Read S'gaw Karen လံာ်လီၣ်ဖျါ 18 Bible Online

လံာ်လီၣ်ဖျါ 18 - S'gaw Karen bible

လံာ်လီၣ်ဖျါ 18

¹တၢ်န့ၣ်ဝံၤအလီၢ်ခံ, ယထံၣ်ကလူးအဂၤတဂၤဟဲလီၤလၢမူ ခိၣ်လီၤ. အဝဲဒၣ်အိၣ်ဒီးတၢ်စိဒိၣ်ကမီၤထီ, ဒီးဟီၣ်ခိၣ်ကပြုၢ်ကပြီၤထီၣ်ဝဲဒီဘ့ၣ်ညါ, လၢအတၢ်ကပြုၢ် ကပြီၤအဃိလီၤ.

²အဝဲဒၣ်ကိးထီၣ်လၢအကလုၢ်ဖးဒိၣ်, “လီၤပှီၢ်လံဘၤဘူၤ လိၣ်ဖးဒိၣ်လီၤပှီၢ်လံ. ခဲကနံၣ်အံၤ, အဝဲဒၣ်ဘၣ်တၢ်မၤတံာ်တာ်မၤပျံၤမၤဖုးအီၤလၢတၢ်ဝံတၢ်နါ, ဒီးသးလၢအတကဆှီတဖၣ်, ထိၣ်လၢအဘၣ်အၢဘၣ်သီဒီးအလီၤသးဟ့အကလုာ်ကလုာ် အိၣ်ဝဲဆိးဝဲလၢအပူၤလီၤ.

³အဂ့ၢ်ဒ်အံၤ, ထံကီၢ်ကိးဘ့ၣ်ဒဲးအီတ့ၢ်အဝဲဒၣ်အစပံးထံ, စပံးထံလၢအဆူၣ်ဝဲ, စပံးထံလၢအဘၣ်ဃးဒီးအဝဲအတၢ်ကလုာ်ကလိၤအလုၢ် အၢလၢ်သီန့ၣ်လီၤ. ဟီၣ်ခိၣ်ဒီဘ့ၣ်အစီၤပၤတဖၣ်မၤကမၣ်မုၣ် ကမၣ်ခွါဒီးအီၤဒီးဟီၣ်ခိၣ်အပှၤပနံာ်တၢ်ကၤတၢ်ဖိတဖၣ် ထူးထီၣ်တီၤထီၣ်ဝဲဒၣ်ခီဖျိအဝဲအတၢ်ကလုာ်ကလိၤလၢ အတပၢၤဃာ်ဝဲဘၣ်အဃိန့ၣ်လီၤ.”

⁴တုၤနုၤတစုယနၢ်ဟူတၢ်ကလုၢ်အဂၤတထံၣ်လၢမူခိၣ်န့ၣ်စံးဝဲ, “ဟးထီၣ်ကွံာ်တက့ၢ်, ယပှၤဂီၢ်မုၢ်သ့ၣ်ဧၢ, ဟးထီၣ်ကွံာ်လၢအဝဲဒၣ်အပူၤတက့ၢ်. သုတဘၣ်မၤဘၣ်ထွဲဃုာ်သုသးလၢ အဝဲအတၢ်ဒဲးဘးတဖၣ်ဘၣ်. သုတဘၣ်တူၢ်သကိးအဝဲအတၢ်စံၣ်ညီၣ်ဘၣ်.

⁵အဂ့ၢ်ဒ်အံၤ, အဝဲအတၢ်ဒဲးဘးတဖၣ် အိၣ်ဖှိၣ်ထီၣ်အသးထီတုၤသိးမူခိၣ်, ဒီးကစၢ်ယွၤသ့ၣ်နီၣ်ထီၣ်အဝဲဒၣ် အကျဲအၢကျဲသီတဖၣ်လီၤ.

