Read S'gaw Karen လံာ်လီၣ်ဖျါ 17 Bible Online

လံာ်လီၣ်ဖျါ 17 - S'gaw Karen bible

လံာ်လီၣ်ဖျါ 17

¹တုၤနုၤတစု, ကလူးနွံဂၤလၢအအိၣ်ဒီးသလၢနွံဖျၢၣ်န့ၣ် အကျါတဂၤဟဲဆူယအိၣ်ဒီးစံးဝဲ, “ဟဲ, ဒီးယကဒုးနဲၣ်နၤလၢဃဲသဲမုၣ်မံၤဟူသၣ်ဖျါတဂၤ, ဝ့ၢ်ဖးဒိၣ်တဖျၢၣ်လၢအဘၣ်တၢ်သူၣ်ထီၣ်အီၤဘူးဒီးထံကျိအါဘိန့ၣ်လီၤ. ကဘၣ်တၢ်စံၣ်ညီၣ်အီၤဒ်လဲၣ်န့ၣ်လီၤ.

²ဟီၣ်ခိၣ်အစီၤပၤတဖၣ်မၤကမၣ်မုၣ်ကမၣ်ခွါဒီးအီၤ, ဒီးပှၤဟီၣ်ခိၣ်ဖိတဖၣ်အီမူၤအသးလၢစပံးထံဘၣ်ဃးဒီး အဝဲအလုၢ်အၢလၢ်သီန့ၣ်လီၤ.”

³ယွၤအသးန့ၣ်ပၢၤဃာ်ယၤ, ဒီးကလူးတဂၤန့ၣ်စိာ်ယၤဆူပှၢ်မုၢ် ကနၢလီၤ. ဖဲန့ၣ်ယထံၣ်ဘၣ်ပိာ်မုၣ်တဂၤဆ့ၣ်နီၤလၢတၢ်ဒူတၢ်ဃိၤ အလွဲၢ်ဂီၤတဒုအဖီခိၣ်လီၤ. တၢ်ဒူတၢ်ဃိၤအဝဲန့ၣ်အိၣ်ဒီးမံၤတဖၣ်ဘၣ်ဃးတၢ်ကတိၤတရီ တပါကစၢ်ယွၤအိၣ်ကွဲးအသးပှဲၤလၢအလိၤလီၤ. တၢ်ဒူတၢ်ဃိၤ အဝဲန့ၣ်, အိၣ်ဒီးအခိၣ်နွံဖျၢၣ်ဒီးအနၢၤအဘိတဆံလီၤ.

⁴ပိာ်မုၣ်န့ၣ်ကူသိးဝဲလၢတၢ်အလွဲၢ်လုးတကုာ်ဒီးတၢ်အလွဲၢ်ဂီၤဆှုၣ်ကလာ်, ဒီးကယၢကယဲအသးလၢထူ, လၢၢ်လုၢ်ဒိၣ်ပှ့ၤဒိၣ်ဒီး တၢ်မျၢ်ပလဲတဖၣ်လီၤ. လၢအဝဲဒၣ်အစုပူၤန့ၣ်, ဟံးဃာ်ဝဲလီခီထူတဘ့ၣ်လၢအပှဲၤဒီးတၢ်လီၤသးဘၣ်အၢတကြၢး တဘၣ်တဖၣ်, လၢအအိၣ်ထီၣ်ဝဲခီဖျိအတၢ်အိၣ်မူတဂ့ၤတဝါအဃိ န့ၣ်လီၤ.

⁵လၢအဝဲဒၣ်အခိၣ်တိသၣ်အလိၤန့ၣ်, မံၤတဖျၢၣ်လၢအအိၣ်ဒီးအခီပညီခူသူၣ်အိၣ်ကွဲးအသးဒ်အံၤလီၤ. ဘၤဘူၤလိၣ်ဖးဒိၣ်, ကယဲၢ်ဃဲသဲမုၣ်ဒီးဟီၣ်ခိၣ်အတၢ်လီၤသးဘၣ် အၢခဲလၢာ်အမိၢ်

⁶ဒီးယထံၣ်လၢပိာ်မုၣ်န့ၣ်အီမူၤအသးလၢကစၢ်ယွၤအပှၤဂီၢ်မုၢ်တဖၣ်, ဒီးယ့ၣ်ၡူးအမၤထူရၤတဖၣ်, အသွံၣ်န့ၣ်လီၤ. ဖဲယထံၣ်အီၤန့ၣ်, ယကမၢကမၣ်ယဲဒိၣ်ဒိၣ်အါအါလီၤ.

