Read S'gaw Karen လံာ်လီၣ်ဖျါ 15 Bible Online

လံာ်လီၣ်ဖျါ 15 - S'gaw Karen bible

လံာ်လီၣ်ဖျါ 15

¹အန့ၣ်ဝံၤအလီၢ်ခံ, ယထံၣ်ဘၣ်တၢ်လီၤတိၢ်လီၤဆီလၢ ပှၤနၢ်ပၢၢ်အဂ့ၢ်တသ့ဘၣ်အဂၤတမံၤလၢမူကပိာ်လိၤ, လၢအဒိၣ်ဝဲသွါဝဲဒီးလီၤကတုၤသးမးတမံၤန့ၣ်လီၤ. ကလူးအိၣ်ဝဲဒၣ်နွံဂၤ, လၢအအိၣ်ဒီးတၢ်နးတၢ်ဖှီၣ်နွံမံၤ, ဒီးမ့ၢ်ဝဲတၢ်နးတၢ်ဖှီၣ်လၢခံကတၢၢ်တဖၣ်, အဂ့ၢ်ဒ်အံၤ, မ့ၢ်ဝဲတၢ်ပာ်ဖျါထီၣ်ကစၢ်ယွၤအတၢ်သးထီၣ်, လၢခံကတၢၢ်န့ၣ်လီၤ.

²ဒီးယထံၣ်တၢ်လၢအလီၤဂာ်ပီၣ်လဲၣ်ယွၤခၣ်စိးအိၣ်ဃါဃုာ် အသးဒီးမ့ၣ်အူန့ၣ်လီၤ. ယထံၣ်ဘၣ်စ့ၢ်ကီးပှၤတဖၣ်လၢအမၤနၢၤတၢ်ဒူတၢ်ဃိၤဒီး အက့ၢ်အဂီၤ, ဒီးမၤနၢၤပှၤတဂၤလၢအမံၤဘၣ်တၢ်ပာ်ဖျါ အီၤခီဖျိနီၣ်ဂံၢ်တဖျၢၣ်န့ၣ်လီၤ. အဝဲသ့ၣ်အိၣ်ဆၢထၢၣ်လၢပီၣ်လဲၣ်ယွၤခၣ်စိးအကပၤ, ဟံးဃာ်တနၢ်သ့ၣ်တဖၣ်လၢကစၢ်ယွၤဟ့ၣ်အဝဲသ့ၣ်,

³ဒီးသးဝံၣ်ယွၤအခ့အပှၤ, စီၤမိၤၡ့အတၢ်သးဝံၣ်, ဒီးသိဖိ အတၢ်သးဝံၣ်ဒီးစံးဝဲ, “သ့တၢ်လၢာ်ကစၢ်ယွၤဧၢ, နတၢ်ဖံးတၢ်မၤတဖၣ်ဒိၣ်ဝဲသွါဝဲ, ဒီးလီၤလိၢ်လီၤလးမးလဲၣ်. ထံဧိၤကီၢ်ဧိၤတဖၣ်အစီၤပၤဧၢ, နကျဲဧိၤကပူၤဧိၤတဖၣ်လိၤဝဲဘၣ်ဝဲ, ဒီးမ့ၢ်ဝဲတီဝဲဆံးဒိၣ်လဲၣ်.

⁴မတၤကအိၣ်ဝဲတဂၤလၢအတပျံၤ ဒီးတယူးယီၣ်နၤန့ၣ်လဲၣ်, ကစၢ်ယွၤဧၢ. မတၤတဂၤကဂ့ၢ်လိာ်လၢအကဘိးဘၣ်သ့ၣ်ညါ ဒီးတဲဖျါထီၣ်နတၢ်ဒိၣ်တၢ်မုၢ်အဂ့ၢ်န့ၣ်လဲၣ်. ထဲနၤတဂၤဧိၤ နစီဝဲဆှံဝဲလီၤ. ကယဲၢ်ထံဧိၤကီၢ်ဧိၤတဖၣ် ကဟဲဝဲဒီးဘူၣ်ထီၣ်ဘါထီၣ်နၤ, အဂ့ၢ်မ့ၢ်လၢနတၢ်ဖံးတၢ်မၤအတီအလိၤတဖၣ်ဘၣ်တၢ်ထံၣ် အီၤလၢပှၤကိးဂၤဒဲးအဃိန့ၣ်လီၤ.”

⁵တၢ်န့ၣ်ဝံၤအလီၢ်ခံ, ယထံၣ်တၢ်လုၢ်ဟံၣ်လၢမူခိၣ်အိးထီၣ် အသး, အိၣ်ဒီးတၢ်အၢၣ်လီၤအီလီၤအဒဲလၢအအိပူၤန့ၣ်လီၤ.

⁶ကလူးနွံဂၤလၢအအိၣ်ဒီးတၢ်နးတၢ်ဖှီၣ်နွံမံၤန့ၣ်, ဟဲထီၣ်လၢ တၢ်လုၢ်ဟံၣ်အပူၤ, ကူဝဲသိးဝဲလၢဖှီဝါကဆှၣ်လၢအကဆှီဒီး ကတြ့ၣ်ကတြိၣ်, ဒီးကံၢ်တူာ်အသးနါပှၢ်လၢတၢ်အကွီၤထူ တဖၣ်န့ၣ်လီၤ.

⁷တုၤနုၤတစုတၢ်လၢအသးသမူအိၣ်လွံၢ်ဒုအကျါတဒုန့ၣ်, ဟ့ၣ်ကလူးနွံဂၤလၢသလၢထူနွံဖျၢၣ်လၢအပှဲၤဝဲဒီးကစၢ်ယွၤ လၢအမူဝဲလီၤစိၤလီၤထီတဂၤန့ၣ်အတၢ်သးထီၣ်လီၤ.

⁸တၢ်လုၢ်ဟံၣ်ပှဲၤဝဲဒီးမ့ၣ်အူလုၢ်လၢအဟဲလၢကစၢ်ယွၤ အလၤကပီၤဒီးအစိကမီၤ, ဒီးတချုးလၢတၢ်နးတၢ်ဖှီၣ်နွံမံၤလၢအဘၣ်တၢ်ဟဲစိာ် အီၤလၢကလူးနွံဂၤကတၢၢ်ဒံးဘၣ်န့ၣ်, ပှၤလဲၤနုာ်ဆူတၢ်လုၢ်ဟံၣ်အပူၤတသ့ဝဲနီတဂၤ ဘၣ်လီၤ.