Read S'gaw Karen လံာ်လီၣ်ဖျါ 11 Bible Online

လံာ်လီၣ်ဖျါ 11 - S'gaw Karen bible

လံာ်လီၣ်ဖျါ 11

¹တုၤနုၤတစုတၢ်ဟ့ၣ်ယၤနီၣ်ထိးဘိတဘိလၢအလီၤဂာ်ဒီးနီၣ်ထိၣ်, ဒီးယဘၣ်တၢ်စံးဘၣ်ယၤ, “လဲၤဒီးထိၣ်ကွၢ်ကစၢ်ယွၤအတၢ်လုၢ်ဟံၣ်ဒီးတၢ်လုၢ်လီၢ်, ဒီးဂံၢ်ကွၢ်ပှၤတဖၣ်လၢအဘူၣ်ထီၣ်ဘါထီၣ်တၢ်ဖဲတၢ်လုၢ်ဟံၣ် အပူၤန့ၣ်တက့ၢ်.

²မ့မ့ၢ်ဂၢၤလၢအချၢတကပၤန့ၣ်, တဘၣ်ထိၣ်ကွၢ်အီၤတဂ့ၤ, အဂ့ၢ်ဒ်အံၤ, အဝဲသ့ၣ်ဘၣ်တၢ်ဟ့ၣ်လီၤတ့ၢ်အီၤဆူပှၤကလုာ်ဂၤ တဖၣ်လၢအကယီၢ်တံၢ်ဝ့ၢ်စီဆှံတဖျၢၣ်န့ၣ်လၢလွံၢ်ဆံခံလါ အတီၢ်ပူၤလီၤ.

³ယကဆှၢလီၤယပှၤအုၣ်အသးခံဂၤလၢအကူသိးထၢၣ်တၢ်ကံးယာ်, ဒီးအဝဲသ့ၣ်ကကတိၤတၢ်လၢဝံအကျိာ်, ဖဲအသီ ၁၂၆၀ တဖၣ်အတီၢ်ပူၤန့ၣ်လီၤ.”

⁴ပှၤအုၣ်အသးခံဂၤန့ၣ်မ့ၢ်သ့ၣ်စၤယံးခံထူၣ်ဒီးမ့ၣ်အူဒၢခံဖျၢၣ်လၢ အအိၣ်ဆၢထၢၣ်ဖဲဟီၣ်ခိၣ်အကစၢ်အမဲာ်ညါန့ၣ်လီၤ.

⁵ပှၤတဂၤဂၤမ့ၢ်ဂုာ်ကျဲးစၢးမၤဆါအဝဲသ့ၣ်န့ၣ်, မ့ၣ်အူဟဲဖျိးထီၣ်လၢအဝဲသ့ၣ်အကိာ်ပူၤ, ဒီးအီၣ်ကွံာ် အဒုၣ်အဒါတဖၣ်, ဒီးလၢကျဲဒ်အံၤအပူၤ, ပှၤတဂၤလၢ်လၢ်လၢအဂုာ်ကျဲးစၢးမၤဆါအဝဲသ့ၣ်န့ၣ်, ကဘၣ်တၢ်မၤသံကွံာ်အီၤလီၤ.

⁶အဝဲသ့ၣ်အိၣ်ဒီးတၢ်စိတၢ်ကမီၤလၢအကကးတံာ်ဃာ်မူခိၣ်ဒ်သိး, ဖဲဆၢကတီၢ်လၢအဝဲသ့ၣ်ကတိၤတၢ်လၢဝံအကျိာ်န့ၣ်မူခိၣ် အသုတစူၤနီတစဲးတဂ့ၤန့ၣ်လီၤ. အဝဲသ့ၣ်အိၣ်စ့ၢ်ကီးဒီးတၢ်စိတၢ်ကမီၤလၢထံမူအဖီခိၣ်လၢ အကလဲလိာ်အီၤဆူတၢ်သွံၣ်အဂီၢ်န့ၣ်လီၤ. အဝဲသ့ၣ်အိၣ်စ့ၢ်ကီးဒီးတၢ်စိတၢ်ကမီၤလၢအကတီၢ် ဟီၣ်ခိၣ်လၢတၢ်သံသတြိာ်အကလုာ်ကလုာ်အဘျီတဖၣ် အဘျီဖဲအဝဲသ့ၣ်အသးဒၣ်ဝဲအသိးန့ၣ်လီၤ.