⁶မၤအီၤလၢတၢ်တမံၤဃီဒ်အဝဲမၤသုအသိးတက့ၢ်. ကယဲၢ်တၢ်လၢအမၤတ့ၢ်ဝဲတဖၣ်န့ၣ်, ဟ့ၣ်ကၣ်က့ၤအီၤခံစးတက့ၢ်. မၤပှဲၤအဝဲဒၣ်အလီခီလၢတၢ်အီလၢအဆူၣ်ဝဲဒၣ် ပှဲၤသိးတၢ်အီလၢအကတဲာ်ကတီၤပာ်ဝဲ လၢသုဂီၢ်န့ၣ်ခံစးတက့ၢ်.

⁷ဟ့ၣ်အီၤတၢ်တူၢ်ဘၣ်တၢ်ဒီးတၢ်သူၣ်အုးသးအုး ပှဲၤသိးသိးတၢ်လၤကပီၤဒီးတၢ်မုာ်တၢ်ပၢၤလၢ အဝဲဟ့ၣ်လီၤက့ၤအသးဒၣ်ဝဲန့ၣ်တက့ၢ်. အဂ့ၢ်ဒ်အံၤ, အဝဲဒၣ်စံးလီၤက့ၤအသးတဘိယူၢ်ဃီ ‘ဖဲအံၤ, ယဆ့ၣ်နီၤယဲဒ်နီၢ်ပၤမုၣ်တဂၤအသိး, ယတမ့ၢ်မုၣ်ကမဲတဂၤဘၣ်. တမ့ၢ်လၢယကသ့ၣ်ညါဘၣ် တၢ်သူၣ်အုးသးအုးနီတစုစုဘၣ်.’

⁸လၢတၢ်တမံၤအံၤအဃိ, လၢတနံၤဃီအတီၢ်ပူၤ, အဝဲဒၣ်ကဘၣ်တၢ်မၤဘၣ်ဒိအီၤလၢ တၢ်သံသတြိာ်တဖၣ်, တၢ်ဆူးတၢ်ဆါ, တၢ်သူၣ်အုးသးအုး, ဒီးတၢ်သၣ်ဝံၤလီၤဒိ ဒီးအဝဲဒၣ်ကဘၣ်တၢ်ဒွဲၣ်အီၤလၢမ့ၣ်အူလီၤ. အဂ့ၢ်ဒ်အံၤ, ကစၢ်ယွၤလၢအစံၣ်ညီၣ်အီၤတဂၤ မ့ၢ်ပှၤလၢအစိဒိၣ်ကမီၤထီတဂၤလီၤ.”

⁹ဟီၣ်ခိၣ်အစီၤပၤလၢအမၤသကိးဝဲအလုၢ်အၢလၢ်သီအတၢ်မၤဒီး အတၢ်ကလုာ်ကလိၤတဖၣ်န့ၣ်, ကဟီၣ်ပသူပသီလၢဝ့ၢ်တဖျၢၣ်အံၤ အဃိ, ဖဲအဝဲသ့ၣ်ထံၣ်ဘၣ်မ့ၣ်အူလၣ်လၢအအီၣ်ကွံာ်အီၤန့ၣ် အလုၢ်ခုၣ်ထီၣ်လီၤ.

¹⁰အဝဲသ့ၣ်အိၣ်ဆၢထၢၣ်ဝဲလၢအယံၤ, အဂ့ၢ်မ့ၢ်လၢအဘၣ်ယိၣ်ဝဲလၢအကတူၢ်ဘၣ်ဃုာ်တၢ်ဒီးအီၤ အဃိလီၤ. အဝဲသ့ၣ်စံးဝဲ, “လီၤပျံၤလီၤဖုးဆံးဒိၣ်လဲၣ်. နးဝဲဖှီၣ်ဝဲဆံးဒိၣ်လဲၣ်. ဝ့ၢ်ဘၤဘူၤလိၣ်လၢအဒိၣ်ဝဲသွါဝဲ ဒီးအဂံၢ်ဆူၣ်ဘါဆူၣ်တဖျၢၣ် အံၤဧၢ, ထဲလၢတနၣ်ရံၣ်အတီၢ်ပူၤနဘၣ်တၢ်စံၣ်ညီၣ်နၤလံ.”

