Read S'gaw Karen လံာ်လီၣ်ဖျါ 9 Bible Online

လံာ်လီၣ်ဖျါ 9 - S'gaw Karen bible

လံာ်လီၣ်ဖျါ 9

¹တၢ်န့ၣ်ဝံၤအလီၢ်ခံ, ကလူးယဲၢ်ဂၤတဂၤအူထီၣ်အကွဲၤ လီၤ. ယထံၣ်ဆၣ်တဖျၢၣ်လၢအဟဲလီၤတဲာ်ဆူဟီၣ်ခိၣ်, ဒီးဘၣ်တၢ်ဟ့ၣ်အီၤတၢ်ပူၤယိာ်အနီၣ်ဝံာ်လီၤ.

²ဆၣ်တဖျၢၣ်န့ၣ်အိးထီၣ်တၢ်ပူၤယိာ်, ဒီးမ့ၣ်အူလုၢ်ဟဲဖျိးထီၣ်ဒ်မ့ၣ်အူအလုၢ်ဟဲထီၣ်လၢ ဖၣ်ကပူၤဖးဒိၣ်တဖျၢၣ်အပူၤအသိးန့ၣ်လီၤ. မုၢ်အတၢ်ကပီၤဒီးတၢ်ဖးဖီခံးလီၤဝဲလၢမ့ၣ်အူလုၢ်လၢ အဟဲဖျိးထီၣ်လၢတၢ်ပူၤယိာ်အဃိန့ၣ်လီၤ.

³ဒွဲၣ်တဖၣ်ဟဲထီၣ်လၢမ့ၣ်အူလၣ်အကျါဆူဟီၣ်ခိၣ်လိၤဒီး အဝဲသ့ၣ်ဘၣ်တၢ်ဟ့ၣ်အီၤတၢ်စိကမီၤတမံၤဃီလၢအအိၣ်ဒီး ပတ့ၤချဲးတဖၣ်န့ၣ်လီၤ.

⁴အဝဲသ့ၣ်ဘၣ်တၢ်မၤလိာ်ပာ်အီၤလၢအသုတမၤဘၣ်ဒိတပံၢ် တမါမ့ၢ်ဂ့ၤသ့ၣ်တဖၣ်မ့ၢ်ဂ့ၤ, တၢ်မုၢ်တၢ်ဘိအဂၤမ့ၢ်ဂ့ၤနီတမံၤ တဂ့ၤန့ၣ်လီၤ. အဝဲသ့ၣ်ကဘၣ်မၤဆူးမၤဆါထဲပှၤလၢအတအိၣ်ဒီးတၢ်ပနီၣ် ဘၣ်ဃးကစၢ်ယွၤအတၢ်စဲပနီၣ်ဃာ်လၢအခိၣ်တိသၣ်အလိၤ တဖၣ်န့ၣ်လီၤ.

⁵တၢ်တဟ့ၣ်ဒွဲၣ်တဖၣ်န့ၣ်အခွဲးလၢအကမၤသံပှၤသ့ၣ်တဖၣ် န့ၣ်ဘၣ်. မ့မ့ၢ်, ကဘၣ်မၤဆူးမၤဆါဒၣ်အီၤနးနးကလဲာ်လၢယဲၢ်လါ အတီၢ်ပူၤလီၤ. တၢ်မၤဆူးမၤဆါတၢ်နးနးကလဲာ်တမံၤ အံၤဆါဝဲဒ်သိးပတ့ၤချဲးဆဲးပှၤဆါအသိးန့ၣ်လီၤ.

⁶ဖဲတၢ်ယဲၢ်လါအဆၢကတီၢ်အဝဲအံၤန့ၣ်, အဝဲသ့ၣ်ကဃုတၢ်သံဘၣ်ဆၣ်တထံၣ်န့ၢ်ဘၣ်အီၤဘၣ်, အဝဲသ့ၣ်ကအဲၣ်ဒိးသံဘၣ်ဆၣ်ဒီးတၢ်သံကဃ့ၢ်ကွံာ်လၢ အဝဲသ့ၣ်အအိၣ်လီၤ.

⁷ဒွဲၣ်သ့ၣ်တဖၣ်န့ၣ်လီၤဂာ်ဒီးကသ့ၣ်တဖၣ်လၢအအိၣ်ကတဲာ် ကတီၤအသးလၢတၢ်ဒုးသုးအဂီၢ်လီၤ. လၢအဝဲသ့ၣ်တဖၣ်အခိၣ် လိၤန့ၣ်, အိၣ်ဒီးတၢ်လၢအလီၤဂာ်ဒီးခိၣ်သလုးထူတဖၣ်, ဒီးအဝဲသ့ၣ်အမဲာ်သၣ်တဖၣ်လီၤဂာ်လၢပှၤကညီအမဲာ်သၣ် န့ၣ်လီၤ.

