝဲသ့ၣ်ဒီးစံးဘၣ်စီၤစဘူလး, “ကွၢ်, ပှၤတဖၣ်ဟဲလီၤလၢကစၢၢ်ဒီခိၣ်အလိၤလီၤ.” စီၤစဘူလးစံးဆၢဝဲဒၣ်, “တၢ်တဖၣ်န့ၣ်တမ့ၢ်ပှၤကညီဘၣ်. မ့ၢ်ဒၣ်တၢ်ကဒုလီၤလၢကစၢၢ်ခိၣ်န့ၣ်လီၤ.”

³⁷စီၤကၤလးစံးကဒီးဝဲ, “ကွၢ်လၢန့ၣ်, ပှၤဟဲလီၤလၢကစၢၢ်ဒီခိၣ်ဒီး ပှၤအဂၤတဖုဟဲဝဲလၢပှၤဖးပှၤတၢ်ဟဲဝံတဖၣ်အသ့ၣ်သ့ထိးဖၣ်အကျဲန့ၣ်လီၤ.”

³⁸တုၤနုၤတစု, စီၤစဘူလးစံးဘၣ်အီၤ, “နတၢ်ကတိၤအဒိၣ်အသွါတဖၣ်ခဲအံၤအိၣ်ဖဲလဲၣ်. နမ့ၢ်ပှၤတဂၤလၢအသံကွၢ်ဘၣ်မနုၤအဃိပဘၣ်မၤစီၤအဘံၤမ့လ့း အတၢ်လဲၣ်န့ၣ်လီၤ. ပှၤတဖၣ်အံၤမ့ၢ်ပှၤလၢနမၤအီၤတရီတပါန့ၣ်လီၤ. လဲၤထီၣ်ခဲအံၤဒီးဒုးအီၤတက့ၢ်.”

³⁹စီၤကၤလးဆှၢထီၣ်ပှၤဝ့ၢ်ၡက့ၣ်ဖိတဖၣ်ဒီးဒုးစီၤအဘံၤမ့လ့းန့ၣ်လီၤ.

⁴⁰စီၤကၤလးဃ့ၢ်ကွံာ်ဝဲဒီးစီၤအဘံၤမ့လ့းလူၤထွဲအီၤန့ၣ်လီၤ. ပှၤဘၣ်ဒိဘၣ်ထံးဝဲအါဂၤတုၤဒၣ်လဲာ်လၢဝ့ၢ်အတြဲၤန့ၣ်လီၤ.

⁴¹စီၤအဘံၤမ့လ့းအိၣ်ဆိးဖဲအရူမၤဒီးစီၤစဘူလးနီၣ်ထီၣ် ကွံာ်စီၤကၤလးဒီးအဒီပုၢ်ဝဲၢ်တဖၣ်လၢ ဝ့ၢ်ၡက့ၣ်အပူၤဒ်သိး အဝဲသ့ၣ်အိၣ်ဖဲန့ၣ်သုတသ့လၢၤတဂ့ၤန့ၣ်လီၤ.

⁴²လၢခံတနံၤန့ၣ်စီၤအဘံၤမ့လ့းထံၣ်သ့ၣ်ညါဝဲလၢ ဝ့ၢ်ၡက့ၣ်အပှၤဂီၢ်မုၢ်ကူၣ်ထီၣ်လၢကဟးထီၣ်ဆူစံာ်ပျီတဖၣ်အပူၤန့ၣ်လီၤ.

⁴³မၤသးဒ်န့ၣ်ဒီးအဝဲဟံးန့ၢ်အပှၤတဖၣ်ဒီးနီၤဖးဝဲသၢဖုဒီး လဲၤအိၣ်ခိးခူသူၣ်တၢ်လၢစံာ်ပျီတဖၣ်အပူၤန့ၣ်လီၤ. တုၤအထံၣ်ဝဲလၢပှၤဂီၢ်မုၢ်ဟဲထီၣ်လၢဝ့ၢ်ပူၤန့ၣ်အဝဲဟဲထီၣ် လၢတၢ်ခိးခူသူၣ်အလီၢ်ဒ်သိးအကမၤသံကွံာ်အဝဲသ့ၣ်န့ၣ်လီၤ.

⁴⁴ဖဲစီၤအဘံၤမ့လ့းဒီးအပှၤတဖုလဲၤထီၣ်ချ့ချ့လၢကမၤန့ၢ်ဝ့ၢ်အတြဲၤန့ၣ်, ပှၤအဂၤခံဖုဒုးပှၤအိၣ်လၢစံာ်ပျီတဖၣ်အပူၤဒီးမၤသံကွံာ်အီၤခဲလၢာ်န့ၣ်လီၤ.

⁴⁵ဒီးတၢ်ဒုးတၢ်ယၤယံာ်ဝဲဒီနံၤညါန့ၣ်လီၤ. စီၤအဘံၤမ့လ့းမၤန့ၢ်ဝ့ၢ်ၡက့ၣ် ဒီးမၤသံကွံာ်အပှၤဂီၢ်မုၢ်, မၤလီၤပှီၢ်ကွံာ်အီၤဒီးမၤဘၢတၢ်လီၢ်န့ၣ်လၢအံသၣ်လီၤ.

⁴⁶ဖဲပှၤခိၣ်ပှၤနၢ်ခဲလၢာ်လၢဝ့ၢ်ၡက့ၣ်အတိာ်ပူၤနၢ်ဟူတၢ်ဂ့ၢ်န့ၣ်ဒီး, အဝဲသ့ၣ်အိၣ်ခူသူၣ်ဝဲလၢတၢ်အၢၣ်လီၤအီလီၤအကစၢ်ဘဧၤလးအတၢ်လုၢ်ဟံၣ် အတိာ်ခၢၣ်သနၢၣ်အပူၤန့ၣ်လီၤ.