¹¹ဟီၣ်ခိၣ်အပှၤပနံာ်တၢ်ကၤတၢ်ဖိတဖၣ်စ့ၢ်ကီးဟီၣ်လၢအဝဲဒၣ် အဃိ, အဂ့ၢ်မ့ၢ်လၢပှၤတပှ့ၤအဝဲသ့ၣ်အတၢ်ဖိတၢ်လံၤနီတဂၤ လၢၤဘၣ်အဃိန့ၣ်လီၤ.

¹²ထဲပှၤတဂၤဧိၤဒၣ်လဲာ်တပှ့ၤအဝဲသ့ၣ်အထူ, အစ့, လၢၢ်လုၢ်ဒိၣ်ပှ့ၤဒိၣ်တဖၣ်, ဒီးတၢ်မျၢ်ပလဲတဖၣ်, တၢ်ကံးယာ်အလွဲၢ်ဝါ, တၢ်ကံးယာ်အလွဲၢ်လုးတကုာ်, သတိၢ်, ဒီးတၢ်ကံးယာ်အလွဲၢ်ဂီၤ, သ့ၣ်လၢအကၤကိးကလုာ်ဒဲး ဒီးကယဲၢ်မ့ၢ်တၢ်ဖိတၢ်လံၤတမံၤလၢ်လၢ်လၢအဘၣ်တၢ်ဘှီ အီၤလၢကဆီမဲ, ဒီးလၢသ့ၣ်လုၢ်ဒိၣ်ပှ့ၤဒိၣ်, လၢတိၢ်ဘီ, ထး, ဒီးလၢၢ်ဝါ

¹³ဒီးသ့ၣ်ကဒါရၤအဖံး, တၢ်နၢမူမၤဝံၣ်မၤဘဲကသူ, တၢ်နၢမူနၢဆှီ, မူရၣ်ဒီးလီၢ်ဘၣ်, စပံးထံဒီးသိ, ကိၣ်ကမူၣ်ဒီးဘုကၠူၣ်, ကျီၢ်, ဒီးသိတဖၣ်, ကသ့ၣ်တဖၣ်ဒီးလ့ၣ်ကဟၣ်တဖၣ်, ကုၢ်တဖၣ်, ဒီးပှၤကညီအသးသမူတဖၣ်ဒၣ်လဲာ်န့ၣ်လီၤ.

¹⁴ပှၤပနံာ်တၢ်ကၤတၢ်ဖိတဖၣ်စံးဘၣ်အီၤ, “ကယဲၢ်မ့ၢ်တၢ်အဂ့ၤအဘၣ်တမံၤလၢ်လၢ်လၢနဆၢဒိးန့ၢ်ဘၣ်နဲ တဖၣ်ဟါမၢ်ကွံာ်ခဲလၢာ်လံ, ဒီးကယဲၢ်နတၢ်လုၢ်ဒိၣ်ပှ့ၤဒိၣ်, ဒီးတၢ်အိၣ်ဖျါလၢအအိၣ်ဒီးအလၤကပီၤတဖၣ်လီၤမၢ်ကွံာ် ခဲလၢာ်လံ, ဒီးနတထံၣ်န့ၢ်လၢၤအဝဲသ့ၣ်နီတစုလၢၤဘၣ်.”

¹⁵ပှၤပနံာ်တၢ်ကၤတၢ်ဖိလၢအထူးထီၣ်တီၤထီၣ်ခီဖျိအဖံး တၢ်မၤတၢ်ဖဲဝ့ၢ်တဖျၢၣ်န့ၣ်အပူၤတဖၣ်န့ၣ်, ကအိၣ်ဆၢထၢၣ် စီၤစိဝဲလၢအယံၤ, အဂ့ၢ်မ့ၢ်လၢအဝဲသ့ၣ်ဘၣ်ယိၣ်လၢအကတူၢ်ဘၣ်ဃုာ်တၢ်ဒီးအီၤ အဃိန့ၣ်လီၤ. အဝဲသ့ၣ်ကဟီၣ်ဒီးသူၣ်အုးသးအုးလၢအဃိ