⁸အဝဲသ့ၣ်အခိၣ်သူလီၤဂာ်ပှၤပိာ်မုၣ်တဖၣ်အခိၣ်သူ, အမဲတဖၣ်လီၤဂာ်ဒ်ခ့ယုၢ်တဖၣ်အမဲန့ၣ်လီၤ.

⁹အဝဲသ့ၣ်အသးနါပှၢ်ဘၣ်တၢ်မၤဘၢဃာ်အီၤလၢတၢ်လၢ အလီၤဂာ်ဒီးသဃိးထး, ဒီးတၢ်သီၣ်တၢ်သဲလၢအဘၣ်တၢ်ဒုးအိၣ်ထီၣ်အီၤလၢအဒံးဆ့ တဖၣ်န့ၣ်လီၤဂာ်ဒီးကသ့ၣ်လ့ၣ်ကဟၣ်ဒုးသုးလၢအသဖှိဃီၤဆူ တၢ်ဒုးသုးပူၤတဖၣ်အသီၣ်န့ၣ်လီၤ.

¹⁰အဝဲသ့ၣ်အိၣ်ဒီးအမဲၢ်တဖၣ်ဒီးဆဲးတၢ်ဒ်ပတ့ၤချဲးဆဲးတၢ်အသိး, ဒီးခီဖျိအမဲၢ်တဖၣ်န့ၣ်, အဝဲသ့ၣ်အိၣ်ဒီးတၢ်စိကမီၤလၢ အကမၤဆူးမၤဆါပှၤကညီလၢယဲၢ်လါအတီၢ်ပူၤလီၤ.

¹¹အဝဲသ့ၣ်အိၣ်ဒီးအစီၤပၤလၢအပၢအီၤတဂၤ, လၢအမ့ၢ်ကလူးလၢအပၢဘၣ်တၢ်ပူၤယိာ်တဂၤန့ၣ်လီၤ. အဝဲဒၣ်အမံၤလၢဧ့ၤဘြံၤ အကျိာ်န့ၣ်မ့ၢ်ဝဲအဘးဒိၣ်, လၢကြံးခ်အကျိာ်တခီအမံၤမ့ၢ်ဝဲအပီးလူၣ် (အခီပညီ မ့ၢ်ဝဲပှၤမၤဟးဂီၤတၢ်ဖိ) လီၤ.

¹²တၢ်နးတၢ်ဖှီၣ်တၢတခါန့ၣ်မၤအသးဝံၤဝဲလံ. အဝဲအံၤဝံၤ အလီၢ်ခံန့ၣ်, တၢ်နးတၢ်ဖှီၣ်လၢအကမၤအသးအိၣ်ဒံးဝဲခံမံၤလီၤ.

¹³တုၤနုၤတစုကလူးဃုဂၤတဂၤအူထီၣ်အကွဲၤလီၤ. ယနၢ်ဟူတၢ်ကလုၢ်သီၣ်ထီၣ်လၢတၢ်လုၢ်လီၢ်ထူအနၢၤလွံၢ်ဘိလၢ အအိၣ်ဆၢထၢၣ်လၢကစၢ်ယွၤအမဲာ်ညါန့ၣ်လီၤ.

¹⁴တၢ်ကလုၢ်စံးဘၣ်ကလူးဃုဂၤတဂၤန့ၣ် “ပျၢ်လီၤကွံာ်ကလူးလွံၢ်ဂၤလၢအဘၣ်တၢ်စၢဃာ်အီၤဖဲထံကျိ ဖးဒိၣ်ဖရၤသးန့ၣ်တက့ၢ်.”

¹⁵ကလူးလွံၢ်ဂၤန့ၣ်, ဘၣ်တၢ်ပျၢ်လီၤကွံာ်အီၤလီၤ. အဝဲသ့ၣ်ဘၣ်တၢ်ကတဲာ်ကတီၤပာ်အီၤလီၤဆီဒၣ်တၢ်လၢနၣ်ရံၣ်အံၤ, နံၤသီ, လါဒီးနံၣ်အံၤအဂီၢ်, ဒ်သိးအကမၤသံကွံာ်ပှၤဟီၣ်ခိၣ်ဖိ သၢပူတပူန့ၣ်လီၤ.