⁷ကလူးန့ၣ်စံးဘၣ်ယၤ, “ဘၣ်မနုၤအဃိနကမၢကမၣ်လဲၣ်. ယကတဲဘၣ်နၤတၢ်အခီပညီခူသူၣ်ဘၣ်ဃးပိာ်မုၣ်, ဒီးဘၣ်ဃးတၢ်ဒူတၢ်ဃိၤလၢအစိာ်အီၤ, တၢ်ဒူတၢ်ဃိၤလၢအအိၣ်ဒီးခိၣ်နွံဖျၢၣ်ဒီးနၢၤအဘိ တဆံန့ၣ်လီၤ.

⁸တၢ်ဒူတၢ်ဃိၤတဒုန့ၣ်, အိၣ်မူတ့ၢ်ဝဲတဘျီ, ဘၣ်ဆၣ်ဒီး တမူဝဲလၢၤဘၣ်. ဘူးထီၣ်လံလၢအဝဲဒၣ်ကဟဲထီၣ်လၢ တၢ်ပူၤယိာ်, ဒီးကဟးထီၣ်ဝဲဒ်သိးအကဘၣ်တၢ်မၤဟးဂီၤကွံာ်အီၤ အဂီၢ်လီၤ. ပှၤအိၣ်လၢဟီၣ်ခိၣ်ချၢ, လၢအမံၤတအိၣ်ကွဲးအသးလၢလံာ်မူအပူၤတချုးတၢ်တ့လီၤပာ်လီၤ ဟီၣ်ခိၣ်ဒံးဘၣ်တဖၣ်န့ၣ်, ကကမၢကမၣ်မးဝဲကိးဂၤဒဲး, ဖဲအဝဲသ့ၣ်ကွၢ်တၢ်ဒူတၢ်ဃိၤတဒုန့ၣ်လီၤ. တၢ်ဒူတၢ်ဃိၤအံၤ, တဘျီန့ၣ်အိၣ်မူဝဲ, မ့မ့ၢ်ခဲကနံၣ်အံၤတအိၣ်မူဝဲလၢၤဘၣ်. ဘၣ်ဆၣ်ဒီး, အဝဲဒၣ်ကအိၣ်ဖျါထီၣ်ကဒါက့ၤလီၤ.

⁹ဖဲအံၤန့ၣ်, တၢ်ကူၣ်သ့, ဒီးတၢ်နူၤပၢၢ်နၢ်ပၢၢ်အလီၢ်အိၣ်ဝဲ ဒၣ်လီၤ. ခိၣ်နွံဖျၢၣ်မ့ၢ်ဝဲတၢ်လူၢ်နွံဖျၢၣ်လၢပှၤပိာ်မုၣ်တဂၤန့ၣ် ဆ့ၣ်နီၤလၢအလိၤန့ၣ်လီၤ. အဝဲသ့ၣ်မ့ၢ်စ့ၢ်ကီးစီၤပၤနွံဂၤန့ၣ်လီၤ.

¹⁰လၢအဝဲသ့ၣ်အကျါယဲၢ်ဂၤန့ၣ်လီၤတဲာ်ကွံာ်လံဝဲလံ. တဂၤ န့ၣ်ပၢဒံးတၢ်, ဒီးအဂၤတဂၤန့ၣ်တဟဲဒံးဘၣ်. ဖဲအဝဲဒၣ်ဟဲန့ၣ်ကဘၣ်ပၢတၢ်ထဲတစိၢ်ဖိဧိၤလီၤ.

¹¹ဒီးတၢ်ဒူတၢ်ဃိၤလၢအအိၣ်မူတ့ၢ်လံဝဲတဘျီ, ဘၣ်ဆၣ်တအိၣ် မူလၢၤဝဲန့ၣ်, အနီၢ်ကစၢ်ဒၣ်ဝဲမ့ၢ်စီၤပၤဃိးဂၤတဂၤလၢ အမ့ၢ်စီၤပၤနွံဂၤအကျါတဂၤ, ဒီးဟးထီၣ်ကွံာ်ဝဲဒ်သိးအကဘၣ်တၢ်မၤဟးဂီၤကွံာ်အီၤ အဂီၢ်န့ၣ်လီၤ.