⁴⁷တၢ်ဒုးသ့ၣ်ညါစီၤအဘံၤမ့လ့းလၢအဝဲသ့ၣ်ပာ်ဖှိၣ်အသးဖဲန့ၣ် အဂ့ၢ်န့ၣ်လီၤ.

⁴⁸လၢတၢ်န့ၣ်အဃိအဝဲလဲၤထီၣ်ဆူကစၢၢ်စးလမိၣ်ဃုာ်ဒီးအပှၤတဖၣ်လီၤ. ဖဲန့ၣ်အဝဲစိာ်ထီၣ်ကွါတဘ့ၣ်ဒီးကျီန့ၢ်သ့ၣ်တဒ့ဒီးယိးထီၣ် ဝဲလၢအဖံထံခိၣ် ဒီးတဲဘၣ်အပှၤတဖၣ်လၢကမၤချ့ချ့ဒ်သိးအီၤန့ၣ်လီၤ.

⁴⁹မၤသးဒ်န့ၣ်ဒီး, ပှၤကိးဂၤဒဲးကျီန့ၢ်သ့ၣ်တဒ့စုာ်စုာ်ဒီးလဲၤပိာ်စီၤ အဘံၤမ့လ့းအခံဒီးပူၣ်ထီၣ်သ့ၣ်ဒ့တဖၣ် လၢတိာ်န့ၣ်အကပၤလီၤ. အဝဲသ့ၣ်ဆူးကဲၤထီၣ်သ့ၣ်ဒ့တဖၣ်န့ၣ်လၢမ့ၣ်အူဃုာ်ဒီးပှၤဂီၢ်မုၢ်အိၣ်လၢတိာ်ပူၤန့ၣ်လီၤ. ဒီးကယဲၢ်ပှၤအိၣ်လၢတိာ်ပူၤကအိၣ်ဝဲ ပိာ်မုၣ်ပိာ်ခွါတကထိဂၤန့ၣ်သံဝဲခဲလၢာ်လီၤ.

⁵⁰အန့ၣ်ဝံၤဒီး, စီၤအဘံၤမ့လ့းလဲၤဆူဝ့ၢ်တ့ဘ့းဒီးကဝီၤဃးဝ့ၢ်န့ၣ်ဒီးမၤန့ၢ်အီၤလီၤ.

⁵¹ဖဲန့ၣ်တၢးထီအဂၢၢ်အကျၢၤအိၣ်ဝဲတခါဒီးပိာ်မုၣ်ပိာ်ခွါကိးဂၤဒဲးလၢဝ့ၢ်ပူၤ ဃုာ်ဒီးပှၤခိၣ်ပှၤနၢ်တဖၣ်ဃ့ၢ်ဆူတၢးထီအအိၣ်န့ၣ်လီၤ. အဝဲသ့ၣ်ကးတံၢ်တြဲၤဒီးလဲၤထီၣ်ဆူတၢးထီအခိၣ်ဒုးန့ၣ်လီၤ.

⁵²တုၤစီၤအဘံၤမ့လ့းဟဲဒ်သိးကဒုးတၢးထီန့ၣ် အဝဲလဲၤထီၣ်ဆူတြဲၤအအိၣ်ဒ်သိးအကဆူးကဲၤထီၣ်အီၤလၢမ့ၣ်အူန့ၣ်လီၤ.

⁵³ဘၣ်ဆၣ်ဒီးပိာ်မုၣ်တဂၤကွံာ်လီၤဆၢၣ်ဂူာ်လၢၢ်တဖျၢၣ်လၢအခိၣ်လိၤ ဒီးအခိၣ်ကုသ့ၣ်ဖးကွံာ်ဝဲန့ၣ်လီၤ.

⁵⁴တုၤနုၤတစု, အဝဲကိးန့ၢ်ပှၤသးစၢ်လၢအစိာ်အစုကဝဲၤန့ၣ်ချ့ချ့ဒီးစံးဘၣ်အီၤ, “ထုးထီၣ်နနးဒီးမၤသံကွံာ်ယၤတက့ၢ်. ယတအဲၣ်ဒိးလၢပှၤစံးလၢပိာ်မုၣ်တဂၤမၤသံယၤန့ၣ်ဘၣ်.” ဒီးပှၤသးစၢ်န့ၣ်ဆဲးဖျိအီၤဒီးသံဝဲလီၤ.

⁵⁵ဖဲပှၤအံၣ်စရ့လးဖိတဖၣ်ထံၣ်လၢစီၤအဘံၤမ့လ့းသံဝဲန့ၣ်ဒီး အဝဲသ့ၣ်က့ၤဆူဟံၣ်ကိးဂၤဒဲးန့ၣ်လီၤ.

⁵⁶လၢကျဲဒ်အံၤန့ၣ်, ကစၢ်ယွၤဟ့ၣ်ကၣ်စီၤအဘံၤမ့လ့းလၢအမၤတၢ်ကမၣ်ထီဒါအပၢ် ခီဖျိတၢ်မၤသံကွံာ်အဒီပုၢ်ဝဲၢ်အဂၤနွံဆံအဃိန့ၣ်လီၤ.

⁵⁷ကစၢ်ယွၤဒုးတူၢ်ဘၣ်စ့ၢ်ကီးပှၤဝ့ၢ်ၡက့ၣ်ဖိအတၢ်လၢအတၢ်အၢတၢ်သီအဃိ, ဒ်စီၤကံးဒဧိၣ်အဖိခွါစီၤယိၤသၣ်ဆိၣ်အၢအဝဲသ့ၣ်အသိးန့ၣ်လီၤ.