⁷ဖဲအဝဲသ့ၣ်ဘိးဘၣ်သ့ၣ်ညါအတၢ်ကစီၣ်ဝံၤလံန့ၣ်, တၢ်ဒူတၢ်ဃိၤလၢအဟဲဟးထီၣ်လၢတၢ်ပူၤယိာ်တဒုန့ၣ် ကဒုးလိာ်အသးဒီးအဝဲသ့ၣ်လီၤ. အဝဲဒၣ်ကမၤနၢၤ ဒီးမၤသံကွံာ်အဝဲသ့ၣ်လီၤ.

⁸ဒီးအဝဲသ့ၣ်အစိၣ်ကအိၣ်မံလီၤလၢဝ့ၢ်ဖးဒိၣ်တဖျၢၣ်ဖဲ အကစၢ်ဘၣ်တၢ်ပျၤထီအီၤလၢထူၣ်စုညါအလိၤန့ၣ် အကျဲမုၢ်ခိၣ်လီၤ. ဝ့ၢ်တဖျၢၣ်န့ၣ်အမံၤလၢအပာ်ဖျါထီၣ်တၢ်ခီဖျိ တၢ်အဒိအတဲာ်မ့ၢ်ဝဲစဒိၣ်, မ့တမ့ၢ်အဲၤကူပတူးလီၤ.

⁹လၢသၢသီဒီးနံၤတဝာ်အတီၢ်ပူၤ, ပှၤကလုာ်လၢကိးထံကိးကီၢ်, ကိးဒူၣ်ကိးထၢ, အိၣ်ဒီးတၢ်ကတိၤအကျိာ်အါကျိာ်, ဒီးပှၤကလုာ်ကိးကလုာ်ဒဲးကကွၢ်အဝဲသ့ၣ်အစိၣ်, ဒီးတပျဲတၢ်ကခူၣ်လီၤအီၤဘၣ်လီၤ.

¹⁰ပှၤအိၣ်ဝဲဆိးဝဲလၢဟီၣ်ခိၣ်ချၢတဖၣ်ကသူၣ်ခုသးခုဝဲ လၢပှၤခံဂၤအံၤအတၢ်သံအဃိလီၤ. အဝဲသ့ၣ်ကမုာ်လၤသးခုသကိးဝဲဒီးဆှၢလီၤတၢ်ဟ့ၣ်ဆူတဂၤဒီး တဂၤအအိၣ်, မ့ၢ်လၢဝံခံဂၤအံၤဒုးအိၣ်ထီၣ်တ့ၢ်တၢ်တူၢ်ဘၣ် တၢ်နးတၢ်ဖှီၣ်အဒိၣ်အအါလၢပှၤဟီၣ်ခိၣ်ဖိတဖၣ်အဂီၢ် အဃိန့ၣ်လီၤ.

¹¹ဖဲသၢသီဒီးနံၤတဝာ်ပူၤကွံာ်န့ၣ်, တၢ်သါလၢအဟ့ၣ်တၢ်မူ, ဟဲလၢကစၢ်ယွၤအအိၣ်ဒီးနုာ်လီၤဆူအဝဲသ့ၣ်အပူၤ, ဒီးအဝဲသ့ၣ် ဂဲၤဆၢထၢၣ်, ဒီးပှၤကိးဂၤဒဲးလၢအထံၣ်ဘၣ်အဝဲသ့ၣ်တဖၣ်န့ၣ် အသူၣ်ပျံၤသးဖုးဝဲန့ၣ်လီၤ.

¹²အန့ၣ်ဝံၤအလီၢ်ခံ, ဝံခံဂၤနၢ်ဟူတၢ်ကလုၢ်ဖးဒိၣ်လၢမူခိၣ်, ကတိၤတၢ်ဒီးအဝဲသ့ၣ်, “ဟဲထီၣ်ဖဲအံၤတက့ၢ်.” ဒီးဖဲအဝဲသ့ၣ်အဒုၣ်အဒါတဖၣ်ကွၢ်ဝဲအဖၢမုၢ်န့ၣ်, အဝဲသ့ၣ်က့ၤထီၣ်ဆူမူခိၣ်လၢတၢ်အၢၣ်တလိၣ်အပူၤ လီၤ.

¹³တကတီၢ်ဃီဖဲန့ၣ်ဟီၣ်ခိၣ်ဟူးဝးဝဲဒၣ်ဆူၣ်ဆူၣ်ကလဲာ်, ဝ့ၢ်အဆံဆဲၣ်ပူဘၣ်တၢ်မၤဟးဂီၤကွံာ်အီၤ, ဒီးပှၤအဂၤနွံကထိ သံကွံာ်ဝဲဒၣ်လီၤ. ပှၤအိၣ်လီၤတဲာ်တ့ၢ်တဖၣ်အသူၣ်ပျံၤသးဖုး ဒီးစံးထီၣ်ပတြၢၤကစၢ်ယွၤလၢမူခိၣ်တဂၤအတၢ်ဒိၣ်တၢ်မုၢ် န့ၣ်လီၤ.