¹²နၢၤအဘိတဆံလၢနထံၣ်တ့ၢ်နဲန့ၣ်မ့ၢ်စီၤပၤအဂၤတဆံ, လၢအတစးထီၣ်ပၢတၢ်ဒံးဘၣ်. ဘၣ်ဆၣ်ဒီးကဘၣ်တၢ်ဟ့ၣ်အီၤတၢ်စိတၢ်ကမီၤလၢအကပၢ တၢ်ဒီးတၢ်ဒူတၢ်ဃိၤအဝဲန့ၣ်, ဒ်စီၤပၤတဖၣ်အသိးလၢတနၣ်ရံၣ် အတီၢ်ပူၤလီၤ.

¹³စီၤပၤအဂၤတဆံအံၤ, အဝဲသ့ၣ်ကိးဂၤဒဲးအိၣ်ဒီးတၢ်တိာ်ပာ် တမံၤဃီ, ဒီးအဝဲသ့ၣ်ဟ့ၣ်လီၤကွံာ်အတၢ်ဂံၢ်တၢ်ဘါဒီးတၢ်စိတၢ် ကမီၤဆူတၢ်ဒူတၢ်ဃိၤတဒုန့ၣ်လီၤ.

¹⁴အဝဲသ့ၣ်ကဒုးတၢ်ထီဒါသိဖိတဒုန့ၣ်, ဘၣ်ဆၣ်သိဖိအဝဲန့ၣ်, ဃုာ်ဒီးအပျဲၢ်အဘီၣ်လၢအဘၣ်တၢ်ကိးအီၤ, တၢ်ဃုထၢအီၤ, ဒီးအသးတီဝဲတဖၣ်, ကမၤနၢၤအဝဲသ့ၣ်, မ့ၢ်လၢအဝဲဒၣ်မ့ၢ်ကစၢ်တဖၣ်အကစၢ်ဒီးစီၤပၤတဖၣ်အစီၤပၤ အဃိန့ၣ်လီၤ.”

¹⁵ကလူးန့ၣ်စံးဘၣ်စ့ၢ်ကီးယၤ, “ထံကျိအါဘိလၢနထံၣ်ဘၣ်အီၤ, လၢဃဲသဲမုၣ်ဆ့ၣ်နီၤဝဲလၢအဖီခိၣ်တဖၣ်န့ၣ်မ့ၢ်ဝဲထံကီၢ်တဖၣ်, ပှၤဟီၣ်ခိၣ်ဖိတဖၣ်, ပှၤကလုာ်တဖၣ်, ဒီးကျိာ်လၢအဘၣ်တၢ်ကတိၤအီၤတဖၣ်လီၤ.

¹⁶နၢၤအဘိတဆံလၢနထံၣ်တ့ၢ်နဲဒီးတၢ်ဒူတၢ်ဃိၤတဒုန့ၣ်, ကသးဟ့ဃဲသဲမုၣ်တဂၤန့ၣ်လီၤ. အဝဲသ့ၣ်ကဟံးထီၣ်ကွံာ်တၢ်ခဲလၢာ်ခဲဆ့လၢအအိၣ်ဒီးပိာ်မုၣ် အဝဲန့ၣ်, ဒီးပာ်တ့ၢ်အိၣ်ဘ့ၣ်ဆ့အီၤလီၤ. အဝဲသ့ၣ်ကအီၣ်ကွံာ်ဃဲသဲမုၣ်အဝဲန့ၣ်အညၣ်ဒီးဒွဲၣ်ကွံာ်အီၤ လၢမ့ၣ်အူန့ၣ်လီၤ.

¹⁷အဂ့ၢ်ဒ်အံၤ, ကစၢ်ယွၤပာ်လံတၢ်သးဆူၣ်မၤလၢမၤပှဲၤအဝဲဒၣ်အတၢ်တိာ်ပာ်ခီဖျိအမၤ သကိးတၢ်တပူၤဃီလၢအဝဲသ့ၣ်အသးပူၤ, ဒီးဟ့ၣ်တၢ်ဒူတၢ်ဃိၤတဒုန့ၣ်အဝဲသ့ၣ် အစိကမီၤလၢအကပၢတၢ်တုၤလီၤလၢကစၢ်ယွၤကလုၢ်ကထါ ဟဲလၢထီၣ်ပှဲၤထီၣ်တစုလီၤ.

¹⁸ပိာ်မုၣ်တဂၤလၢနထံၣ်ဘၣ်တ့ၢ်နဲန့ၣ်, မ့ၢ်ဝ့ၢ်ဖးဒိၣ်လၢအပၢဘၣ်ဟီၣ်ခိၣ်အစီၤပၤတဖၣ်လီၤ.”