¹⁶ဒီးစံးဝဲ, “လီၤပျံၤလီၤဖုးဆံးဒိၣ်လဲၣ်. လၢဝ့ၢ်ဖးဒိၣ်တဖျၢၣ်အံၤအဂီၢ်, နးဝဲဖှီၣ်ဝဲဆံးဒိၣ်လဲၣ်. ဝ့ၢ်တဖျၢၣ်အံၤညီနုၢ်ကူသိးလၢတၢ်ကံးယာ် အလွဲၢ်ဝါ, တၢ်ကံးယာ်အလွဲၢ်လုးတကုာ်, ဒီးတၢ်ကံးယာ် အလွဲၢ်ဂီၤ, ဒီးကယၢကယဲအသးလၢထူ, လၢၢ်လုၢ်ဒိၣ်ပှ့ၤဒိၣ် တဖၣ်, ဒီးတၢ်မျၢ်ပလဲတဖၣ်လီၤ.

¹⁷ဒီးလၢတနၣ်ရံၣ်အတီၢ်ပူၤ, ကယဲၢ်အတၢ်လုၢ်ဒိၣ်ပှ့ၤဒိၣ်တဖၣ်အံၤလီၤမၢ်ကွံာ်န့ၢ်အီၤခဲလၢာ်လံ.” ဒီးကယဲၢ်ကဘီခိၣ်, ဒီးပှၤဒိးတၢ်ဖိ, ဒီးကဘီဖိ, ဒီးပှၤအဂၤခဲလၢာ်လၢအလုၢ်အီၣ်အသးသမူခီဖျိတၢ်လဲၤ တၢ်က့ၤလၢပီၣ်လဲၣ်ပူၤတဖၣ်အိၣ်ဆၢထၢၣ်စီၤစိဝဲဒၣ်လၢ အယံၤ,

¹⁸ဒီးကိးထီၣ်ဝဲဒၣ်ဖဲအဝဲသ့ၣ်ထံၣ်ဘၣ်မ့ၣ်အူလုၢ်လၢအဟဲ ထီၣ်လၢမ့ၣ်အူလၣ်လၢအအီၣ်ကွံာ်အီၤန့ၣ်, “ဝ့ၢ်အဂၤတဖျၢၣ်လၢအလီၤဂာ်ဒီးဝ့ၢ်ဖးဒိၣ်တဖျၢၣ်အံၤ, တအိၣ်ဒံးဝဲနီတစုဘၣ်.”

¹⁹အဝဲသ့ၣ်ဖှံဖၣ်ဆါလၢအခိၣ်အလိၤ, ဟီၣ်ဝဲယၢၤဝဲ, ဒီးသူၣ်အုးသးအုးဒီးစံးဝဲ, “လီၤပျံၤလီၤဖုးဆံးဒိၣ်လဲၣ်. လၢဝ့ၢ်ဖးဒိၣ်တဖျၢၣ်အံၤအဂီၢ်နးဝဲဖှီၣ်ဝဲဆံးဒိၣ်လဲၣ်. အဝဲဒၣ်မ့ၢ်ဝ့ၢ်တဖျၢၣ်ဖဲကဘီကစၢ်လဲၤထီၣ်က့ၤလီၤလၢပီၣ်လဲၣ် ပူၤတဖၣ်ထူးထီၣ်တီၤထီၣ်လၢဝ့ၢ်အံၤအတၢ်လုၢ်ဒိၣ်ပှ့ၤဒိၣ် အဃိလီၤ. ဒီးလၢတနၣ်ရံၣ်အတီၢ်ပူၤတၢ်ခဲလၢာ်လီၤမၢ်ကွံာ်န့ၢ် အီၤလံ.”

²⁰သးခုလၢအဝဲဒၣ်အတၢ်ဟးဂီၤကွံာ်အဃိတက့ၢ်. မူခိၣ်ဧၢ, သးခုတက့ၢ်, ကစၢ်ယွၤအပှၤဂီၢ်မုၢ်ဒီးတၢ်မၢဖိဒီးဝံသ့ၣ်တဖၣ်ဧၢ, အဂ့ၢ်ဒ်အံၤ, ကစၢ်ယွၤစံၣ်ညီၣ်ဃၣ်လံအီၤလၢတၢ်လၢ အမၤတ့ၢ်သုန့ၣ်အဃိလံ.