¹⁴တၢ်နးတၢ်ဖှီၣ်ခံမံၤတမံၤန့ၣ်မၤအသးဝံၤလံ, ဘၣ်ဆၣ်ဒီး တယံာ်ဘၣ်န့ၣ်, တၢ်နးတၢ်ဖှီၣ်သၢမံၤတမံၤကတုၤအိၣ်လီၤ.

¹⁵အန့ၣ်ဝံၤဒီး, ကလူးနွံဂၤတဂၤအူထီၣ်အကွဲၤ, ဒီးတၢ်ကလုၢ်တဖၣ်သီၣ်ထီၣ်ဖးဒိၣ်လၢမူခိၣ်, ဒီးစံးဝဲဒၣ်, “ခဲကနံၣ်အံၤ, တၢ်စိကမီၤဘၣ်ဃးဒီးတၢ်ပၢဘၣ်ဟီၣ်ခိၣ်မ့ၢ် ပကစၢ်ဒီးအမ့းၡံအၤအတၢ်, ဒီးအဝဲဒၣ်ကပၢတၢ်လီၤထူလီၤ ယိာ်လီၤ.”

¹⁶တုၤနုၤတစု, ပှၤသူၣ်က့သးပှၢ်ခံဆံလွံၢ်ဂၤလၢအဆ့ၣ်နီၤလၢ အလီၢ်ပစိာ်လိၤ, လၢကစၢ်ယွၤအမဲာ်ညါန့ၣ်ထိၣ်လီၤပှီၤအသး, ဒီးဘူၣ်ထီၣ်ဘါထီၣ်ကစၢ်ယွၤဒီးစံးဝဲ,

¹⁷“သ့တၢ်လၢာ်ကစၢ်ယွၤ, လၢအမ့ၢ်တၢ်, ဒီးမ့ၢ်တ့ၢ်ဝဲတဂၤဧၢ, ပစံးဘျုးနၤလၢနဟံးန့ၢ်တ့ၢ်လံနစိကမီၤအဒိၣ်အမုၢ်, ဒီးစးထီၣ်ပၢတၢ်အဃိန့ၣ်လီၤ.

¹⁸ပှၤကလုာ်ဂၤတဖၣ်သူၣ်ဒိၣ်သးဖျိးဝဲ, အဂ့ၢ်မ့ၢ်လၢနတၢ်သးထီၣ် အဆၢကတီၢ်ဟဲတုၤဝဲလံ, ဆၢကတီၢ်လၢပှၤသံ ကဘၣ်တၢ်စံၣ်ညီၣ်အီၤန့ၣ်လီၤ. ဆၢကတီၢ်တုၤအိၣ်ဝဲလၢတၢ်ကဟ့ၣ်ခိၣ်ဖး ဆူနခ့နပှၤတဖၣ်, ဝံတဖၣ်, ဒီးနပှၤဂီၢ်မုၢ်ခဲလၢာ်, ပှၤကိးဂၤဒဲးလၢအအိၣ်ဒီး တၢ်ယူးယီၣ်ပာ်ကဲနၤတဖၣ်, ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤန့ၣ်လီၤ. ဆၢကတီၢ်တုၤအိၣ်ဝဲလၢတၢ်ကမၤဟးဂီၤကွံာ် ပှၤတဖၣ်လၢအမၤဟးဂီၤဟီၣ်ခိၣ်န့ၣ်လီၤ.”

¹⁹တုၤနုၤတစုကစၢ်ယွၤအတၢ်လုၢ်ဟံၣ်လၢမူခိၣ်အိးထီၣ်အသး, ဒီးတၢ်အၢၣ်လီၤအီလီၤအတလါဘၣ်တၢ်ထံၣ်အီၤဖဲန့ၣ်လီၤ. အန့ၣ်ဝံၤဒီးလီဝၢ်အဒံး, တၢ်သီၣ်ထီၣ်ဝဲဒၣ်ရုၢ်ရုၢ်, လီသီၣ်လီသဲ, ဟီၣ်ခိၣ်ဟူးဝးဒီးသူၣ်အဖျၢၣ်တဖၣ်ဟဲလီၤဝဲဒ် တၢ်စူၤဖးဒိၣ်အသိးန့ၣ်လီၤ.