¹⁶ယဘၣ်တၢ်စံးဘၣ်တဲဘၣ်ယၤလၢကသ့ၣ်သုးဖိအနီၣ်ဂံၢ်လီၤ. အဝဲန့ၣ်မ့ၢ်အကကွဲၢ်ခံကယၤလီၤ.

¹⁷ဒီးလၢယတၢ်ထံၣ်တၢ်လၢညါခီအပူၤန့ၣ်ယထံၣ်ဘၣ်ကသ့ၣ် တဖၣ်, ဒီးပှၤလၢအဒိးအီၤတဖၣ်လီၤ. အဝဲသ့ၣ်အိၣ်ဒီးသဃိးတဖၣ်လၢအဂီၤဝဲဒ်မ့ၣ်အူအသိး, လါအဲးဝဲဒ်တၢ်မျၢ်နံၤလါ, ဒီးဘီဝဲဒ်ကးကမူၣ်အသိးန့ၣ်လီၤ. ကသ့ၣ်တဖၣ်အခိၣ်လီၤဂာ်ဒ်ခ့ယုၢ်အခိၣ်, ဒီးလၢအဝဲသ့ၣ် တဖၣ်အကိာ်ပူၤန့ၣ်, မ့ၣ်အူ, တၢ်အလုၢ်ခုၣ်ဒီးကးကမူၣ် ဟဲဖျိးထီၣ်ဝဲဒၣ်လီၤ.

¹⁸ပှၤဟီၣ်ခိၣ်ဖိသၢပူတပူသံကွံာ်ဝဲဒၣ်လၢတၢ်သံသတြိာ် သၢမံၤအံၤအဃိ, မ့ၣ်အူ, တၢ်အလုၢ်ခုၣ်, ဒီးကးကမူၣ်တဖၣ်လၢအဟဲဖျိးထီၣ်လၢကသ့ၣ်တဖၣ်အကိာ်ပူၤ အဃိန့ၣ်လီၤ.

¹⁹အဂ့ၢ်ဒ်အံၤ, ကသ့ၣ်တဖၣ်အစိကမီၤအိၣ်ဝဲဒၣ်လၢအဝဲသ့ၣ် အကိာ်ပူၤဒီးလၢအမဲၢ်အပူၤစ့ၢ်ကီးန့ၣ်လီၤ. အဝဲသ့ၣ်အမဲၢ်တဖၣ်မၤအသးဒ်ဂုၢ်သ့ၣ်လၢအအိၣ်ဒီးအခိၣ် တဖၣ်, ဒီးအဝဲသ့ၣ်သူအီၤလၢအကမၤဆူးမၤဆါပှၤကညီ တဖၣ်အဂီၢ်လီၤ.

²⁰ပှၤဟီၣ်ခိၣ်ဖိလၢအအိၣ်လီၤတဲာ်တ့ၢ်တဖၣ်ဒီးကယဲၢ်ပှၤလၢ အတဘၣ်တၢ်မၤသံအီၤလၢတၢ်သံသတြိာ်တဖၣ်န့ၣ်, တပီၢ်ယၢ်လီၤအသးလၢတၢ်လၢအဝဲသ့ၣ်အနီၢ်ကစၢ်ဒၣ်ဝဲမၤတ့ၢ်ဝဲ တဖၣ်အဃိန့ၣ်ဘၣ်. အဝဲသ့ၣ်တဆိကတီၢ်ကွံာ်အတၢ်ဘူၣ်ထီၣ် ဘါထီၣ်တၢ်ဝံတၢ်နါတဖၣ်မ့ၢ်ဂ့ၤ, တၢ်ဂီၤထူ, တၢ်ဂီၤစ့, တၢ်ဂီၤတိၢ်, တၢ်ဂီၤလၢၢ်, တၢ်ဂီၤသ့ၣ်လၢအထံၣ်တၢ်တသ့, အနၢ်ဟူတၢ်တသ့, ဟးတသ့တဖၣ်မ့ၢ်ဂ့ၤန့ၣ်ဘၣ်.

²¹ဒ်န့ၣ်အသိး, အဝဲသ့ၣ်တပီၢ်ယၢ်လီၤအသးလၢအတၢ်မၤသံမၤဝီတၢ် အဃိမ့ၢ်ဂ့ၤ, အတၢ်ဟိၣ်တၢ်ယီအဃိမ့ၢ်ဂ့ၤ, အတၢ်မၤကမၣ်မုၣ်ကမၣ်ခွါအဃိမ့ၢ်ဂ့ၤ, ဒီးအတၢ်ဟုၣ်တၢ်ဘျၣ်တၢ်အဃိမ့ၢ်ဂ့ၤန့ၣ်ဘၣ်.