²¹တုၤနုၤတစုကလူးလၢအဂံၢ်ဆူၣ်ဘါဆူၣ်တဂၤဟံးထီၣ်လၢၢ်လၢ အဒိၣ်ထဲသိးဆၢၣ်ဂူာ်လၢၢ်တဖျၢၣ်, ဒီးကွံာ်လီၤအီၤဆူပီၣ်လဲၣ် အပူၤ, ဒီးစံးဝဲ, “လၢကျဲဒ်အံၤအပူၤ, ဝ့ၢ်ဖးဒိၣ်ဘၤဘူၤလိၣ် ကဘၣ်တၢ်တ့ၢ်လီၤအီၤဆူၣ်ဆူၣ်ကလဲာ်, ဒီးတၢ်တထံၣ်န့ၢ်အီၤနီတစုလၢၤဘၣ်လီၤ.

²²တၢ်သူၣ်ဝံၣ်သးဆၢလၢအဟဲသီၣ်ထီၣ်လၢတနၢ်, ဒီးပှၤအကလုၢ်, ပှၤအူပံဒီးကွဲၤတဖၣ်, တဘၣ်တၢ်နၢ်ဟူအီၤလၢနပူၤနီတစုလၢၤဘၣ်. ပှၤမၤတၢ်ဖိ, ဘၣ်ဃးဒီးတၢ်မၤတကလုာ်ဂ့ၤတကလုာ်ဂ့ၤတဘၣ်တၢ်ထံၣ်န့ၢ်အီၤလၢ နပူၤနီတစုလၢၤဘၣ်. ဒီးဆၢၣ်ဂူာ်လၢၢ်အသီၣ်တဘၣ်တၢ်နၢ်ဟူအီၤနီတစုလၢၤဘၣ်.

²³မ့ၣ်အူဒၢအတၢ်ကပီၤတဘၣ်တၢ်ထံၣ်န့ၢ်အီၤလၢနပူၤနီ တစုလၢၤဘၣ်. တလးမူးပိာ်မုၣ်ဒီးတလးမူးပိာ်ခွါတဖၣ်အကလုၢ် တဘၣ်တၢ်နၢ်ဟူအီၤလၢနပူၤနီတစုလၢၤဘၣ်. နပှၤပနံာ်တၢ်ကၤတၢ်ဖိတဖၣ်မ့ၢ်တ့ၢ်ပှၤအိၣ်ဒီးအစိအကမီၤ အဒိၣ်ကတၢၢ်လၢဟီၣ်ခိၣ်ဒီဘ့ၣ်ညါ, ဒီးခီဖျိနတၢ်မၤကဒါမဲာ် ကဘျံးကဘျၣ်န့ၣ်, နလီန့ၢ်ပှၤဟီၣ်ခိၣ်ဖိလၢဟီၣ်ခိၣ်ချၢခဲလၢာ်လီၤ.”

²⁴ဝ့ၢ်ဘၤဘူၤလိၣ်ဘၣ်တၢ်စံၣ်ညီၣ်အီၤ, အဂ့ၢ်မ့ၢ်လၢဝံဒီးကစၢ်ယွၤအပှၤဂီၢ်မုၢ်တဖၣ်အသွံၣ်ဘၣ်တၢ်ထံၣ် န့ၢ်အီၤလၢဝ့ၢ်န့ၣ်အပူၤအဃိလီၤ. မ့ၢ်စဲဃဲၤလီၤ, မ့ၢ်ကယဲၢ်ပှၤလၢအဘၣ်တၢ်မၤသံတ့ၢ်အီၤလၢဟီၣ်ခိၣ်ချၢ တဖၣ်အသွံၣ်ဘၣ်တၢ်ထံၣ်န့ၢ်အီၤလၢဝ့ၢ်တဖျၢၣ်န့ၣ်အပူၤ အဃိလီၤ.